Ka Akariro te Akarongo Kia Akakoromaki Tatou e Kia Pure Oki

“E akakoromaki katoa oki kotou; e akatinamou tikai i to kotou ngakau: kua vaitata rava taua [“parutia,” NW] o te Atu ra.”​—IAKOBO 5:8.

1. Eaa tatou ka akaataʼi ki runga ia Iakobo 5:7, 8?

E TIKA tikai i teianei to Iesu Karaiti [“parutia,” NW] tei tapapa roaia maira. (Mataio 24:3-14) Kia maata atu i to mua ana, e tumu tikai to te aronga te manako ra e akarongo to ratou i te Atua raua ko Karaiti ra kia akamanako i teianei au tuatua a te pipi ko Iakobo: “E teianei e akakoromaki, e aku au taeake, e kia tae mai te [parutia] o te Atu ra. I na oki te tanu-kai ra, te tatari marie ua ra aia i te kai meitaki o te enua nei, te akakoromaki marie ra oki i te reira, e kia rauka mai te ua momua e te ua openga ra. E akakoromaki katoa oki kotou; e akatinamou tikai i to kotou ngakau: kua vaitata rava taua [parutia] o te Atu ra.”​—Iakobo 5:7, 8 akaaite ia NW.

2. Eaa etai au manamanata tei aroia atu e te aronga ta Iakobo i tata atura?

² Te aronga ta Iakobo i tata atura i tana reta akauruia te umuumuia ra kia akono i te akakoromaki e kia akakore atu oki i te au manamanata tuke tuke. E manganui tei rave tarevake ra ki tei manakoia no te aronga te karanga ra e akarongo to ratou i te Atua ra. E akatauanga, e au apinga etai tei umuumuia kia raveia no etai au anoano tei tupu maira ki roto i etai ngakau. Kua umuumuia kia akaoraia mai te tu maru ki roto i taua au Kerititiano mua ra. Kua anoano katoaia te ako anga no ratou kia akakoromaki marie e kia pure oki. Ia tatou ka akamanako i ta Iakobo i tuatua kia ratou ra, e tamanako tatou kia kite e ka akapeea tatou i te akono anga i tana au tuatua ki roto i to tatou ora anga.

E Akapou Anga ta te Au Anoano Tarevake

3. Eaa te au tumu no te au pekapeka putuputuanga ra, e eaa ta tatou te ka kite mei te reira maira?

³ Kua ngere te tu au i roto i tetai papaki i taua aronga manako ra e Kerititiano ratou, e ko te au anoano tarevake te tumu o teia turanga. (Iakobo 4:1-3) Kua akatupu te au maroanga i te pekapeka, e ka akaapa aroa kore ua tetai papaki i to ratou au taeake. Kua tupu teia no te au inangaro i te akamareka anga tau kore o te kopapa nei e kua rave i tetai keanga i roto i te au mero o to ratou kopapa. Penei ka tau tatou uaorai kia pure no te tauturu kia arai atu i te au inangaro o te kopapa no te rongonui, te mana, e te au apinga kia kore tatou e rave i tetai apinga kia akakino i te tu au o te putuputuanga. (Roma 7:21-25; 1 Petero 2:11) I roto i etai au Kerititiano o te anere mataiti mua ra, kua tupu te tu noinoi tae roa ki tetai vaerua makitakita e te ta ua. I te mea kare te Atua ra e akatupu i to ratou au anoano tarevake, kua rave ua atu ratou i te tauta anga kia rauka ta ratou akakoro anga. Me tei ia tatou taua tu anoano tarevake ra, penei ka pati tatou mari ra kare e rauka mai, no te mea kare to tatou Atua tapu e pau mai i taua au tu pure ra.​—Te Aue o Ieremia 3:44; 3 Ioane 9, 10.

4. Eaa ra a Iakobo i kapiki ei i etai ei “au akaturi,” e eaa te akatupu anga tau kia tatou no tana tuatua anga?

⁴ Kua tupu te au tu o teianei ao, te vareae, e te akaparau ki roto i etai o te au Kerititiano mua ra. (Iakobo 4:4-6) Kua tapaia e Iakobo tetai papaki ei “au akaturi” no te mea e au oa ratou no teianei ao e no reira kua apa i te akaturi anga i te pae vaerua. (Ezekiela 16:15-19, 25-45) E mea tika, kare tatou e anoano kia riro mei to teianei ao i te tu manako, te tuatua, e te angaanga, no te mea ka akariro te reira ia tatou ei au enemi no te Atua. Te akaari maira tana Tuatua kia tatou e ‘ki roto nei te vareae’ ko tetai tuanga ia no te manako kino, me kare “vaerua,” i roto i te au tangata ara nei. (Genese 8:21; Numero 16:1-3; Salamo 106:16, 17; Koheleta 4:4) No reira me ka kite tatou e ka tau kia maro atu tatou i te vareae, te ngakau parau, me kare i tetai atu manako anga kino, e kimi tatou i ta te Atua ra tauturu na te vaerua tapu. Te reira mana, tei orongaia e te takinga meitaki aroa ua o te Atua, e maata atu ia e ‘ki roto nei te vareae.’ Noatu e te patoi ra a Iehova i te ngakau parau, ka oronga maira aia i te takinga meitaki aroa ua me ka maro atu ei i te au manako no te rave ara ra.

5. E rekarekaʼi i to te Atua ra takinga meitaki aroa ua, eaa te au umuumu anga tika na tatou kia akono?

⁵ Akapeea e raukaʼi ia tatou to te Atua ra takinga meitaki aroa ua? (Iakobo 4:7-10) E rekarekaʼi i te takinga meitaki aroa ua mei ko mai ia Iehova ra, ka tika tatou kia akarongo kiaia, kia ariki i tana au apinga, e kia kauraro ki tana e anoano maira. (Roma 8:28) Ka tika katoa oki tatou kia “patoi atu” me kare ‘kia māro atu,’ i te Tiaporo ra. Ka ‘rere ke atu aia ia tatou’ me ka vai ketaketa tatou ei aronga turu i te ngateitei o Iehova i te ao katoa e pini ua ake. Tei ia tatou ta Iesu tauturu anga, tei arai atura i te au rima rave kino o teianei ao kia kore tetai ua atu apinga e rave mai i te kino mutu kore no tatou. E auraka e ngaropoina i teia: Na te pure, te rave anga, e te akarongo, ka akavaitata atu tatou ki te Atua ra, e te vaitata ua maira aia kia tatou.​—2 Paraleipomeno 15:2.

6. Eaa ra a Iakobo i kapiki ei i etai Kerititiano ra ei “aronga rave ara”?

⁶ Eaa ra a Iakobo i taiku ei i te tuatua “aronga rave ara” ki etai te manako ra te akarongo ra ratou i te Atua? No te mea kua apa ratou i te “tamaki” e te makitakita ta ua​—te au tu manako ariki koreia no te au Kerititiano ra. (Tito 3:3) To ratou “rima” tei ki ra i te rave anga kikino, kua umuumuia kia tamaia. Kua tau katoa oki ratou kia tamaia to ratou “ngakau,” koia te vairanga o te akakeu anga. (Mataio 15:18, 19) Taua “aronga ngakau rua” kua oripu ua i rotopu i te oa anga ma te Atua ra e te oa anga ma teianei ao. I te akamatakite anga mai na ta ratou akatauanga kino ra, e akono tatou i te tu tau maroiroi tamouia kia kore taua au apinga ra e akakino i to tatou akarongo.​—Roma 7:18-20.

7. Eaa ra Iakobo i tuatuaʼi ki tetai papaki kia “aue na kotou, ka mii”?

⁷ Kua tuatua atura Iakobo ki tona aronga tatau kia “aue na kotou, ka mii, e kia maringi to kotou roi-mata.” Me ka akakite ratou i te tu mii tau i te Atua, ka riro te reira ei akapapu anga i te tataraara. (2 Korinetia 7:10, 11) I teia tuatau nei, ko tetai papaki te karanga ra e akarongo to ratou te kimi ra i te oa anga ma teianei ao. Me te aru ra tetai ua atu o tatou i taua aerenga ra, kare ainei e tau kia aue tatou i to tatou tu apikepike i te pae vaerua e kia viviki te rave i te au takainga kia akatikatika i taua au tu ra? Na te raveanga i te au akatikatika anga umuumuia e te rauka anga ta te Atua ra akakore anga ara ka akatupu mai i tetai manako ngakau rekareka no tetai akava ngakau ma ra e te au manakonakoanga rekareka oki no te oraanga mutu kore.​—Salamo 51:10-17; 1 Ioane 2:15-17.

Auraka e Akaapa Tetai i Tetai

8, 9. Eaa tatou ka kore ei e tau kia tuatua akakino me ka akaapa tetai i tetai?

⁸ E ara te tuatua kino i tetai taeake akarongo ra. (Iakobo 4:11, 12) Inara e akaapa ua tetai papaki i to ratou au taeake Kerititiano ra, penei no to ratou uaorai tu manako e e tuatua tika ratou me kare no to ratou anoano kia akateitei ia ratou uaorai na te tuatua taekeanga ia etai ke ra. (Salamo 50:20; Maseli 3:29) Ko te tuatua Ereni tei uriia ra e “tuatua kino” te akataka maira i te tu riri e te akakite ra i tetai akaapa anga akamaataia me kare e pikikaa. Te aite ra teia ki te akaapaanga tau kore i tetai taeake. Akapeea teianei i te ‘tuatuaanga kino e te akaapa anga oki i te ture a te Atua’? Kua rave te au tata tuatua e te au Pharisea ‘i te akakore anga i ta te Atua ra’ e kua akaapa na to ratou uaorai au turanga. (Mareko 7:1-13) Mei te reira oki, me ka akaapa tatou i tetai taeake ta Iehova kare ra e akaapa, kare ainei tatou e ‘akaapa ana i te ture a te Atua’ e te akakite apa ua ra e kare i tau ia? E na te akaapaanga tau kore i to tatou taeake, kare tatou e akatupu ana i te ture no te aroa.​—Roma 13:8-10.

⁹ Kia maara tatou i teia: “Okotai oki tumu o te ture”​—ko Iehova. ‘Tana ‘ture kare e apa,’ kare i te puapinga kore. (Salamo 19:7; Isaia 33:22) Tei te Atua anake te tika kia akanoo i te au turanga e te au ture no te ora. (Luka 12:5) No reira kua ui a Iakobo: “Koai oki koe ka akaapaʼi koe ia etai ke?” Kare ia tatou te tika kia akava e kia akaapa atu ia etai ke. (Mataio 7:1-5; Roma 14:4, 10) Na te akaataanga ki runga i to te Atua tu ngateitei e tona akara kore i te tu e to tatou uaorai tu ki i te ara ka tau kia tauturu ia tatou kia akakore i te akaapaanga ia etai ke ra ma to tatou uaorai manako e tuatua tika tatou.

E Kopae Ke i to Tatou Uaorai Irinaki Anga Akateitei

10. Eaa tatou ka tau ei kia akamanako atu ia Iehova i to tatou oraanga i te au ra tataki tai?

¹⁰ Ka tau tatou kia akamanako tamou ia Iehova e tana ture. (Iakobo 4:13-17) I te manako koreanga i te Atua ra, kua tuatua te aronga irinaki ia ratou uaorai: ‘E aere tatou akonei e apopo ki roto i tetai oire kia okotai ake mataiti i te oko anga e kia rauka mai te apinga.’ Me ka ‘akaputu tatou i te apinga no tatou uaorai, kare i maata tona apinga i te Atua ra,’ penei ka ope to tatou oraanga apopo e penei kare o tatou tuatau kia tavini atu ia Iehova ra. (Luka 12:16-21) Mei ta Iakobo i tuatua, te aite ra tatou mei te kou i te popongi “e vaivai ake, e roa poto akera, ngaro atura ïa.” (1 Paraleipomeno 29:15) Na te akono anake i te akarongo ia Iehova ra e raukaʼi ia tatou kia manakonako i te rekareka anga mutu kore e te oraanga e tuatau ua atu.

11. Eaa te aite anga kia tuatua e, “Kia tika i te Atu ra”?

¹¹ Kare e kia akateitei manako kore ua i te Atua ra, ka tau tatou kia akono i teia turanga: “Kia tika i te Atu ra, e kia roa to tatou aʼo, e rave ïa tatou i teia, e i tera.” I te tuatua anga e, “Kia tika i te Atu ra” te akakite maira e te tauta ra tatou kia rave rotai ma tona anoano. Penei te umuumuia ra kia rave pitiniti ei turu i to tatou ngutuare tangata, no te aere i te angaanga Patireia, e te vai atura. Inara auraka tatou ei akatietie. “E mea kino anake ïa taua rekareka ra” no te mea te manako kore ra te reira i te irinaki anga i te Atua ra.​—Salamo 37:5; Maseli 21:4; Ieremia 9:23, 24.

12. Eaa te aite anga o te au tuatua ia Iakobo 4:17 ra?

¹² I te akara anga ei akaoti anga i tana tuatua anga no te irinaki ia koe uaorai e te akatietieanga, kua na ko maira Iakobo: “Ko te tangata i kite i te rave i te mea meitaki, e kare i rave, kua riro ïa ei ara nana.” Ka tau te au Kerititiano kia akatika taakaaka ua i tona irinaki anga ki runga i te Atua ra. Me kare aia e rave akapera, “kua riro ïa ei ara nana.” Inara, te tau ra taua kaveinga rai ki tetai ua atu kore anga e rave i ta te akarongo i te Atua e umuumu maira ia tatou nei.​—Luka 12:47, 48.

Akamatakiteanga no Runga i te Aronga Apinga Maata

13. Eaa ta Iakobo tuatua no te aronga taangaanga tarevake i ta ratou au apinga maata ra?

¹³ No te mea kua riro etai au Kerititiano mua ra ei aronga anoano apinga me kare te akateitei ra i te apinganui, kua tuatua ketaketa a Iakobo no runga i etai au tangata apinga maata ra. (Iakobo 5:1-6) Te au tangata o teianei ao te taangaanga tarevake ra i ta ratou apinga maata ‘ka tangi, ka aue i to ratou au mate maata e vaitata mai kia ratou ra’ me tutaki te Atua ia ratou kia tau ki ta ratou au angaanga. I taua tuatau ra, ko te apinganui o te au tangata e manganui no te au apinga mei te kakau, te ua titona, e te uaina. (Ioela 2:19; Mataio 11:8) Ko etai o teia apinga ka pe me kare ‘ka pou i te neu,’ inara te akaketaketa ra a Iakobo i te puapinga kore o te apinganui, kare i tona tu pe ua. Noatu rai e kare te auro e te ario e tutae auriia, me kia akaputu tatou i te reira, ka riro ia ei mea puapinga kore mei te tutae auri ra. Te “moneneu” te akakite maira i te au apinga nui kare ra i taangaanga meitakiia. No reira, ka tau tatou ravarai kia maara e “mei te pou ai ra” ta te aronga te irinaki ra i ta ratou au apinga ‘tei akaputu i te au rā openga nei’ e tae mai ei to te Atua ra riri ki runga ia ratou. I te mea te noo nei tatou i “te tuatau openga,” e aite anga taka ke to taua au tuatua ra no tatou.​—Daniela 12:4; Roma 2:5.

14. Akapeea ta te aronga apinga maata te putuputu ra i te rave, e eaa ta tatou te ka tau kia rave no te reira?

¹⁴ E putuputu te aronga apinganui i te pikikaa i ta ratou aronga kokoti, te “kapiki ra” to ratou tutaki tapuia ra no te tutakianga. (Akaaite ia Genese 4:9, 10.) Te au tangata apinga o teianei ao ‘kua noo ma te navenave.’ Kua rave i te kanga, kua akapori ia ratou, ma te au ngakau akarongo kore e ka rave ua atu i teia tae roa ki “te rā” akanooia no to ratou ta anga. Kua ‘akaapa ratou e kua tamate i te tangata tuatua-tika ra.’ Kua ui a Iakobo: “Kare oki aia i tutaki mai ia kotou.” Inara i ta tetai atu urianga, “tei tuatua-tika ra; kare aia e patoi mai ana ia koe na.” I tetai ua atu tu, kare tatou e tau kia akara i te tu o te tangata apinga maata ra. Ka tika tatou kia tamou i te au apinga vaerua na mua i te ora anga.​—Mataio 6:25-33.

Ka Tauturu te Akarongo kia Akakoromaki Tatou

15, 16. Eaa ra i puapinga maataʼi kia akono i te akakoromaki marie?

¹⁵ I te otianga tana tuatua anga no te aronga apinga maata o teianei ao tei rave takinga kino ra, kua akamaroiroi mai a Iakobo i te au Kerititiano tei takinga kinoia ra kia akono i te akakoromaki. (Iakobo 5:7, 8) Me ka akakoromaki te aronga akarongo ra i to ratou tuatau rave ngata ra, ka tutakiia ratou no te tiratiratu i te tuatau o to Karaiti ra parutia, me tae mai te akavaanga ki runga i te aronga takinga kino ia ratou ra. (Mataio 24:37-41) Kua umuumuia taua au Kerititiano mua ra kia aite ki te tangata tanu kai ra tei akakoromaki ra i te tatari anga no te ua momua o te tuatau pururu anga rau ra, e raukaʼi iaia te tanutanu, e te ua openga o te tuatau tupuanga rau te ka akatupu i te uua anga. (Ioela 2:23) Ka tau katoa tatou kia akakoromaki e kia akamaroiroi i to tatou ngakau, kia maata oki i te mea kua “tae mai te [“parutia,” NW] o te Atu” ko Iesu Karaiti ki konei!

¹⁶ Eaa ra tatou ka tau ei kia akakoromaki? (Iakobo 5:9-12) Ka tauturu mai te akakoromaki anga ia tatou kia kore e aue e kia kore e mii me ka akaongoongo mai to tatou au taeake akarongo ia tatou. Me ka “akavareae [tatou] tetai ki tetai” ma te vaerua kino, ka akaapaia tatou e te Akava koia a Iesu Karaiti. (Ioane 5:22) I teianei i te mea kua akamata tona “parutia” e ‘te tu ra aia i te ngutupa,’ e akatupu tatou i te au na te akakoromaki anga ma to tatou au taeake, te aro atura i te au timataanga e manganui no te akarongo. Te akamaroiroiia maira to tatou uaorai akarongo me ka maara tatou e i tutaki te Atua ia Iobu no tona akakoromaki marieanga i tona au timataanga. (Iobu 42:10-17) Me ka akono tatou i te akarongo e te akakoromaki marie, ka kite tatou e “kua ki te Atu i te aroa e te takinga-meitaki maata.”​—Mika 7:18, 19.

17. Eaa ra a Iakobo i tuatuaʼi, e ‘auraka e taputou’?

¹⁷ Me ka kore tatou e akakoromaki marie, penei ka taangaanga tarevake tatou i te arero me tei raro ake i te pekapeka. Ei akatauanga, penei ka tia viviki ua tatou. ‘Auraka e taputou,’ ta Iakobo i tuatua, i te akamatakiteanga i te puapinga kore o te taputou. Te akaraanga pikikaa ua ra te rave anga putuputu i te tuatua ma te au taputou ra. E no reira ka tau ua tatou kia tuatua i te tuatua mou ra, kia riro ta tatou koia ei koia, e ta tatou kare, ei kare. (Mataio 5:33-37) Inara, kare a Iakobo i tuatua ana e e tarevake kia taputou kia tuatua i te tuatua mou i te akava anga.

Te Akarongo e ta Tatou Au Pure

18. I raro ake i teea au turanga e tau ei tatou e “ka pure” e ka ‘imene i te imene’?

¹⁸ Ka tika te pure ei tetai tuanga maata i to tatou oraanga me kia akatere tatou i ta tatou tuatua anga, kia akono akakoromaki marie, e kia tamou marie i tetai akarongo meitaki i te Atua. (Iakobo 5:13-20) E maata oki me te timataia maira ka tau tatou e “ka pure” ua atu. Me te rekareka ra tatou, ka “imene [tatou] i te imene,” mei ta Iesu ratou ko tana au apotetoro i rave ra i tana akono anga i te Akamaara Anga no tona matenga. (Mareko 14:26) I etai taime penei te ki ra tatou i taua akameitaki anga i te Atua ra e ka imene akapaapaa tatou i roto i te ngakau. (1 Korinetia 14:15; Ephesia 5:19) E mei teaa ra te rekareka kia akapaapaa ia Iehova i te imene anga i te au uipa anga Kerititiano ra!

19. Eaa ta tatou ka tau kia rave me ka makiia tatou i te pae vaerua, e eaa ra ka rave ei i taua takainga ra?

¹⁹ Penei kare tatou e anoano kia imene me te apikepike ra tatou i te pae vaerua, penei no te tu akono tarevake me kare na te kore e kaikai putuputu i te kaingakai a Iehova. Me tei roto tatou i tera turanga, e tiki akaaka tatou i te aronga pakari e ‘na ratou e pure ia tatou.’ (Maseli 15:29) Ka ‘akatainu oki ratou ia tatou i te manongi i te ingoa o Iehova ra.’ Mei te manongi akamaru ra ki runga i tetai puta, ka tauturu ta ratou au tuatua akapumaana e te akoanga Tuatua Tapu ia tatou kia akakore atu i te manako taitaia, te ekoko, e te mataku. Na ‘te pure akarongo e akariro kia meitaki mai tatou’ me te turuia ra te reira e to tatou uaorai akarongo. Me ka kiteia e te aronga pakari ra e na tetai ara kino i akatupu i to tatou maki i te pae vaerua, ka akataka takinga meitaki mai ratou i ta tatou apa, e ka tauta kia tauturu mai ia tatou. (Salamo 141:5) E me e tataraara to tatou, ka rauka ia tatou te akarongo e ka rongo mai te Atua ra i ta ratou pure e ka akakore i ta tatou ara.

20. Eaa tatou ka tau ei kia aaki i ta tatou au ara e ka pure ei tetai no tetai ra?

²⁰ Na ‘te aakianga i ta tatou apa tetai ki tetai’ ka tau kia tapupu i etai atu raveanga ara. Ka tau te reira kia akamaroiroi i te aroa taokotai anga, ko tetai tu te ka akakeu ia tatou kia “pure oki tetai i tetai.” Ka rauka ia tatou te akarongo e ka puapinga teia, no te mea ko te pure na ‘te tangata tuatua-tika’​—tetai te akono ra i te akarongo e te manakoia maira e te Atua e tika​—e maata tona puapinga ma Iehova ra. (1 Petero 3:12) E au tu paruparu to te peroveta ko Elia mei to tatou nei rai, inara kua tupu tana pure. Kua pure aia, e kare i ua e toru e te apa mataiti. I tana pure akaou anga, kua topa mai te ua.​—1 Ariki 17:1; 18:1, 42-45; Luka 4:25.

21. Penei eaa ta tatou ka rauka kia rave me ‘ka tatipakeia i te tuatua-mou’ tetai taeake Kerititiano ra?

²¹ Ka peea me ‘kia tatipakeia tetai mema o te putuputuanga i te tuatua mou nei,’ i te aere keanga i te apiianga tika e te tu akono tau? Penei ka rauka ia tatou kia akaariu ke mai iaia i tana ara na te akoanga Pipiria, te pure, e etai atu tu tauturu. Me ka autu tatou, ka tamou teia iaia ki raro ake i to Karaiti oko e ka akaora iaia i te mate vaerua e te akaapaanga kia akapouia. Na te tauturuanga i tei apa ra, ka tapoki tatou i tona ara tini ra. Me ka ariu mai tei ara ra i te ako angaia mei tona aerenga tarevake ra, ka tataraara, e ka kimi kia akakoreia tana ara, ka rekareka tatou e kua rave tatou i te tapokianga i tana au ara.​—Salamo 32:1, 2; Iuda 22, 23.

Tetai Apinga na Tatou Katoatoa

22, 23. Eaa te akatupu anga tau kia tatou na te au tuatua a Iakobo ra?

²² Te taka meitaki ra, e apinga tetai i roto i te reta a Iakobo e puapingaiaʼi tatou katoatoa. Te akaari maira te reira kia tatou e akapeea te akono anga i te au timataanga, te ako maira ia tatou no te akaperepere i te tu akara anga, e te raurau ra ia tatou kia rave i te au angaanga tika. Te raurau katoa ra a Iakobo ia tatou kia akatere meitaki i te arero, kia patoi i te mana o teianei ao, e kia akatupu i te au. Ka tau katoa tana au tuatua kia akariro ia tatou kia akakoromaki marie e kia pure oki.

²³ E tika, kua tukuia te reta a Iakobo i te akamata anga ki te au Kerititiano akatainu muaia ra. Inara, pouroa tatou ka tau kia tuku i tana ako anga ei tauturu ia tatou kia mou i to tatou akarongo. Ka rauka i te au tuatua a Iakobo kia pange i te akarongo te ka akakeu ia tatou kia rave papu i te tavini anga i te Atua ra. E te patu ra teianei reta akauruia i tetai akarongo akakoromaki te ka akariro ia tatou kia rave marie, ei Au Kite rave pure no Iehova i teia tuatau nei, i “taua [“parutia,” NW] o te Atu ra” ko Iesu Karaiti.

Akapeea Koe me Pau?

◻ Eaa ra etai o te au Kerititiano mua ra i tau ei kia taui i to ratou tu manako e te tu akono oki?

◻ Eaa ta Iakobo akamatakiteanga i oronga ki te aronga apinga maata ra?

◻ Eaa ra tatou i tau ei kia akono i te akakoromaki marie anga?

◻ Eaa tatou i tau ei kia pure putuputu?

[Akameitakianga no te Tutu i te kapi 19]

Pictorial Archive (Near Eastern History) Est.

[Tutu i te kapi 23]

Kua umuumuia tetai papaki o te au Kerititiano mua ra kia akakoromaki maata atu i te au taeake akarongo

[Tutu i te kapi 24]

Ka tau te au Kerititiano kia akakoromaki marie, kia aroa, e kia rave i te pure