Kia Mou Piri Tatou i to Tatou Akarongo Meitaki Maata!

“I te aronga i rauka katoa ia ratou taua akarongo meitaki mei ia matou nei.”​—2 PETERO 1:1.

1. Eaa ta Iesu i tuatua i te akamatakiteanga i tana au apotetoro, inara eaa ta Petero akateitei anga?

I TE aiai i mua ake i to Iesu matenga, kua tuatua aia e ka akaruke tana au apotetoro katoatoa iaia. E kua tuatua akateitei maira tetai o ratou, ko Petero: “Kia maitu te tangata katoa ia koe, kare takiri au nei e maitu!” (Mataio 26:33) Inara e tuke ta Iesu i kite. No reira aia i tuatuaʼi kia Petero i taua atianga ra: “I pure ana ra au ia koe, kia kore e ope toou akarongo: e kia akaariuia mai koe ra, ka akatinamou atu i to au taeake.”​—Luka 22:32.

2. Noatu rai to Petero irinaki maata iaia uaorai, eaa tana au angaanga tei akakite maira e e paruparu tona akarongo?

² Ko Petero, tei riro ra kia maata roa tona irinaki anga i tona uaorai akarongo, kua uuna ia Iesu i taua po tikai ra. E toru taime tana uuna anga e kua kite aia ia Karaiti! (Mataio 26:69-75) I tona “akaariuia mai” anga, e mea tika kua tangi maata maira e te taka meitaki ki tona nga taringa te au tuatua a tona Atu, “ka akatinamou atu i to au taeake.” Kua tupu oonu ki te toenga atu o to Petero oraanga taua akamaroiroi anga ra, mei tei kiteia i nga reta e rua tana i tata, tei akonoia ra ki roto i te Pipiria.

Te Tumu i Tataʼi a Petero i Tana Nga Reta

3. Eaa ra a Petero i tataʼi i tana reta mua ra?

³ E vaitata i te 30 mataiti i muri ake i to Iesu matenga, i tataʼi a Petero i tana reta mua, e kua tuku atu ki tona au taeake i Ponoto, i Galatia, i Kapadokia, i Asia, e i Bitunia, te au ngai tei matauia i teianei ko te apatokerau e te opunga o Tureki. (1 Petero 1:1) Kare e ekoko anga kua kapitiia atu te au ngati Iuda, ko tetai papaki tei riro ra ei au Kerititiano ia Penetekote 33 T.N., ki roto i taua aronga ta Petero i tata atura. (Angaanga 2:1, 7-9) E manganui e au Kenitara tei o atura ki roto i te au timataanga veravera i te au rima o te aronga patoi ra. (1 Petero 1:6, 7; 2:12, 19, 20; 3:13-17; 4:12-14) No reira kua tata atu a Petero ki teianei au taeake kia akamaroiroi atu ia ratou. Tana akakoro anga kia tauturu ia ratou kia “rauka oki te openga o to [ratou] akarongo, koia te ora o to [ratou] au vaerua.” E no reira, i roto i tana akamaroiroi anga takake, kua raurau aia: E “patoi atu [i te Diabolo] ma te akarongo turori kore.”​—1 Petero 1:9; 5:8-10.

4. Eaa a Petero i tataʼi i te rua o tana reta?

⁴ I muri iora, kua tata atura Petero i te rua o tana reta ki taua au Kerititiano ra. (2 Petero 3:1) Eaa ra te tumu? No te mea te vaira tetai akakoko anga maata atu. Ka tamata te aronga akono tau kore kia akatupu i ta ratou tu akono taviiviianga ki roto i te aronga akarongo e ka akavare i tetai papaki ra! (2 Petero 2:1-3) Pera katoa oki, kua akamatakite maira Petero no te aronga taitoito. Kua tata oki aia i tana reta mua ra e “kua vaitata ra te openga o te au mea ravarai nei,” e i teianei te taitoito ra tetai papaki i taua manako ra. (1 Petero 4:7; 2 Petero 3:3, 4) E akara matatio tatou i te rua o ta Petero reta e kia kite i akapeea te reira te akamaroiroi anga i te au taeake kia vai turori kore i te akarongo. I roto i teianei atikara mua, ka akamanako marie tatou ia 2 Petero pene 1.

Te Akakoro Anga o te Pene 1

5. Akapeea ta Petero akateateamamao anga i tona aronga tatau no tetai uriuri anga manako i te au manamanata?

⁵ Kare a Petero i tuatua vave i te au manamanata kikino. Mari ra, kua teateamamao aia i te mataara no te uriuri manako anga no teianei au manamanata na te akatupuanga kia maata te ariki anga o tana aronga tatau no ta ratou i rauka i to ratou riro anga ei au Kerititiano. Kua akamaaraara atu aia kia ratou i te au taputou memeitaki a te Atua e te tau oki kia irinakiia te au totou Pipiria ra. Kua rave aia i teia na te akakiteanga i te akatukeanga, te orama tana uaorai i kite no Karaiti i tona mana Patireia ra.​—Mataio 17:1-8; 2 Petero 1:3, 4, 11, 16-21.

6, 7. (a) Eaa te apiianga ta tatou ka kite mei te akamata anga ki te reta a Petero ra? (e) Me ka oronga tatou i te akoanga, eaa te tu o te akakite anga penei ka tauturu mai i etai taime?

⁶ Ka rauka ainei ia tatou tetai apiianga mei ta Petero akamata anga maira? Kare ainei e meitaki atu te arikiia te akoanga me ka na mua tatou i te tamanako anga ma te aronga akarongo maira i te au tuanga no te manakonakoanga meitaki o te Patireia ta tatou e anoano kapipiti ra? E ka peea oki te akakiteanga i tetai tupu anga kia koe uaorai? Penei, i muri ake i to Iesu ra matenga, kua putuputu a Petero i te tuatua anga i tona kiteanga i te orama o to Karaiti kaka Patireia ra.​—Mataio 17:9.

⁷ Kia maara, katoa oki, e penei, kia tae ki te tuatau i tataʼi a Petero i te rua o tana reta, kua tua ateaia te Evangeria a Mataio e te reta katoa oki a te apotetoro ko Paulo ki to Galatia. E no reira penei kua kite meitakiia to Petero au tu apa pera katoa tona akarongo oki i roto i tona au taeake o tona tuatau ra. (Mataio 16:21-23; Galatia 2:11-14) Inara, kare teia i apai ke i tona tu mataku kore i te tuatua. Ko te tika, penei kua akariro te reira kia reka atu tana reta ki te aronga tei manako ra i to ratou uaorai au tu paruparu. E no reira, me te tauturu ra i te aronga e au manamanata to ratou, kare ainei e tau kia akatika ua e te ngoie ra tatou i te rave apa ua?​—Roma 3:23; Galatia 6:1.

Tetai Tuatua Akamataanga ei Akamaroiroi

8. Penei eaa te tu o ta Petero taiku anga i te tuatua “akarongo” ra?

⁸ E akamanako ana i teianei i ta Petero tuatua akamataanga. Kua taiku viviki ua aia i te tumu no te akarongo, i te tuatuaanga ki tei tatau ra ei “te aronga i rauka katoa ia ratou taua akarongo meitaki mei ia matou nei.” (2 Petero 1:1) I konei penei ko te aite anga o te tuatua “taua akarongo” ra e “raurau anga tinamou” e te taiku ra i te papaanga o te au akarongo Kerititiano me kare au apiianga, te karangaia ra i te au Tuatua Tapu i etai taime ko “te tuatua-mou.” (Galatia 5:7; 2 Petero 2:2; 2 Ioane 1) E putuputu te taikuia te tuatua “akarongo” na roto i teianei tu kare i te tu matauia ra no te irinaki me kare irinaki anga tei tukuia ra ki roto i tetai tangata me kare apinga.​—Angaanga 6:7; 2 Korinetia 13:5; Galatia 6:10; Ephesia 4:5; Iuda 3.

9. Eaa ra te au tuatua akamataanga a Petero i tangi maanaanaʼi ki te au Kenitara ra?

⁹ E mea tika e kua tangi maanaana ta Petero tuatua akamataanga ki te aronga Kenitara tei tatau ra. Kare te au ngati Iuda i akono kapiti atu ma te au Kenitara, kua akavaavaa atura ia ratou, e kua vairai te akavaavaa anga i te au Kenitara ki roto i te au ngati Iuda tei riro ra ei Kerititiano. (Luka 10:29-37; Ioane 4:9; Angaanga 10:28) Inara, ko Petero, i anauia mai ei tetai ngati Iuda e kua riro ei tetai apotetoro na Iesu Karaiti, kua tuatua e ko te aronga tatau i tana tataanga​—te au ngati Iuda e te au Kenitara​—kua kapitiia i te akarongo okotai e kua rekareka i te angaanga kapipiti aiteite ma ia katoa ra.

10. Eaa te au apiianga ta tatou ka kite mei te au tuatua akamataanga a Petero ra?

¹⁰ E tamanako i te au apiianga meitaki ta te tuatua akamataanga a Petero e apii maira ia tatou i teia tuatau nei. Kare te Atua e akono i te tu o te tangata; kare aia e akaperepere i tetai iti tangata me kare enua tangata ki runga ake i tetai. (Angaanga 10:34, 35; 11:1, 17; 15:3-9) Mei ta Iesu uaorai i apii maira, e au taeake anake te au Kerititiano katoatoa ra, e kare tetai ia tatou e tau kia manako e e teitei ake aia i etai ke ra. Pera katoa oki, te akaketaketa maira ta Petero tuatua akamataanga e e au taeake katoa tatou i te ao nei, tei mou ra i “taua akarongo meitaki” rai koia te akarongo ta Petero ratou ko tona au taeake apotetoro i akono ra.​—Mataio 23:8; 1 Petero 5:9.

Te Kite e ta te Atua Au Taputou

11. Aru mai i tana au tuatua akamataanga, eaa te au mea puapinga maata ta Petero i akaketaketa mai?

¹¹ Aru mai i tana tuatua akamataanga ra, kua tata a Petero: “Kia akamaataia mai te aroa ua e te au ia kotou.” Ka akapeea ra te aroa ua e te au i te akamaata angaia kia tatou? Na “te kite i te Atua, e to tatou Atu ia Iesu ra,” ta Petero ia i pau mai. I reira kua tuatua aia: “Na te mana Atua nona i oronga mai i te au mea katoa ia tatou, i te tau, i te ora, e te akono i te Atua.” Inara akapeea e raukaʼi ia tatou teianei au mea puapinga maata? “No te kite iaia ko tei kapiki mai ia tatou no te kakā e te maroiroi.” E no reira e rua taime i akaketaketa mai ei a Petero e mea puapinga te kite tika tikai i te Atua e tana Tamaiti oki.​—2 Petero 1:2, 3; Ioane 17:3.

12. (a) Eaa ra a Petero i akaketaketaʼi i te puapinga maata o te kite tika? (e) E rekarekaʼi i ta te Atua ra au taputou, eaa ta tatou ka tika kia rave na mua?

¹² Te tuatua ra te au “orometua pikikaa” ta Petero i akamatakite maira i te pene 2 i ta ratou “tuatua pikikaa” kia akavare i te au Kerititiano. Na teianei tu te tauta ra ratou kia akavare ia ratou kia oki akaou ki roto i te au ravenga tau kore i akaoraia maira ratou mei reira mai. Te au tupu anga te ka tupu ki tetai ua atu tei akaoraia mai na roto i “te kite i te Atu ra, i te Ora ia Iesu Mesia” e tei tuku ua atu ki teia akavare anga e kino tikai. (2 Petero 2:1-3, 20) I te akara anga i te manako anga kia uriuri manako i teianei manamanata i muri akera, kua akaketaketa maira Petero i te akamata anga o tana reta i te tuanga o te kite tika kia akatinamou i tetai turanga ma ma te Atua ra. Kua akakite maira Petero e kua “oronga mai [te Atua] ia tatou i te meitaki rava i tuatuaia maira, kia rauka ia kotou te tu Atua i te reira.” Inara, e rekarekaʼi i teianei au mea tuatuaia maira, ko te reira ra tetai tuanga maata o to tatou akarongo, kua tuatua mai a Petero, ka tika tatou kia na mua i “te rere ke anga atu i te kino e vai i teianei ao no te anoano tika kore ra.”​—2 Petero 1:4.

13. Eaa ta te au Kerititiano akatainuia e te “au mamoe ke atu” te manako papu ra kia mou piri tikai?

¹³ Akapeea toou manako no ta te Atua ra au taputou? Na roto ainei i te tu o ta te toenga o te au Kerititiano akatainuia ra? I te 1991, kua akataka maira Frederick Franz, koia te peretiteni o te Taiate Punanga Tiaki Pipiria e te Pepa i reira ra, tei aruaru ra i te angaanga orometua i te au tuatau ravarai no te tere atu i te 75 mataiti, i te manako o te aronga tei manakonako ra kia tutara ma Karaiti: “Te mou piri meitaki ra matou tae roa mai ki teianei ora tikai, e ka mou piri meitaki ua atu matou kia tae roa ki ta te Atua ra akapapu anga e te mou tika ra aia ki tana ‘au taputou meitaki e te mekameka tikai.’” Kua vai mou tikai to te Taeake ko Franz irinaki anga i ta te Atua ra taputou no tetai tuakaouanga ki te rangi, e kua mou piri tikai aia ki te akarongo tae roa ki tona matenga e 99 ona mataiti. (1 Korinetia 15:42-44; Philipi 3:13, 14; 2 Timoteo 2:10-12) Mei te reira katoa, e au mirioni ua atu te mou meitaki ra i te akarongo, i te tamouanga i to ratou manako ki runga i ta te Atua taputou no tetai parataito i te enua nei te ngai e noo ei te au tangata e tuatau ua atu ma te mataora anga. Ko koe ainei tetai io ratou ra?​—Luka 23:43; 2 Petero 3:13; Apokalupo 21:3, 4.

Akono Tau ki ta te Atua Au Taputou

14. Eaa ra a Petero i akapapaʼi i te akono tika meitaki ei te tu mua kia kapitiia atu ki te akarongo?

¹⁴ Te akameitaki ra ainei tatou ki te Atua no tana i taputou mai? Me koia ia, te maro maira Petero, ka tau tatou kia akaari i te reira. “Ae, no teianei tumu tikai” (no te mea kua oronga mai te Atua kia tatou i te au taputou meitaki rava), ka tau tatou kia tauta tikai kia rave. Kare tatou e mareka ua i te akarongo anga me kare i te kite anga i te tuatua mou o te Pipiria anake. Kare te reira e rava! Penei i to Petero tuatau ra kua tuatua maata tetai papaki i roto i te au putuputuanga ra no te akarongo inara kua o atu ki roto i te tu akono tau kore. Kua umuumuia to ratou tu akono kia riro ei akono tika meitaki, no reira kua raurau a Petero: “E kapiti atu i te akono tika meitaki ki to kotou akarongo.”​—2 Petero 1:5, NW; Iakobo 2:14-17.

15. (a) Eaa ra te kite i akapapaiaʼi i muri ake i te akono tika meitaki ei tetai tu kia kapitiia atu ki te akarongo? (e) Eaa etai atu au tu te ka akapapa ia tatou kia mou piri tikai i te akarongo?

¹⁵ I muri ake i te taikuanga i te akono tika meitaki, kua akapapa mai a Petero e ono atu au tu te ka tika kia kapitiia atu, me kare kia tapiriia, ki to tatou akarongo. Te umuumuia ra te reira tataki tai e tatou me “kia matakite; kia mou piri tikai te akarongo.” (1 Korinetia 16:13) No te mea kua ‘ruri ke te au apoteiti i te au tuatua i tataia ra’ e te akatotoaanga i te apiianga “pikikaa,” kua tata maira Petero i te kite ei tetai mea puapinga maata, i te na ko anga: “Ki to kotou akono tika meitaki [e kapiti atu i] te kite.” I reira kua tuatua katoa aia: “Ki to kotou kite [e tapiri atu i] te akatere-uaorai, ki to kotou akatere-uaorai te akakoromaki, ki to kotou akakoromaki te tu akono i te Atua, ki to kotou tu akono i te Atua te inangaro taeake, ki to kotou inangaro taeake te aroa.”​—2 Petero 1:5-7, NW; 2:12, 13; 3:16.

16. Eaa te ka tupu me ka kapitiia atu te au tu ta Petero i akapapa ra ki te akarongo, inara eaa te ka tupu me ka kore te reira e raveia?

¹⁶ Eaa te ka tupu me ka kapitiia mai eia nga mea e itu ki to tatou akarongo? “Me te vaira teia au mea ia kotou ra e e ki maringi ua,” kua pau mai a Petero, “ka paruru te reira ia kotou mei te akatau anga me kore te uua kore anga kia tau ki te kite tika tikai o to tatou Atu ko Iesu Karaiti.” (2 Petero 1:8, NW) I tetai tua, te tuatua ra Petero: “Me kare teia au mea e vaira i tetai ua atu, e matapo aia, te topirianga i tona mata ki te marama, e kua ngaropoina i tona tamaangaia mei tana au ara i muatangana.” (2 Petero 1:9, NW) E akara e kua taui a Petero i te taiku anga ia “kotou” e “tatou” ki “tetai ua atu,” “aia,” e “tona.” Noatu rai, e mea mii, kua poiri te mata o tetai papaki, kua ngaropoina ua, e kua viivii; ma te takinga meitaki kare a Petero i tuatua kapiti atu i tei tatau ra ei tetai o teianei aronga.​—2 Petero 2:2.

Akamaroiroianga i Tona Au Taeake

17. Penei na teaa i akakeu i ta Petero pati anga maru kia akono i “teianei au mea”?

¹⁷ Penei i te kiteanga e ka ngoie ua te aronga ou i te akavareia, kua akamaroiroi maru atura Petero ia ratou: “E teianei, e aku au taeake, ka akamaroiroi, kia kitea tikaia to kotou kapiki angaia e te iki angaia; kia pera oki kotou, kare ua ïa e inga.” (2 Petero 1:10; 2:18) Te au Kerititiano akatainuia tei kapiti atura ki to ratou akarongo i eia mea e itu ra ka rekareka i tetai tutaki meitaki, mei ta Petero i tuatua ra: “Ka oronga uaia mai oki te o no kotou ki roto i te basileia mutu kore o to tatou Atu o Iesu Mesia, to tatou Ora ra.” (2 Petero 1:11) Ka rauka i te “au mamoe ke atu” tetai tuanga mutu kore i te ngai o te Patireia o te Atua i te enua nei.​—Ioane 10:16; Mataio 25:33, 34.

18. Eaa ra a Petero i kore ei “e vata i te akakite akamaara anga” ki tona au taeake?

¹⁸ E ngakau tae tikai to Petero anoano i taua tutaki meitaki ra no tona au taeake. “E teianei,” tana i tata, “kare ua au e vata i te akakite ia kotou i teianei au tuatua, kite ua rai kotou, e tinamou ua rai kotou i taua tuatua-mou nei.” (2 Petero 1:12) Kua taiku a Petero i te tuatua Ereni ste·riʹzo, tei uriia i konei “e tinamou ua rai” mari ra kua akatakaia ei “akamaroiroi” i ta Iesu akauenga kia Petero i mua akera: “Ka akamaroiroi atu i to au taeake.” (Luka 22:32, NW) Te akakite maira te taangaanga anga i taua tuatua ra e te maara ra ia Petero te akamaroiroi anga ririnui tei rauka iaia mei ko mai i tona Atu ra. Kua tuatua a Petero i teianei: “Te manako nei oki au e mea tika, i toku noo anga i teianei puakapa [kopapa tangata], kia akamatutu atu ia kotou, i te akakite akaou anga atu rai; Kua kite oki au e kua vaitata au i te kopae i teianei puakapa.”​—2 Petero 1:13, 14.

19. Eaa te au tauturu te umuumuia ra e tatou i teianei tuatau?

¹⁹ Noatu rai kua tuatua takinga meitaki a Petero e ko tona aronga tatau “e tinamou ua rai [ratou] i taua tuatua-mou nei,” kua kite ra aia e ka rauka ua kia akangaa pai i to ratou akarongo. (1 Timoteo 1:19) I te mea kua kite aia e kare e roaia ka mate aia, kua akamaroiroi atu aia i tona au taeake na te taikuanga i te au mea te ka maaraia e ratou i muri akera kia tamou i to ratou uaorai maroiroi i te pae vaerua. (2 Petero 1:15; 3:12, 13) Mei te reira katoa tatou i teia tuatau te umuumuia ra te au akamaaraara anga putuputu kia tinamou i te akarongo. Noatu rai e koai tatou me kare eaa te roa ia tatou i roto i te tuatua mou, kare e tau kia manako kore tatou i te tatauanga putuputu i te Pipiria, te apii naau uaorai, e te aere anga ki te au uipaanga putuputuanga. Ka kimi tetai papaki i te au kotoe anga no te kore e aere, i te na ko anga e e roiroi roa ratou me kare e taokioki ua te au uipaanga e kare e meitaki te oronga anga, inara kua kite a Petero e akapeea te viviki no tetai ua atu o tatou kia ngere i te akarongo me ka riro tatou kia maata rava te irinaki anga ia tatou uaorai.​—Mareko 14:66-72; 1 Korinetia 10:12; Ebera 10:25.

Tumu Anga Ngaueue Kore no to Tatou Akarongo

20, 21. Akapeea ta te akatuke anga akamaroiroi anga i te akarongo o Petero e te aronga tatau i tana nga reta ra, kapiti katoa oki ia tatou i teia tuatau nei?

²⁰ Kua akatumu uaia ainei to tatou akarongo ki runga i etai tua kikite? “Kare,” kua akakite ketaketa maira Petero, “kare oki ta matou i te tuatua taeke ua i akatupuia e te pakari ra, ka akakite atu ei matou ia kotou i te mana e te [“parutia,” NW] o to tatou Atu ra o Iesu Mesia, kua kite tikai ra to matou mata i tona tapunui.” I reira katoa a Petero, a Iakobo, e Ioane ma Iesu i to ratou kite anga i tetai orama nona i roto i te mana Patireia. Kua akataka maira Petero: “I rauka oki iaia i te Atua Metua ra te akangateitei e te kakā, ka tae mai ei iaia taua reo no roto mai i te kakā maata ra e, ‘Taku tamaiti akaperepere teia, kua mareka rava au iaia.’ Kua akarongo matou i taua reo no te rangi maira, ia matou ma ia katoa ki runga i te maunga tapu ra.”​—2 Petero 1:16-18.

²¹ I te kite anga a Petero, a Iakobo, e Ioane i taua orama ra, kua riro te Patireia ei tika tikai kia ratou ra! Kua akakite maira Petero, “tei ia tatou katoa te tuatua tika maata rava atura o te au peroveta; ko te mea meitaki ïa ia kotou kia akono i te reira.” Ae, ko te aronga tatau i taua reta a Petero ra, kapiti katoa ia tatou i teia tuatau nei, e tumu mana ririnui to tatou kia manako akono i te au totou no te Patireia o te Atua ra. Na teea tu i tau ei kia manako akono tatou? Kua pau mai a Petero: “Mei te lamepa e kakā ua i te ngai poiri ra, e kia mamaiata, e kake ei te etu popongi i roto i to kotou ngakau.”​—2 Petero 1:19; Daniela 7:13, 14; Isaia 9:5, 6.

22. (a) Eaa te mea tau kia matakite tamou to tatou au ngakau? (e) Akapeea tatou i te manako akono anga ki te tuatua totou ra?

²² Ka poiri to tatou ngakau me ka kore te marama o te tuatua totou ra. Inara na te manako akono i te reira, kua vai matakite te au ngakau Kerititiano ki te makirata o te ra e kake ei te “etu popongi,” koia Iesu Karaiti, i te kaka Patireia ra. (Apokalupo 22:16) Akapeea tatou i teia tuatau nei i te manako akono anga ki te tuatua totou ra? Na te apii Pipiria, na te teateamamao anga e te rave anga tuanga i roto i te au uipaanga, e na te ‘akamanakoanga tikai i teianei au tuatua, ma te rave oki e auraka e tivata.’ (1 Timoteo 4:15) Me kia kaka mai te tuatua totou ra i roto i te “ngai poiri” (to tatou ngakau), ka tika tatou kia tuku kia tupu oonu ki roto ia tatou​—i to tatou au anoano, au manako ngakau, au akakeu anga, e te au akakoro anga. Ka umuumuia tatou kia riro ei aronga apii i te Pipiria, no te mea kua taopenga maira Petero i te pene 1: “Te au totou ravarai i roto i te tuatua i tataia ra, kare ïa te mea kimiia e te tangata uaorai. Kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te Vaerua Tapu i tuku mai ia ratou ra.”​—2 Petero 1:20, 21.

23. Kua akateateamamao no teaa te pene mua o 2 Petero i te aronga tatau ra?

²³ I roto i te pene akatueraanga o te rua o tana reta, kua oronga mai a Petero i te akakeu anga ririnui no tatou kia mou tinamou i to tatou akarongo meitaki. Kua papa tatou i teianei no tetai akamanako anga i te au tumu maata te aru mai nei. Ka uriuri te atikara te aru mai nei i te pene 2 o 2 Petero, te ngai ta te apotetoro i akono ra ma te akaaoanga i te au mana akono tau kore tei tae ki roto i te au putuputuanga.

Te Maara Ainei ia Koe?

◻ Eaa a Petero i akaketaketaʼi i te puapinga maata o te kite tika?

◻ Penei eaa te tumu i akapapaiaʼi te akono tika meitaki ei te tu mua kia kapitiia atu ki te akarongo?

◻ Eaa ra a Petero i kore ei e vata i te akakite akamaara anga ki tona au taeake?

◻ Eaa te tumu anga ngaueue kore ta Petero i oronga mai no to tatou akarongo?

[Tutu i te kapi 9]

Kare to Petero au apaanga i akariro iaia kia akaruke i tona akarongo