E Tatari Marie Ua

KUA kite te tamaiti tiaki mamoe tei kapiki ripiti ua e e “Ruko!” e kare tana kapiki putuputu anga i tetai tauturu e akarongoia mai te kore anga te ruko. Mei te reira katoa oki i teia tuatau, e manganui tei manako kore i to Iehova ra maata no te mea kua rongo ana ratou i te au akamatakiteanga kare e rauka i te tareia te akapapu anga mai e e au tangi anga pikikaa. I te tika anga e manganui kare i kite meitaki e ko teea tikai te akamatakiteanga e no reira kua akarongo atu ki te reira te rave kangakanga ia ra ki roto i nga rima o te enemi maata o te Atua ra, koia a Satani, taua ‘angela no te mārama’ pikikaa ra.​—2 Korinetia 11:14.

E mea kino te vaerua manako merengo kore ua no te aronga tei tavini ia Iehova i tetai tuatau roa. No teea ra? E tamanako ana i te akamatakiteanga a te apotetoro ko Petero i te anere mataiti mua.

Kia Manako Taka Meitaki

E akamaara anga te rua o te reta akauruia a Petero ki te au Kerititiano mua, e pera katoa oki kia tatou. “E aku au akaperepere e,” tana i tata, “te tata atu nei au i te rua o te episetole ia kotou i teianei; ei akaaraara atu i to kotou ngakau pikikaa kore kia manako.” (2 Petero 3:1) Eaa ra to Petero tumu anga no teia manako? Te akakite maira a Petero te taenga mai te aronga taitoito e na roto i ta ratou taitoito anga te akaparuparu anga i te manako anoano rapurapu no te tuatau tau te ora nei rai te au tavini o te Atua. Teia te tuatau kia matakite kia kore e akaauouoia e te aronga aviri. No reira kua raurau mai a Petero i tona aronga tatau kia “maara oki kotou i te tuatua i tuatuaia mai e te au peroveta tapu i muatangana.” (2 Petero 3:2; Angaanga 3:22, 23) Eaa ra ta te au peroveta i tuatua mai?

Te akakite maira te au tavini tiratiratu o te Atua i te au tuatau e manganui e i akapeea ra te au akavaanga tu-Atua i te takore anga i te rave kino. Te akamaara maira a Petero i tona aronga tatau i to Noa tuatau o te Vaipuke i te taangaanga anga te Atua ei ravenga akao anga te ki anga te enua i te kino. Kua takore takiriia e taua Tiruvi vai puke ra te ao o taua tuatau ra. Inara kua akaora te Atua ia Noa e tona ngutuare tangata i roto i te araka ma te au mea ora i komonoia “o nga mea ravarai.” Te akakite maira te au tua o te ao e pini ua ake te tika anga o te akapapaanga Pipiria.a​—Genese 6:19; 2 Petero 3:5, 6.

Kua kapiki a Petero i taua akao anga tu-Atua ko ‘tetai tuatua tei ngaro’ no tetai aronga tangata. E oti kua akavareia tetai ki roto i te tu manako kore na te aronga taitoito o taua tuatau ra. Inara, ko tatou ra, auraka rava e akangaropoina i ta Iehova i rave takere ana. Te akakite maira a Petero kia tatou: “Kareka te rangi e te enua e vai nei, te tāpuia nei ïa e taua tuatua ra no te ai, kia tae ki te rā akavaanga, e te mate o te aronga akono kore i te Atua ra.” (2 Petero 3:7) Ae, ka tupu akaou te akao anga tu-Atua.

Kare te Atua e Akaroaroa

Kua pati takere te tuatau o te tauatini ua atu mataiti. Eaa ra te Atua i tatari roaʼi no te akakore atu i te au manamanata o te au tangata nei? Te tou akaou maira a Petero ki runga i tetai tumu ke. Te karanga ra aia: “Auraka na ra e ngaro ia kotou i teianei potonga tuatua, e aku au akaperepere, okotai rai tu i te Atu te rā tai e te mataiti okotai tausani; e te mataiti okotai tausani ra, okotai rai tu e te rā okotai nei.” (2 Petero 3:8) E tuke to Iehova manako no te tuatau i to tatou nei. Ki te Atua mutu kore ra, mei te tuatau i to Adamu anga angaia anga e tae ua mai ki teia tuatau nei kare i tae ake ki te epetoma. Inara noatu e eaa to tatou manako no te tuatau, ko te tauatini mataiti tataki tai e te ra tataki tai te ngaro ra te akavaitata atura ia tatou ki te akatupuanga i to Iehova ra akakoro anga.

“Kare te pani e pupu me akara uaia” e tuatua te akataka ra e me tatari ua i tetai tupu anga te akaraanga e te taroaroaia ra tona tupuanga. Inara, te akamaroiroi maira a Petero i te “tatari anga, e te rapurapu anga atu, kia tae mai taua rā o te Atua ra.” (2 Petero 3:12) Akapeea ra tatou te akatupu i tetai tu manako te akamatakite ra ia tatou te vaitata mai anga te akao anga tu-Atua ra?

E Maata Atu te Akakite Anga a te Au Angaanga i ta te Au Tuatua

Te tou maira a Petero i te manako ki runga i te au ravenga e te au angaanga. Te taiku ra aia ki te “au tuatua tapu” e pera katoa “te akono i te atua.” (2 Petero 3:11) Eaa ra te kapitiia atura ki teia?

Te akono ra te tavini tika tikai o te Atua i te mataara te mareka ra Iaia. Te akaata maira te akarongo o taua tangata akamori ra i roto i tona tu. Te akatakake ra teia iaia mei te aronga tei tuatua ua ra e te irinaki ra i te Atua e tana au taputou. Penei kua kite koe i taua angaanga orometua i te ngai tangata a te Au Kite o Iehova e e tuke ratou. Te aere maira ratou ki toou kainga te akaari i te au taputou a te Atua tei akakiteia mai i roto i te Pipiria. Inara te akaari katoa maira ratou i to ratou au manakonakoanga e te au irinaki anga i te ngai e aravei ra ratou i te tangata.

Te Kite te rave angaanga ra iaia uaorai te akakiteanga i tona akarongo ki etai ke ra kua akaketaketaia tona irinaki anga e te akamaroiroiia ra. Te akaoonu ra te akakiteanga i te akara anga e i taua taime rai te oronga maira i te rekareka no roto roa e te pumaana. Me akakite tatou i te tuatua meitaki o te Patireia o te Atua, te akamareka katoa ra tatou ia Iehova. Kua kite tatou e koia ra ‘kare i te tuatua-tika kore ka akangaro ei i ta tatou angaanga i rave e ta tatou anoano i tona ingoa,’ mei to Petero taeake apotetoro ko Paulo i akakite mai.​—Ebera 6:10; Roma 10:9, 10.

Eaa ra te tupu anga no teia manako maata te totoaanga i te tuatua meitaki o te Patireia i teia au ra openga o teia akatere anga kino nei? E anere e tauatini ua atu te au tangata ngakau tiratiratu te apii ra e akapeea me piri vaitata ma Iehova, kia puapingaia mei tona aroa takinga meitaki e te kimi ra i te mataora mou i roto i te manakonakoanga no te oraanga mutu kore ki runga i tetai enua parataito.

Te Kite i Teianei Au Mea

Noatu rai e kua kite tatou mei te Pipiria e ka akao mai te Atua ra ko Iehova i tona ra tuatau tau, te anoanoia ra tatou kia akarongo atu i tetai akamatakiteanga tei orongaia mai e Petero. “Kua kite ana kotou i teianei au mea, kia matakite ia kotou, kia kore kotou e riro i te pikikaa a te tangata kikino ra, e inga iora kotou i to kotou maroiroi anga na.”​—2 Petero 3:17.

Kua kite papu a Iehova i mua ana e ko etai pae tei ngere ra te akarongo maroiroi ka riro mai te taitaia no te akaraanga e te roa nei te akao anga tu-Atua. Kua kite katoa aia e ka takino te mana taviivii o te au tangata tau kore ra i tona au tavini mou me kore, ka akaparuparuia to ratou irinaki anga e te vaitata maira te akatapu anga te ingoa o te Atua. Mei teaa ra te tumatetenga me topa mei te tu ngaueue kore i teia au ra openga!

Kare ko teia te tuatau e akamoupuku i te manako ekoko me kore te tu papu kore e eaa ta Iehova ka rave. (Ebera 12:1) Kareka ra, teia te tuatau kia tupu te ariki anga e eaa ta te akakoromaki anga o Iehova ra i oronga mai​—ko te manakonakoanga no te ora ki te au mirioni tei riro mai ei tuanga no te urupu maata i te pa enua e te akara ra ki mua kia ora atu i te tumatetenga maata te aere maira. (Apokalupo 7:9, 14) Te raurau maira a Petero: “Kia tupu ra te aroa ua ia kotou, e te kite i to tatou Atu ra, i te Ora, ia Iesu Mesia. Ei iaia te kakā i teianei e e tuatau ua atu.”​—2 Petero 3:18.

“Tamou Tikai Kotou i to Kotou Uaorai Inangaro i te Atua”

Kia maata te angaanga tutu aere i te Patireia e te tae putuputuanga ki te au uipaanga Kerititiano no te akamori e te apii anga i te Tuatua a te Atua ka orongaia mai kia tatou te paruru anga. No reira, kare o tatou tuatau kia manako maata atu no runga i te au turanga kino i roto i teia akatere anga kino o teia tuatau. Kare e anoanoia kia tupu te mataku e te au apiapi i roto i te oraanga o te au Kerititiano mou. (1 Korinetia 15:58) Te maata anga te angaanga i te tavini ia Iehova, te pati viviki ra te tuatau.

Kua raurau mai te apa teina o Iesu i to Petero tuatau, koia a Iuda ia tatou: “Kotou, e aku au akaperepere e, i te patu anga ia kotou uaorai, i to kotou akarongo tapu maata ra, i te pure anga ma te Vaerua Tapu. Tamou tikai kotou i to kotou uaorai inangaro i te Atua, i te tatari anga i te aroa o to tatou Atu o Iesu Mesia, e tae ua atu ki te ora mutu kore ra.” (Iuda 20, 21) E akara atu i te puapinga o tetai tu akapapu te anoanoia ra na roto i te pure akakoromaki anga. (1 Tesalonia 5:17) Kua kapiti mai i reira a Iuda e: “Ka aroa atu i tetai pae, ei akonoanga ke ïa, E ka akaora oki i tetai pae ma te mataku, i te aō anga ia ratou no roto i te ai; i te rikarika anga atu i te kakau i viivii i te kino ra.” (Iuda 22, 23) Mei teea ra te puapinga kia akamaroiroi i tetai e tetai i teia au tuatau ngata! E mei teaa ra te puapinga kia kore e topa atu ki roto i te timata anga, te taangaanga maata anga i teia “rā e oraʼi ra” e ei kotoeanga no te “kanga anga,” te tupu maata ra i teianei te ao tu akono tau kore viivii ra i teia tuatau.​—Iuda 4; 2 Korinetia 6:1, 2.

Na te akarongo anga i te ako anga aroa a Petero, a Paulo, e Iuda e te angaanga maata e te rave anga i te angaanga a te Atua ra, ka rauka ia koe i te tatari marie i te akao anga a Iehova. Inara ka akapera ainei koe?

Auraka e tapupu i te aravei atu i te Au Kite i te ngai e noo ra koe no te tauturu kia akamaroiroiia toou akarongo i roto i te taputou a Tei Anga ra no te oraanga mutu kore. E apii e eaa te umuumuia ra ei mea tau kia piri atu ki roto i teia angaanga tutu aere anga i te koropu kare e ripiti akaouia te ka akaotiia te vaitata mai anga te tumatetenga maata. (Mareko 13:10) Ka rauka ia koe i reira te manakonako anga no te nooanga ki roto i te ao ou o te tuatua tika ta Iehova e taputou maira. (2 Petero 3:13) E akarongo atu i reira ki tana au akamatakite anga! E tatari marie ua! Kia maata te angaanga!

[Tataanga Rikiriki i Raro]

[Tutu i te kapi 7]

E apii i teia taime nei no runga i te au taputou a te Atua no te Parataito

[Akameitakianga no te Tutu i te kapi 5]

Wolf: Animals/Jim Harter/Dover Publications, Inc.; young shepherd: Children: A Pictorial Archive from Nineteenth-Century Sources/Grafton/Dover Publications, Inc.