Te Itae Atu Nei Ainei Koe?

“Kia itae atu tetai tangata i te taoonga akaaere, kua inangaro aia i te angaanga memeitaki.”​—1 TIMOTEO 3:1, “NW.”

1. Te akatupuanga i teea akakoroanga te mea maata i rotopu i te au Kite o Iehova?

E TIKA anake te au akakoroanga o te au Kite o Iehova tei takiia atura e tei raveia na roto i te mataara akono i te Atua ra. Kare teia i te apinga poitirere, i te mea e au akakoroanga meitaki anake ta to ratou Atua e te oti katoa ra oki tona au akakoroanga. (Isaia 55:8-11) Kare te au tavini o Iehova e tau kia aite atu ki te aronga tei ngere ra i te akakoroanga meitaki e te aere ua atura to ratou oraanga ma te ravenga mea ngiti ua te puapinga no etai ke mari no ratou ua. Ko te apinga maata ki te au Kite o te Atua ko te akatupuanga i te akakoroanga meitaki no te tutu aere anga i te tuatua o te Patireia e te tua anga ma etai atu i te kite oronga ora no te tuatua a te Atua ra.​—Salamo 119:105; Mareko 13:10; Ioane 17:3.

2. Eaa te akakoroanga na te au tangata Kerititiano tei taikuia ra e Paulo ia 1 Timoteo 3:1?

² I roto i ta Iehova akaaerenga, te vaira etai atu au akakoroanga meitaki. Kua akakite mai te apotetoro ko Paulo i tetai i tana tata anga: “E tuatua mou teia. Kia itae atu tetai tangata i te taoonga akaaere, kua inangaro aia i te angaanga memeitaki.” (NW) Te reira tu tangata te anoano ra kia rave i tetai apinga ei meitaki no etai ke atu. Te inangaro ra aia i “te angaanga memeitaki,” kare i te oraanga noonoo ua e te kaka. Te tuatua ra tetai atu urianga: “E tika rava kia tuatua e ko te tangata tei akanoo ra i tona ngakau ei arataki aia e inangaro meitaki tona.”​—1 Timoteo 3:1, Phillips.

Au tu Kino no te Aronga Pakari

3, 4. Eaa i tau ei te tangata te itae atura kia riro ei akaaere, kia paruru i tona ngakau?

³ Na teea tu te tangata tei akanoo ra i tona ngakau ei akaaere Kerititiano aia i tau ei e e “inangaro meitaki” tona ra? Ko te inangaro e anoano pakari ia kia rauka tetai akakoroanga tikai. E tika, te vaira te au inangaro tika e te inangaro tika kore. Inara kia itae taakaaka atu te tangata i te taoonga ei akaaere no tona anoano kia tavini atu ia etai ke ra, te raveia ra tana angaanga ma te au manako tika e ka rauka kia tupu mai te au akameitakianga i te pae vaerua. Inara e mea tau nona kia paruru i tona ngakau.​—Maseli 4:23.

⁴ Te kimi ra tetai papaki tangata inangaro i te kaka no ratou. Ko etai atu te anoano ra na ratou e tutara i runga ake i te au tangata no ratou ra. Te aite ra, te noinoi no te turanga teitei me kare mana, mei te aka pe ra te ka rauka kia akainga ki raro i te pu rakau akaraanga meitaki ra. Ka rauka katoa oki te Kerititiano kia varea i te reira inangaro tarevake te akakeu anga. (Maseli 16:18) “I tata na au i tetai mea ki te putuputuanga ra,” i na te apotetoro ko Ioane ei, “ko Dioterepe ra, ko tei akateitei iaia uaorai ki rungao ia ratou ra [“ko tei anoano e koia ei upoko no te au mea katoa ra,” Phillips], kare aia e ariki ngateitei mai i tetai apinga na matou. No reira, kia tae atu au, ka akamaaraara atu au i tana au angaanga e rave ua atura, te tuatua akakino aere anga ia matou. Pera katoa oki, kare aia e mareka i te reira anake ra, kare katoa aia uaorai e kite mai i te au taeake ma te kauraro, e ko te aronga te anoano ra kia ariki atu ia ratou te tauta ra aia i te arai atu e kia tiria ki vao i te putuputuanga.” (3 Ioane 9:10, NW) Kare to Dioterepe inangaro i te tu Kerititiano. Kare e ngai i rotopu i ta Iesu au pipi mou no te akateitei e no te aruaru kia mana ki rungao i etai ke ra.​—Maseli 21:4.

5. Eaa te tu manako tau no te au akaaere i te akono anga i ta ratou au angaanga?

⁵ Te akaaere Kerititiano te akono ra i tana au angaanga ma te manako tika, kare ia e aruaru i te au inangaro noinoi. Ka akamanako aia i teia angaanga memeitaki ei akaaere Kerititiano e, e taoonga na te Atua i oronga mai e ka akono aia ei tiaki i te anana a te Atua “auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau; Auraka ma te akaueue ua ki runga i te tuanga a te Atua ra, ei [akaraanga] ra kotou no te anana.” (1 Petero 5:2, 3) Ae, ka tau te au akaaere kia kopae ke i te tupuanga ngakau parau ma te kimianga kia taangaanga i te mana ei rave akakino.

6. Eaa ka tau kore ei no tetai tangata pakari kia akaueue ua ki rungao i te au tangata o te Atua ra?

⁶ Kare te tangata pakari e tau kia akariro koia ei pu ki rungao i etai atu au Kerititiano, no te mea e taeake rave angaanga katoa aia, kare i ‘te atu i to ratou akarongo.’ (2 Korinetia 1:24) I te aruaru anga etai nga apotetoro ra ko ratou kia maata, kua karanga atura Iesu: “Kua kite oki kotou e, te tutara nei te ui mana o te etene ki runga ia ratou, e te aronga mamaata ra, te mana ra ïa i runga i to ratou. Kare ra e tika kia akapera ki roto ia kotou; ko te anoano i te akamaata i o kotou, kia riro ïa ei tavini no kotou; E ko te inangaro kia maata aia i o kotou na, ei tavini akaaka aia no kotou: Kare oki te Tamaiti a te tangata i aere mai kia taviniia tona, ei tavini ra, e kia oronga i tona ora ei oko no te tangata e manganui.” (Mataio 20:20-28) Kare te tangata pakari i te Tiaki Maata mari ra e tiaki no raro ua aia. Kia akaueue aia ki rungao i te anana ra, te akakite ra aia i te vaerua akaparau. Ka riro mai te reira ei kino me ka akavare aia ia etai ke atu kia tauturu i te akatere atu i tona inangaro akaparau. Kua karanga tetai Maseli: “Te rikarika rā Iehova i te aronga katoa i parau te ngakau ra: tuikau ua rai te rima, kare aia e kore i te akautungaia.”​—Maseli 16:5.

7, 8. (a) Eaa ka anoanoiaʼi te aronga pakari Kerititiano kia taakaaka ia ratou uaorai? (e) E oronga mai i te akaraanga no tetai tangata pakari tei taakaaka ra.

⁷ No reira, ka tau te aronga pakari Kerititiano kia ‘akamoraro ia ratou uaorai i raro ake i te rima mana o te Atua.’ Ka tu te parau ei arai i te meitaki i te pae vaerua, no te mea ko te aronga taakaaka anake ua te tau ra te ngakau e te manako kia rave i te anoano o te Atua. “E patoi te Atua i tei nengonengo, e oronga mai i te meitaki no tei akaaka.” (1 Petero 5:5, 6) Ae, te akameitaki ra a Iehova i tei akaaka te manako. No roto mai i teia aronga te au tangata tau te akataoongaia ra ei aronga Kerititiano pakari.

⁸ Te ki ra te tuatua enua no te au Kite o Iehova i teia tuatau i te au tataanga i te angaanga taakaaka tei raveia e te aronga ta­taki­tai tei akono ra i te Atua. Ei akaraanga, e akamanako na ia W. J. Thorn tangata maru ra, e orometua, me kare e akaaere tutaka aere, e e tangata angaanga roa ki Betela. Kua tuatua tetai Kerititiano nona e: “Kare rava, kare e ngaropoina iaku tetai tuatua anga na te Taeake ko Thorn tei tauturu iaku e tae roa mai ki teia ra nei. Kua karanga aia, taku ia ka tuatua atu, ‘Te au taime ua atu kia akamata au i te akamanakonako maata iaku uaorai, ka taki atu au iaku uaorai ki roto i te akoko e kia tuatua ua, e kua na ko atu: “Ko koe e te one pueu meangiti ua nei. Eaa taau e akaparau na?”’” Mei teaa ra te tu meitaki no te aronga pakari kia akaari! Kia maara e, “te tutaki o te taakaaka e te mataku ia Iehova, ko te apinga nui ïa, ko te [kaka, NW] ïa, ko te ora ïa.”​—Maseli 22:4.

Te Inangaro na te Atua i Oronga Mai kia Tavini

9. Eaa i tau ei kia tuatuaia e ko te inangaro kia tavini ei akaaere e mea orongaia mai na te Atua ra?

⁹ Na te Atua ainei i oronga mai i te inangaro kia tavini ei akaaere? Ae, no te mea na te vaerua o Iehova i oronga mai i te akakeu anga, te maroiroi, e te ririnui kia rave i te angaanga tapu kiaia. Ei akatauanga, eaa tei tupu i te pure anga te au pipi a Iesu tei takinokinoia ra, kia mataku kore ratou i te tutu aere? “Ngaueue iora te ngai i uipaiaʼi ratou; e akakiia maira ratou ravarai i te Vaerua Tapu, kua tuatua ua iora i te tuatua a te Atua ma te mataku kore.” (Angaanga 4:27-31) I te mea na te vaerua tapu i akatupu i te reira, ka rauka katoa i te vaerua tapu i te akakeu kia itae atu te tangata nei.

10. (a) Eaa tetai tumu penei e kore ei tetai tangata Kerititiano e itae atu? (e) Me oronga mai te Atua i te taoonga tavini no tatou, eaa te mea ka papu ia tatou?

¹⁰ Eaa ra te Kerititiano kua pakari penei ka kore ei e itae atu? Penei e tangata manako no te pae vaerua aia inara te manako ngakau ra e kare aia i tau. (1 Korinetia 2:14, 15) Inara e mea tau kia akamako tatou i te manako anga no tatou uaorai, ma te matakite i to tatou au kotinga. (Mika 6:8) Kare ko te manakoanga e ko tatou tei tau meitaki rava atu no tetai apainga, e mea meitaki kia akamanako e “tei te aronga akaaka ra te pakari.” (Maseli 11:2) Ka tau katoa ra tatou kia kite e me oronga mai te Atua i tetai angaanga na tatou, ka oronga katoa mai aia i te ririnui tei anoanoia no te rave i te reira. Mei ta Paulo i karanga ra: “E tika iaku te au mea ravarai nei i te Mesia, ko tei akamaroiroi mai iaku nei.”​—Philipi 4:13.

11. Eaa te ka rauka i tetai Kerititiano kare ra e itae atu ana no te mea te manako ra e te ngere ra aia i te pakari e te oronga anga i te ako?

¹¹ Penei kare te Kerititiano e itae atu no te mea te manako ra aia e kare i rava tona pakari no te ako. Kareka ra, penei ka rauka iaia te pakari na te apii anga maroiroi i te Tuatua a te Atua ra, e e mea tau kia pure aia no te pakari. Kua tata a Iakobo e: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana. E pati ra aia ma te akarongo, e te ekoko kore: ko tei ekoko ra, e tau ïa i te ngaru tai e puia e te matangi, e tikitiki akera. Auraka oki te reira tangata e manako e, ka rauka tana i te Atu[a] ei ngai mea ngiti ake: E tangata ngakau rua ïa, e te tinamou kore, i tona katoa ra au aerenga.” (Iakobo 1:5-8) I te pau anga i te pure, kua oronga te Atua kia Solomona i “te ngakau karape e te kite” i raukai iaia i te kite i rotopu i te meitaki e te kino i te akavaanga. (1 Ariki 3:9-14) E tu takake rai to Solomona, inara ma te apii maroiroi e te tauturu na te Atua ra, ka rauka i te aronga tei orongaia ra te apainga i roto i te putuputuanga kia akoia etai ke ra ma te tuatua tika. “Ko Iehova oki tei oronga mai i te pakari: no roto i tona vaa te kite e te karape.”​—Maseli 2:6.

12. Me kare tetai tangata e itae atu no tona apiapi, eaa te ka rauka i te tauturu iaia?

¹² Penei na tetai manga apiapi e tapupu i tetai tangata kia kore e itae atu. Penei ka manako aia e kare e rauka iaia i te akono i te apainga teiaa a te tangata pakari ra. Ko Paulo tetai tei akakite mai e: “Ko te pekapeka ra i rokoia ua mai ei au i te au rā katoa nei, i te akono anga i te au [putuputuanga, NW] katoa ra.” (2 Korinetia 11:28) Inara kua kite te apotetoro ra eaa tana ka rave me rokoia e te apiapi, no te mea kua tata aia: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:6, 7) Ae, ka rauka i te pure e te irinaki ia Iehova i te akakore atu i te apiapi.

13. Akapeea ta te tangata pure me te ngoie kore ra aia i te itaeanga atu?

¹³ Me ka tamou mai etai tu apiapi, e mea tau no te tangata ekoko i te itae atu kia pure mei ta Davida rai: “E unuunumou mai koe iaku, e te Atua, kia kite oki koe i toku ngakau; e timata mai iaku, e kia kite koe i toku manako [taitaia, NW]: E akara mai i te aerenga kino e vai nei i roto iaku nei, e e arataki koe iaku i te arataa e tika i te vai marie anga te meitaki ra.” (Salamo 139:23, 24) Noatu eaa te tu o to tatou ra manako “taitaia” me kare “apiapi” ka rauka i te Atua i te tauturu ia tatou kia akono atu i te reira e kia tupu tatou i te pae vaerua. (E akara i The New International Version.) Te taka meitaki ra i tetai atu salamo e: “Iaku i karanga ra, Te paeke nei toku vaevae, kua turu mai to ­takinga-meitaki iaku, e Iehova. I rotopu i toku nei manako mirimiri-ngata i roto iaku nei, na to akapumaana e akarekareka mai i toku [meta, NW].”​—Salamo 94:18, 19.

E Rave Rekareka i ta Iehova i Anoano

14. Eaa ka tau ei te tangata kare ra e itae atu ana kia pure no te vaerua tapu o te Atua?

¹⁴ Me ka kore tetai tangata Kerititiano e itae atu no te apiapi, e te manakoanga e kare i tau, me kare no te ngere i te akakeu anga, e e mea tika rai kia pure no te vaerua o te Atua. Kua karanga a Iesu: “E te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te [rangi, NW] ra, i te oronga i te Vaerua Tapu i te aronga e pati atu ki aia ra!” (Luka 11:13) I te mea tei roto te au e te akono meitaki i te au ua o te vaerua, ka rauka i teia vaerua i te tauturu ia tatou kia rauka te akono i te apiapi me kare te au manakoanga e kare i tau.​—Galatia 5:22, 23.

15. Eaa te tu pure te ka rauka i te tauturu i te aronga kare ra o ratou akakeu anga kia akapapa ia ratou uaorai no te taoonga angaanga?

¹⁵ Akapeea me ngere anake i te akakeu anga? Ei au Kerititiano papetitoia, ka tau tatou kia pure e akamaroiroi mai te Atua ia tatou kia rave i tei akamareka iaia. Kua pati akatenga a Davida: “E akakite mai koe kiaku i to au arataa, e Iehova; . . . E arataki koe iaku i te tuatua-mou naau ra, e apii mai koe iaku.” (Salamo 25:4, 5) Na te pure mei teianei rai e tauturu ia tatou kia kopae ke i te arataa tarevake, e ka rauka katoa ia tatou i te pure mei te reira rai te tu me te ­ngere ra tatou i te akakeu anga kia itae atu. Ka tau tatou kia pati ia Iehova kia akariro ia tatou kia inangaro i te ariki i te au apainga no te angaanga. Ko te tika, kia pure tatou no to te Atua ra vaerua e ka aru i tana arataki anga, kare e ekoko anga e ka akapapa rai tatou ia tatou uaorai me ka orongaia mai te apainga na tatou kia rave i te angaanga. Kare oki e tau, kia akakore te au tavini o te Atua i ta te vaerua akakeu anga.​—Ephesia 4:30.

16. Eaa te tu manako te oronga maira i te akakeu anga ririnui kia itae atu i tetai apainga no te putuputuanga?

¹⁶ Te tu anga i “te manako o te Mesia,” ka rekareka rai tatou i te raveanga i te anoano o te Atua ra. (1 Korinetia 2:16, NW) Aiteite to Iesu tu manako ki to te tata salamo, tei karanga ra: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau.” (Salamo 40:8) Kua tuatua te Mesia: “I na! I aere mai ei au nei e rave i toou anoano,” e tae roa te reira ki te matenga ki runga i te rakau tamamae anga. (Ebera 10:9, 10, NW) Na te inangaro i te rave i te au mea ravarai te ka rauka i roto i ta Iehova angaanga e oronga mai i te akakeu anga maroiroi kia itae atu i te apainga no te putuputuanga.

Akara i te Tuatau ki Mua

17. (a) Eaa ra te au tangata kare e rave ana i teianei kia maata mei ta ratou i rave i muana, i tau kore ei kia manako apikepike? (e) Eaa te angaanga maata rava atu?

¹⁷ No te au manamanata o te ora anga kopapa me kare no etai atu tumu, ko tetai papaki tei akono i te au angaanga puapinga maata no te putuputuanga i muana kare ia ratou e rave akaou ana i teianei. Kare e tau kia akono akaparuparuia ratou. Kua kite tatou e e manganui te au tangata tiratiratu kare e rauka ia ratou te rave kia ki ta ratou tuanga mei ta ratou i rave i muana inara te vai ngaueue kore ra to ratou tiratiratu. (Salamo 25:21) No reira, ko te aronga pakari taakaaka no te tuatau roa ka tau kia rave tamou i te oronga i to ratou kite na te vaianga ki roto i te pupu o te aronga pakari ra. Noatu rai e te apikepike ra i te ruau me kore te au tu paruparu, kare ratou e takai mai ki raro. I teianei, e akaperepere te au Kite tatakitai o Iehova i te angaanga meitaki rava, koia ‘te tuatuaanga i te kakā o to te Atua ra basileia’ ei aronga mou i tona ingoa tapu.​—Salamo 145:10-13.

18. (a) Me kua kiritiia tetai tangata pakari me kare tavini angaanga orometua, eaa te anoanoia ra? (e) Eaa te tu manako meitaki tei akakiteia maira e tetai tangata pakari tei kiritiia ra?

¹⁸ Me ko koe ana tetai tangata pakari me kare tavini angaanga orometua inara kare koe e rave ra i te reira angaanga i teianei, kia papu ia koe e te vaira to te Atua manako noou, e penei ka oronga akaou mai aia i etai angaanga kare i manakoia a te tuatau ki mua. (1 Petero 5:6, 7) Me te tau ra koe kia akono i etai akatikatika anga, kia ngoie ua koe i te akatika e e tarevake tetai e ka rave ei i te akatikatika i te reira ma te tauturu a te Atua ra. Ko tetai papaki tei kiritiia mai i te angaanga ei aronga pakari kua rave i te tu akono tau kore no te Kerititiano, e e tokoiti ua kua akamutu te angaanga me kare kua topa ki vao i te tuatua mou. Inara mei teea ra te pakari kia akaaite atu ki te aronga tei akakite maira i te vaerua meitaki! Ei akaraanga, i te kiriti angaia tetai tangata pakari e manganui ra ona mataiti i rave ei i te angaanga i Rotopu o Marike, kua karanga aia: “E mamae maata toku i te kore anga taku angaanga i akaperepere ra no te tuatau roa. Inara ka tauta pakari au noatu eaa ta te au taeake ka anoano iaku kia rave e ka rapu au kia rauka akaou mai taku angaanga.” I muri akera kua riro mai te reira taeake kia rave akaou i te angaanga ei tangata pakari.

19. Eaa te apii tano te orongaia ra ki tetai taeake tei kiritiia ra tona taoonga ei tangata pakari me kare ei tavini angaanga orometua?

¹⁹ Me ko koe tetai tei kiritiia ei tangata pakari me kare ei tavini angaanga orometua, e tamou koe i te vaerua taakaaka. E kopae ke i te tu riri te ka akatau kore ia koe no te angaanga no te tuatau ki mua ra. Ka rauka mai te akangateitei i te vaerua akono i te Atua ra. Auraka e akaapikepike te manako, e akamaaraara i ta Iehova ra akameitakianga i taau angaanga orometua me kare i toou ngutuare. E akamatutu i toou ngutuare tangata i te pae vaerua, e aravei i te aronga maki, e akamaroiroi atu i te aronga paruparu. I rungao i te au mea katoatoa, e akaperepere i te angaanga akapaapaa anga e te tutuanga i te tuatua meitaki ei Kite no Iehova.​—Salamo 145:1, 2; Isaia 43:10-12.

20. Akapeea e raukai i te pupu aronga pakari i te tauturu i tetai e akaaere me kare e tavini angaanga orometua i muana?

²⁰ E mea tau no te pupu o te aronga pakari kia kite e ko te kiritiia anga ka akatupu i te manako manamanata no tetai e akaaere aia i muana me kare no tetai e tavini angaanga orometua, noatu rai e me nana ua i akakore i taua angaanga ra. Me kare aia i akaateaia ki vao, inara te kite ra te aronga pakari e te taitaia ra te reira taeake, e mea tau no ratou kia oronga atu i te tauturu aroa i te pae vaerua. (1 Tesalonia 5:14) Ka tau katoa ratou kia tauturu iaia kia kite e te anoanoia ra aia i roto i te putuputuanga. Noatu rai e me i anoanoia te akoanga, penei kare e roa te tuatau ki mua ka rauka akaou ei i te tangata taakaaka e te meitaki, etai angaanga kapitiia mai i roto i te putuputuanga.

21. Koai tei tiaki no te taoonga angaanga ra, e eaa te manakoia ra no te aronga te tiaki ra no te reira i teia tuatau nei?

²¹ Me te itae atura koe, penei ka tiaki koe no tetai tuatau i mua ake e raukai tetai atu angaanga. Auraka e akakoromaki kore. E 40 mataiti a Mose i te tiaki anga i mua ake i tona taangaanga angaia e te Atua e tatara atu i to Iseraela mei roto i te tuikaa anga i Aiphiti ra. (Angaanga 7:23-36) I mua ake i to Iosua akataoonga angaia ei mono ia Mose, e roa tona rave anga ei tauturu. (Exodo 33:11; Numero 27:15-23) Kua tiaki a Davida no tetai tuatau i mua ake i tona akanoo angaia ki runga i te terono o Iseraela. (2 Samuela 2:7; 5:3) A Petero raua ko Ioane Mareko i te akaraanga kua akapou i etai tuatau no te tama angaia. (Mataio 26:69-75; Ioane 21:15-19; Angaanga 13:13; 15:36-41; Kolosa 4:10) No reira me kare taau angaanga i roto i te putuputuanga i teianei, penei te akono ra a Iehova ia koe kia akatikatikaia na te raukaanga kia tere atu toou kite. Noatu eaa te tu, e kimi i ta te Atua tauturu ia koe e itae atura i te angaanga, e nana e akameitaki ia koe ma etai angaanga kapitiia mai. I teianei, e rapu marie kia tau koe no tetai apainga i roto i te putuputuanga e ka akakite mai ei i te vaerua mei to Davida rai, iaia i karangaʼi: “Ka tuatua toku vaa ma te akapaapaa ia Iehova; e kia akameitaki te tangata ravarai i tona ra ingoa tapu e tuatatau ua atu.”​—Salamo 145:21.

Akapeea Koe Me Pau?

◻ Eaa te au kino ka tau te aronga Kerititiano pakari kia paruru atu?

◻ Eaa te ka rauka i te tauturu i te aronga kare e itae atu ana, no te apiapi me kare no te manako e kare i rava tona kite?

◻ Eaa te ka tau ei akakeu i tetai tangata kia akapapa iaia uaorai no te apainga i roto i te putuputuanga?

◻ Eaa te tu manako tau no te tuatau ki mua na te aronga pakari e te au tavini angaanga orometua ra ratou i muana?

[Tutu i te kapi 19]

Kua akanoo a W. J. Thorn i te akaraanga meitaki ei tangata pakari taakaaka

[Tutu i te kapi 21]

Mei ia Iesu rai, te rekareka ra ainei koe i te rave i te au mea ravarai e rauka ia koe i ta Iehova angaanga ra?