Au Uianga a te Aronga Tatau

Te akakite maira a 1 Ioane 4:18 kia tatou: “Kare o te aroa e mataku; e peke te mataku i te aroa meitaki rava.” Inara kua tata a Petero e: “E aroa atu i te au taeake. Ka mataku i te Atua.” (1 Petero 2:17) Akapeea e raukaʼi ia tatou i te akarotai i teia nga irava?

Ko Petero raua ko Ioane e nga apotetoro tei apii tikaia no ko mai ia Iesu Karaiti uaorai. No reira ka rauka ia tatou i te irinaki e ta raua i tata te rotai ra. Ko te nga irava tei taikuia i runga akenei, ko te taviri ia te tuatua ra te nga apotetoro e rua i te au tu tukeke o te mataku.

E akamanako ana tatou na mua i te ako anga a Petero. Mei ta te tata anga e akaari maira, te oronga maira a Petero ki te au taeake Kerititiano i te ako anga akauruia no runga i to ratou tu ki te aronga i roto i te mana taoonga. Na tetai mataara, te akameitaki ra aia i te akara anga tau te kauraro ra i tetai au ngai. No reira, kua ako atu aia i te au Kerititiano kia kauraro ki te au tangata tei mou ra i te au taoonga mana akaaere i roto i te au kavamani a te tangata ra, mei te au ariki ra me kare te au kavana. (1 Petero 2:13, 14) Aere ua atu ra, kua tata a Petero: “E akangateitei atu i te tangata ravarai. E aroa atu i te au taeake. Ka mataku atu i te Atua. Ka akangateitei i te ariki.”​—1 Petero 2:17.

Te tamanako anga i te papaanga tuatua, kia marama e te karanga ra a Petero e e mea tau i te au Kerititiano kia “mataku atu i te Atua,” ko tana aite anga ra e mea tau ia tatou kia akangateitei oonu ma te akatapu anga i te Atua, te mataku i te akamareka kore anga i te mana taoonga teitei roa atu.​—Akaaite ia Ebera 11:7.

Akapeea ra no runga i to te apotetoro Ioane manako? Te akamata anga i roto ia 1 Ioane pene 4, te rave ra te apotetoro ma te anoano kia timata i te “au tuatua akauruia” mei tei aere mai mei ko mai i te au peroveta pikikaa ra. Kare taua au tuatua ra mei ko mai tikai i te Atua ra ko Iehova; no ko mai ratou me kare te akaata ra i te ao kino.

Ei tuke anga, “no ko mai [te au Kerititiano akatainuia ra] i te Atua.” (1 Ioane 4:1-6) No te reira, te raurau maira a Ioane e: “E aku au akaperepere e, e aroa tatou ia tatou uaorai, no ko mai oki te aroa i te Atua ra.” Kua rave ua te Atua i te akaari i te aroa​—kua “tono mai [aia] i tana Tamaiti ei tarangaara i ta tatou nei ara.” (1 Ioane 4:7-10) Akapeea tatou me pau atu?

Ma te marama, e tau tatou kia vai taokotai ma to tatou Atua aroa. Auraka tatou e mataku iaia e kare e ruketekete i te manakonako anga i te pure atu kiaia. I te akamata anga kua ako mai a Ioane: “Kia kore to tatou ngakau e akaapa ia tatou, kare o tatou e taitaiaanga i reira i te Atua ra. E ta tatou e pati atu iaia ra, e rauka ïa ia tatou, no te mea te akono nei tatou i tana au akauenga, e te rave nei i te au mea e marekaʼi iaia ra.” (1 Ioane 3:21, 22) Ae, te oronga maira te akava ngakau kia tatou te rangatira kia pure atu ki te Atua ma te kore te mataku tau kore me kore tapupu ra. I roto i te aroa, kua rangatira tatou kia tuatua atu, me kare kia pure atu, kia Iehova na roto i te pure. Na roto i teia manako, “kare o te aroa e mataku.”

No reira e tau tatou kia kapiti i nga manako. E tau te Kerititiano kia mataku akangateitei ia Iehova, i anauia ra kia kauraro oonu no tona taoonga, te mana, e te tika. Inara te aroa katoa ra tatou i te Atua ei Metua no tatou e te manako ngakau i tetai pirianga vaitata kiaia e te rangatira anga i te aere atu kiaia. Kare i araiia kia mataku iaia, te irinaki ra tatou e ka rauka ia tatou i te aere atu kiaia mei tetai tamariki te rangatira ra i te aere atu ki tetai metua aroa ra.​—Iakobo 4:8.