Eaa tei Umuumuia i to Tatou Tu Kauraro Anga Atua

“E tenana e kauraro atu kotou i te Atua.”​—IAKOBO 4:7.

1. Eaa te ka rauka kia tuatuaia no te tu Atua ta tatou e akamori nei?

E ATUA umere tikai a Iehova! E aite koreia, kare tetai atu mei iaia rai, kare e rauka kia akaaite atu kiaia, e manganui tona au tu takake ra! Koia tei Teitei Rava, tei Ngateitei i te Ao Katoa e Pini Ua Ake e te vaira te mana tika katoa iaia ra. No te tuatau mutu kore aia e mutu kore ua atu e no te maata tona kaka kare e tika kia akara tetai tangata iaia e ka ora atu ei. (Exodo 33:20; Roma 16:26) Kare i kotingaia tona mana e tona pakari, e apa kore tikai tana akava anga, e koia tikai te aroa. Koia Tei Anga mai ia tatou, koia to tatou Akava, to tatou Tuku Ture, e to tatou Ariki. Te au mea memeitaki i o maiia ra, e te au mea tika ravarai no ko mai iaia ra.​—Salamo 100:3; Isaia 33:22; Iakobo 1:17.

2. Eaa te au mea te kapitiia maira ki te tu kauraro anga atua ra?

² I te manako anga i teia au tika katoa, kare e ekoko anga no ta tatou apainga kia kauraro atu iaia ra. Inara eaa te kapitiia maira e te reira no tatou nei? E manganui te apinga. I te mea kare tatou uaorai e akara mata i te Atua ia Iehova ra, te kapiti ra te kauraro anga iaia i te akarongo anga i te reo o tetai akava ngakau tei apiiia ra, te taokotaianga ma te akaaerenga a te Atua i te enua nei, te kiteanga i te aronga mana taoonga ra, e te kauraroanga i te kaveinga no te upoko anga i roto i te ngutuare tangata ra.

Mouanga i te Akava Ngakau Meitaki

3. E tamou marie ei i te akava ngakau meitaki, eaa te au tu ture te ka tau tatou kia akarongo?

³ E mou ei te akava ngakau meitaki, ka tau tatou kia akarongo i te apinga kare ra i maroia mai​—koia oki, te au ture me kare kaveinga kare ra e rauka e no te tangata e maro mai kia raveia. Ei akatauanga, te tai ngauru o te akaueanga o te Ture Ngauru ra, tei akaueia maira kia kore e morimori apinga, kare te reira na te aronga mana taoonga tangata nei e maro mai kia akonoia. E no reira, te akakite maira te reira i te akamataanga o te Ture Ngauru e no ko mai i te Atua ra, no te mea kare e pupu tangata maani ture te ka maani i tetai ture te ka kore e maroia mai na te akautunga anga me ka aatiia ia. Na teia ture, kua oronga te Atua ko Iehova ra i te apainga na te Iseraela tataki tai ra kia riro koia uaorai tona akava​—me te anoano ra aia i te akava ngakau meitaki. (Exodo 20:17) Mei te reira katoa, i roto i te au angaanga a te kopapa te ka arai i tetai kia kore e o i te Patireia o te Atua ra koia te “vareae” e te “riri”​—e au tu manako ia kare e rauka i te au akava tangata nei i te tuku i te akautunga e kare e rauka ia ratou i te maro atu kia akonoia. (Galatia 5:19-21) Inara kia raukai te mou i te akava ngakau meitaki, ka tau tatou kia kopae ke i te reira au mea.

4. E tamou marie ei i te akava ngakau meitaki eaa te au kaveinga a te Puka Tapu te ka tau tatou kia akono?

⁴ Ae, ka tau tatou kia akono i te au kaveinga Puka Tapu i to tatou oraanga. Ko te reira au kaveinga ka rauka i te kapitiia i nga ture e rua ta Iesu Karaiti i taiku atura i te pauanga i te uianga e ko teea te akauenga i maata o te ture a Mose ra. “E anoano atu koe i to Atua ia Iehova ma to ngakau katoa, e ma to meta katoa, e ma to manako katoa. . . . E aroa atu koe i toou tangata tupu mei te aroa ia koe uaorai.” (Mataio 22:36-40, NW) I te akatutuanga mai i tei kapitiia ra ki roto i te rua o eia akauenga te vaira nga tuatua a Iesu tei tataia ia Mataio 7:12: “E te au mea katoa ta kotou i anoano ia etai ke ra, na reira katoa kotou ia ratou: ko ta te ture ïa, e ta te au peroveta.”

5. Akapeea e raukai ia tatou te tamou marie i te pirianga meitaki ma te Atua ra ko Iehova?

⁵ Ka tau tatou kia rave i ta tatou i kite e ko te tika ia e auraka e rave i ta tatou i kite e e tarevake ia, noatu e me te kite maira etai ke e me kare ua. Ko teia ia, noatu me kare tatou e kitea mai ko te kore e rave i tei tau kia raveia e tatou me kare ko te rave anga i tei tau kore ra. Ko tona aite anga ko te tamouanga i te pirianga meitaki ma to tatou Metua i te rangi ra, ma te manako anga i te akamatakite anga ta te apotetoro ko Paulo i tuatua maira ia Ebera 4:13: “Kare rava e mea ngaro iaia: te vai ua nei ra te au mea katoa ma te maeu rava ki mua i tona mata, tei iaia te tuatua ia tatou nei.” Na te rapurapu anga i te rave i te tika ka tauturu ia tatou kia maro atu i te au ravenga akavare a te Tiaporo, kia maro atu i te au taomi anga o teianei ao, e kia patoi atu i te au tu manako akatuangaia maira no te noinoi.​—Akaaiteia atu kia Ephesia 6:11.

Kauraro Anga i te Akaaerenga a te Atua Ra

6. Eaa te au mataara no te komunikeiti anga ta Iehova ra i taangaanga i te au tuatau i mua ake i te akonoanga Kerititiano ra?

⁶ Kare te Atua ra ko Iehova i akaruke takiri mai kia tatou tataki tai te tuku anga i te tika e akapeea tatou i te akono anga i te au kaveinga Puka Tapu i to tatou oraanga. Mei te akamata anga mai o te tuatua enua o te tangata nei, kua akono te Atua ko te au tangata ra te au mataara no te komunikeiti anga. E no reira ko Adamu to te Atua ra vaa tuatua atu kia Eva. Te akauenga no te ua tureia ra kua orongaia kia Adamu i mua ake ka angaia mai ei a Eva, penei na Adamu i akakite atu kia Eva to te Atua ra anoano nona. (Genese 2:16-23) Ko Noa ta te Atua ra peroveta ki to ngutuare tangata e ki to te ao i mua ake i te tiruvi ra. (Genese 6:13; 2 Petero 2:5) Ko Aberahama to te Atua ra vaa tuatua ki tona ngutuare tangata. (Genese 18:19) Ta te Atua ra peroveta e tona mataara komunikeiti anga ki te iti tangata o Iseraela ra ko Mose. (Exodo 3:15, 16; 19:3, 7) I muri mai iaia, tae roa mai kia Ioane Papetito, e manganui te au peroveta taunga, e te au ariki tei taangaangaia e te Atua ra e komunikeiti i tona ra anoano ki tona au tangata.

7, 8. (a) I te aerenga mai o te Mesia ra, koai tei riro kia taangaangaia ei vaa tuatua no te Atua ra? (e) Eaa ta te tu kauraro anga atua ra i umuumu i te Au Kite o Iehova i teia tuatau nei?

⁷ I te taenga mai te Mesia, koia a Iesu Karaiti, kua taangaanga te Atua iaia e tona au oa piri vaitata iaia ra koia te au apotetoro e te au pipi kia tavini atu ei vaa tuatua Nona ra. I muri akera, kua rave te au pipi tiratiratu akatainuia a Iesu Karaiti ra ei “tavini akono meitaki ra e te pakari” i te komunikeiti anga ki te au tangata o Iehova e akapeea te akono anga i te au kaveinga o te Puka Tapu i to ratou au oraanga ra. Kua riro te aite anga o te tu kauraro anga i te Atua ra e ko te irinakianga i te apinga ta te Atua ko Iehova e taangaanga ra.​—Mataio 24:45-47; Ephesia 4:11-14.

⁸ Te akaari maira te au tika e i teia tuatau nei te kapiti atura “te tavini akono meitaki e te pakari” ma te Au Kite o Iehova e kua komonoia e te Pupu Akaaere o te Au Kite ra. E kua riro na taua pupu ra e akataoonga i te aronga akaaere i te au angaanga ke ke ra​—mei te aronga pakari e te aronga tutaka aere ra​—ei arataki i te angaanga i tetai ngai ra. Te umuumuia ra te tu kauraro anga atua i te Au Kite tataki tai tei akatapuia ra kia kauraro atu i teia au akaaere i te akamou atu anga ki ta Ebera 13:17 (NW): “E akarongo atu i te aronga arataki ia kotou na ka kauraro atu ei, no te mea ko ratou te tiaki ra i to kotou au meta, e na ratou e akakite to kotou tu; kia rauka ia ratou te rave i te reira ma te rekareka kare e ma te aue, ko te kino aea kotou no te reira.”

Arikianga i te Ako Anga

9. Eaa te putuputu ra te kapitiia atu ki te tu kauraro anga atua ra?

⁹ E putuputu te tu kauraro anga atua ra i te akatupuia na te arikianga i te ako anga mei ko mai i te aronga tavini ra ei akaaere. Me kare tatou e rave ua ana i te ako anga tau no tatou uaorai, penei ka tau tatou kia apiiia e kia akoia mai e te aronga e kite to ratou e te mana oki no te rave i te reira, mei to tatou aronga pakari o te putuputuanga ra. Ko te ariki i te reira ako anga ko te mataara pakari ia.​—Maseli 12:15; 19:20.

10. Eaa te apainga a te aronga tei akono ra i te ako anga?

¹⁰ E mea tau ra, ko te aronga pakari te oronga ra i te akoanga e meitaki kia tau ratou ei akaraanga no te tu kauraro anga atua ra. Na ea ra? I ta Galatia 6:1 e akakite maira; kare e kia meitaki anake ua te tu ta ratou apiianga mari ra kia tau katoa oki te akaraanga: “E te au taeake ra, kia rokoia tetai e te apa ra, ka akaora kotou ko tei akono i ta te Vaerua ra i te reira, ma te ngakau maru; ma te manako ia koe uaorai, ko te timata katoaia aea koe.” Ko tera te tu, e mea tika kia tau te apiianga a te tangata pakari ra ki tana akaraanga e akanoo maira. Te rotai ra te reira ma te akoanga tei orongaia maira ia 2 Timoteo 2:24, 25 e ia Tito 1:9. Ae, ko te aronga te oronga ra i te ako anga me kare akatikatika anga e mea tau no ratou kia matakite auraka ei vaa karaea. Ka tau ratou kia maru, kia takinga meitaki, e inara, kia turori kore oki i te mouanga i te au kaveinga i roto i te Tuatua a te Atua ra. E mea tika no ratou kia akono ei aronga akarongorongo ma te kore e ngakau akavaavaa, ei akaanga i te roi o te aronga i roiroi ra e te teiaa ra i te apainga.​—Akaaiteia atu kia Mataio 11:28-30.

Kauraro Anga i te Aronga Mana Taoonga

11. Eaa te umuumuia ra i te au Kerititiano i to ratou au pirianga ma te aronga mana taoonga o te enua nei?

¹¹ Te umuumu katoaia ra i te tu kauraro anga atua ra kia akarongo tatou i te aronga mana o te enua nei. Te apiiia maira tatou ia Roma 13:1 e: “Kia kauraro marie te tangata katoatoa i te aronga mana taoonga ra, Kare rava oki e mana mari ra no ko mai i te Atua ra; te aronga mana e noo nei, kua akonoia ïa e te Atua.” Te umuumuia ra tatou, i roto i etai atu au mea ke ra, kia akono i te au ture akaoro i runga i te mataara, e kia akamanako meitaki katoa i te tutakianga tero e te taunga ra, mei ta te apotetoro ko Paulo i taiku maira ia Roma 13:7.

12. Na roto i teea tu te kotinga angaia to tatou kauraro anga kia Kaitara?

¹² Inara, te taka meitaki ra e ko te reira au kauraro anga katoatoa kia Kaitara kare i te katoa anga ra. E mea tika no tatou kia tamou ki to tatou manako i te kaveinga ta Iesu Karaiti i akakite ra mei tei papaia ia Mataio 22:21: “E apai mari i ta Kaisara kia Kaisara; e ta te Atua ra, e apai ïa ki te Atua.” I tetai tataanga i raro ake no to Roma 13:1 ra i te Oxford NIV [New International Version] Scofield Study Bible te akakite maira: “Kare te aite anga o teia e kia akono aia i te au ture te akatika ra i te akaturi me kare e tau kore i te Kerititiano. I roto i te reira turanga tei runga iaia te tika kia akarongo i te Atua e kare i te au tangata nei (Anga. 5:29; cp. Dan. 3:16-18; 6:10ff).”

Tu Kauraro Anga Atua i Roto i te Ngutuare Tangata

13. Eaa te umuumuia ra i roto i te tuanga o te ngutuare tangata no te tu kauraro anga atua ra tona au mema katoa?

¹³ I roto i te ngutuare tangata katoa, ko te tane koia te metua ra ka akonoia aia ei upoko. Te umuumuia ra te au vaine kia akono i te apiianga orongaia maira ia Ephesia 5:22, 23: “E te au vaine noo tane ra, e kauraro kotou ki ta kotou uaorai au tane, mei ta kotou e tu kauraro anga i te Atu ra. Ko te tane oki te upoko o te vaine, mei te Mesia katoa ra te upoko ïa i te ekalesia.”a E ko te au tamariki, kare na ratou uaorai e maani i te au ture no ratou mari ra ka tika ratou i te tu kauraro anga atua ra ki to ratou metua tane raua ko te metua vaine, mei ta Paulo i akataka mai ia Ephesia 6:1-3: “E te au tamariki ra, e akarongo atu i to kotou au metua i tei tau i te Atu ra; e tuatua-tika oki te reira. ‘E akangateitei i to metua tane e to metua vaine’; (ko te akauenga muatangana ïa i paʼuia i te meitaki i akakiteia mai;) ‘Kia meitaki koe, e kia akaroaia toou puke rā i te enua nei.’”

14. Eaa te umuumuia ra i te au upoko o te ngutuare tangata i te tu kauraro anga atua ra?

¹⁴ Inara, ka riro kia ngoie ua no te au vaine e te tamariki kia akono i te reira tu kauraro anga atua me ka akaari te au tane e te au metua i to ratou uaorai tu kauraro anga atua ra. Ka rave ratou i te reira na te akonoanga i to ratou taoonga ei upoko kia tau ki te au kaveinga o te Puka Tapu, mei tei kiteia ra ia Ephesia 5:28, 29 e te 6:4: “E aroa katoa te au tane i ta ratou uaorai au vaine e tikaʼi, mei to ratou uaorai kopapa; ko tei aroa i tana uaorai vaine, kua aroa aia iaia uaorai. Kare ua e tangata e makitakita i tona uaorai kopapa e teia noaʼi oki, kareka e angai e te akaperepere marie; mei ta te Atu i te ekalesia nei.” “Ko kotou oki te aronga metua, auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.”

Au Tauturu no te Akakiteanga i te Tu Kauraro Anga Atua

15. Eaa te ua o te vaerua ra te ka tauturu ia tatou kia akakite i te tu kauraro anga atua ra?

¹⁵ Eaa te ka tauturu ia tatou kia akakitekite i te tu kauraro anga atua ra i roto i teia au ngai tuke tuke? Te mea mua, ko te aroa noinoi kore​—te aroa atu i te Atua ia Iehova e te aronga katoa oki tana i tuku ei akaaere ia tatou. Te tuatuaia maira kia tatou ia 1 Ioane 5:3: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.” Kua oronga katoa mai oki a Iesu i te reira manako ia Ioane 14:15: “Kua anoano kotou iaku ra, ka akono i taku ra au akauenga.” E tika tikai, ko te aroa​—te ua puapinga tikai o te vaerua—​ka tauturu te aroa ia tatou kia ariki i te au mea ravarai ta Iehova ra i rave mai na tatou e ka tauturu te reira ia tatou kia akono i te tu kauraro anga atua ra.​—Galatia 5:22.

16. Eaa ta te mataku i te Atua ra tauturu i te akaari anga i te tu kauraro anga atua ra?

¹⁶ Te rua, te vaira te mataku i te atua. Na te mataku i te akamareka kore i te Atua ia Iehova ra ka tauturu ia tatou no te mea ko tona “ko te rikarika ia i te kino.” (Maseli 8:13, NW) Kare e ekoko anga, ko te mataku i te akamareka kore ia Iehova ra ka paruru ia tatou kia kore e tuku ua no te mataku i te tangata nei. Ka tauturu katoa oki te reira ia tatou kia akono i ta te Atua ra au apiianga noatu eaa te au tu ngata no te akonoia. Pera katoa, na te reira e tapu ia tatou kia kore e tuku ua ki te au timata anga me kare ki te au manako anga no te rave i te tarevake ra. Te akaari maira te au Tuatua Tapu e no te mataku o Aberahama ia Iehova i raukai iaia i te tamata kia oronga i tana tamaiti akaperepere ia Isaaka ei atinga, e no te mataku i te akamareka kore ia Iehova i raukai ia Iosepha kia patoi atu i te tamata anga a te vaine a Potiphara i te rave akaturi ra.​—Genese 22:12; 39:9.

17. Eaa te tuanga ta te akarongo ka rave i to tatou akonoanga i te tu kauraro anga atua ra?

¹⁷ Te toru o te tauturu ko te akarongoia i te Atua ia Iehova ra. Na te akarongo e raukai ia tatou kia akono i te apiianga tei orongaia maira ia Maseli 3:5, 6: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” E maata atu oki te tauturu a te akarongo ia tatou me te akara anga e te mamae tau kore ua ra tatou me kare te manako ra e te akakinoia maira tatou no to tatou enua me kare iti tangata me kare no etai tukeanga i te tu ei tangata. Ko tetai papaki penei ka manako e kua tarevake te kore anga e manako mai ia ratou i te iki anga kia tavini ei tetai o te aronga pakari me kare ei tavini orometua. Me e akarongo to tatou, ka tiaki tatou ia Iehova nana e akatikatika i te reira tumu i te tuatau tau iaia ra. No teia tuatau penei ka anoanoia tatou kia tatanu i te akakoromaki anga tiaki marie ra.​—Te Aue o Ieremia 3:26.

18. Eaa te a o te tauturu i te akaarianga i te tu kauraro anga atua ra?

¹⁸ Te a o te tauturu ko te taakaaka ia. Kare e rave anga ngata no tetai tangata taakaaka kia akakite i te tu kauraro anga atua ra no te mea ‘no te tu manako akaaka, te manako akameitaki atura i etai ke e maata atu iaia uaorai.’ Ko te tangata taakaaka e mareka ua aia kia akariro iaia uaorai ei “tei mea ngiti rava.” (Philipi 2:2-4; Luka 9:48) Inara ko te tangata ngakau parau kare e reka i te kauraro anga e ka aviriia i te reira. Kua oti te tuatuaia e ko te reira tu tangata e reka atu aia kia kino aia na te akapaapaaia i te akaoraia na te tuatua akakinoia.

19. Eaa te akaraanga meitaki no te taakaaka tei orongaia mai e tetai peretiteni mua o te Totaiete Punanga Tiaki ra?

¹⁹ Ko tetai akaraanga meitaki no te taakaaka e te tu kauraro anga atua ra kua akonoia e Joseph Rutherford, koia te rua o te peretiteni o te Totaiete Punanga Tiaki Puka Tapu e te Pepa Akonoanga. I ta Hitler arai anga i te angaanga a te Au Kite o Iehova ra i Tiamani, kua tata atu te au taeake i reira kiaia ma te uianga eaa ta ratou ka tau kia rave i te mea kua araiia ta ratou au uipaanga e ta ratou angaanga tutu aere. Kua taiku atu aia i te reira ki te ngutuare tangata o te Betela e kua akakite papu atura aia e kare aia i kite eaa tana ka tuatua atu ki te au taeake i Tiamani ra, e maata atu oki no te mea e kino tikai te au akautunga tei raveia ki te au taeake i Tiamani ra e te kavamani a Hitler ra. Kua karanga aia e me e tangata tetai tei kite ra e eaa e tuatua atu kia ratou, ka rekareka aia i te akarongorongo atu i te reira. Mei teaa ra te vaerua taakaaka!b

Au Puapinga no te Akakiteanga i te Tu Kauraro Anga Atua

20. Eaa te au akameitakianga tei tupu mai no te akakiteanga i te tu kauraro anga atua ra?

²⁰ Penei ka tau kia uiia, eaa tikai te au puapinga no te akakiteanga i te tu kauraro anga atua ra? E manganui, tikai. Ka ora tatou i te au apiapi e te au manamanata te tupu ra ki te aronga rave akatakake ra ia ratou. Te rekareka nei tatou i te pirianga meitaki ma te Atua ko Iehova ra. Tei ia tatou nei te taokotai anga meitaki roa ma to tatou au taeake Kerititiano ra. Pera katoa, na to tatou akonoanga ia tatou uaorai kia tau ki te ture, ka kopae ke tatou i te au taitaia puapinga kore ua ma te aronga mana taoonga o te enua nei. Te rekareka katoa ra tatou i te oraanga ngutuare tangata ei au tane e ei au vaine, ei au metua e ei tamariki. E pera katoa oki, na te tamou marie anga i te tu kauraro anga atua ra, kua akono tatou kia rotai ki te apiianga tei orongaia maira ia Maseli 27:11: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.”

[Au Tataanga Rikiriki i Raro]

Au Uianga Akamanako Akaou

◻ Ko teaa au tangata ta te Atua ra i taangaanga ei matara no te komunikeiti anga, e eaa ta tona au tavini i kaiou atu kia ratou ra?

◻ I teea au pirianga tuke tuke te akonoia ra te tu kauraro anga atua ra?

◻ Eaa te au tu te ka tauturu ia tatou kia akaari i te tu kauraro anga atua ra?

◻ Eaa te au akameitakianga te ka tupu mai no te tu kauraro anga atua ra?

[Tutu i te kapi 16]

Kua akono te Atua na te akaaerenga i te iero i Ierusalema ra e akakitekite atu tona anoano ki tona au tangata ra

[Au Tutu i te kapi 18]

Te au ngai te ka rauka ia tatou i te akakitekite i te tu kauraro anga atua ra