E Manako Rapurapu Atu i te Ra o Iehova

“Kia tae ki te au rā openga ra, e kitea mai ei e aronga taitoito.”​—2 PETERO 3:3.

1. Eaa te tu rapurapu o tetai Kerititiano no teia tuatau nei?

KUA tata tetai orometua angaanga i te au tuatau ravarai no te tere atu i te 66 mataiti e: “Kua manako tamou ua rai au i tetai tu rapurapu tikai. Kua vairai a Aramakito ki roto i toku manakoanga, ei te ra i muri ake i to apopo. (Apokalupo 16:14, 16) Mei toku metua tane, e tona metua tane i mua ake iaia ra, kua akono au i toku ora anga mei ta te apotetoro [ko Petero] i raurau maira, i ‘te rapurapu anga atu, [“i te parutia o,” NW] taua rā o te Atua.’ Kua manako tamou ua rai au i te ao ou taputouia maira ei tetai ‘kite ïa i te au mea kare i akaraia nei.’”​—2 Petero 3:11, 12; Ebera 11:1; Isaia 11:6-9; Apokalupo 21:3, 4.

2. Eaa te aite anga o “te rapurapu anga atu” i te ra o Iehova ra?

² Ta Petero tuatua “te rapurapu anga atu” i te taiku anga i te ra o Iehova ra tona aite anga e kia kore tatou e akakore atu i te reira i to tatou manako. Kare tatou e tau kia akangaropoina e ko taua ra e akapou ei a Iehova i teianei akatereanga o te au mea nei ei akamata anga i te akanooanga i tana ao ou i taputou maira te vaitata rava maira. Ka tau ia kia riro ei mea tika tikai kia tatou e te kite taka meitaki ra tatou i te reira, e te vaitata ua maira i mua ia tatou nei. I tika tikai te reira ki te au peroveta a te Atua i taito ra, e e putuputu ratou i te tuatua no te reira e te vaitata maira ia.​—Isaia 13:6; Ioela 1:15; 2:1; Obadia 15; Zephania 1:7, 14.

3. No teaa ra i akakeuiaʼi ta Petero ako anga no runga i te ra o Iehova ra?

³ Eaa ra a Petero i raurau ei ia tatou kia manako i te ra o Iehova ra mei te mea rai e, penei ka tae mai te reira, a “te ra i muri ake i apopo”? No te mea kua akamata tetai papaki i te taitoito i te manako no to Karaiti parutia tei taputouia maira te tuatau e akautungaiaʼi te aronga rave tarevake ra. (2 Petero 3:3, 4) E no reira i te pene 3 o tana reta tuarua ra, ta tatou ka akamanako i teianei, kua pau maira Petero i te au akaapa anga a taua aronga taitoito ra.

Akamaroiroi Anga Maanaana kia Maaraia

4. Eaa ta Petero i anoano kia maaraia e tatou?

⁴ Kua akaariia mai to Petero inangaro no tona au taeake na tana karanga anga putuputu ia ratou i roto i teianei pene ei “au akaperepere.” I te akamaroiroi anga maanaana ia ratou auraka kia akangaropoina i tei apiiia ra kia ratou, kua akamata a Petero: “E aku au akaperepere e . . . ei akaaraara atu i to kotou ngakau pikikaa kore kia manako: Kia maara oki kotou i te tuatua i tuatuaia mai e te au peroveta tapu i muatangana, e te apiiia atu e matou e te au aposetolo a te Atu ra a te Ora.”​—2 Petero 3:1, 2, 8, 14, 17; Iuda 17.

5. Eaa ta etai peroveta i tuatua no te ra o Iehova ra?

⁵ Eaa “te tuatua i tuatuaia mai e te au peroveta tapu” ta Petero i raurau maira i te aronga tatau kia manako? Eaa oki, ko tei tataia no te parutia o Karaiti i tona mana Patireia e te akava anga oki o te aronga akono kore i te Atua. Kua akaariu mai a Petero i te manako anga ki teianei au tuatuaanga. (2 Petero 1:16-19; 2:3-10) Kua taiku maira Iuda ia Enoka, koia te peroveta mua tei akakiteia no te akamatakite atu i te akava anga akautunga a te Atua i te aronga rave kino ra. (Iuda 14, 15) Kua aru oki etai atu peroveta ia Enoka ra, e kare a Petero i anoano kia ngaropoina ia tatou ta ratou i tata ra.​—Isaia 66:15, 16; Zephania 1:15-18; Zekaria 14:6-9.

6. Eaa te au tuatua a Karaiti ratou ko tana au apotetoro te akamarama maira ia tatou no te ra o Iehova?

⁶ Kapiti katoa oki, kua tuatua atu a Petero ki tona aronga tatau kia maara i “te apiiia atu e . . . te Atu ra a te Ora.” Kua kapiti mai ta Iesu akauenga i te akamaroiroi anga: “E matakite ra ia kotou, ko te opue aea to kotou ngakau . . . ka rokoia mai ei kotou e taua rā ra . . . mei te ereere ra.” “E matakite oki ia kotou, e akamaroiroi, e e pure; kare oki taua tuatau ra i kitea e kotou.” (Luka 21:34-36; Mareko 13:33) Kua raurau katoa mai oki a Petero ia tatou kia akarongo i te au tuatua a te au apotetoro ra. Ei akatauanga, kua tata te apotetoro ko Paulo e: “Te aere maira taua rā o te Atu ra mei te keia i te po ra. E teianei, auraka tatou e moe, mei tetai papaki ra, kia ara ra, e e akono meitaki.”​—1 Tesalonia 5:2, 6.

Te Anoano o te Aronga Taitoito Ra

7, 8. (a) Eaa te tu o te au tangata tei taitoito ra i ta te Atua au tuatua akamatakiteanga? (e) Eaa ta te aronga taitoito ra i karanga?

⁷ Mei tei akakiteia mai i mua akenei, ko te tumu no ta Petero akamaroiroi anga no tei akamata tetai papaki i te akavaavaa i taua au akamatakite anga ra, mei to Iseraela i te au tuatau mua ra akavaavaa anga i te au peroveta a Iehova ra. (2 Paraleipomeno 36:16) Kua akataka maira Petero: “Kia kite ra kotou i teia e, kia tae ki te au rā openga ra, e kitea mai ei e aronga taitoito, i te akono anga i ta ratou uaorai anoano.” (2 Petero 3:3) Kua tuatua a Iuda e ko te anoano o teianei aronga taitoito “ko te au apinga tau kore i te Atua.” Kua tapa aia ia ratou e aronga “tei ta te kopapa, ko tei kore i rauka ia ratou te Vaerua ra.”​—Iuda 17-19.

⁸ Ko te au orometua pikikaa ta Petero i tuatua ra “tei akono ua i ta te kopapa ra, i te anoano viivii ra” penei ko ratou etai i roto i teianei aronga taitoito kare ra e akono i ta te vaerua. (2 Petero 2:1, 10, 14) Ka ui akavaavaa ua ratou i te au Kerititiano tiratiratu ra: “Teiea ua te [“parutia,” NW] nona i karangaia ra? te vai ua nei rai oki te au mea katoa nei mei te moe anga mairai o te ai metua ra, mei te maani anga mairai o te enua ra.”​—2 Petero 3:4.

9. (a) Eaa i tautaʼi te aronga taitoito ra kia akakore i te tu rapurapu te akaki ra i te Tuatua a te Atua? (e) Akapeea te vai rapurapu anga to tatou manako i te ra o Iehova i riro ei ei paruru no tatou?

⁹ No teaa ra teianei taitoito? Eaa i manako ei e penei kare e rokoia mai to Karaiti parutia, e kare rava te Atua i akao ana iaia ki roto i te au ravenga a te tangata nei e kare rava oki e pera? Inara, na te akakoreanga i te tu rapurapu te vaira i te Tuatua a te Atua, te kimi nei teianei aronga taitoito kia akaapikepike i etai ke ki roto i tetai turanga manako kore i te pae vaerua e kia akariro ia ratou kia ngoie ua te riro i te au akavare anga noinoi. Mei teaa ra te akamaroiroi anga ririnui no tatou i teianei tuatau kia vai matakite i te pae vaerua! Kia vai rapurapu to tatou manako i te ra o Iehova e kia maara tamou marie e te akara maira tona nga mata ia tatou! E na te reira e akakeu ia tatou kia tavini atu ia Iehova ma te totomapu e kia akono oki i to tatou tu akono ma.​—Salamo 11:4; Isaia 29:15; Ezekiela 8:12; 12:27; Zephania 1:12.

Rave Akakoro e te Tau Kore

10. Akapeea ta Petero akapapu anga e te tarevake ra te aronga taitoito ra?

¹⁰ Te akakore ra taua aronga taitoito i tetai tika puapinga maata. Kua akakoro ratou kia manako kore atu i te reira e kua tauta kia akariro ia etai ke ra kia akangaropoina atu i te reira. Eaa ra te tumu? Kia ngoie uaʼi te akavare maata atu i te au tangata. “Kua inangaro oki ratou,” ta Petero i tata, “i te akangaro i teia e.” Eaa teia tika? “Na te tuatua a te Atua tei anga i te rangi i taito ra, e te enua i vai ki raro i te tai e tei aranga ki runga i te tai: I mate ei te reira enua i te tapoki angaia e te tai.” (2 Petero 3:5, 6) Ae, kua takore atu a Iehova i te rave kino i te enua nei i te Vaipuke i te tuatau ia Noa ra, e tika ia ta Iesu katoa oki i akaketaketa mai. (Mataio 24:37-39; Luka 17:26, 27; 2 Petero 2:5) No reira ei tuke anga ki ta te aronga taitoito i tuatua ra, kare te au mea katoa i vai ua “mei te maani anga mairai o te enua ra.”

11. Eaa te tapapa anga na mua ia o te au Kerititiano mua tei taki atu i tetai papaki kia taitoito ia ratou ra?

¹¹ Penei kua akavaavaa te aronga taitoito ra i te au Kerititiano tiratiratu no te mea kare teianei aronga i kite ake i te au mea tei tapapaia ra. I mua poto ake i to Iesu mate anga, kua akamata te au pipi a Iesu, e “te manako ra ratou e, e kitea mai te basileia o te Atua i reira ra.” I reira, i muri ake i tona tuakaouanga kua ui ratou kiaia me ka akanooia te Patireia i reira tikai. Pera katoa, e vaitata i te tai ngauru mataiti i mua ake i ta Petero tata anga i te rua o tana reta, kua manako “poitirere” tetai papaki na “tetai tuatua anga” me kare “tetai reta,” tei manakoia e no ko mai i te apotetoro ko Paulo me kare na tona au taeake, “i te na ko anga atu e, kua tae mai te rā o Iehova.” (Luka 19:11; 2 Tesalonia 2:2, NW; Angaanga 1:6) Inara, kare taua tapapaanga o te au pipi a Iesu ra i te pikikaa, mari ra e kua na mua ia. Ka tae maira te ra o Iehova!

Ka Rauka kia Irinakiia te Tuatua a te Atua

12. Akapeea te akapapu anga a te Tuatua a te Atua ra e tau kia irinakiia tana au totou no ‘te rā o Iehova’?

¹² Mei tei kiteia i mua akera, e putuputu te au peroveta i mua i te tuatau Kerititiano ra, i te akamatakite e te vaitata maira te ra o to Iehova riri. Kua tae mai tetai tupu anga meangiti o taua ‘rā o Iehova’ i te 607 M.T.N. i ta Iehova ra akatupu anga i tona riri ki runga i tona iti tangata rave tau kore ra. (Zephania 1:14-18) I muri iora, kua rokoia etai atu enua, kapiti katoa ia Babulonia e Aiphiti, i taua ‘rā o Iehova’ ra. (Isaia 13:6-9; Ieremia 46:1-10; Obadia 15) Kua totou katoaia te openga o te akatereanga ngati Iuda o te au mea nei, e kua rokoia te reira i te akatanea angaia a Iudea i te 70 T.N. na te vaeau o Roma ra. (Luka 19:41-44; 1 Petero 4:7) Inara kua tou maira Petero ki tetai ‘rā o Iehova’ i te tuatau ki mua te ka akameangiti ua i te tu noatu i to te Vaipuke o te ao katoa ra!

13. Eaa te akaraanga tuatua enua te akakite maira i te akapapu anga i te openga o teianei akatereanga o te au mea nei?

¹³ Kua akamata maira Petero i te akataka anga i taua akapouanga te aere maira, i te na ko anga: Na “taua tuatua ra.” Koi oti ua akera aia i te tuatua e “na te tuatua a te Atua,” kua tu mai te enua i mua ake i te Vaipuke ra “i vai ki raro i te tai e tei aranga ki runga i te tai.” Na teianei turanga, tei akatakaia maira i te tataanga Pipiria o te anga mai anga, i raukaʼi kia tupu te Teruvi i te maringi anga mai ki raro te vai i ta te Atua ra aratakianga, me kare tuatua. Kua tuatua katoa a Petero: “Kareka te rangi e te enua e vai nei, te tāpuia nei ïa e taua tuatua [a te Atua] ra no te ai, kia tae ki te rā akavaanga, e te mate o te aronga akono kore i te Atua ra.” (2 Petero 3:5-7; Genese 1:6-8) Tei ia tatou ta Iehova ra tuatua tau kia irinakiia no te reira! Ka apai mai aia i te openga ki “te rangi e te enua”​—koia teianei akatereanga o te au mea nei​—i te riri veravera o tana ra maata! (Zephania 3:8) Inara aea ia?

Inangaro Anga no te Openga kia Tae Mai

14. Eaa ra i raukaʼi kia irinaki tatou e te noo nei tatou i teianei i “te tuatau openga”?

¹⁴ Kua anoano nga pipi a Iesu kia kite e aea e tae mai ei te openga, no reira kua ui ratou kiaia: “Eaa te akairo o toou ra parutia e te openga o te akatereanga o te au mea nei?” I te akaraanga te ui ra ratou no te akatereanga ngati Iuda e aea e ope ei, inara te akakite maata ra ta Iesu pauanga no te tuatau o te akapou anga o te au “rangi e te enua” te vai nei. Kua totou a Iesu i te au apinga mei te tamaki maata, te onge kai, te ngaruerue enua, te maki mate, e te rave kino. (Mataio 24:3-14, akaaite ia NW; Luka 21:5-36) Mei te mataiti 1914 mairai, kua kite tatou i te tupu anga te akairo ta Iesu i oronga maira no “te openga o te akatereanga o te au mea nei” pera katoa oki te au apinga ta te apotetoro ko Paulo i taiku ei akataka i “te tuatau openga ra.” (2 Timoteo 3:1-5) E tika tikai, e maata te akapapu anga e te noo nei tatou i te tuatau o te openga o teianei akatereanga o te au mea nei!

15. Eaa ta te au Kerititiano i manako kia rave noatu rai e kua akamatakiteia e Iesu?

¹⁵ Kua inangaro te Au Kite o Iehova kia kite e aea e rokoiaʼi te ra o Iehova ra. No to ratou inangaro maata i etai tuatau kua tamata ratou kia akataka penei aea e tae mai ei te reira. Inara na te raveanga i te reira, kua kore e puapinga ta ratou, mei ta Iesu au pipi mua ra, no te kore i akarongo i te akamatakite a to ratou Pu ra e “kare oki taua tuatau ra i kitea” e tatou. (Mareko 13:32, 33) Kua aviri te aronga taitoito ra i te au Kerititiano tiratiratu no to ratou aere mua anga te tapapaanga. (2 Petero 3:3, 4) Inara, ka tae mai taua ra o Iehova ra, ta Petero i akapapu mai, kia tau ki Tana tuatau i akapapa.

Umuumuia kia Akono i to Iehova Manako

16. Eaa te apii anga ta tatou ka akono pakari?

¹⁶ Ka umuumuia tatou kia akono i to Iehova ra manako no te tuatau, mei ta Petero e akamaaraara maira ia tatou: “Auraka na ra e ngaro ia kotou i teianei potonga tuatua, e aku au akaperepere, okotai rai tu i te Atu te rā tai e te mataiti okotai tausani; e te mataiti okotai tausani ra, okotai rai tu e te rā okotai nei.” Mei teaa ra te poto me akaaiteia atu ki to tatou tuatau ora anga e 70 me kare 80 mataiti! (2 Petero 3:8; Salamo 90:4, 10) No reira me ka akara anga taroaroa te tupu anga o ta te Atua ra taputou, ka tau tatou kia ariki i te ako anga a te peroveta a te Atua ra: “Roa oti [te tuatau akatakaia ra], ka tapapa atu rai; e tae tika mai ia, e kare e tavarevare.”​—Habakuka 2:3.

17. Noatu rai e kua roa atu te au ra openga i ta te aronga e manganui i manako, eaa ra ta tatou ka tau kia irinaki?

¹⁷ Eaa ra te tuatau openga o teianei akatereanga i roa atu ei i tei manakoia e te aronga e manganui ra? No tetai tumu meitaki, mei ta Petero i akataka mai i muri nei: “Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava e anoano e kia mate atu tetai, kia rauka katoatoa ra te tataraara.” (2 Petero 3:9) Te akamanako ra a Iehova eaa te au mea meitaki no te au tangata katoatoa nei. Ko tona manako tei te au oraanga o te au tangata, mei tana i tuatua ra e: “Kare rava oku e mareka anga i te mate o te tangata kino ra; kia ariu maira te tangata kino i tona aerenga kia ora.” (Ezekiela 33:11) E no reira ka rauka ia tatou te irinaki anga e ka tae mai te openga i te tuatau tau tikai kia akatupu i te akakoroanga a Tei Anga aroa mai ia tatou ma te pakari katoatoa ra!

Eaa te ka Peke Ke Atu?

18, 19. (a) Eaa ra a Iehova i manako papu ei kia akapou i teianei akatereanga o te au mea nei? (e) Akapeea ta Petero akataka anga i te openga o teianei akatereanga, e eaa te ka akapou tikaia?

¹⁸ No te mea te aroa tika ra a Iehova i te aronga te tavini ra iaia, ka takore atu aia i te aronga katoatoa te akatupu ra i te tu taitaia kia ratou. (Salamo 37:9-11, 29) Ma te manakoanga mei ta Paulo i mua akera, e ka tae mai teianei akapou anga i tetai tuatau kare ra i manakoia atu, kua tata a Petero: “E tae maira te rā o te Atu mei te keia i te po ra: ka peke ke atu oki teianei rangi ma te paku maata, e taravai te au tumu o te enua i te veravera maata, e te enua oki e te angaanga tini ravarai ki runga, ka pou ïa i te ai.” (2 Petero 3:10; 1 Tesalonia 5:2) Kare te au rangi tikai e te enua i akapouia i te Teruvi ra, kare katoa oki i te ra o Iehova ra. Eaa, i reira, te “ka peke ke atu,” me kare ra ka akapouia?

¹⁹ Ko te au kavamani tangata tei tutara ra i te au tangata mei te “rangi” ra te ka ope atu e pera katoa oki te “enua,” me kare te taiate au tangata akono kore i te Atua ra. Penei ko te “paku maata” te akakite maira i te taka keanga viviki o te au rangi ra. “Te au tumu o te enua” ko ratou te taiate tangata taeke ra te ka “taravai,” me kare ka pou. E ko te “enua,” kapiti katoa oki “te angaanga tini ravarai ki runga” ka “pou ïa i te ai.” Ka akakite atea ravaia e Iehova te au angaanga kikino a te au tangata ra me apai mai aia i te akatereanga katoa o te ao nei ki tona openga tau tikai ra.

Tamanako Marie i Toou Manakonakoanga

20. Akapeea te au akatupu anga tau i to tatou oraanga no to tatou kite anga i te au tupu anga te vai maira ki mua?

²⁰ I te mea kua vaitata teianei au tupu anga taka meitaki, kua karanga a Petero e ka tau tatou kia o atu ki roto i “te tuatua tapu e te akono i te Atua; I te tatari anga, e te rapurapu anga atu, kia tae mai taua rā o te Atua ra.” Kare rava e ekoko anga no te reira! “Te rā e ngaro ei te rangi i te tutungiia i te ai, e e taravai ei te au tumu o te enua i te veravera maata.” (2 Petero 3:11, 12) Ko te tika e ka rauka kia akamata teianei au tupu anga taka meitaki apopo ka tau kia mana ki runga i te au mea ravarai ta tatou ka rave me kare ka parani kia rave.

21. Eaa te ka mono mai i te au rangi e te enua te vai nei?

²¹ Kua akakite mai a Petero i teianei eaa te ka mono i te akatereanga taito ra, i te na ko anga: “Te tatari nei ra tatou i te rangi ou e te enua ou tana i tuatua maira, i te vai tika anga o te tuatua-tika ra.” (2 Petero 3:13; Isaia 65:17) A, mei teaa ra te matara anga meitaki! Ka riro ko Karaiti ratou ko tona au oa tutara e 144,000 ei “rangi” kavamani “ou,” e te aronga tangata te ka ora atu i te openga o teianei ao nei ko te “enua ou” ia.​—1 Ioane 2:17; Apokalupo 5:9, 10; 14:1, 3.

Tamou i te Rapurapu e te Tu Akono Ma

22. (a) Na teaa e tauturu ia tatou kia kopae ke i tetai ua atu topata me kare apa? (e) Eaa te tu kino ta Petero e akamatakite maira?

²² “E teianei, e aku au akaperepere e,” ta Petero i tuatua ua mai, “ko te reira au mea ta kotou e tatari ana, ka akamaroiroi, kia rokoia mai kotou e ia ma te au, ma te topata kore, e te apa kore. E e karanga kotou i te akakoromaki maata o to tatou Atu ra, ko te ora ïa.” Na te tatarianga ma te manako inangaro e te manakoanga i tetai ua atu akara anga taroaroa o te ra o Iehova ra ei akakite anga akakoro maki tu-Atua ka tauturu ia tatou kia kopae ke i tetai ua atu topata me kare apa i te pae vaerua. Inara, te vaira tetai tu kino! Kua akamatakite maira Petero e i te au tataanga a to tatou “taeake akaperepere mei ta Paulo . . . e e mea kimingata oki tai papaki, ta te aronga apii koreia ra, e te tinamou kore, i ruri ke, mei ta ratou i ruri ke i te au tuatua ravarai i tataia ra, e riro atura oki ei mate no ratou uaorai.”​—2 Petero 3:14-16.

23. Eaa ta Petero ra ako anga taopenga?

²³ I te akara anga kua ruri ke te au orometua pikikaa i ta Paulo au tataanga no te aroa ua o te Atua ra, i te taangaanga i te reira ei kotoe anga no te kanga anga. Penei tei roto teia i te manako o Petero i tana tata anga i te akoanga i tona akarukeanga: “E tenana, e aku au akaperepere e, kua kite ana kotou i teianei au mea, kia matakite ia kotou, kia kore kotou e riro i te pikikaa a te tangata kikino ra, e inga iora kotou i to kotou maroiroi anga na.” Kua akaoti atura aia i tana reta, i te raurauanga: “Kia tupu ra te aroa ua ia kotou, e te kite i to tatou Atu ra, i te Ora, ia Iesu Mesia.”​—2 Petero 3:17, 18.

24. Eaa te tu manako tau no te au tavini katoatoa o Iehova ra kia takave atu?

²⁴ Te taka meitaki ra e te anoano ra Petero kia akamaroiroi i tona au taeake. Kua inangaro aia kia rauka i te katoatoa te tu manako tei akakiteia maira e te Kite tiratiratu 82 mataiti tei taikuia maira i te akamata anga maira: “Kua akono au i toku oraanga mei ta te apotetoro i raurau maira, i ‘te rapurapu anga atu, kia tae mai taua rā o te Atua ra.’ Kua manako tamou au i te ao ou tei tuatuaia maira ei tetai mea ‘tika tikaʼi noatu rai kare i akara mataia.’” Kia akono ra tatou katoatoa i to tatou oraanga na roto i taua mataara rai.

Akapeea Koe me Pau?

◻ Eaa te aite anga e kia manako ‘rapurapu atu’ i te ra o Iehova?

◻ Eaa ta te aronga taitoito ra i akakoro kia manako kore atu, e no teaa ra?

◻ No teea tumu i aviri ei te aronga taitoito ra i te au Kerititiano tiratiratu?

◻ Eaa te tu manako te ka tau tatou kia tamou marie?

[Tutu i te kapi 23]

Kia manako rapurapu i te ra o Iehova . . .

[Tutu i te kapi 24]

. . . e te ao ou te ka aru mai