“E Kapiki Aia i te Aronga Pakari”

“Me te maki ra tetai i roto ia kotou na? E kapiki aia i te aronga pakari o te putuputuanga kia aere atu kiaia.”​—IAKOBO 5:14, NW.

1, 2. (a) Te kite nei te au tavini o Iehova ia ratou uaorai i roto i teea turanga kino i teianei, e penei eaa ta ratou ka manako? (e) Eaa te au uianga te umuumuia nei te pauanga i teianei?

KUA tae mai “te au tuatau kikino tei ngata roa no te akono atu.” Te rave ra te au tangata i te tu noinoi, te apinga kopapa, te akaparau, e putuputu te akakeuanga i te tu tau kore i teia “au ra openga ra.” (2 Timoteo 3:1-5, NW) Ei au Kerititiano te noo nei i te akatereanga kino o te au mea i teianei, te kite nei tatou ia tatou uaorai i te tamanata angaia e toru apinga kino maata: ko Satani te Tiaporo, te ao o te au tangata akono kore i te atua, e to tatou uaorai tu tei akatuangaia i te rave i te ara.​—Roma 5:12; 1 Petero 5:8; 1 Ioane 5:19.

² I te akakoko angaia e teia nga mea kino nei, i etai tuatau penei ka tupu te manako e kare e rauka ia tatou te akakoromaki. Teiea, i reira, te ngai e kiteaʼi e tatou te turu anga ei tauturu ia tatou kia akakoromaki tiratiratu atu? Koai ta tatou ka rauka kia aru atu no te arataki anga me ka aro atu i te tuku anga tika no ta tatou au angaanga Kerititiano e ta tatou akamori anga oki?

Tauturu te Vaitata Maira

3. Ka rauka ia tatou mei ko mai iaai ra te akapapu anga pumaana, e naea?

³ No te kite e ko Iehova te Tumu o to tatou ririnui te oronga maira i te akapapu anga pumaana. (2 Korinetia 1:3, 4; Philipi 4:13) Kua akakite mai te tata taramo ko Davida, koia tei kite ra i te tauturu na te atua e: “E uri atu i to aerenga ki runga ia Iehova; e irinaki iaia, e nana e akatupu i te reira.” “E tuku koe i taau apainga [teiaa, NW] kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” (Salamo 37:5; 55:22) E akameitaki tikai tatou no te reira tauturu anga!

4. Akapeea ta Petero raua ko Paulo oronga mai anga i te akapumaana?

⁴ Ka rauka katoa oki ia tatou te pumaana no te kite e kare tatou i vai ana ko tatou anake ua i te aro atu anga i te au timataanga e te au tu kino oki. Kua raurau atura te apotetoro ko Petero i tona au taeake Kerititiano kia: “Patoi atu ïa [ia Satani te Tiaporo] ma te akarongo turori kore, kua kite oki kotou e, tei to kotou au taeake katoa i te ao nei taua au mate ra.” (1 Petero 5:9) E tika rava oki, te anoano ra te au Kerititiano ravarai kia ngaueue kore i te akarongo. E tika rai, penei ka putuputu tatou i te manako e ‘kua kako i te mate,’ mei te apotetoro ko Paulo rai. Inara, kare ra “[aia] i apiapi.” Mei iaia rai, penei kua pekapeka tatou, “kare ra i ope te manakoanga.” Noatu me kua takinga kinoia mai tatou nei, “kare ra [tatou] i akarukeia.” Me “kua uriia ki raro,” “kare ra [tatou] i mate rava.” E no reira “e kore ei [tatou] i roiroi.” Kua tamata tatou kia tamou atu i to tatou mata, “eiaa i te au mea i akaraia ra, i te au mea akara koreia ra.” (2 Korinetia 4:8, 9, 16, 18) Akapeea e raukai ia tatou i te rave i te reira?

5. Eaa nga tuanga tauturu e toru ta Iehova e oronga maira?

⁵ Kua oronga mai a Iehova, “tei akarongo i te pure” ra, e toru tuanga tauturu. (Salamo 65:2; 1 Ioane 5:14) Te mea mua, te oronga maira aia i te arataki anga na roto i tana Tuatua akauruia, koia te Puka Tapu. (Salamo 119:105; 2 Timoteo 3:16) Te rua, te akamaroiroi maira tona vaerua tapu ia tatou i te rave i tona anoano. (Akaaiteia atu kia Angaanga 4:29-31.) E te toru, te vai tamou maira te akaaerenga a Iehova i te enua nei e kua papa no te tauturu ia tatou nei. Eaa ta tatou ka rave kia rauka mai ia tatou te tauturu?

“Oronga Ua Maira te Meitaki i te Tangata Nei”

6. Eaa ta Iehova ra tauturu i oronga i Tabera ra, e naea?

⁶ Te tauturu maira tetai tupu anga i te tuatau o te peroveta ko Mose ra kia ariki tatou i to Iehova manako aroa i te oronga anga i te tauturu no Tona au tavini ra. Kua tupu te reira i Tabera, tona aiteanga “kua ka te ai; ai akapouanga maata; e mura ai.” I teia ngai i te metepara i Sinai ra, kua akatupu te Atua ra kia mura te ai i te au Iseraela e akaapa ua ra. “Taua urupu tangata ke ke” tei piri maira ki to Iseraela i te aerenga mai mei Aiphiti e kua kapiti katoa ratou i te akakite anga i te tu reka kore no te manga tei orongaia maira e te atua. I te kite anga i to te Atua ra riri e te manakoanga maata i te apainga no te au tangata ra e te au apinga anoanoia no ratou ra, kua kapiki maata a Mose e: “Kare e maranga iaku i teia katoa nei au tangata ko au anake ra, e maata ua atu ïa i te teiaa. E pera mairai koe iaku nei, kia mate roa au, ko taku ïa tuatua kia koe, peneiake te kite aroaia maira au e koe ra; kia kore oki au e kite i toku mate.” (Numero 11:1-15) Eaa ta Iehova ra i rave? Kua akataka maira aia e “itu ngauru no te aronga pakari i Iseraela” e kua tuku atura aia i tona vaerua ki rungao ia ratou kia tau ei ratou no te rave i te angaanga akaaere ma Mose katoa ra. (Numero 11:16, 17, 24, 25) I te akataoonga angaia taua aronga tangata tau ra, kua papa meitaki i reira te tauturu i to Iseraela e pera katoa “te tangata ke ke katoa” ra.​—Exodo 12:38.

7, 8. (a) I akapeea ta Iehova ra oronga ua maira i te “apinga no te [tu] tangata” nei i Iseraela i taito ra? (e) Eaa te aite anga ta Paulo i akataka mai no te Salamo 68:18 i te anere mataiti mua ra?

⁷ I muri ake i te nooanga to Iseraela ki te Enua Taputouia ra no etai mataiti e manganui, kua kake akatutu ua atura a Iehova ki runga ia Maunga Ziona e kua akariro atura ia Ierusalema ei oire maata ia no te patireia akatutuia e ko Davida ei ariki i reira. I te akapaapaa anga i te Atua, i te “Mana katoatoa ra,” kua akateitei atura Davida i tona reo i te imene anga: “Kua riro koe ki runga, kua arataki koe i te tuikaa e manganui ra; e kua rauka ia koe te apinga no te [tu] tangata ra.” (Salamo 68:14, 18) E tika rai, ko te au tangata tei riro ra ei tuikaa i te tuatau i peke ei te Enua Taputou ra kua riro mai ei tauturu i to te ngati Levi ma ta ratou au angaanga katoa ra.​—Ezera 8:20.

⁸ I te anere mataiti mua o te T.N., kua akamaaraara atura te apotetoro ko Paulo i tetai akatupuanga totou i te au tuatua a te tata taramo ra. Kua tata a Paulo e: “Kua orongaia mai te meitaki kia tatou katoa nei i ta te Mesia i tau i te oronga mai. Koia i tuatuaiaʼi e, ‘Iaia i kake ki runga, e aronga tuikaa e manganui tana i arataki, e kua oronga ua maira te meitaki i te tangata nei.’ (E koia oki i kake ki runga ra, kare aina no te mea i eke mai ana aia ki raro ki te au ngai akaaka i teianei ao? E ko tei eke mai ki raro nei, ko tei kake ïa ki runga rava atu i te au rangi ravarai nei, kia ope te au mea katoa i te akakiia e ia).” (Ephesia 4:7-10) Koai tikai tei “eke mai”? Kare i tetai ke atu mari ra ko tei komono ia Iehova ra, koia tei Maata atu ia Davida ra e ko te Ariki Mesia, ko Iesu Karaiti. Koia ta te Atua i akatuakaou maira e kua ‘akateitei rava atu iaia.’​—Philipi 2:5-11.

9. (a) Koai ma tei oronga ua maira te meitaki i te tangata nei i te anere mataiti mua ra? (e) Koai ma tei oronga ua maira te meitaki i te tangata nei i teia tuatau nei?

⁹ Koai ma, i reira, teia aronga orongaia mai ei “meitaki i te tangata nei” (me kare, “e au tangata nei”)? Kua akataka maira Paulo e na te Komono Maata i te Atua ra i “akono oki aia i tetai pae, ei aposetolo; tetai pae, ei peroveta; tetai pae, ei apii evangelia; e tetai pae, ei tiaki, e ei orometua; Ei akatau i te aronga tapu, no te angaanga orometua, kia meitaki oki te kopapa o te Mesia ra.” (Ephesia 4:11, 12) Pouroa te au pipi a Karaiti tei tavini ra ei apotetoro, ei peroveta, ei apii evangeria, ei tiaki, e ei orometua kua rave i te reira i raro ake i te aratakianga tutaraatua ra. (Luka 6:12-16; Angaanga 8:12; 11:27, 28; 15:22; 1 Petero 5:1-3) I to tatou tuatau nei, kua akataoongaia te aronga pakari tau te tu vaerua i te vaerua tapu ei akaaere i etai 70,000 au putuputuanga o te Au Kite o Iehova i te ao katoa nei. E au tangata oronga uaia mai ratou. (Angaanga 20:28) I te akatotoaanga te angaanga tutu aere i te patireia i te ao katoa nei e te viviki maira, e maata atu te au taeake te “inangaro” ra e te rave ra i te au apainga a te aronga “akataoongaia ra ei akaaere.” (1 Timoteo 3:1, NW) I te akataoonga angaia, kua riro katoa ratou ei au tangata oronga uaia mai.

10. Akapeea ta Isaia akataka anga i te “ui ariki” i tau ei i te tuanga a te aronga pakari Kerititiano i teia tuatau nei?

¹⁰ Ko teia aronga pakari Kerititiano, me kare au tangata oronga uaia mai, te tau ra i te akatakaanga a te peroveta ko Isaia i tana totouanga i te taoonga ei “ui ariki,” koia te aronga akaaere i raro i te tutara Patireia ra. E riro oki ratou tataki tai “mei te punanga i te uriia ra, mei te pipinianga i te matangi maata ra; mei te au vai taʼe i te ngai keremarō ra, mei te marumaru o tetai mato maata i te enua papamarō ra.” (Isaia 32:1, 2) Te akakite maira teia i te turuanga a te akaaere aroa tau a teia aronga akataoongaia ra. Akapeea e raukai ia koe te puapinga maata rava mei te reira mai rai?

Rave Anga i te Tamata

11. Me ka apikepike i te pae vaerua, akapeea e raukai ia tatou tetai tauturu?

¹¹ Ka kapiki ua ra tetai tangata te maremo ra, no te tauturu. Kare roa e tapupu anga. Me te vaira te oraanga i roto i te tu kino, kare e anoanoia tetai kia na mua te akakeuia kia kapiki i te tauturu. Kare ainei te Ariki ko Davida i kapiki putuputu i te tauturu mei ko mai ia Iehova ra? (Salamo 3:4; 4:1; 5:1-3; 17:1, 6; 34:6, 17-19; 39:12) Me te meangiti ra te tu i te pae vaerua, penei te tomo atura ki roto i te tu taitaia, ka pera katoa tatou i te ariu atu anga kia Iehova i te pure e te pati anga kiaia kia arataki ia tatou na tona vaerua tapu ra. (Salamo 55:22; Philipi 4:6, 7) Ka kimi tatou i te pumaana mei te Tuatua Tapu mai ra. (Roma 15:4) Ka akarakara tatou i te au puka Kerititiano a te Totaiete Punanga Tiaki no etai apiianga tau. E putuputu te rauka i te reira i te akakore atu i to tatou uaorai au manamanata. Inara me ka o atu tatou ki roto i te au turanga ngata, ka rauka katoa ia tatou i te kimi i te ako anga mei ko mai i te aronga pakari akataoongaia o te putuputuanga. Ko te tika ra, penei e au tuatau etai te ka tau tatou kia ‘kapiki i te aronga pakari ra.’ Eaa ra ka kapiki ei i te aronga pakari Kerititiano? Akapeea e raukai ia ratou i te tauturu i te aronga te anoano ra i te tauturu i te pae vaerua?

12-14. (a) Eaa te ravenga pakari no te akono me ka makiia tetai? (e) Kia tau ki ta Iakobo 5:14, eaa te akaueia maira kia raveia e te au Kerititiano “maki ra”? (ng) Eaa te tu maki ta Iakobo 5:14 e taiku maira, e eaa koe i pau mai ei mei te reira ra?

¹² Me ka makiia tatou, ka akaangaroi tatou kia raukai i te au ngai mana o te kopapa te tuatau no te akamaroiroi anga. Inara me ka vai ua mai to tatou maki, ka kimi pakari tatou i te tauturu tau no te rapakau anga. Kare ainei e tau kia rave akapera katoa tatou me ka apikepike tatou i te pae vaerua?

¹³ E akara ana i ta te pipi ko Iakobo e akaue maira ia tatou no teia tu. Kua karanga aia e: “Me te maki ra tetai i roto ia kotou na? E kapiki aia i te aronga pakari o te putuputuanga kia aere atu kiaia, e na ratou e pure nona, ma te akatainuanga iaia i te manongi i te ingoa o Iehova ra.” (Iakobo 5:14) Eaa te tu maki ta Iakobo e taiku nei i konei? Te manako ra tetai papaki o te aronga akamarama Puka Tapu e e maki kopapa ia, ma te manakoanga e ko te akatainuanga i te manongi ko te ravenga matauia no te rapakau anga i taua tuatau ra. (Luka 10:34) Te irinaki katoa ra ratou e te manako ra a Iakobo i tetai rapakau temeio na roto i te apinga orongaia mai no te rapakauanga. Inara, eaa ta te au tuatua koropini e akakite maira?

¹⁴ “Kia rekareka ra i te pae vaerua” kua akatukeia ia te “mamae i te kino.” Te akataka maira teia e te tuatua ra a Iakobo no te maki i te pae vaerua. (Iakobo 5:13, NW) “Te aronga pakarikari [aronga pakari, King James Version] o te putuputuanga,” kare ra ko te au taote me kare te aronga tei ia ratou te apinga orongaia no te akaoraanga temeio, tei tau kia kapikiia. E eaa ta ratou ka tau kia rave? Kua karanga a Iakobo e: “Na ratou e pure nona. . . . E na te pure akarongo ra e akariro kia ora mai tei makiia ra.” (Iakobo 5:14, 15, NW; akaaiteia atu kia Salamo 119:9-16.) I te akapapu takiri anga e te tuatua ra a Iakobo no te maki i te pae vaerua ko te tika e kua akamaroiroi mai aia kia aaki i te au ara tei kapitiia atu ki te akaoraanga te manakonakoia ra. Kua tata aia: “E aaki eeu ua i ta kotou apa tetai ki tetai e e pure oki tetai no tetai kia akaoraia kotou na.” Me ko te rave anga ara kino te tumu no te maki i te pae vaerua ra, ka rauka i te tangata maki ra kia manako atu i te ora me ka rave anake aia i te akamaroiroi anga tau tei akanooia ra ki runga i te Tuatua a te Atua, kia tataraara, e kia ariu ke mai i tona aerenga i te ara ra.​—Iakobo 5:16, NW; Angaanga 3:19.

15. Eaa te tu angaanga te akaueia maira ia Iakobo 5:13, 14?

¹⁵ Te vaira tetai atu apinga tau kia manakoia i te ako a Iakobo i oronga maira. Me te mamae ra i te kino, ka tau te Kerititiano kia “pure ua atu aia.” Kia rekareka ra aia i te pae vaerua “e imene aia i te au salamo.” Teia nga turanga tataki tai​—me te mamae ra tetai i te kino me kare te rekareka ra i te pae vaerua—​te anoanoia ra kia rave aia i tetai apinga. Ko te pure te anoanoia ra i tetai pae, e ko te maeva anga rekareka i tetai pae. E no reira, eaa ta tatou ka manako atu me ka ui mai a Iakobo e: “Me te maki ra tetai i roto ia kotou na?” Te akataka akaou maira aia i te apinga kia raveia, ae, kia tamata i te rave. “E kapiki aia i te aronga pakari o te putuputuanga kia aere atu kiaia.”​—Salamo 50:15; Ephesia 5:19; Kolosa 3:16.

Akapeea “te Aronga Pakari” i te Tauturu Anga

16, 17. Akapeea ta te aronga pakari tauturu mai ia tatou kia akono i te au kaveinga no te Puka Tapu?

¹⁶ E mea ngata no tatou kia kite e akapeea te akapirianga i te au kaveinga Puka Tapu ki to tatou uaorai au turanga. I konei ka rauka i te aronga pakari Kerititiano i te akakite mai i tetai tumu meitaki no te tauturu. Ei akatauanga, ka pure ratou no tetai tei maki ra i te pae vaerua ma te ‘akatainu anga iaia i te manongi i te ingoa o Iehova ra’ na te taangaanga karape anga i te au ikuikuanga tamaru no te Tuatua a te Atua ra. E na reira ka rauka i te aronga pakari i te tauturu maata mai kia ora tatou i te pae vaerua ra. (Salamo 141:5) E putuputu te kitea e, ko tei anoanoia no tatou ko te akapapu anga e te tika ra te aerenga o to tatou manako. Na te uriuri anga manako ma te aronga pakari Kerititiano ka akamaroiroi mai i to tatou manako kia rave i te mea tika.​—Maseli 27:17.

¹⁷ Me kapikiia mai kia aere atu e aravei, ka tau te aronga pakari Kerititiano kia “tauturu atu i tei apikepike, [e] kia roa te akakoromaki anga i te tangata ravarai.” (1 Tesalonia 5:14) Na te reira kapiti vaitata anga, e te pirianga kite i rotopu i “te aronga pakari” e “tei apikepike” ka meitaki mai te tupuanga kia ora tika rava i te pae vaerua ra.

Apainga a te Aronga Tataki Tai e te Pure

18, 19. Eaa te tuanga ta te aronga pakari Kerititiano ka rave i te pirianga kia Galatia 6:2, 5 ra?

¹⁸ Ka tau te aronga pakari Kerititiano kia rave i ta ratou apainga i te anana a te Atua ra. Ka tau ratou kia tauturu atu. Ei akatauanga, kua karanga a Paulo e: “E te au taeake, noatu e ka rave tetai tangata i te takainga tarevake i mua ake ka kite ei aia, ko kotou ko te aronga e tu tau to kotou i te pae vaerua e tauta i te akatikatika i taua tangata ra i te vaerua maru, ma te matakite ia kotou ko te timataia mai aea kotou. E tamou ua rai i te apai i te au teiaa a tetai i reira te akatupu anga i te ture a te Karaiti.” Kua tata katoa oki te apotetoro e: “Na te tangata tataki tai e rave i tana uaorai apainga.”​—Galatia 6:1, 2, 5, NW.

¹⁹ Akapeea e raukai ia tatou te rave i te apainga teiaa a tetai e tetai ma te rave katoa oki i ta tatou uaorai apainga? Na te tuke anga o te aiteanga o nga tuatua Ereni tei uriia e “apainga teiaa” e te “apainga” na te reira i akataka mai i te pauanga. Me ka o atu tetai Kerititiano ki roto i te tu ngata i te pae vaerua tei riro ra ei apainga teiaa roa kiaia, ka rauka i te aronga pakari e etai atu au taeake akarongo i te tauturu atu iaia, e ka tauturu atu iaia i te rave anga i tana “apainga teiaa.” Inara, te manakoia ra taua tangata ra nana uaorai e rave i tana uaorai “apainga” no ko mai i te Atua ra.a Ka rave rekareka ua te aronga pakari i “te apainga teiaa” a to ratou au taeake na te akamaroiroi anga, na te ako anga Tuatua Tapu, e na te pure. Inara, kare te aronga pakari e rave ke na ratou e apai ta tatou uaorai “apainga” i te apainga i te pae vaerua ra.​—Roma 15:1.

20. Eaa ra i tau kore ei kia manako koreia te pure anga?

²⁰ E puapinga tikai te pure e e mea tau kia kore e manako koreia. Inara e manganui te aronga Kerititiano makiia i te pae vaerua te kite ra i te tu ngata no te pure. Me ka oronga te aronga pakari i te pure akarongo no tetai te makiia ra i te pae vaerua, eaa tikai te akakoro anga? “Na Iehova e akatu iaia ki runga,” mei roto i te tu ngakau manakonako kore, e ka akamaroiroi iaia kia aruaru i te aerenga tuatua mou e te tuatua tika. Penei ko te Kerititiano te makiia ra i te pae vaerua e tu manako tarevake tona inara penei kare aia i rave ana i tetai ara kino, no te mea kua karanga mai a Iakobo e: “Me, kua rave aia i te ara, ka akakoreia tana ara.” I etai tuatau na te ako Tuatua Tapu a te aronga pakari ra kapiti katoa oki te pure akatenga ka akakeu i te tangata apikepike i te pae vaerua ra kia aaki i tana au ara kikino i rave ana e kua akakite mai i te vaerua tataraara. Na te rave anga, i te reira, e akakeu i ta te Atua ra tuanga i te akakoreanga i te ara.​—Iakobo 5:15, 16, NW.

21. (a) Eaa tetai papaki Kerititiano ka kore ei e kapiki i te aronga pakari ra? (e) Eaa te ka uriuri manakoia i te atikara te ka aru mai?

²¹ I te aro atu anga i te akaaoanga no te akonoanga i te au urupu o te aronga ou te aere maira ki roto i te putuputuanga Kerititiano, e maata ta te aronga pakari manako ngakau meitaki ra, ka rave i te akonoanga i te akaaere anga tau. E tika tikai, ko teia au meitaki oronga uaia mai i te tangata nei e apinga meitaki no ko mai ia Iehova ra ei tauturu ia tatou kia akakoromaki roa i teia au tuatau kino nei. Inara, te tapupu ra tetai papaki Kerititiano i te kapikianga no ta ratou tauturu, te manakoanga e e maata roa te au manamanata a teia au taeake me kare no te maata roa ta ratou angaanga. Ka tauturu ia tatou te atikara te aru mai nei, kia manako ariki e te rekareka nei teia aronga tangata i te rave tauturu anga, no te mea te tavini rekareka ra ratou ei tiaki tauturu i roto i te putuputuanga Kerititiano.

[Tataanga Rikiriki i Raro]

Akapeea Koe me Pau?

◻ Me ka anoano tatou i tetai tauturu, eaa nga tuanga tauturu e toru ta Iehova ka oronga mai?

◻ Koai ma tei oronga ua maira te meitaki i te tangata nei i teia tuatau?

◻ Eaa te tuatau tau no tatou kia kapiki i te aronga pakari ra?

◻ Eaa te tauturu te ka tau tatou kia manakonako mei ko mai i te aronga pakari Kerititiano ra?

[Tutu i te kapi 15]

Te rekareka ra ainei koe i te au puapinga i te pae vaerua no te pure, te apii Puka Tapu, e te tauturu no ko mai i te aronga pakari Kerititiano ra?