Noo Tamou i Roto i to Iehova Akaaerenga

KUA tata te pipi a Iakobo e: “E akavaitata atu ki te Atua, e nana e akavaitata mai kia kotou.” (Iako. 4:8) Ae, noatu to Iehova turanga ngateitei, kare aia i atea ke mei ia tatou, ka akarongo mai aia ia tatou noatu to tatou tu apa ua. (Anga. 17:27) Ka akapeea ra tatou me akavaitata atu ki te Atua? Ka akamou tatou i tetai pirianga vaitata kia Iehova na roto i te pure. (Sala. 39:12) Ka akatupu katoa tatou i tetai pirianga tumanava ki te Atua, na roto i te apii ua rai i tana Tuatua, te Pipiria. Na teia matara, ka kite tatou no runga ia Iehova, tona akakoroanga, e tona anoano no tatou. (2 Timo. 3:16, 17) I reira tatou e kite ei i te akatupu i te inangaro nona e te mataku i te rave i te kino te ka akamareka kore iaia.—Sala. 25:14.

² Inara ko teia tu pirianga kia Iehova, kare e rauka mari ua na roto i tana Tamaiti ia Iesu. (Ioa. 17:3; Roma 5:10) Kare atu e tangata e rauka i te akamārama mai kia tatou no runga i to Iehova aerenga manako, mari ua ko Iesu. E pirianga tumanava tikai to Iesu e tona Metua, i rauka ai iaia kia karanga e: “Kua ope rava te au mea katoa i te tukuia mai e taku Metua, tei iaku: kare rava tetai i kite i te Tamaiti, mari ra ko te Metua; e kare tetai i kite i te Metua, mari ra ko te Tamaiti, e te tangata ta te Tamaiti e inangaro i te akakite atu.” (Luka 10:22) No reira me apii tatou i ta te au Evangeria e akakite maira no runga i to Iesu aerenga manako e to roto i tona ngakau, te kite ra tatou i to Iehova aerenga manako e to roto i tona ngakau. Ka tauturu tera ia tatou kia akavaitata atu ki to tatou Atua.

³ I raro i te akatereanga a Iesu, ka akatupu tatou i te pirianga tumanava kia Iehova na te noo vaitata ua anga ki te tuanga o Tona akaaerenga i te enua nei, tei apii mai ia tatou i te rave i to Iehova anoano. Mei tei totouia i roto ia Mataio 24:45-47, kua akamana te Pu, a Iesu Mesia, i “te tavini akono meitaki e te pakari,” kia tuʼa ‘i te kai i te ora mou’ no te ngutuare o te akarongo. Teia tuatau, e maata ua atu te kai pae vaerua ta te tavini akono meitaki e oronga mai nei. Na roto i teia tuanga o tona akaaerenga, te ako maira a Iehova ia tatou kia tatau i tana Tuatua i te au rā ravarai, kia tae ua rai ki te au Uipaanga Kerititiano, e kia piri ki te tutu aere anga i “te evangelia o te basileia.” (Mata. 24:14; 28:19, 20; Iosu. 1:8; Sala. 1:1-3) Kare rava tatou e inangaro i te aru i te aerenga manako o te tangata no runga i te tavini akono meitaki. Kia tauta pakari tatou i te noo vaitata ua ki te tuanga o to Iehova akaaerenga i te enua nei, e kia aru i ta te reira aratakianga. Ka akapiri vaitata roa atu teia ia tatou ki te Atua ko Iehova, ka akaketaketa e ka paruru ia tatou noatu te au turanga ngatā.

TUMU I MAATA AI TE AU TU NGATĀ

⁴ Penei kua roa te au mataiti ia koe i roto i te tuatua mou. Me koia ïa, papu roa e kua kite koe mei teaa te tu me akakoromaki i te au timataanga ki toou tu tiratiratu. Inara, noatu koi akamata ua akera koe i te apii no runga ia Iehova e te piri mai ki tona iti tangata, kua kite koe e ka patoi te Tiaporo ko Satani i tetai ua atu te ka kauraro ki to Iehova turanga ngateitei. (2 Timo. 3:12) Noatu me e iti ua e me e maata taau i akakoromaki ana, kare e tumu tau noou kia mataku e kia taitaia. Te taputou maira a Iehova e ka akono aia ia koe no toou akakoromaki e ka oronga mai aia i te ora noou a te tuatau ki mua.—Ebe. 13:5, 6; Apo. 2:10.

⁵ Penei te vai nei te tuatau ka takinokinoia tatou i teia au rā o to Satani akatereanga. Mei te taime mai i akatumuia ai te Patireia o te Atua i te mataiti 1914, kare a Satani e akatikaia kia oki akaou ki te rangi. Kua uriia mai aia ki te enua nei ma tana au angera kino. Te kino maata e tupu nei i runga i te enua, e te pakari o te takinga kino i to Iehova au tavini akatapuia, e akairo tera no to Satani riri otooto e te akapapuanga e te noo nei tatou i te au tuatau openga o tana tutaraanga kino i rungao i te tangata.—Apo. 12:1-12.

⁶ E aka riri tikai to Satani no teia turanga akaaka roa tei tukuia aia ki roto. Te kite ra aia e e taime poto ua tona e vai nei. Te titau nei aia e tana au temoni i te arai i te angaanga tutu evangeria o te Patireia, e kia takore i te tu rotai o to Iehova au tavini. Kua akaō atu teia ia tatou ki te tamaki pae vaerua e akatakaia maira e “kare oki te tangata anake ta tatou e kukumi nei, ko te au ariki katoa ra, e te aronga mana, e te au tutara o teianei ao poiri, e te au vaerua kikino i te reva nei.” E upokotu ei tatou i to Iehova tua, auraka tatou e tuku i te au, kia vai rai te rakei katoa o to tatou akarongo. Ka anoanoia tatou “kia patoi i te ravenga pakari a te diabolo.” (Ephe. 6:10-17) Tera te aiteanga, kia maata to tatou akakoromaki.

AKATUPU I TE TU AKAKOROMAKI

⁷ Te aiteanga o te akakoromaki, “tāpu marie i raro i te au turanga ngatā, me kore i te tumatetenga.” I te pae vaerua, te ō maira te au tu ngaueue kore i te rave i te mea tika me aro atu i tetai turanga kino, te patoianga, takinga kino, e tetai au mea ke atu tei akakoroia ei akatatipake ia tatou kia kore e vai tiratiratu kia Iehova. Ka anoanoia tatou kia tamou marie i te tu akakoromaki. Ka roa rai te reira. Me matutu to tatou turanga akarongo, ka maata atu to tatou akakoromaki. Me rauka ia tatou te akakoromaki i te au timataanga rikiriki i to tatou akarongo, ka matutu atu tatou e to tatou akakoromaki i te au turanga ngatā atu te ka tupu mai. (Luka 16:10) Auraka tatou e vaoʼo kia tupu roa tetai manamanata kino, ka manako ei kia akamatutu i to tatou akarongo. Kia papa ua tatou i mua ake ka tupu ei te timataanga. Te akakite mai anga e ka anoanoia kia tamou marie i te tu akakoromaki e etai atu au tu Kerititiano ke mai, kua tata te apotetoro a Petero e: “Ka akamaroiroi ua i te kapiti katoa to kotou akarongo ki te mataku kore; e te mataku kore oki, ki te kite; te kite oki, ki te noo marie; te noo marie, ki te akakoromaki; te akakoromaki oki, ki te akono i te Atua; te akono i te Atua oki, ki te aroa taeake; te aroa taeake oki, ki te aroa i te tangata katoa.”—2 Pete. 1:5-7; 1 Timo. 6:11.

⁸ Te akamaara maira a Iakobo kia tatou i te puapinga o te akakoromaki, i te na ko anga e: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki. E tuku atu i ta te akakoromaki ra angaanga kia tika rava, kia meitaki rava kotou, ma te apa kore, auraka e ape toe.” (Iako. 1:2-4) Te akakite maira a Iakobo e kia āriki te au Kerititiano i te au timataanga e kia rekareka no te mea ka tauturu te reira ia tatou kia akatupu i te akakoromaki. E manako akapera ana rai koe? Kua akaari mai a Iakobo e e angaanga ta te akakoromaki i te akameitaki roa atu i to tatou tu Kerititiano kia mareka mai a Iehova ia tatou. Ka akamatutuia to tatou akakoromaki me aro atu tatou i te timataanga e me autu i te reira. E ka akatupu mai te akakoromaki i te au tu memeitaki ta tatou e anoano nei.

⁹ Te mareka maira a Iehova i to tatou tu akakoromaki; ka akakeu te reira iaia kia oronga mai i te ora mutu kore. Akakite katoa mai a Iakobo e: “E ao to te tangata e akakoromaki i te timataanga: kua akatika anakeia mai aia ra, e rauka ïa iaia te korona ora, ta te Atu i tuatua mai e no te aronga i anoano iaia ra.” (Iako. 1:12) Ae te akakoromaki nei tatou kia rauka te oraanga mutu kore. Me kare e akakoromaki, kare tatou e mou i roto i te tuatua mou. Me tuku ua atu tatou ki te taomianga a teianei ao, ka marōia tatou kia oki ki roto i teianei ao. Me kare e akakoromaki, kare e rauka te vaerua o Iehova, e kare e rauka i te akatupu i te au ua o tona vaerua i roto i to tatou oraanga.

¹⁰ E rauka ai ia tatou kia akakoromaki ua atu rai i roto i teia au tuatau ngatā, ka anoanoia tatou kia akatupu i te tu Kerititiano me takinga kinoia. Te maara ra ia koe ta Iakobo i tata e: “E mea rekareka anake ïa.” Penei kare tera i te mea ngoie ua i te rave no te mea te ō maira te mamae kopapa e te taitaia o te ngakau. Inara e akamaara e te ō katoa maira to tatou oraanga. Kua tupu ana tetai mea ki te au apotetoro te ka tauturu ia tatou kia kite i te aiteanga o te rekareka me takinga kinoia. Ka kiteaia teia i roto te puka o Angaanga e na ko ra e: “Akaokiia maira e ratou te au aposetolo ra ki roto, pāpā atura, e oti akera, kua akaue atura ia ratou, auraka rava e tuatua ma te ingoa o Iesu, e kua tuku atura ia ratou. Aere atura ratou mei te aroaro atu o te Sunederi, ma te rekareka, i te mea, no tona ingoa i manakoiaʼi ratou e tau ia ratou taua takinga-kino ra.” (Anga. 5:40, 41) Kua mārama te au apotetoro e ko te takinga kino, e akapapuanga te reira e kua akono ratou i ta Iesu akauenga, e kua mareka rava a Iehova ia ratou. Te au mataiti i muri mai, i te tata anga i tana reta mua, kua akakite a Petero e me takinga kinoia tatou no te tuatua mou, e mea meitaki te reira.—1 Pete. 4:12-16.

¹¹ E tupuanga ke tetai tei ō mai a Paulo raua ko Sila. Ia raua e rave ra i ta raua angaanga tutu evangeria i Philipi, kua opuia raua e kua akaapaia no te tamanamanata i te tangata e te apii aere i te au peu kare i tau i te ture. Tei tupu, kua pāpāia raua e kua titiriia ki roto i te are auri. Te akakite maira te Pipiria, e ia raua i roto i te are auri, kia “turuaipo akera, kua pure iorā Paulo raua ko Sila, imene atura ma te akameitaki i te Atua: te akarongo maira te au tangata i tapekaia ra ia raua.” (Anga. 16:16-25) Irinaki a Paulo e tona tokorua e, ko te takinga kino ta raua i na roto, e akapapuanga te reira no to raua uaorai tu tiratiratu ki te Atua e ki te tangata, e ravenga katoa te reira kia akakite i te tuatua meitaki ki te aronga te ka akarongo mai. No te mea te ō maira te oraanga o te tangata. Tera po tikai, kua akarongo te tiaki mouauri e tona ngutuare tangata e kua riro maira ei au pipi. (Anga. 16:26-34) Kua irinaki tikai a Paulo e Sila i roto ia Iehova, tona mana, e tona aroa ua i te tauturu ia raua kia akakoromaki. E kua akaora a Iehova ia raua.

¹² I teia tuatau, te oronga katoa mai nei a Iehova i te au mea tei anoanoia ei tauturu ia tatou i te au tuatau ngatā. Inangaro aia kia rauka ia tatou te akakoromaki. Kua oronga mai aia i tana Tuatua akauruia ei apii ia tatou kia rauka te kite mou tikai no runga i tona akakoroanga. Ka akamatutu teia i to tatou akarongo. Ka rauka ia tatou te tikaanga kia piri ki to tatou au oa akarongo e kia akamori ia Iehova. Ka rauka katoa ia tatou te tikaanga ngateitei kia akamou i tetai pirianga tumanava kia Iehova na roto i te pure. Te akarongo maira aia i ta tatou akapaapaaanga iaia e ta tatou pati akatenga kia rauka te turanga mā i mua i tona aroaro. (Phili. 4:13) Eiaa katoa e ngaropoina i te maroiroi e rauka maira, ia tatou e tapapa atura i te manakonakoanga tei taputouia mai.—Mata. 24:13; Ebe. 6:18; Apo. 21:1-4.

AKAKOROMAKI I TE AU TURANGA NGATĀ

¹³ Te au turanga ngatā ta tatou e kite nei, aite rai ki ta te au pipi a Iesu i muatangana. Teia tuatau, e tuatua akakinoia ana te Au Kite o Iehova, e takinga kinoia ana e te aronga tei akavareia. Mei te tuatau rai o te au apotetoro, te maataanga o te takinga kino na te au akonoanga, no te mea te akamaeu uaia maira e te Tuatua a te Atua ta ratou apiianga e te au angaanga pikikaa. (Anga. 17:5-9, 13) Tetai au taime, e rauka ana i te iti tangata o Iehova i te tauturu na roto i te ture ta te au kavamani i akanoo. (Anga. 22:25; 25:11) Inara, e arai ana rai te au tutara i ta tatou angaanga, i te tauta anga kia takore takiri i ta tatou angaanga orometua. (Sala. 2:1-3) I roto i tera turanga, kia ngakau toa tatou i te aru i te akaraanga o te au apotetoro tiratiratu tei akakite e: “Ko te Atua ta matou e akarongo e tikaʼi auraka te tangata.”—Anga. 5:29.

¹⁴ I te mea te maata ua atura te peu akaepaepa enua i te ao nei, te pakari ua atura te taomianga ki runga i to Iehova iti tangata kia akaruke i ta ratou angaanga tutu evangeria ta Iehova i akamana ia ratou kia rave. Kua mārama meitaki to Iehova au tavini i te aiteanga o te akamatakiteanga i roto ia Apokalupo 14:9-12 no runga i te akamori i “te puaka taae e tona tutu.” Te kite nei tatou i te puapinga o ta Ioane tuatua e: “Teia te akakoromaki o te aronga tapu, ko tei tāpu i te au akauenga a te Atua, e te akarongo ia Iesu.”

¹⁵ Penei no te tamaki, te meameaau me kore te takinga kino, e te au araianga a te kavamani, ka ngatā roa atu te rave atea ua i ta tatou akamorianga Kerititiano. Penei kare e rauka kia rave i te uipaanga a te putuputuanga. E penei ka araiia to tatou tika kia tuatua atu me kore kia tuku imere e te vai atura, ki te opati Betela. E penei ka araiia te au akaaere tutaka me atoro mai, e kare a tatou puka e tae mai. Me tupu ake teia, eaa ra taau ka rave?

¹⁶ Pauanga, e rave i taau ua atu ka rauka i roto i teia au turanga nei. Kia rave rai i taau uaorai apii. E akameangiti ua i te au pupu me uipa i roto i te ngutuare o te au taeake. Taangaanga i te au puka takere kua apiiia ana, e pera katoa te Pipiria no ta tatou uipaanga. Eiaa e manamanata, e eiaa e apiapi. E au ravenga tetai ka rauka i te Pupu Akaaere kia karangaranga mai ki te aronga pakari no tetai taime poto ua.

¹⁷ Noatu e mamao te ngai e noo ra koe mei ko i toou au taeake Kerititiano, e akamaara e tei vaitata uao a Iehova e tana Tamaiti ko Iesu Mesia, ia koe. Kia vai ngaueue kore rai toou akarongo. Te rongo maira a Iehova i taau pure, e ka oronga mai aia i tona vaerua ei akamatutu ia koe. Pati i tana aratakianga. E akamaara e e tavini koe no Iehova, e e pipi na Iesu. No reira, e taangaanga meitaki i te au atianga kia akakite i te Patireia ki etai ke. Ka akameitaki mai a Iehova i taau tautaanga. Penei kare e roa atu ka piri mai etai ke ki te akamori ia Iehova.—Anga. 4:13-31; 5:27-42; Phili. 1:27-30; 4:6, 7; 2 Timo. 4:16-18.

¹⁸ Inara mei te mea e ka tamatakuia mai koe e ka riro ei mate noou, tuku i toou irinakianga ki roto ia Iehova ‘te Atua, tei akatu i tei mate.’ (2 Kori. 1:8-10) Ka riro toou akarongo i roto i te akatuakaouanga ei tauturu ia koe kia akakoromaki noatu te pakari o te takinga kino. (Luka 21:19) Kua akanoo a Iesu Mesia i te akaraanga; kua kite aia e ka riro tona tu tiratiratu noatu te timataanga, ei akamaroiroi i etai ke kia akakoromaki. Ka riro katoa koe ei akamaroiroianga maata ki toou au taeake.—Ioa. 16:33; Ebe. 12:2, 3; 1 Pete. 2:21.

¹⁹ Kapiti mai ki te takinga kino e te patoianga, penei ka anoanoia koe kia akakoromaki i tetai au turanga ngatā ke atu. Ei akaraanga, taitaia tetai aronga no te mea kare te tangata e ariu mai ana ki te karere Patireia. Tetai papaki, te tauta ra i te akakoromaki i to ratou uaorai turanga makimaki, te ngakau taitaia me kore, tetai au turanga apikepike o te kopapa. I na roto katoa ana a Paulo i tetai au turanga kino tei riro ei tamanamanata e tei akangatā roa atu i tana angaanga tutu evangeria. (2 Kori. 12:7) Pera katoa a Epaperodito, e taeake Kerititiano aia no Philipi i te anere mataiti mua, kua aue aia no te mea kua akarongo tona au oa e kua maki aia. (Phili. 2:25-27) E riro ana to tatou tu apa ua, e to etai ke ei mea ngatā roa atu na tatou kia akakoromaki i te manamanata. Penei kare to tatou tu e āu ana ki to te au oa Kerititiano me kore ki to tatou uaorai ngutuare tangata. Inara ka rauka ua i te aronga tei akarongo ki te ako a te Tuatua a Iehova, kia akakoromaki e kia akakore i taua au tu ra.—Eze. 2:3-5; 1 Kori. 9:27; 13:8; Kolo. 3:12-14; 1 Pete. 4:8.

KIA VAI TIRATIRATU

²⁰ Kia vai tiratiratu tatou kia Iesu, ta Iehova i akamana ei Upoko no te putuputuanga. (Kolo. 2:18, 19) Ka anoanoia tatou kia angaanga kapiti ki te “tavini akono meitaki e te pakari” e ki te aronga tei akamanaia ei au akaaere. (Ebe. 13:7, 17) Na te aru vaitata anga i ta Iehova akanoonooanga, e te taokotai anga ki te aronga pakari, ka akaaere meitakiia tatou kia rave i to Iehova anoano. Ka anoanoia tatou kia taangaanga meitaki i to tatou tikaanga ngateitei kia pure. Kia akamaara e noatu kua uriia tatou ki roto i te are auri e noatu ka akataaia, kare e rauka i te au ravenga a te tangata kia arai ia tatou mei te karangaranga atu ki to tatou Metua i te rangi, e kia takore i to tatou turanga rotai e te au taeake.

²¹ Kia tauta e kia akakoromaki tatou i te tutu i te evangeria, e kia rave tiratiratu atu rai i te angaanga ta Iesu i akanoo kia rave tana au pipi, i te na ko anga e: ‘E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; Ma te apii atu ia ratou, kia akono i te au mea katoa taku i akaue atu kia kotou.’ (Mata. 28:19, 20) Mei ia Iesu rai, kia akakoromaki tatou. Kia akamou ua rai tatou i te manakonakoanga o te Patireia e te oraanga mutu kore ki mua ia tatou. (Ebe. 12:2) Ei au pipi papetitoia na te Mesia, e tikaanga ngateitei to tatou kia ō atu ki te akatupu anga o ta Iesu totou no runga i “te openga o teianei ao.” Akakite aia e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mata. 24:3, 14) Me rave maroiroi tatou i teia angaanga ma te ngakau katoa i teia tuatau openga, ka rauka ia tatou te rekarekaanga mou o te oraanga e tuatau ua atu i roto i to Iehova ao ou e te tuatua tika!