Kia Vai Taokotai i Roto i te Putuputuanga

I rotopu i te au taeake irinaki, kua aite tatou mei te Ariki ko Davida: “Te meitaki e te mataora, kia noo katoa te au taeake ma te tau tikai!” (Salamo 133:1) Kare to tatou tu taokotai i te mea tupu ua. Te rave ra tatou tatakitai i ta tatou tuanga.

1. Eaa te mea umere i rotopu i te iti tangata o te Atua?

Me aere koe ki tetai uipaanga putuputuanga i te enua ke, kare koe e mārama ana i te reo, inara ka āriki aroaia mai koe. Eaa te tumu? No te mea te apii ra tatou i te Pipiria e e aiteite ta tatou au puka e apii ra. E ka aroa tatou i tetai e tetai. Noatu te ngai e noo ra tatou, ‘ka kapiki tatou i te ingoa o Iehova; kia tavini atu iaia ma te manako okotai.’​—Zephania 3:9.

2. Eaa taau ka rave kia vai taokotai?

‘Kia aroa maata kotou ia kotou uaorai ma te ngakau tae.’ (1 Petero 1:22) Akapeea koe me taangaanga i teia ako anga? Auraka e akamou ki runga i te au tu apa ua o tetai ke, e akara i te au tu meitaki. Eiaa e piri ua ki te aronga aiteite te manako e te oraanga, e pukapuka atu ki te au taeake e te au tuaine tukeke te oraanga. Ka angaanga pakari tatou i te kiriti tumu i tetai ua atu manako papakitai.​—E tatau ia 1 Petero 2:17.a

3. Eaa taau ka rave me e manamanata toou ki tetai taeake Kerititiano?

Kua taokotaiia tatou, inara e aronga apa ua tatou. Tetai taime ka tamamae tatou i tetai e tetai. No reira te akakite maira te Tuatua a te Atua “e akakore tetai i ta tetai ara,” e: “Mei [ta Iehova] i akakore i ta kotou na, e akapera katoa kotou.” (E tatau ia Kolosa 3:13.) Eia taime to tatou tamamae anga ia Iehova kua akakore mai aia i ta tatou ara. Te tapapa maira aia kia akakore tatou i te ara a tetai. Me kua tamamae koe i tetai, e aravei atu iaia kia akatikatika i te reira.​—E tatau ia Mataio 5:​23, 24.b

KIMI OONU

4. Akakore i te tu papakitai

Inangaro tatou i te akaperepere i te au taeake. Inara penei ka ngata ia tatou i te āriki i tetai tei tuke kia tatou. Eaa te tauturu? E tatau ia Angaanga 10:​34, 35, e oti uriuri i teia au uianga:

• Ka āriki a Iehova i te iti tangata tukeke ei Au Kite nona. Eaa toou manako me kite koe i tetai e tuke tona oraanga ki toou?

• Eaa te au tu papakitai taau e kite ana i toou ngai ka kopae atu koe?

E tatau ia 2 Korinetia 6:​11-13, e oti uriuri i teia uianga:

• Akapeea koe me akavaitata atu ki te au taeake e te au tuaine tukeke te oraanga?

5. Akakore i te ara e e aka‘au

Ka akakore ua a Iehova i ta tatou ara noatu kare aia e anoano mai ia tatou kia akakore iaia. E tatau ia Salamo 86:5, e oti uriuri i teia au uianga:

• Mei teaa to Iehova tu akakore i te ara?

• Eaa koe i mareka ai i tona tu akakore ua?

• Eaa te au turanga ka ngata i te akaoa i tetai?

Akapeea tatou me aru i to Iehova tu kia vai taokotai ki te au taeake e te au tuaine? E tatau ia Maseli 19:11, e oti uriuri i teia uianga:

• Me akakinoia koe, eaa taau ka rave kia akameitaki atu i te turanga?

I tetai taime e akakino ana tatou i tetai. Me tupu te reira, eaa ta tatou ka rave? Akatangi i te VITIO, e oti uriuri i te uianga ka aru mai.

VITIO: Akameitakianga o te Akatupu i te Au (6:01)

• I roto i te vitio, eaa ta te tuaine i rave no te aka‘au?

6. Akara i te au tu meitaki o te au taeake e te au tuaine

Me akavaitata atu tatou ki te au taeake e te au tuaine, ka kite tatou i to ratou tu maroiroi e te au ngai paruparu. Akapeea tatou me akamou ki runga i to ratou tu maroiroi? Akatangi i te VITIO, e oti uriuri i te uianga ka aru mai.

VITIO: E Akaari ua Rai i te Aroa! (5:10)

• Eaa te ka tauturu ia koe kia akara i te au tu meitaki o te au taeake e te au tuaine?

E akamou ua ana a Iehova ki runga i to tatou tu meitaki. E tatau ia 2 Paraleipomeno 16:9a, e oti uriuri i teia uianga:

• Eaa toou manako me kite koe e e akamou ua ana a Iehova ki runga i toou au tu meitaki?

APIIANGA

Ka rauka ia koe te tauturu i te putuputuanga kia vai taokotai na te akakore anga i te ara e te aroa anga i te au taeake e te au tuaine.

Uriurianga

• Akapeea e rauka ai ia koe te akakore i te tu papakitai?

• Eaa taau ka rave me e manamanata toou ki tetai taeake Kerititiano?

• Eaa koe ka aru ei i to Iehova akaraanga kia akakore i te ara a tetai?

KIMI KIMI

Apii kia kite akapeea tetai o te au akatutuanga a Iesu me tauturu ia tatou auraka e akava atu i tetai.

Kiriti i te Rakau Maata (6:56)

Ka anoanoia ainei tatou kia tataraara atu noatu kare tatou i rave ana i te tarevake?

“Tataraaraanga​—E Taviri no te Akatupuanga i te Au” (Te Punanga Tiaki, Noema 1, 2002)

Akara akapeea tetai pae te akaari anga i te tu papaki tai kore.

Auraka e Akava Atu ia Vao i te Tangata (5:06)

Uriuri i te au ravenga ka rauka ia koe te akatikatika i toou au manamanata i mua ake ka takino ei te reira i te tu ‘au o te putuputuanga.

“E Akatikatika i te au Pekapeka na Roto i te Ngakau Aroa” (Te Punanga Tiaki, Me 2016)