Te Au Mamoe ke Atu e te Koreromotu Ou

“Te au tamariki o te tangata ke . . . , te aronga katoa e akono i te sabati, kare te reira i viivii ia ratou, e ko tei tāpu piri i taku koreromotu; Ko ratou rai oki taku e arataki ki toku maunga tapu ra.”​—ISAIA 56:6, 7.

1. (a) Kia tau ki te orama a Ioane, eaa te akatupuia ra i te tuatau tapuia ra nga matangi no ta Iehova ra akavaanga? (e) Eaa te urupu maata ta Ioane i akara ra?

I ROTO i te a o te orama i te puka o Apokalupo, kua kite atura te apotetoro ko Ioane i te tapu anga i nga matangi akapou no ta Iehova ra akavaanga kia ope ra te akairo anga i te au mema katoatoa o “te Iseraela o te Atua” ra. Ko teianei te aronga mua tei akameitakiia na roto ia Iesu, koia ra te tuanga maata o te uanga o Aberahama. (Galatia 6:16; Genese 22:18; Apokalupo 7:1-4) I roto i taua orama rai, kua akara atura Ioane i tetai “aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki, . . . ma te kapiki nui to ratou reo, i te na ko anga e, No to tatou Atua te ora, tei noo ki rungao i te terono, e no te Punua-mamoe.” (Apokalupo 7:9, 10) I te na ko anga e “te ora [no tatou] . . . no te Punua-mamoe,” te akakite maira te aronga maata rava e ko ratou katoa oki te akameitakiia ra e te Uanga o Aberahama ra.

2. I na ea te aronga maata rava i mama mai ei, e i akapeea te akataka anga i te reira ra?

² Kua kitea teianei aronga maata rava mei te 1935 mai ra, e i teia tuatau nei ko tona numero kua tere atu i te rima mirioni. Kua akairoia kia ora atu i te mate maata, ka akatakaia tona au mema no te ora mutukore me akataka a Iesu i “te mamoe” mei “te puaka-nio ra.” Te au Kerititiano o te aronga maata rava ra tei roto i te “mamoe ke atu” i ta Iesu akatutu anga o nga koro mamoe ra. Te manakonako ra ratou kia ora e tuatau ua atu ki runga i tetai enua parataito.​—Mataio 25:31-46; Ioane 10:16; Apokalupo 21:3, 4.

3. Akapeea te tuke anga te au Kerititiano akatainuia ra e te au mamoe ke atu no runga i te koreromotu ou?

³ No te 144,000 ra, ka na roto mai te akameitakianga o te koreromotu kia Aberahama ra i te koreromotu ou. Ei aronga akatuangaia i roto i teianei koreromotu, tei raro ake ratou i te “aroa ua” e “tei raro ake [ratou] i te ture i te Mesia.” (Roma 6:15; 1 Korinetia 9:21) No reira, ko te 144,000 au mema anake o te Iseraela o te Atua tei kai tika ra i te au oroa i te tuatau Akamaara Anga i te matenga o Iesu ra, e kia ratou anake ta Iesu ra akono anga i tana koreromotu no tetai Patireia. (Luka 22:19, 20, 29) Kare te au mema o te aronga maata rava ra i te aronga akatuangaia i roto i te koreromotu ou ra. Inara, te taokotai atura ratou ma te Iseraela o te Atua ra e te noo ra ma ratou katoa i to ratou “enua.” (Isaia 66:8) No reira te tau ra kia tuatuaia e tei raro katoa oki ratou i te aroa ua o Iehova ra e tei raro oki i te ture i te Mesia ra. Noatu kare i te aronga akatuangaia i te koreromotu ou ra, e aronga puapingaia ra ratou i te reira.

‘Au Tangata Ke’ e te “Iseraela o te Atua” Ra

4, 5. (a) Kia tau ki ta Isaia, ko teea pupu te ka tavini kia Iehova? (e) Akapeea te akatupu anga ia Isaia 56:6, 7 ki rungao i te aronga maata rava ra?

⁴ Kua tata te peroveta ko Isaia: “E te au tamariki o te tangata ke, ko tei piri kia Iehova ra, ei akamori iaia, e kia inangaro oki i te ingoa o Iehova, kia riro ei au tavini nona; te aronga katoa e akono i te sabati, kare te reira i viivii ia ratou, e ko tei tāpu piri i taku koreromotu; Ko ratou rai oki taku e arataki ki toku maunga tapu ra, e akarekareka au ia ratou i roto i toku are pure anga: e marekaia mai ta ratou au atinga karakaratio, e ta ratou atinga, ki runga i taku atarau.” (Isaia 56:6, 7) I Iseraela ra, kua riro te aite anga o teianei e ko te aronga “tangata ke,” kare i te ngati Iseraela, ka akamori ia Iehova​—ka inangaro i tona ingoa, ka akono i te au ikuiku o te Ture koreromotu, ka akono i te Tapati, e te orongaanga atinga i te iero, koia te “are pure” o te Atua ra.​—Mataio 21:13.

⁵ I to tatou tuatau nei, “te au tamariki o te tangata ke, ko tei piri kia Iehova ra” ko te aronga maata rava ia. Kua tavini kapiti atu ratou ia Iehova ma te Iseraela o te Atua ra. (Zekaria 8:23) Te oronga ra ratou i te au atinga aiteite te arikiia ra mei ta te Iseraela o te Atua ra. (Ebera 13:15, 16) Te akamori ra ratou i roto i te iero vaerua o te Atua ra, koia tona “are pure.” (Akaaite ia Apokalupo 7:15.) Te akono ra ainei ratou i te Tapati epetoma? Kare te aronga akatainuia kare katoa oki te au mamoe ke atu i akaueia kia rave i te reira. (Kolosa 2:16, 17) Inara kua tuatua atu a Paulo ki te au Kerititiano Epera akatainuia ra: “Te vai ra mari te akaangaroianga [“tapati,” NW] no te tangata o te Atua. Ko tei o oki i tona akaangaroianga ra, e e akaangaroi ïa aia i tana uaorai angaanga, mei te Atua oki i tana.” (Ebera 4:9, 10) Kua tomo atu taua aronga Epera ra ki roto i teia ‘akaangaroianga tapati’ i to ratou uaorai kauraro anga ki “te tuatua-tika a te Atua” ra e te akaangaroianga mei te tautaanga kia akatika ia ratou uaorai na te au angaanga a te Ture ra. (Roma 10:3, 4) Kua rekareka katoa oki te au Kerititiano Kenitara akatainuia ra i taua akaangaroianga rai na to ratou uaorai kauraroanga ki to Iehova ra tuatua tika. Kua kapiti atu te aronga maata rava ki roto i taua akaangaroianga ra.

6. Akapeea te au mamoe ke atu i teia tuatau i te mou anga i te koreromotu ou ra?

⁶ Pera katoa oki, ka mou atu te au mamoe ke i te koreromotu ou mei te aronga tangata ke i taito ra tei mou ra i te Ture koreromotu. Na roto i teea tu? Kare na te riroanga kia akatuangaia ki roto i te reira mari ra na te kauraroanga ki te au ture kapitiia ma te reira e te puapingaanga mei te akanoonoo anga a te reira. (Akaaite ia Ieremia 31:33, 34.) Mei to ratou au oa akatainuia, kua tata katoaia te ture a Iehova ki ‘roto i te ngakau’ o te au mamoe ke ra. Te inangaro oonu ra ratou e te akarongo ra i ta Iehova au akauenga e te au kaveinga oki. (Salamo 37:31; 119:97) Mei te au Kerititiano akatainuia rai, kua kite ratou ia Iehova. (Ioane 17:3) Ka peea ra te peritome anga? I etai 1,500 mataiti i mua ake i te akanooanga i te koreromotu ou ra, kua raurau atura Mose i to Iseraela: “E tenana, ka peritome ana i te kiri i mua i to kotou ngakau ra.” (Deuteronomi 10:16; Ieremia 4:4) Noatu ra e kua kore atu te akauenga peritome anga kopapa ma te Ture katoa ra, ka tika ra te aronga akatainuia ra ma te au mamoe ke atu kia “peritomeia” to ratou ngakau. (Kolosa 2:11) Ei openga oki, te akakore ra a Iehova i te ara o te au mamoe ke ra na runga i te akatumu anga o to Iesu ra ‘toto no te koreromotu’ tei akamaringiia ra. (Mataio 26:28; 1 Ioane 1:9; 2:2) Kare te Atua e akatuanga ia ratou ei tamariki vaerua nana, mei tana i rave i te 144,000 ra. Mari ra te akakite ra aia i te au mamoe ke ra ei tuatua tika, i te tu mei ia Aberahama i akakiteia ra ei tuatua tika e ei oa no te Atua ra.​—Mataio 25:46; Roma 4:2, 3; Iakobo 2:23.

7. Eaa te manakonako te akatueraia maira no te au mamoe ke atu i teia tuatau, tei akakiteia ra ei aronga tuatua tika mei ia Aberahama ra?

⁷ No te 144,000, te riroanga kia akakiteia ei tuatua tika te akatuera ra i te mataara no ratou kia rauka te manakonako anga kia tutara kapiti ma Iesu katoa i te Patireia o te rangi ra. (Roma 8:16, 17; Galatia 2:16) No te au mamoe ke ra, te riroanga kia akakiteia ei tuatua tika ei au oa no te Atua ra ka akatika kia ariki i te manakonako anga no ratou no te oraanga mutu kore ki roto i te enua parataito ra​—me na te ora atuanga ia Aramakito ei tuanga no te aronga maata ra me kare na ‘te tuakaouanga o te aronga-tuatua tika ra.’ (Angaanga 24:15) Mei teaa ra tetai tupu anga meitaki kia rauka taua manakonako anga e kia riro ei oa no Tei Ngateitei o te ao katoa e pini ua ake, kia riro oki kia “tuitarere i [tona] ra puakapa”! (Salamo 15:1, 2) Ae, ko te aronga akatainuia e te au mamoe ke atu oki kua akameitakiia na roto i tetai tu meitaki roa na roto ia Iesu, koia te Uanga o Aberahama ra.

Tetai Ra Tapokiangaara Maata Atu

8. Eaa tei akatutuia maira e te au atinga o te Ra Tapokiangaara i raro ake i te Ture ra?

⁸ I te uriuri manakoanga i te koreromotu ou, kua akamaaraara maira Paulo tona aronga tatau no te Ra Tapokiangaara o te mataiti i raro ake i te Ture koreromotu. I taua ra ra, kua orongaia nga atinga taka ke​—okotai no te kopu kau taunga o Levi e ko tetai no te au kopu 12 ra. Kua roa te akataka anga mai i teianei ei akatutuanga i to Iesu ra atinga maata te ka akapuapinga i te 144,000 ra ma te manakonako anga no te rangi e te au mirioni ua atu tei manakonako ra kia noo i te enua nei.a Kua akakite a Paulo e i te akatupu anga ka orongaia mai te au puapinga o to Iesu ra atinga na roto i tetai Ra Tapokiangaara maata atu i raro ake i te koreromotu ou ra. Ei Taunga Maata no teia ra maata atu, kua oronga a Iesu i tona oraanga apa kore ua ei tetai atinga tapokiangaara kia raukaʼi “te ora mutu kore” no te au tangata.​—Ebera 9:11-24.

9. I te riroanga ki roto i te koreromotu ou ra, eaa ta te au Kerititiano Epera akatainuia ra ka rauka kia takave?

⁹ E manganui te au Kerititiano Epera no te anere mataiti mua ra te vai “maroiroi anake ra ratou i te Ture [a Mose].” (Angaanga 21:20, NW) Kua tau, i reira, kia akamaaraara atu Paulo ia ratou: “I riro ei oki [a Iesu] ei [“rotopu,” NW] i te koreromotu ou nei, kia rauka te ao mutu kore i tuatuaia maira, i te aronga i kapikiia ra, i tona mate, ei oko i te ara i te koreromotu mua ra.” (Ebera 9:15) Na te koreromotu ou i akamatara mai i te au Kerititiano Epera ra mei te koreromotu taito ra, tei akakite atea maira i to ratou tu ara. E akameitaki i te koreromotu ou, e ka rauka ia ratou kia takave i “te ao mutu kore [i te rangi] i tuatuaia maira.”

10. No teaa ta te aronga akatainuia e te au mamoe ke atu oki te ka akameitaki i te Atua ra?

¹⁰ Ko te aronga “akarongo i te Tamaiti ra” ka puapingaia i te atinga oko ra. (Ioane 3:16, 36) Kua na ko maira Paulo: “Koia katoa te Mesia, ka tai akenei ona apai angaia ei atinga kia apai ke aia i te ara a te tangata e manganui, e ka mama mairai aia, ko te tu rua ïa o te mama anga mai, eiaa ei tarangaara, kia ora ra te aronga e tatari atu iaia.” (Ebera 9:28) I teia tuatau, te aronga e tatari atura ia Iesu te kapiti ra i te toenga o te au Kerititiano akatainuia o te Iseraela o te Atua ra te ora ra e te au mirioni ua atu o te aronga maata rava, e e tuanga i te au mea katoa to ratou ra no te ora mutu kore. Te akameitaki ra eia nga pupu e rua i te Atua no te koreromotu ou e no te au akameitakianga oronga ora mai te kapitiia ra ma te reira, kapiti katoa oki i te Ra Tapokiangaara maata atu e te angaanga a te Taunga Maata, koia Iesu, i roto i te Ngai Tapu Rava i te rangi ra.

Angaanga Maata i te Tavini Anga Tapu

11. Ma te au akava ngakau tamaia na roto i te atinga o Iesu, eaa ta te aronga akatainuia e te au mamoe ke atu oki ka rave mataora?

¹¹ I tana reta ki to Epera ra, kua akaketaketa maira Paulo i te puapinga teitei atu o to Iesu atinga i te akanoonoo anga koreromotu ou me akaaiteia atu ma te au tarangaara i raro ake i te koreromotu taito ra. (Ebera 9:13-15) Te rauka ra i te atinga meitaki atu a Iesu kia “maata atu ïa te mā o to [tatou] akava-ngakau i te angaanga mate, kia akamori i te Atua ora ra.” No te au Kerititiano Epera ra, te kapiti ra te “angaanga mate” i “te ara i te koreromotu mua ra.” No te au Kerititiano i teia tuatau nei, te kapiti ra te reira i te au ara tei raveia i te tuatau kua topa tei tataraara tikaia ra e kua akakoreia e te Atua taua au ara ra. (1 Korinetia 6:9-11) Ma te au akava ngakau tamaia, te oronga ra te au Kerititiano akatainuia “kia akamori i te Atua ora ra.” E pera katoa oki te aronga maata rava ra. I te tama anga to ratou akava ngakau na roto i “te toto o te Punua-mamoe ra,” tei roto ratou i te nao vaerua meitaki o te Atua “i akamori ei ratou iaia i te po e te ao.”​—Apokalupo 7:14, 15.

12. Akapeea tatou i te akaari anga e tei ia tatou “te akarongo mou tikai”?

¹² Kapiti katoa oki, kua tuatua a Paulo: “E akavaitata tatou ma te ngakau pikikaa kore, ma te akarongo mou tikai, ma te akava-ngakau i pïpïia, kia kore te manako kino, e ma te kopapa oreiia i te vai mā.” (Ebera 10:22) Akapeea e raukaʼi ia tatou te akaari e tei ia tatou “te akarongo mou tikai”? Kua raurau atura Paulo i te au Kerititiano Epera: “Kia piri tikai to tatou mou ranga i ta tatou tuatua [no te rangi] ma te ngaueue kore; (e tuatua-mou oki tana ta tei tuatua maira;) E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:23-25) Me te ora ra to tatou akarongo, kare katoa tatou “e akaruke i to tatou akaputuputu anga.” Ka mareka ra tatou kia akamaroiroi i to tatou au taeake e kia akamaroiroi mai oki ratou ia tatou kia aroa e te au angaanga memeitaki e kia maroiroi oki no te angaanga puapinga maata i te akakitekiteanga i to tatou manakonako, me no te enua me kare no te rangi.​—Ioane 13:35.

Te “Koreromotu Mutu Kore”

13, 14. Na teea au tu i mutu kore ei te koreromotu ou ra?

¹³ Eaa te ka tupu me ka aere atu te mea openga o te 144,000 ra ki to ratou manakonako anga i te rangi? Ka akamutu ainei te akono a te koreromotu ou ra? A te reira taime, kare e mema toe mai ki runga i te enua nei no te Iseraela o te Atua ra. Pouroa te aronga akatuangaia i roto i te koreromotu ka kapitiia atu ma Iesu “i te basileia o [tona] Metua.” (Mataio 26:29) Inara te maara nei tatou i te au tuatua a Paulo i roto i tana reta ki to te au Epera ra: “Kia akatau mai te Atua au, . . . tei akaoki mai i to tatou Atu ra ia Iesu, i te tiaki mamoe maata, mei te mate maira, no te toto o te koreromotu mutu kore ra.” (Ebera 13:20; Isaia 55:3) Na roto i teea tu i mutu kore ei te koreromotu ou ra?

¹⁴ Te mea mua, kare mei te Ture koreromotu ra, kare rava ia e monoia. Te rua, te au tupu anga no tana angaanga e mea akatinamouia, mei to Iesu ra arikianga. (Akaaite ia Luka 1:33 ma 1 Korinetia 15:27, 28.) E ngai mutu kore to te Patireia o te rangi ra i roto i ta Iehova au akakoro anga. (Apokalupo 22:5) E te toru, ka tamou marie te puapinga anga o te au mamoe ke ra mei te akanoonoo anga koreromotu ou ra. I te tuatau o to Karaiti Tutara Anga no te Tauatini Mataiti, ka tamou marie te au tangata tiratiratu “e i akamori ei ratou [ia Iehova] i te po e te ao i tona nao” mei ta ratou e rave nei i teianei. Kare a Iehova e akamanako akaou i ta ratou au ara kua topa tei akakoreia ra na runga i te tumu anga to Iesu “toto o te koreromotu ra.” Ka rekareka ua atu ratou i tetai turanga tuatua tika ei au oa no Iehova, e ka vai rai tana ture i te tata anga ki roto i to ratou ngakau.

15. E akataka mai i to Iehova ra pirianga ma tona aronga akamori i runga i te enua i roto i te ao ou.

¹⁵ Ka rauka ainei ia Iehova i reira kia tuatua no teianei aronga tavini tangata nei e: ‘Ko au to ratou Atua, e ko ratou toku au tangata’? Ae. “E noo aia ki rotopu ia ratou, e riro ratou ei tangata nona, e e noo te Atua ki rotopu ia ratou.” (Apokalupo 21:3) Ka riro ratou ei “te puakapa o te aronga tapu,” ei aronga enua no “te oire i akaperepereia ra,” te vaine akaipoipo ou a Iesu Karaiti i te rangi ra. (Apokalupo 14:1; 20:9; 21:2) Ka rauka teia katoatoa no to ratou akarongo i “te toto o te koreromotu” o Iesu tei akamaringiia ra e no to ratou kauraro anga i te ui ariki e te kau taunga i te rangi, ko ratou ra te Iseraela o te Atua i te enua nei.​—Apokalupo 5:10.

16. (a) Eaa te au apinga penei ka tupu ki te aronga akatuakaouia ki te enua nei? (e) Eaa te au akameitakianga te ka tupu a te openga o te tauatini mataiti ra?

¹⁶ Ka peea tei mate ra te ka akatuakaouia mai ki runga i te enua nei? (Ioane 5:28, 29) Ka pati katoaia ratou kia “akameitaki ia ratou uaorai” na roto ia Iesu, koia te Uanga o Aberahama. (Genese 22:18; NW) Ka tau katoa ratou kia inangaro i te ingoa o Iehova, kia tavini atu iaia, ma te orongaanga au atinga tau, e te akamori anga i roto i tona are pure. Ko te aronga te ka rave i te reira ka tomo atu ki roto i to te Atua ra akaangaroianga. (Isaia 56:6, 7) Kia tae ki te openga o te tauatini mataiti ra, kua oti te apaiia mai te aronga tiratiratu katoatoa ki te tu tangata apa kore ua na roto i te angaanga a Iesu Karaiti e tona au oa kau taunga e 144,000 ra. Ka riro ratou ei tuatua tika, kare e kia akakite uaia e tuatua tika ei au oa no te Atua ra. Ka “ora akaou” ratou, kua matara takiri te ara e te mate tei akatuangaia mai ia Adamu ra. (Apokalupo 20:5; 22:2) Mei teaa ra tetai akameitakianga te reira! Mei ta tatou i manako i teia tuatau nei, i te akara anga e ko te angaanga kau taunga a Iesu ratou ko te 144,000 kua oti i reira. Kua taangaanga ki katoaia te au akameitakianga o te Ra Tapokiangaara maata atu. Pera katoa oki, ‘ka tuku atu a Iesu i te basileia ki te Atua ki te Metua ra.’ (1 Korinetia 15:24) Ka raveia ra tetai timataanga openga no te au tangata, e ei reira a Satani e tana au temoni ka akapouia e tuatau ua atu.​—Apokalupo 20:7, 10.

17. I te manako anga i te rekareka te tatari maira ia tatou, eaa ta tatou taki tai ka tau kia akakoro i te rave?

¹⁷ Eaa te tuanga, me e tuanga tetai, te ka raveia e te “koreromotu mutu kore” i taua tuatau marekaanga ra te ka akamataia ra? Kare te reira na tatou e tuatua. Ko ta Iehova i akakite mai kua rava no teianei. Te akaruke maira te reira ia tatou ma te va ua. E tamanako ana​—te oraanga mutu kore ei tuanga no “te rangi ou e tetai enua ou”! (2 Petero 3:13) Kia kore tetai ua atu apinga e akaparuparu mai i to tatou inangaro kia akatuangaia i taua taputou ra. Penei kare i te mea ngoie ua te tuanga ngaueue kore. Kua karanga a Paulo: “Ko te akakoromaki ra te tau ia kotou e, kia oti ia kotou te rave i ta te Atua i anoano ra, kia rauka ia kotou te tutaki i tuatuaia maira.” (Ebera 10:36) Inara, kia maara, e ko tetai ua atu manamanata kia akakoreia, tetai ua atu patoi anga kia autuia, ka ngaro ua atu i te akaaite atu anga ki te rekareka te tatari maira ia tatou. (2 Korinetia 4:17) E no reira, auraka e riro tetai o tatou kia “unui ki muri e mate atu.” Kareka ra, kia akapapu tatou ia tatou uaorai e no “te aronga ra i rauka te akarongo e ora atu ei te vaerua.” (Ebera 10:39) Kia rauka ra ia tatou katoatoa te irinaki anga ki tikai ia Iehova, i te Atua o te au koreromotu ra, ei akameitakianga mutu kore no tatou tataki tai ravarai.

[Tataanga Rikiriki i Raro]

Kua Marama Ainei Koe?

◻ I te pae atu i te au Kerititiano akatainuia, koia ma te akameitakiia ra na roto i te Uanga o Aberahama?

◻ I te akameitaki anga na roto i te koreromotu ou ra, akapeea te au mamoe ke atu ra i aite ei ki te au poroteraita i raro ake i te koreromotu taito ra?

◻ Akapeea te akameitaki anga i te au mamoe ke atu ra na roto i te akanoonoo anga Ra Tapokiangaara maata atura?

◻ Eaa ra a Paulo i tapaʼi i te koreromotu ou ra ei tetai “koreromotu mutu kore”?

[Pia i te kapi 21]

Akamori Anga i te Iero Ra

Te akamori ra te aronga maata rava ma te au Kerititiano akatainuia i te paepae o te iero vaerua maata o Iehova i te enua nei. (Apokalupo 7:14, 15; 11:2) Kare e tumu kia manakoia e tei roto ratou i tetai Paepae o te au Kenitara tei akataka keia. Ia Iesu i te enua nei, e Paepae o te au Kenitara tetai i te iero ra. Inara, i nga parani tu-Atua akauruia o to Solomona iero e to Ezekiela oki, kare e apinga akapapaia no tetai Paepae o te au Kenitara. I te iero o Solomona ra, e paepae tetai i vao ake i te ngai i akamori kapipiti ei to Iseraela e te aronga poroteraita, te au tane e te au vaine. Ko teia te akaraanga totouia no te paepae i te enua nei no te iero vaerua ra, te ngai ta Ioane i kite ra i te aronga maata rava i te akamorianga.

Inara, ko te kau taunga anake e te au ngati Levi ra tei akatikaia kia tomo ki roto i te paepae i roto maira, te ngai i reira ra te atarau maata; ko te kau taunga anake ka akatikaia kia tomo i te ngai Tapu; e ko te taunga maata anake ka akatikaia kia tomo ki te ngai Tapu Rava. Ko te paepae i roto maira e te ngai Tapu oki te kiteia ra kia akaata mai i te turanga vaerua taka ke o te au Kerititiano akatainuia i te enua nei. E ko te ngai Tapu Rava te akatutu maira i te rangi uaorai, te ngai e raukaʼi i te au Kerititiano akatainuia ra te ora mate kore kapiti katoa ma to ratou Taunga Maata i te rangi ra.​—Ebera 10:19, 20.

[Tutu i te kapi 23]

I te manako anga i te rekareka te tatari maira ia tatou, kia “rauka [ia tatou] te akarongo e ora atu ei te vaerua”