Kia Matakite e kia Maroiroi!

“Kia matakite ia kotou, kare kotou i kite i te rā, e te ora.”​—MATAIO 25:13.

1. Eaa ta te apotetoro ko Ioane i akara atu ki mua ra?

I ROTO i te tuatua anga openga i roto i te Pipiria, kua taputou a Iesu: “Te aere vave atu nei au.” Kua pau atura tana apotetoro ko Ioane: “Amene. Koia ïa, ka aere mai, e te Atu, e Iesu e.” Kare o te apotetoro ra ekoko anga e ka aere mai a Iesu. Ko Ioane tetai i roto i nga apotetoro tei ui atura kia Iesu: “E akakite mai koe ia matou i te tupu anga o taua au mea nei, e te akairo o toou aerenga mai [Ereni, pa·rou·siʹa] e te openga o teianei ao”? Ae, kua tapapa irinaki tika atura Ioane ki to Iesu ra parutia i te tuatau ki mua.​—Apokalupo 22:20; Mataio 24:3

2. No te parutia o Iesu, eaa te turanga i te au ekaretia ra?

² E taki tai ua ake taua tu irinaki anga ra i to tatou tuatau nei. E apiianga akamanaia ta te au ekaretia e manganui no to Iesu “aerenga mai,” inara e tokoiti ua to ratou au mema te tapapa atura i te reira. Te akono tau ra ratou ki te reira tu. Te akakite ra te puka The Parousia in the New Testament: “E meangiti ua ra te mana papu o te manakonako Parutia i roto i oraanga, te manako e te angaanga oki a te ekaretia ra. . . . Ko te tu rapurapu tikai tei tau ra te ekaretia kia rave i tana au angaanga no te tataraara e te akakitekite anga mitinari i te evangeria, kua apikepike roa me kare kua ngaro takiri ia.” Inara kare ki te katoatoa ra!

3. (a) Akapeea te manako ngakau o te au Kerititiano no te parutia ra? (e) Eaa tikai ta tatou ka akamanako i teianei?

³ Te tatari akatenga nei te au pipi mou a Iesu i te openga o te akatereanga kino o te au mea nei. Ia tatou e rave tiratiratu ra i te reira, ka tau tatou kia tamou i te akara anga tika ki te au mea ravarai te o atura ki to Iesu parutia e ka rave ei kia tau i te reira. Na te reira ka raukai ia tatou kia ‘tāpu tikai e tae ua atu ki te openga kia orai.’ (Mataio 24:13) I te orongaanga i te totou ta tatou e kite ia Mataio pene 24 e te 25, kua oronga mai a Iesu i te apiianga pakari te ka rauka ia tatou kia akono, ei puapinga mutu kore no tatou. Te vaira i te pene 25 nga parapore penei te kite ra koe, te kapiti ra i tetai no te au paretenia tino ngauru ra (te paretenia pakari e te neneva) e te parapore no te au tareni ra. (Mataio 25:1-30) Akapeea e puapingaiai tatou mei taua nga akatutuanga ra?

Kia Matakite, mei Nga Paretenia e Rima Ra!

4. Eaa te apiianga maata o te parapore o te au paretenia ra?

⁴ Penei ka anoano koe kia tatau akaou i te parapore no te au paretenia, te kitea ra ia Mataio 25:1-13. Te akanoonooanga ko tetai akaipoipoanga maata na te ngati Iuda ra, ka aere te tane akaipoipo ou ra ki te are o te metua o te vaine akaipoipo ou ra e arataki mai iaia ki te are o te tane akaipoipo (me kare ki tona metua tane ra). Penei ka kapitiia atu te aronga akatangi imene e te aronga imene katoa oki, e kare e kiteaia te taime tikai o to ratou tae atuanga. I roto i te parapore ra, e tai ngauru au paretenia tei tatari atura tae roa ki te turuaipo no te tae atuanga taua tane akaipoipo ou ra. E rima o ratou kua neneva ua kare i apai atu kia rava te inu no to ratou ramepa no reira kua aere e oko mai i tetai. Ko etai atu e rima ra kua rave pakari mai kia rava te inu ei akaki akaou i to ratou ramepa me ka anoanoia i te tuatau tatari anga ra. Ko taua aronga toko rima ua ra kua papa i reira i te tae atu anga te tane akaipoipo ou ra. No reira, ko ratou anake ua tei akatikaia kia tomo ki te oroa ra. I te oki anga mai nga paretenia e rima neneva ra, kua tureiti roa no ratou kia tomo atu ki roto.

5. Eaa te au irava te akamarama maira i te aiteanga akatutu o te parapore no te au paretenia ra?

⁵ E manganui te au tu o teianei parapore ka rauka kia kiteia ei akatutu anga. Ei akatauanga, te tuatua ra te au Tuatua Tapu ia Iesu ei tane akaipoipo ou. (Ioane 3:28-30) Kua akaaite atura Iesu iaia uaorai ki te tamaiti a tetai ariki tei akateateamamaoia ra tetai oroa akaipoipoanga i tana tamaiti. (Mataio 22:1-4) E te akaaite atura te Pipiria ia Karaiti ki tetai tane. (Ephesia 5:23) E mea tau kia akamanako, e noatu rai te akatakaia ra te au Kerititiano akatainuia i etai atu ngai te “vaine akaipoipo ou” a Karaiti, kare ra te parapore ra i taiku i tetai vaine akaipoipo ou. (Ioane 3:29; Apokalupo 19:7; 21:2, 9) Inara, te tuatua ra ia no te tino ngauru paretenia, e ko te aronga akatainuia ra te akaaiteia ra i etai atu ngai ei paretenia tei taputouia ra kia akaipoipo ia Karaiti.​—2 Korinetia 11:2.a

6. Eaa te akamaroiroi anga ta Iesu i oronga mai i te taopenga anga i te parapore no te au paretenia ra?

⁶ I te pae atu i taua au tumu ra e etai ua atu au akakite anga totou, te vaira etai atu kaveinga meitaki te ka rauka ia tatou kia kite mei teianei parapore. Ei akatauanga, e tamanako ana e kua taopenga a Iesu i te reira ma te au tuatua: “E teianei, kia matakite ia kotou, kare kotou i kite i te rā, e te ora.” No reira te oronga maira te parapore i te umuumu anga no tatou tataki tai kia matakite, kia akara atu ki te vaitataanga mai te openga o teianei akatereanga kino. Kare e ekoko anga te aere mai nei teianei openga, noatu rai e kare e rauka ia tatou te tou atu i tetai ra. No teianei tu e akamanako ana i te tu manako tei akakiteia mai e nga pupu paretenia e rua ra.

7. Na roto i teea tu to nga paretenia e rima i roto i te parapore ra akapapu anga i te tu neneva?

⁷ Kua karanga a Iesu: ‘E toko rima o ratou e neneva.’ No te mea ainei e kare ratou i irinaki e te aere maira te tane akaipoipo ou? Te aruaru ra ainei ratou i te au mea e navenave ei ra? Me kare kua akavareia ainei ratou? Kare i pera. Kua karanga a Iesu e i “aere atura kia aravei i te tane akaipoipo ou ra,” taua aronga e toko rima ra. Kua kite ratou e te aere maira aia, e kua anoano kia o atu ratou, kia piri atu ki taua “oroa akaipoipoanga ra.” Inara, i teateamamao tikai ainei ratou? Kua tiaki ratou no tetai tuatau iaia, “tae roa ki te turuaipo ra,” inara kare ratou i papa no tona taeanga me aea ua atu te reira​—me i mua ake e me i muri akera i ta ratou i manako i te akamataanga ra.

8. Akapeea te akapapu anga nga paretenia e rima i te parapore ra i te tu pakari?

⁸ Etai toko rima ra​—te aronga ta Iesu i tapa ra e pakari​—kua aere katoa atu ma ta ratou ramepa te ka ra, i te tapapaanga i te taenga mai te tane akaipoipo ou ra. Kua tatari katoa oki ratou, inara e “pakari” ratou. Ko te tuatua Ereni tei uriia ra e “pakari” ka rauka kia oronga i te tu “kite, mako, e pakari tau tikai.” Kua akapapu teianei aronga e toko rima nei na te apaianga mai i te au ariki ma tetai atu inu i roto ei akaki akaou i ta ratou ramepa me ka anoanoia. Ko te tika, kua tau tikai to ratou manako anga kia papa no te tane akaipoipo ra e kare ratou e oronga ke atu i ta ratou inu ra. Kare taua tu matakite ra i tarevake, mei tei akapapuia ra na to ratou tae anga ki reira e te papa meitaki anga i te taenga mai te tane akaipoipo ra. Ko teia aronga “i vave ra, kua aere atura ratou ma ia katoa ki roto i te oroa akaipoipoanga ra; topiriia iora te pa.”

9, 10. Eaa te apiianga maata o te parapore o te au paretenia ra, e eaa te au uianga ka tau tatou ki ui ia tatou uaorai?

⁹ Kare a Iesu i oronga mai ana i tetai apiianga i te akonoanga meitaki no te akaipoipoanga, kare katoa oki aia e oronga mai ana i tetai ako anga no te tua anga apinga. Ko tana tumu koia: “Kia matakite ia kotou, kare kotou i kite i te rā, e te ora.” E ui kia koe uaorai, ‘Te matakite tikai ra ainei au no runga i to Iesu ra parutia?’ Te irinaki ra tatou e te tutara ra Iesu i teianei i te rangi, inara akapeea to tatou akapapa anga no te tika e ‘kare e roaia ka aere mai te Tamaiti a te tangata na roto i te tiao rangi ma te mana, e te kakā maata.’ (Mataio 24:30) I “te turuaipo ra” kua vaitata roa mai te taenga mai o te tane akaipoipo ou ra i to te aerenga mua atu o te au paretenia ra kia aravei iaia ra. Mei te reira katoa, te taenga mai o te Tamaiti a te tangata ra kia akapou i teianei akatereanga kino kua vaitata ua mai i to tatou akamata anga i te akara atuanga ki tona aerenga maira. (Roma 13:11-14) Kua tamou marie ainei tatou i to tatou matakite anga, e kia maata atu te matakite i te vaitata anga mai taua tuatau ra?

¹⁰ Kia akarongo i taua akauenga ra “kia matakite” te umuumuia ra kia tamou marie i te tu matakite. Kua tuku nga paretenia toko rima ra kia pou ta ratou inu e kua aere atu kia oko akaou mai i tetai. Penei tetai Kerititiano te aiteite ra i teianei tuatau kua aere ke tona manako no reira kare aia i papa meitaki no to Iesu ra taenga mai. I tupu te reira ki tetai papaki Kerititiano i te anere mataiti mua ra. Ka rauka katoa kia tupu te reira ki tetai papaki i teianei. No reira e ui tatou kia tatou uaorai, ‘Te tupu ra ainei te reira kiaku?’​—1 Tesalonia 5:6-8; Ebera 2:1; 3:12; 12:3; Apokalupo 16:15.

Kia Maroiroi i te Vaitata Mai Anga te Openga

11. Eaa te parapore ta Iesu i oronga i muri iora, e kua aite atura te reira ki teaa ra?

¹¹ I roto i tana parapore i muri maira, kua rave a Iesu kia tere atu i te raurau anga i tana au pipi kia matakite. I muri ake i te akakiteanga i nga paretenia pakari e nga paretenia neneva, kua tuatua aia i te akatutu anga no te au tareni. (E tatau ia Mataio 25:14-30.) I roto i etai tu e manganui kua akatutu mai teianei i tana parapore i mua akera no nga mina ra, ta Iesu i tuatua atura no te mea e manganui “te manako ra ratou e, e kitea mai te basileia o te Atua i reira ra.”​—Luka 19:11-27.

12. Eaa te tumu o te parapore o te au tareni ra?

¹² I te parapore o te au tareni ra, kua tuatua a Iesu no tetai tangata, tei pati i tona nga tavini e toru kia aere mai kiaia, i mua ake i tona aereanga i tetai aerenga mamao. Ki tetai kua oronga aia e rima tareni, ki tetai e rua, e ki te mea openga e okotai ua​—“i tei tau katoa i aua nga tangata ra.” I te akara anga, e tareni ario teianei, ko tetai moni matauia te tau ra i reira na te tangata kia rave angaanga e 14 mataiti katoa​—ko tetai moni maata ia! I te oki anga mai taua tangata ra, i te ‘tuatau roa akera’ akatikatika maira i te tuatua ia ratou ta ratou i rave iaia i aere ke atura. Kua taki rua te puapinga a nga tavini mua e rua ra no tei orongaia ra kia raua. Kua tuatua aia “kua tika rava,” e kua taputou kia raua taki tai kia maata atu ta raua apainga, e kua taopenga atu: “Aere [korua] ki roto i te rekarekaanga [o to korua] pu.” I te karangaanga e maata roa te umuumuanga a te pu ra, kare te tavini ma te tareni okotai ra i taangaanga i tana tareni kia rauka tetai puapinga. Kua uuna aia i te moni ra, kare ua i ori i te reira ki te aronga pangika kia rauka te puapinga. Kua tapaia aia e te pu ra ei “tavini kino nei e te akatau” no te mea kua rave patoi atu aia i tona pu ra. No reira, kua rave keia atu te tareni iaia ra, e kua uri keia atu aia ki vao “tei reira te aue e te pakati anga nio.”

13. Akapeea ta Iesu akapapu anga kia aite aia ki te pu i roto i te parapore ra?

¹³ I reira akaou, te au tumu no teianei ka rauka kia kiteaia i roto i tetai tu akatutu anga. Ei akatauanga, ko Iesu, tei akatutuia mai e te tangata tei aere ra ki te ngai mamao, ka akaruke mai i tana au pipi, ka aere atu ki te rangi, e ka tatari no tetai tuatau roa tae rava kia rauka iaia te mana ei ariki.b (Salamo 110:1-4; Angaanga 2:34-36; Roma 8:34; Ebera 10:12, 13) Inara, i reira akaou, ka rauka ia tatou tetai atu apiianga atea me kare kaveinga te ka tau tatou katoatoa kia akono i to tatou au oraanga. Eaa te reira?

14. Eaa te umuumu anga puapinga maata ta te parapore o te au tareni e akaketaketa maira?

¹⁴ Noatu me ko to tatou manakonakoanga ko te mate kore i te rangi me kare e oraanga mutu kore i runga i tetai enua parataito, te taka meitaki ra mei te parapore a Iesu e ka tau tatou kia rave maroiroi i te au angaanga Kerititiano. Ko te tika, te tuatua no teianei parapore ka rauka kia akatakaia i te tuatua: kia maroiroi. Kia akanoo te au apotetoro ra i te akara anga mei te Penetekote 33 T.N. mairai. Ka tatau tatou: “E manganui rai tana tuatua i karanga atu, e ako atura [Petero], na ko atura, Kia ora kotou i teianei uki māro.” (Angaanga 2:40-42) E mei teaa ra te au tupuanga meitaki i tana au tauta anga ra! I te kapiti anga etai atu ma te au apotetoro ra i te angaanga tutuanga Kerititiano, e maroiroi katoa ratou, ma te tuatua meitaki i ‘te akatupu i te ao katoa nei.’​—Kolosa 1:3-6, 23; 1 Korinetia 3:5-9.

15. Eaa te tu takake ka tau tatou kia akono i te tumu o te parapore o te au tareni ra?

¹⁵ E tamou i te manako o roto i teianei parapore​—e totou ia no to Iesu ra parutia. Kua rava ta tatou akapapu anga e te tupu nei to Iesu parutia e kare e roaia ka itae ki te take. E tamanako ana i te pirianga ta Iesu tuatua i rotopu i “te openga” e te angaanga ta te au Kerititiano i tau kia rave: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ia i reira ra.” (Mataio 24:14) Ma teianei i roto i te manako, ko teea tu tavini ta tatou e akatutu nei? E ui ia koe uaorai: ‘E tumu ainei tetai kia manako e te aite ra au ki te tavini tei uuna ra i tei orongaia kiaia, penei iaia e akono ra i tana uaorai au apinga ra? Me kare te taka meitaki ra ainei e te aite ra au ki nga tangata tei meitaki ra e te tiratiratu? Kua rave ainei au ma te ngakau katoa kia akatupu i te au apinga a toku Pu i te au atinga ravarai?’

Matakite e te Maroiroi i te Tuatau o Tona Parutia

16. Eaa te tuatua a nga parapore e rua ta tatou i uriuri manako te mou ra noou?

¹⁶ Ae, i te pae atu i to raua aiteanga akatutu anga e te totouanga, te oronga mai nei teia parapore e rua kia tatou i tetai akamaroiroi anga te aere maira mei te vaa o Iesu uaorai. Ko teia tana tuatua: Kia matakite; kia maroiroi, kia maata oki me kiteia te akairo o to Karaiti ra parutia. I teianei ia. No reira te matakite ra e te maroiroi tikai ainei tatou i teianei?

17, 18. Eaa ta te pipi ko Iakobo i ako mai no runga i te parutia o Iesu ra?

¹⁷ Kare te apa teina o Iesu ko Iakobo i runga i te Maunga i Oliveta i akarongo atu i ta Iesu totou; inara no muri mai aia i kite ei i te reira, e kua mou taka meitaki iaia tona puapinga. Kua tata aia: “E teianei e akakoromaki, e aku au taeake, e kia tae mai te Atu ra. I na oki te tanu-kai ra, te tatari marie ua ra aia i te kai meitaki o te enua nei, te akakoromaki marie ra oki i te reira, e kia rauka mai te ua momua e te ua openga ra. E akakoromaki katoa oki kotou; e akatinamou tikai i to kotou ngakau: kua vaitata rava taua aerenga mai o te Atu ra.”​—Iakobo 5:7, 8.

¹⁸ I te mea kua oronga aia i te akapapu anga e ka akava te Atua i te aronga te ka taangaanga tarevake i ta ratou au apinga, kua raurau a Iakobo i te au Kerititiano auraka kia akakoromaki kore ia ratou e tatari ra no Iehova kia rave. Penei ka riro te Kerititiano akakoromaki kore ra kia manako e mei te mea rai nana uaorai e akatikatika i te au tarevake tei raveia ra. Inara, kare te reira e tau, no te mea ka tae mai te tuatau no te akava anga. Te akatutu maira te akara anga a te tangata tanutanu ra i te reira, mei ta Iakobo i akataka maira.

19. Eaa te tu akakoromaki anga ta te tangata tanutanu Iseraela ka rauka kia akono?

¹⁹ Kua tatari te tangata tanutanu Iseraela tei tanu ra i te ua, te mea mua no te kao kia mama mai, i muri akera no te ngangaere kia pakari mai, e i te openga no te mou ra. (Luka 8:5-8; Ioane 4:35) I aua marama ra, e tuatau tetai e penei e tumu no etai apiapi anga. Ka aere mai ainei te au ua mua ra? Penei te au manumanu me kare tetai uriia ka tamate i te ua tupu maira? (Akaaite ia Ioela 1:4; 2:23-25.) Tera ra, i rungao katoa ka rauka i tetai tangata tanutanu Iseraela kia irinaki ia Iehova e te au tu natura tana i akanoo maira. (Deuteronomi 11:14; Ieremia 5:24) Ka riro te akakoromaki anga o te tangata tanutanu ra ei irinakianga tikai i te mea tapapaia ra. Na roto i te akarongo kua kite aia e ko tana i tatari ra ka tae mai ia. Ka tae tika mai ia!

20. Akapeea e raukai ia tatou kia akakite i te akakoromaki anga kia rotai ma ta Iakobo ako anga ra?

²⁰ I te mea penei e kite to te tangata tanutanu ra e aea e raveiai te mou, kare i rauka i te au Kerititiano o te anere mataiti ra te akataka e aea e tupu ei te parutia o Iesu ra. Inara, kua papu e ka aere mai ia. Kua tata a Iakobo: “Kua vaitata rava taua aerenga mai [Ereni, pa·rou·siʹa] o te Atu ra.” I te tuatau i tataiai e Iakobo taua au tuatua ra, kare te akairo maata me kare to te ao katoa o te parutia o Karaiti i kitea ake. Inara kua kitea i teianei! No reira eaa te manako ngakau tau no tatou i teianei tuatau? Kua kite tikaia te akairo. Te akara nei tatou i te reira. Ka rauka kia tuatua tatou ma te papu tikai, ‘Te kite nei au i te akatupu anga i te akairo ra.’ Ka rauka ia tatou te tuatua irinaki anga e, ‘Kua vaitata rava taua aerenga mai o te Atu ra, e te vaitata maira tona tupu anga.’

21. Eaa ta tatou i akanoo papu tikai kia rave?

²¹ I te mea ko te reira te tika, e tumu ketaketa tikai to tatou kia tuku ki roto i te ngakau e kia rave oki i te au apiianga tumu o nga parapore e rua a Iesu ta tatou i uriuri manako akenei. Kua tuatua aia: “E teianei, kia matakite ia kotou, kare kotou i kite i te rā, e te ora.” (Mataio 25:13) Ko teianei tikai te tuatau no tatou kia maroiroi i ta tatou angaanga Kerititiano. E akaari tatou i te au ra takitai i to tatou oraanga e te kite nei tatou i te tumu a Iesu. Kia matakite tatou! Kia maroiroi oki tatou!

[Au Tataanga Rikiriki i Raro]

Maara Ainei ia Koe?

◻ Eaa te tumu taviri taau i rauka mai i te parapore o nga paretenia pakari ra e nga paretenia neneva ra?

◻ Na roto i te parapore o te au tareni ra, eaa te apiianga tumu ta Iesu e oronga ra kia koe?

◻ I roto i teea tu te aite anga o toou akakoromaki anga ki te parutia ra i aite ei ki to tetai tangata tanutanu Iseraela ra?

◻ Eaa ra teianei i riro ei ei tetai tuatau rapurapu e te akaaoanga ra no te ora anga?

[Au Tutu i te kapi 23]

Eaa te au apiianga ta tatou i kite mei nga parapore o te au paretenia ra e te au tareni ra?