Te Akaope Anga o “te Buka Tamaki a Iehova Ra”

“I tuatuaiaʼi i roto i te buka tamaki a Iehova ra.”​—NUMERO 21:14.

1, 2. No teea atianga i taito ra i akakite ei a Iehova ki to Aiphiti e e Atua toa aia no te tamaki, e i akapeea tana rave anga i te reira?

E MEANGITI ua te manako arikiia e te au tangata o teia tuatau nei e ko te Atua o te Puka Tapu, koia a Iehova, e toa tamaki aia, e peretana maroiroi no te tamaki. Kua akakite nukuia mai teia i tana akaora anga i tona iti tangata i taito ra i te takingakino anga i Aiphiti. Kua akakeuia a Pharao e te enemi akara koreia o taua iti tangata ra, koia a Satani te Tiaporo, kia tamata e taangaanga ia ratou kia mate atu. I reira, i tona kite anga e ka ngere aia me ka tuku atu kia aere ua to Iseraela ra, kua arumaki atura a Pharao e tona nuku vaeau ia ratou.

² Inara, kare a Pharao i kite e ka rauka i te Atua o to Iseraela kia akariro ei Atua toa aia no te tamaki ei akaora i Tona iti tangata. I te arumaki atu anga taua nuku o Aiphiti ra na roto i te ngai maro o te Tai Muramura ra, kua rave te Atua o to Iseraela tei roto ra i te tu kino, kua tamaremo atura i te aronga akaoro kariota e te aronga akaoro oroenua katoa, na te tuku anga, kia tapokiia e te au vai tei akapukeia ra, ki rungao i te mataara no te aere anga e orai tei akatuera semeioia ra no to Iseraela.​—Exodo 14:14, 24-28.

3. I ta ratou imene no te autu anga, eaa te tu Atua ta to Iseraela i akatutu maira ia Iehova, inara eaa te tika te manako kore uaia ra e to te pa enua ravarai i teia tuatau?

³ I te ora anga i te pae itinga ra o te Tai Muramura ra, kua imene to Iseraela tei autu ra, i te imene, akateitei anga i to ratou Akaora i te rangi ra: “E tuku ana iaku kia imene kia Iehova, i te mea kua akateitei maataia aia. Te oroenua e tona akaoro kua uri aia ki roto i te tai. Ko Ia toku ririnui e toku maroiroi, i te mea koia toku ora. Koia toku Atua, ka akapaapaa au iaia; ko te Atua toku metua, e ka akateitei rava au iaia ki runga. E peretana toa a Iehova i te tamaki. Ko Iehova tona ingoa. Kua uri aia i to Pharao au kariota e tona au nuku vaeau ki roto i te tai, e tona au tumutoa ikiia ra kua maremo i te Tai Muramura.” (Exodo 15:1-4, NW) Kua akaari a Iehova i te Tai Muramura ra, e koia uaorai te toa e raukai te rave i te au angaanga tuke roa. Kua manako kore ua to te pa enua o teianei ao i teia tika.

4, 5. No roto mai i teea tupuna taua 12 kopu rekareka o Iseraela ra, e riro maira aia ei oa noai, e no teea tu nona ra?

⁴ Kua tuatua te peroveta ko Mose nana ra i taki i te imene akauruia, e ko Iehova “ko te Atua toku metua.” Ko te Epera ra ko Aberahama tetai tupuna meitaki roa o te iti tangata Iseraela ra. Mei iaia mai, na roto ia Isaaka e Iakoba e nga tamaroa 12 a Iakoba, i tumuia mai ei te 12 kopu o Iseraela ra. Kua akakite papu a Aberahama iaia uaorai ei tangata akamori tau tikai no te Atua no Iehova. E tangata akarongo maroiroi aia mei teia, e i to Iehova kapiki anga iaia kia akaruke i tona kainga i Ura o te au Kaledea ra, kua ekoko kore aia i te aere atu ki te enua ta Iehova ka akaari atu kiaia, ma te papu tona manako e ka akono te Atua i Tana taputou kia oronga atu i te reira nona e tona uanga.

⁵ No te maata te akarongo o Aberahama, kua taputou a Iehova kia oronga i tetai “uanga,” me kare anaunga, e nana e akameitaki ei te au kopu tangata ravarai o te enua nei ia ratou uaorai, e kapiti katoa te au kopu tangata o teia tuatau nei. (Genese 12:2, 3; 22:17, 18) Kua raveia mai a Aberahama ki roto i teia pirianga vaitata ma tona Atua e kua matauia aia ei “oa no Iehova,” na te Atua uaorai i karanga i taua pateriareka tiratiratu ra e ko “toku oa.”​—Iakobo 2:23, NW; Isaia 41:8.

6. Noatu rai e e tangata au ua aia i te ori aere anga i te Enua Taputouia ra, i akapeea a Aberahama i te akapapu anga iaia uaorai e ei tangata tamaki ma te irinaki anga ia Iehova ra?

⁶ Noatu rai i ori aere a Aberahama mei te manene rai i te Enua Taputouia ra, kua akapapu maira Aberahama e ka rauka iaia i te rave ei tangata tamaki, ei toa oki. I tetai atianga e a ariki no vao mai, tei aere atu e aru i te Enua Taputouia ra e kua oro atu ma te tamaiti ka akatamariki a Aberahama koia a Lota e te anau katoa a Lota. Kua akakeuia a Aberahama e tona pirianga ketaketa ma tona kopu tangata, kua akapapa e 318 o tana au tavini tane ei nuku tamaki, e kapiti katoaia maira tona nga oa no tera ngai, ko Anera, ko Esekola, e Mamera, e kua arumaki atura aia i taua aronga keia ra. E kua tamaki poitirere atura ia ratou i te po, kua ta roa atura a Aberahama e tona nuku i taua aronga rave kino ra, noatu rai e e maata roa atu to ratou nuku. Tupu atura te “tainga anga i te au ariki ra” i reira. (Ebera 7:1; Genese 14:13-17) Kua akaora maira Aberahama ia Lota e tona ngutuare tangata ma ta ratou apinga ravarai i keiaia ra.

7-9. (a) Koai te taunga ta Aberahama i aere e aravei, e eaa te akameitakianga tei rauka iaia? (e) I akapeea ta Aberahama akaari anga e i inangaro aia na te Atua Teitei Rava anake aia e akariro kia apinganui? (ng) Mei tei akapapuia e Melekizedeka ra, naai i oronga kia autu a Aberahama i te tamaki ra?

⁷ Kua kite a Aberahama e kua puapinga tona vaeau no tei tauturuia e te Atua ko Iehova, e i tona oki anga autu mai ki tona kainga kua rauka iaia i te akakite ki te ngai tangata i te reira tika. Kua kite oki aia e ko te ngai o te taunga tei marekaia e te Atua ra ko te oire ia o Salema. No reira kua aere atura aia ki te reira oire. Te akakite maira te tuanga openga o Genese pene 14 kia tatou eaa tei tupu i reira:

⁸ “E kua apai atura oki te ariki o Salema, ko Melekizedeka, i te areto e te wina: e taunga oki aia na te Atua teitei. Kua akameitaki atura aia iaia, na ko atura, Kia akameitakiiā Aberama e te Atua teitei, te Pu o te rangi e te enua nei: E kia akameitakiia oki te Atua teitei, ko tei tuku mai i toou au enemi ki toou rima na. Kua tuku mairā Aberama i te ngauru i taua au apinga katoa ra nona. E kua karanga atura taua ariki o Sodoma ra kia Aberama, E tuku mai te au tangata kiaku nei, e tāpu atu i te apinga ra noou uaorai. E kua tuatua mairā Aberama ki taua ariki o Sodoma ra, Kua taputou au ki te Atua teitei ra, kia Iehova, ki te Pu o te rangi e te enua nei, Kare au e rave ua atu i tetai manga taura iti i te apinga ravarai naau na, e tae ua atu ki tetai taura itiki tamaka ra, ko te tuatua aea oki koe, E apinga maata ta Aberama iaku: Mari ra i tei keingaia e te au tangata ou nei, e te tuanga a te au tangata ou nei, e te tuanga a te au tangata i aere katoa ra, ta Anera, ta Esekola, e ta Mamera; ka rave ratou i ta ratou tuanga.”​—Genese 14:18-24.

⁹ Mei tei akaariia maira e teia nga irava, kua akapapu a Melekizedeka, koia te ariki taunga o te oire o Salema ra, i to Aberahama manako papu e na te Atua teitei i tamaki nona e tona vaeau e kua oronga i te autu anga kiaia. Kare rava te Ariki Taunga koia a Melekizedeka i rave ke i tetai tuanga na Iehova ra i te reira.

Te Puka no ta Iehova au Tamaki

10. Eaa te tuatua anga mua i te Puka Tapu no te tamaki anga, e eaa i tau ei e ko te akamata ua anga te reira o ta Iehova au tamaki autu anga?

¹⁰ Te akatakaanga ia Genese 14 i te aru anga i te Enua Taputouia ra e to Aberahama autu anga i te nuku keia ra, ko te taiku anga mua ia no te tamakianga ki roto i te au Tuatua Tapu ra. No reira e tere atu i te a anere mataiti i mua ake i tana tamate anga i te Tai Muramura ra, kua akaari ke ana a Iehova iaia uaorai ei peretana toa, “E peretana toa . . . i te tamaki.” Inara, ko te akamata anga anake te reira. E maata roa atu e e tere roa atu te autu anga te ka aru mai, kapiti katoa oki i te mea openga a teia “openga o te akatereanga o te au mea nei.”​—Mataio 24:3, NW.

11. Eaa “te buka Tamaki a Iehova ra,” inara teiea atu etai au tataanga maata no tana au ravenga tamaki?

¹¹ Kia tau ki tei tuatuaia ia Numero 21:14, e “buka tamaki a Iehova” tetai tei tataia. Ko teia tata anga tika me kare tuatua enua, no te au tamaki a te Atua no tona iti tangata, penei kua akamataia mai i teia tamaki anga na Aberahama tiratiratu ra. Kua kite a Mose i teia puka inara kare aia i oronga mai i tetai tata anga no te reira. No reira, kare i akakiteia mai kia tatou te au mataara katoa ta Iehova i akono iaia uaorai e toa tamaki i te tuatau tei o atu ki roto i te reira puka o te au Tamaki a Iehova ra. Inara, no muri mai i te taiku anga i te reira puka, i tataiaʼi te maata anga o te Puka Tapu, e e maata te tataanga ta te reira i oronga mai kia tatou no ta Iehova au ravenga i te tamaki anga.

E Toa​—Te Melekizedeka Maata Ra

12. I akatutu mai a Melekizedeka i teea Akaaere maata a te Atua Teitei Rava, e ko teea salamo tei akapapaia e Davida tei tataia kiaia ei taunga e ei toa tamaki?

¹² I muri mai i to Aberahama autu anga ia Kedalaoma e tona au taeake ariki ra, kua akameitaki a Melekizedeka iaia. Kua akatutu totou maira te Ariki Taunga ko Melekizedeka i Tei tau kia riro ei Taunga Maata no te Atua Teitei Rava e pera katoa te toa ririnui tei turuia e te Atua Ngateitei Rava. Kua tataia a Salamo 110 e te ariki toa koia a Davida i raro ake i te akauru anga a te vaerua, ki Tei maata atu ia Melekizedeka o Salema ra kua na ko maira: “Na Iehova e tuku atu te tokotoko o toou ririnui mei Ziona atu, i te na ko anga: ‘E akavi koe i rotopu i toou au enemi.’ Kua taputou a Iehova (e kare aia e tataraara): ‘E taunga koe e tuatau ua atu, mei ia Melekizedeka te tu!’ Na Iehova uaorai i to rima katau ra, e ta i te ui ariki kia pueurikiriki i te ra o tona riri anga.”​—Salamo 110:2, 4, 5, NW.

13. Ia Ebera 7 e te 8, koai tei akatakaia mai e ko Tei maata atu ia Melekizedeka i taito ra, e i tomo atu Aia ki teea ngai teitei ma teea tu atinga ra?

¹³ Na te tata akauruia i te puka Ebera ra i akakite mai i te akataka anga i Tei tataia atura taua au tuatua ra i tana tuatua anga: “I te ngai i tomokia e to tatou momua, e Iesu, ko tei akariroia ei taunga maata e tuatau ua atu, mei ia Melekizedeka ra.” (Ebera 6:20) I te pene aru mai o Ebera ra kua akatakaia to Melekizedeka i taito ra tu maata. Inara kua tere atu i tona tu maata ei taunga, to Tei akaataia maira e ia, koia oki a Iesu Mesia akakakaia ra, tei akatuakaouia maira, ko tei tomo atu ki mua i te aroaro tapu o te Atua ko Iehova uaorai ma te puapinga o tona atinga tei maata atu te meitaki i tetai ua atu apinga tei rauka i te Ariki Taunga ko Melekizedeka o Salema i te oronga.​—Ebera 7:1–​8:2.

14. Kua akamana ainei te Melekizedeka Maata i te au orometua o Kerititome kia piri atu ki te au tamaki a te au enua te karangaia ra e e Kerititome?

¹⁴ Kua akameitaki te ariki taunga koia a Melekizedeka i te toa tamaki ra, ia Aberahama tei autu ra. Inara akapeea te Melekizedeka Maata atu, koia Tei Akanoo i te akonoanga Kerititiano mou ra? Te karanga ra te au orometua o Kerititome e e komono ratou no Iesu Mesia i te akameitaki anga i te au vaeau o ta ratou i karanga e e au pa enua Kerititiano e kua pure katoa oki no ratou. Inara i turu ana ainei te Taunga Maata a Iehova i te rangi ra i te au orometua o Kerititome i teia ravenga? Kua ariki ainei aia i te apainga no te akamaringi anga toto ravarai tei raveia i te tuatau tei karangaia ra e Tuatau Kerititiano, kapiti katoa te toto tei akamaringiia i te tuatau o te Tamaki Mua o te Ao e te Rua? Kare rava ia! Kare e tuatau i akatika aia i tana au pipi mou kia akariro ia ratou uaorai ei tuanga no teianei ao e kia piri atu ki tona vaeau akamaringi anga i te toto.

Akariro Anga te Atua Toa Tamaki i te Ingoa Manea Nona Uaorai

15, 16. Eaa ta Iehova i akatupu nona uaorai i tana tamaki anga no tona iti tangata i te akaora anga ia ratou mei Aiphiti mai ra?

¹⁵ Te taiku maira Nehemia 9:10 i ta Iehova akaora anga i te 12 kopu o Iseraela mei Aiphiti, i te na ko anga: “E kua akakite [koe, NW] i te au akairo e te au ravenga taka ke ki runga ia Pharao, e tona katoa ra au tavini, e ki runga katoa i te tangata tini o tona enua; kua kite oki koe e, e ravenga parau ta ratou ia ratou [to Iseraela] ra. Rauka iora toou ingoa mei tei teianei rai rā.”​—Akaaiteia atu kia Exodo 14:18.

¹⁶ Kua taiku te peroveta ko Isaia i te tu meitaki o teia ingoa i tana tuatua anga no Iehova i “te arataki anga i te rima katau o Mose, i tona uaorai rima kakā, i te vevete anga i te moana na mua ia ratou, kia akariro aia i tona ingoa ei ingoa ngaro kore.” I te tuatua anga no Iehova, kua karanga aia: “I pera toou arataki anga i toou iti-tangata, kia riro toou ei ingoa kakā ia koe.” (Isaia 63:12-14) I te pati anga kia Iehova kia akono akaou i tona iti tangata, kua tuatua a Daniela nona e “ko tei arataki mai i to au tangata mei te enua maira mei Aiphiti, ma te rima ririnui, e kua rongonui ia koe toou ingoa, mei tei teianei ra.”​—Daniela 9:15; Ieremia 32:20.

17. Koai ta Iehova ka tono kia aere e tamaki ma tona ingoa, e eaa tana ka akaari ki to te pa enua ravarai i teia tuatau nei?

¹⁷ Kia tae ki te tuatau tau, ka tono mai te Atua ko Iehova ia Iesu Mesia, koia te Melekizedeka Maata, ei toa ririnui. Ka riro nana, ta Iehova akono anga i tetai ingoa nona uaorai kia maata atu i etai au mea katoa i te tuatau kua topa mei tei akatakaia maira i te puka o te au Tamaki a Iehova me kare i te au Tuatua Tapu Ebera o te Puka Tapu ra. I te pene openga o te puka i mua ua ake i te openga o te au Tuatua Tapu Ebera ra, kua totouia mai te tamaki anga a to te au enua katoa ia Ierusalema. I reira, kia tau ki ta Zekaria 14:3, “Ei reira Iehova e aere atu ei, ka tamaki ei ki taua au enua ra, mei tana rai i tamaki i te rā tamaki ra.” Na teia mataara ka akaari te Atua o te Puka Tapu ki te au enua katoatoa o teia tuatau e te vai nei koia te Atua toa mei iaia i vai ana i te tuatau o Iseraela i taito ra.

18, 19. Ko teea te Ierusalema te ka riro kia tamaki pakariia e to te pa enua ravarai?

¹⁸ E manakonako anga teia te vai mai nei ki mua ia tatou. Inara ko teea Ierusalema te ka mamae i te reira tamaki anga maata? Kare te reira totou i akatupuia ki runga ia Ierusalema o to Zekaria tuatau ra. Kua akapouia te reira oire e te vaeau o Roma i te 70 T.N. Inara, kua patu akaouia a Ierusalema, e te manakoia ra e Kerititome ei ngai tapu i teia tuatau e pera katoa oki te manako o te iti tangata kopapa o Iseraela ra. I te ono ra i tamaki ei i te 1967, kua riro te katoa anga o Ierusalema i te enua nei tei patu akaouia ra i te Iseraela kopapa ra. Inara, kare takiri e akapapu anga e i o atu te Atua ko Iehova ki te reira tamaki anga. Kare tana Ariki i akateronoia, koia a Iesu Mesia, e i tutara ki Ierusalema i te enua nei, e kare oki te reira i vai mai e “ko te oire ïa o te Ariki maata,” koia oki, no Iehova.​—Mataio 5:35.

¹⁹ Kare, kare teia oire maata o te mema ngati Iuda no te Taikotaianga Enua, i te Ierusalema tei taikuia i te totou a Zekaria ra. Mari ra, te tuatua ra a Zekaria no te Ierusalema ta tatou e tatau i te puka o Ebera ra. I reira, te tuatua ra Paulo ki te au Kerititiano akatainuia ra e kua karanga: “Kua aere maira kotou ki te Maunga ko Ziona te oire o te Atua ora ra, ko Ierusalema i te rangi ra, e te manotini ua atu au angera.” (Ebera 12:22, NW) Kare teia Ierusalema i te rangi ra i tetai apinga ke mari ra ko te Patireia Mesia o te Atua, tei komonoia i te enua nei i teia tuatau e te pupu meangiti o te au Kerititiano akatainuia ra ko ratou te manakonako rekareka ra kia riro ei oa tutara ma Iesu Mesia katoa i roto i te reira Patireia. Ko ratou te aronga te ka tamakiia atu tei totouia maira.

20. Eaa te au tuatua ta te Ariki ko Hezekia i tuatua ki tona iti tangata tamatakuia ra ei tupae ia ratou ra, e i runga i te au tuatua a teea Ariki tei maata atu ia Hezekia ta te au Kite o Iehova tupae anga ia ratou uaorai i teia tuatau?

²⁰ Kare e tau teia aronga, e pera katoa oki te urupu maata o te au Kerititiano te manakonako ra kia noo ki te enua nei no roto maira ratou i to te pa enua ravarai kia taokotai katoa i te akamori mou, kare ratou e tau kia mataku i te apinga ka tupu mai i te reira tamaki anga. I te aere mai anga te au nuku vaeau tamataku a Senakeriba, koia te ariki o Asura, e tamaki mai ia Ierusalema i te tuatau tutara o te Ariki ko Hezekia ra, kua orongaia te manako tamaru ki to Iseraela no te kino to ratou turanga, i ta te Ariki ko Hezekia tuatua anga kia ratou: “E rima tangata tei iaia; ia tatou nei ra, ko to tatou Atua ïa ko Iehova, ei tupae ia tatou, e ei karo i ta tatou tamaki.” Ko tei tupu kua “irinaki marie akera te au tangata i te au tuatua a te ariki o Iuda ra a Hezekia.” (2 Paraleipomeno 32:8) Me tamatakuia mai te au Kite o Iehova o teia tuatau nei, e te au vaeau o te au enua o te akatereanga o teianei ao, ka tau ratou kia tupae ia ratou uaorai ki te au tuatua aiteite ki te reira mei ko mai i te ariki maata atu ia Hezekia, koia a Iesu Mesia.

21. (a) Eaa te au tuatua a Iahaziela ka akamaaraiaʼi a te tuatau o te tamaki te aere maira ki te Ierusalema o te rangi ra? (e) Eaa te ka tupu i taua tamaki te ka tamakiia ra?

²¹ A te reira tuatau, ka akamaaraiaʼi te au tuatua akauru i te akarongo a Iahaziela ngati Iuda ra: “Kare kotou e tamaki i tenana, e akamou ua kotou, e tu ua mai kotou, e e akara i te ora a Iehova i o kotou na; e Iuda, e Ierusalema katoa, auraka e mataku auraka e tumatetenga: apopo e aere ei ki vao ka aravei ia ratou: tei ia kotou oki a Iehova.” (2 Paraleipomeno 20:17) Ae, i roto i te reira tuatau kino katoa, ka noo rai a Iehova i rotopu i tona iti tangata. Ka rauka to ratou meitaki e te akaora anga na tona tamaki anga no ratou ra. Ka tamaki rai aia, na tana Ariki toa, na Iesu Mesia e rave! Te apinga te ka tupu? Ka akapou takiriia te akaaerenga akara mataia a te Tiaporo i runga i te enua nei.​—Apokalupo 19:11-21.

22. (a) Eaa te openga autu anga te ka tupu ki te puka o te au Tamaki a Iehova ra, e eaa ta Iehova ka akono nona uaorai i te reira? (e) Ka akakeuia te aronga inangaro ia Iehova kia rave i teaa no tona autu anga?

²² Mei teaa ra te manea o te ingoa ta te Atua ka akono nona uaorai na tona autu anga umere roa i “te tamaki i taua rā maata o te Atua mana katoatoa ra” ia Ara Makito! (Apokalupo 16:14, 16) Mei te mea rai e, e pene ou te ka kapitiia atu ki te puka o te au Tamaki a Iehova ra. Ka riro te reira ei openga autu anga, e openga meitaki no teia akatereanga o te au mea nei. Ka akaari mai te reira puka katoa, e kare rava te Atua Mana Katoatoa i kore i autu ana i tetai tamaki. Mei teaa ra te maeva anga akapaapaa iaia a te aronga inangaro katoatoa i te ingoa o Iehova i muri akera! Ei reira tikai, e rave meitakiiaʼi te irava openga o te puka Salamo ra: “Ko tei uti i te aʼo ra​—kia akapaapaa anake ïa ia Iehova. Alelu Ia!”​—Salamo 150:6.

Au Uianga no te Uriuri Akaou

◻ Eaa te meangiti ua te manako arikiia e te au tangata o teia tuatau no te Atua o te Puka Tapu, koia a Iehova?

◻ Eaa te tamaki ta Aberahama i tamaki ana, e naai i oronga kiaia te re?

◻ Eaa “te buka Tamaki a Iehova ra”?

◻ Eaa te akaopenga no “te buka Tamaki a Iehova ra,” te aere maira, e eaa te ka tupu i te reira?