Ka Tau Tikai Ainei Koe kia Tavini?

“No ko mai i te Atua to matou tika ei aronga tau meitaki tikai.”​—2 KORINETIA 3:5, “NW.”

1. Eaa te tu o te tangata kare ona ngai i roto i te putuputuanga Kerititiano?

E RAVE angaanga katoa oki te Atua ra ko Iehova raua ko Iesu Mesia. Kua karanga a Iesu: “Te angaanga ua nei rai toku Metua, ka angaanga katoa oki au.” (Ioane 5:17) Kare te Atua e mareka i te au tangata kare ra e akatika kia angaanga; kare katoa tona mareka anga i runga i te aronga te kimi ra i te apainga na ratou ei mana no ratou ki runga ake ia etai ke ra. Kare e ngai i roto i te putuputuanga Kerititiano no te aronga kope ra me kare no te aronga noinoi taoonga.​—Mataio 20:25-27; 2 Tesalonia 3:10.

2. Eaa ra i maataʼi te anoanoia o te au tangata ei rave i te apainga i roto i te putuputuanga Kerititiano?

² Mei e te au Kite o Iehova ‘maata nei te rave anga i te angaanga a te Atu,’ e maata roa atu i teianei, i te mea e manganui te au tangata te aere maira ki “te maunga” o te akamori anga mou ra. (1 Korinetia 15:58; Isaia 2:2-4) Te vaira te anoano maata anga no te au tangata tau tikai i te pae vaerua kia rave i te apainga i roto i te putuputuanga. Kare na te noinoi i te taoonga, te akateitei ra te reira au tu tangata ia Iehova, kare ia ratou uaorai. (Maseli 8:13) Kua kite ratou e na te Atua e tauturu ia ratou kia tau tikai no te au angaanga o te putuputuanga, mei tana rai i ‘akatau meitaki tikai i te au orometua o te koreromotu ou.’​—2 Korinetia 3:4-6, NW.

3. Ei akatumuanga, eaa te au apainga a te aronga pakari e te au tavini angaanga orometua ra?

³ I teia tuatau nei, mei to te au Kerititiano mua ra, na te vaerua tapu e na roto i te akanooanga akaaerenga a Iehova e akataoonga ana i te au tangata kia tavini ei aronga pakari me kare ei tavini angaanga orometua. (Angaanga 20:28; Philipi 1:1; Tito 1:5) Na te aronga pakari e tiaki ana i te anana a te Atua ra i te pae vaerua, e te oronga anga i te akaaere paruru anga. Na te au tavini angaanga orometua e tauturu ana ia ratou, ko ta teia aronga angaanga, kare e kapiti tika atura i te akaaere anga i te pae vaerua. (1 Petero 5:2; akaaiteia atu kia Angaanga 6:1-6.) Mei te Tamaiti a te Atua, tei aere maira kia rave angaanga orometua, mei te reira katoa teia aronga akataoongaia te inangaro ra kia tavini atu i to ratou au taeake akarongo ra. (Mareko 10:45) Me ko koe tetai e tangata Kerititiano, tei ia koe ainei te reira tu vaerua?

Au tu Tau Tikai Tei Mou Taokotaiia

4. Teiea tikai te ngai e kiteaʼi e tatou te papaanga no te au tu tau tikai no te aronga tei orongaia te au apainga o te putuputuanga ra?

⁴ Kua akatakaia te au umuumuanga no te aronga tei orongaia na ratou te apainga i te putuputuanga tei akanooia ra e te apotetoro ko Paulo ia 1 Timoteo 3:1-10, 12, 13 e ia Tito 1:5-9. Ia tatou e uriuri manako nei i teia au tu tau tikai, ko etai te piri atura ki te aronga pakari e te au tavini angaanga orometua, auraka tatou e akara i te reira mei te turanga o teianei ao. Tera ra ka akara tatou ia ratou na roto i te akanooanga i te anere mataiti mua ra e te tau ra no to Iehova iti tangata. Kare te tauanga i teia au umuumuanga i te akauenga kia apa kore ua, no te mea kare e tangata e tau tikai i te reira. (1 Ioane 1:8) Inara me e tangata Kerititiano koe, noatu e me e au angaanga taau i te putuputuanga e me kare ua, eaa koe ka kore ei e akara matatio i toou uaorai au tu tau tikai?

5. Eaa te aiteanga e kia kore e akaapaia mai?

⁵ Kare e akaapaanga mai; ei rongo meitaki oki tona i te aronga ki vao ra; kare e tapepeanga. (1 Timoteo 3:2, 7, 8, 10; Tito 1:6, 7) I te akataoonga angaia e pera katoa i te tavinianga, ka tau te au tavini angaanga orometua e te aronga pakari kia kore e akaapaanga mai, koia oki, kia atea i te akaapaia e kia kore katoa e tau kia akoia no tetai akaapaanga tika no te tu akono tarevake me kare apiianga. Te au akaapa tika kore tei tukuia mai e te “au taeake pikikaa” me kare e etai ke atura kare ia e riro ei tangata apa aia. E tau kore ei te tangata no te tavinianga i te putuputuanga, kare te akaapaanga e tau ei mea rikiriki ua, e ka tau ra kia akapapuia kia rotai ki te au turanga Tuatua Tapu ra. (2 Korinetia 11:26; 1 Timoteo 5:19) Ka tau te tangata akataoongaia i te putuputuanga ra “ei rongo meitaki oki tona i te aronga ki vao ra e tikaʼi; ko te rokoia aea aia i te akakino, e te ereere a te diabolo.” Me i rave ana tetai tangata i te ara kino roa i te tuatau kua topa, ka rauka te akataoonga iaia me kua rauka iaia i te akakore i te akakino anga e kua akariro kia meitaki tona uaorai ingoa.

6. Eaa te aiteanga e ei tangata okotai vaine?

⁶ Ei tangata vaine okotai. (1 Timoteo 3:2, 12; Tito 1:6) Kare te aiteanga o teia e ko te au tangata akaipoipo anake ua te ka tau ei tavini angaanga orometua e ei aronga pakari. Inara, me kua akaipoipoia, ka tau te tangata kia okotai ua ana vaine e ora ra e kia tiratiratu aia kiaia. (Ebera 13:4) Auraka kia aite atu ki te au tangata e manganui kare i te Kerititiano i te anere mataiti mua ra, kare aia e tau ei tangata vaine e manganui.a

7. (a) Ko te pakari ainei o te mataiti e te kopapa te ka tau tikai ei tangata pakari? (e) Eaa te kapitiia maira ki te arataki meitaki i tona uaorai ngutuare?

⁷ Ei arataki meitaki i tona uaorai ngutuare ra, e tana au tamariki i te kauraro marie anga iaia. (1 Timoteo 3:4, 5, 12; Tito 1:6) Penei te manako ra tetai papaki e ka tau te aronga pakari auraka ei raro ake i te 30 mataiti, inara kare te Puka Tapu i akanoo mai i te mataiti kia taeaia. Tera ra, e mea tau no taua tangata ra kia akono mei tetai tangata pakari i te tu o te pae vaerua. E mea tau rai no te au tavini angaanga orometua e te aronga pakari, kia rava te au mataiti no te anau tamariki. Me kua akaipoipoia, kare te tangata e tau tikai me ka akono aia kia tika ki ta te Atua i etai ngai ke mari ra e tangi kore e te takinga kino katoa oki i tona ngutuare. E mea tau kia rauka iaia te akangateitei anga no te akono anga i tona uaorai ngutuare kia tau ki te kaveinga Puka Tapu, e ko tona akakoroanga kia puapinga i te pae vaerua te au mema katoatoa o tona ngutuare. Te mea matauia, ko te tangata pakari e metua tamariki aia ka tau tana tamariki mea rikiriki kia mako e tei roto i te “akarongo.” Te aere atura ki te manako no te akatapu anga ki te Atua me kare kua oti takere i te papetitoia ei Kite no Iehova. Ko te tangata kare e rauka iaia i te patu te akarongo ki roto i tana tamariki kare e akaraanga e ka rauka iaia i te rave kia etai ke atura.

8. I mua ake ka tau ei te tangata e tamariki tana, kia riro ei tangata pakari, eaa tana ka tika kia apii i te rave?

⁸ I mua ake ka tau ei te tangata e tamariki tana, ei tangata pakari te ka rauka iaia te akono i te akaaere i te putuputuanga i te pae vaerua, e mea tika kia apii aia e akapeea te arataki i tona uaorai ngutuare. ‘Me kare tetai tangata i kite e akapeea i te arataki i tona uaorai ngutuare, eaa e tikaʼi iaia kia tiaki i te putuputuanga a te Atua?’ (1 Timoteo 3:5) E tika rai, penei te patoiia ra tetai tangata, e tana vaine akarongo kore. (Mataio 10:36; Luka 12:52) Penei ko tetai o tana tamariki kua apa i te rave ara kino, e ko tetai papaki te meitaki ra i te pae vaerua. Inara, me kua rave te reira tangata i te au mea katoa tei tau kia manakoia, e e maata atu oki me kua puapingaia aia i te akono anga i tetai atu papaki o tona ngutuare, ko te kopae anga i tana arataki anga meitaki, a tetai mema no tona ngutuare kare e tau ei akakore iaia ei tavini angaanga orometua me kare ei tangata pakari.

9. Eaa te mea tau kia matakite te tangata pakari me kare tavini angaanga orometua kia akono no runga i te kava?

⁹ Eiaa ei tangata tauetono no te kona kava me kare ei inu maata i te wina. (1 Timoteo 3:3, 8; Tito 1:7) Auraka rava te tavini angaanga orometua me kore te tangata pakari e inu maata i te kava. No te maata te inu i te kava ka akangere i te akatere i te manako e te manako ngakau, e ka arataki atu ki te tauetono no te kona kava me kare ka momoto. Kare aia e tau ei tangata ‘inu maata i te wina’ me kare ei tangata matauia no te maata te inu kava. (Maseli 23:20, 21, 29-35) Mei teaa ra te tarevake me ka akakinoia te atoro anga tiakianga, no te maata te inu kava! Me ka inu tetai taeake i te kava, kare aia e tau kia rave i te reira i te tuatau o te au uipaanga, te angaanga tutu aere, me kare i etai atu angaanga no te akamori anga.​—Levitiku 10:8-11; Ezekiela 44:21.

10. Eaa ka kore ei e tika te aronga inangaro maata i te moni e te noinoi apinganui no te tiratiratu kore, e tau ei aronga pakari me kare ei tavini angaanga orometua?

¹⁰ Eiaa ei noinoi moni me kare ei noinoi i te apinganui na te tiratiratu kore. (1 Timoteo 3:3, 8; Tito 1:7) Tei roto te aronga inangaro maata i te moni i te tu kino i te pae vaerua, e ko te “aronga noinoi” kare e o ki te Patireia o te Atua ra. No reira, kare te reira tu tangata e tau tikai ei aronga pakari me kare ei tavini angaanga orometua. (1 Korinetia 6:9, 10; 1 Timoteo 6:9, 10) Te tumu tuatua Ereni tei uriia e “tiratiratu kore” tona aiteanga tumu anga e “mea rikarika,” e ko te tuatua tei uriia e “apinganui” te taiku ra i tetai ua atu tu puapinga me kare manuia. (Philipi 1:21; 3:4-8) Inara, ko te tangata te akakite maira tona tu e kare aia e akono tiratiratu i te “au mamoe” a te Atua ra kare aia e tau tikai ei rave apainga i te putuputuanga. (Ezekiela 34:7-10; Angaanga 20:33-35; Iuda 16) Ko te anoanoia kia matakite i te akatika anga taoonga te akamaataia maira me ka kite tatou i te tangata e me akataoongaia penei ka tiaki i te moni e penei ka timataia i te keia i tetai papaki o te reira.​—Ioane 12:4-6.

11. Eaa ka kore ei e tau “tetai tangata akarongo ou ua” kia akatikaia no te apainga a te putuputuanga?

¹¹ Auraka ei tangata akarongo ou; na mua rai oki i te timata marie ia me ka tau aia. (1 Timoteo 3:6, 10) Kare i rava ake te tuatau no te tangata akarongo ou ua te papetito angaia kia akapapu e ka tiratiratu aia i te akono i te au angaanga akanooia ra. Penei te ngere ra aia i te aroa no te aronga te takinoia ra me kare te pakari no te tauturu i te au taeake akamori ra e penei ka akara akavaavaa ua ia etai ke ra. I mua ake i te akatika angaia ei tavini angaanga orometua e maata atu oki me ei tangata pakari, ka tau rai kia na mua i “te timata marie ia me ka tau” e kia akakite mai i te akapapu anga i te ikianga meitaki e te mako. Kare e tuatau akatakaia no teia timataanga, e te tuke tuke ra te au tangata i to ratou tupu anga i te pae vaerua. Inara kare e tau te aronga pakari kia viviki ua te akatika i tetai tangata akarongo ou “ko te akateiteiia aea aia e te nengonengo, e rokoia iora aia i te akaapa i akaapaiaʼi te Diabolo ra.” E vaio ra na te reira tangata e akakite mai i te tu taakaaka mei te Mesia rai na mua.​—Philipi 2:5-8.

Akara Anga i te au Tavini Angaanga Orometua

12. No te au tavini angaanga orometua anake ua ainei te au umuumuanga tei papaia ra no ratou?

¹² Kua papaia etai umuumuanga no te au tavini angaanga orometua. Inara, me kare te reira au umuumuanga i itaeia e te aronga pakari, kare ratou i tau tikai no te tavini. Ei tangata Kerititiano te tau tikai ra ainei koe i teia au turanga?

13. Eaa te aiteanga e kia ngakau papu?

¹³ Papu tikai. (1 Timoteo 3:8) Kare e tika te tangata te tau tikai ra ei tavini angaanga orometua kia manako mea ngiti ua i tana apainga. E mea tau nona kia akamako iaia uaorai i te tu tapu e raukai te akangateitei anga. Noatu rai e ka arikiia te akakata i tetai atianga, kare rai aia e tau tikai kia rave putuputu i te tu takatakata ua e te manako kore.

14. (a) Eaa te aiteanga e eiaa ei vaa rua? (e) Eaa te anoanoia ra no te akava ngakau viivii kore?

¹⁴ Eiaa ei vaa rua; ei akava-ngakau viivii kore ra. (1 Timoteo 3:8, 9) Ka tau te au tavini angaanga orometua (e te aronga pakari) kia pikikaa kore, auraka ei tuatua ua no etai ke me kare ei akavare. I te mea e auraka ratou ei vaa rua, auraka ratou e tuatua pikikaa ua i tetai apinga ki tetai tangata e ka akakite tuke i taua apinga rai ki tetai ke ra. (Maseli 3:32; Iakobo 3:17) Ka tika katoa teia au tangata kia turu maroiroi i te tuatua mou te akakiteia maira, e kia “tāpu marie i te tuatua ngaro i akarongoia nei ma te akava-ngakau viivii kore.” Ka tau kia akakite te akava ngakau o te reira tangata e e tangata tuatua tau aia e kare e rave i tetai apinga uunaia me kare ei taviivii. (Roma 9:1; 2 Korinetia 1:12; 4:2; 7:1) Kare rava tetai tangata e tau tikai ei tavini i te anana a te Atua mari ra kia mou aia i te tuatua mou e te au kaveinga tau i te Atua ra.

Akara i te au tu Tau Tikai o te Aronga Pakari

15. Noai ma te au tu tau tikai te akaraia nei i teianei, e eaa tikai te o atura ki te reira?

¹⁵ Etai au tu tau tikai te piri atura ki te aronga pakari e te akataka maata ra i ta ratou angaanga ei au tiaki e ei au puapii. Ei tangata Kerititiano, te rauka ra ainei ia koe teia au umuumuanga?

16. (a) Eaa te umuumuia ra e kia akono meitaki ei? (e) Akapeea e raukai i te tangata pakari i te tamou i te akono meitaki?

¹⁶ Ei tangata akono meitaki; tapu e te noo marie. (1 Timoteo 3:2; Tito 1:8) E mea tau no te tangata pakari kia maru, auraka kia tuikaaia ki te au ravenga kikino. Me aro atu aia i te au timataanga, ka tauturu te Atua iaia kia tamou i te tu tau kia pure ra aia mei ta te tata salamo rai: “Kua maata io nei te mamae o toku ngakau: e akaora koe iaku i toku au tumatetenga nei.” (Salamo 25:17) Kia pure katoa te akaaere no te vaerua o te Atua e kia akaari katoa i tona au ua, kapiti katoa te akono meitaki. (Luka 11:13; Galatia 5:22, 23) Na te tapupu anga i te au manako, te tuatua, e te au angaanga ka akariro kia kore e tarevake iaia e oronga ra i te aratakianga i te putuputuanga i te pae vaerua.

17. Eaa te kapitiia ra ki te manako meitaki?

¹⁷ Kia meitaki te manako. (1 Timoteo 3:2) Ka tau te tangata pakari kia meitaki te manako, kia pakari, e kia matakite. E mea tika nona kia akakoro e kia kore e maata roa te tuatua e kia mako te rave i te angaanga. Ko tona manakoanga e taakaaka, e te tau tei akatumuia ki runga i te pakari akono i te Atua e ki runga i te apiianga meitaki no te Tuatua a Iehova, ko tei tau aia kia apii papu i te reira.​—Roma 12:3; Tito 2:1.

18. Eaa te umuumuia ra no te tangata pakari kia papa meitaki aia?

¹⁸ Noo papa meitaki. (1 Timoteo 3:2) Te tuatua Ereni tei taikuia i ko nei kua uriia e “e mako te akanoo anga” ia 1 Timoteo 2:9 (NW). No reira ko te tangata pakari ka tau kia meitaki, kia mako te akanoo anga i te oraanga. Ei akatauanga, kia vave mai aia. I te akara anga kare a te au Kerititiano o te anere mataiti mua ra tumu maata i akanoo no te tataanga ripoti, e ko te akaaere i teia tuatau kare e anoanoia e ei tangata kite i te tare moni me kare ei tekeretere. Penei ka riro na te tavini angaanga orometua e akono i te au apinga tei umuumuia no te reira tu. Inara ko te tuatua Ereni no te “mako te akanoo anga” ka tau katoa e e akono meitaki, e mea papu e ko tetai tangata kare e tau tikai ei tangata pakari me ngata te ako e te mako kore.​—1 Tesalonia 5:14; 2 Tesalonia 3:6-12; Tito 1:10.

19. No tona kite i te tangata ke ke, eaa ta te tangata pakari ka rave?

¹⁹ Kia kite i te tangata ke ke ra. (1 Timoteo 3:2; Tito 1:8) Ka ‘aru ra te tangata pakari i te mataara kia kite i te tangata ke ke ra.’ (Roma 12:13; Ebera 13:2) Ko te aiteanga o te tuatua Ereni no “te kite i te tangata ke ke ra” e “rekareka i te au tangata ke ra.” E no reira, ka ariki rai te tangata pakari tei kite i te tangata ke ke ra i te aronga ou ki te au uipaanga Kerititiano, ma te akaarianga i te manako ariki i te aronga putaua mei tana ka rave ki te aronga apinganui ra. E kite katoa aia i te aronga tutaka no te angaanga Kerititiano ra e ka tauturu atu ia ratou i to ratou aerenga “na te tu i tau i te Atua ra.” (3 Ioane 5-8, NW) E tika oki, ka akaari te tangata pakari i te kite kia maata katoa ki te au taeake akarongo ra kia tau ki tei anoanoia no ratou e i te tuanga te ka rauka iaia i tona ra turanga.​—Iakobo 2:14-17).

20. Na teea au tu e tau tikai ei te tangata pakari kia apii?

²⁰ Ka tau tikai kia apii. (1 Timoteo 3:2) Kare te tau anga o te tangata pakari ei apii i te pae vaerua no tona uaorai kite me kare no te pakari o teianei ao. (1 Korinetia 2:1-5, 13) Ka rauka mai te reira no tona “mouanga ngaueue kore i te tuatua-mou no tona karape [me kare, tu] i te apiianga, kia rauka katoa iaia i te akamaroiroi na te apiianga i te tuatua ora e kia akakite atu i te ara a te aronga i patoi maira.” (Tito 1:9, NW; akaaiteia atu kia Angaanga 20:18-21, 26, 27.) Ka tau katoa aia kia ‘apii maru marie atu i te aronga te patoi maira.’ (2 Timoteo 2:23-26) Noatu rai e kare te tangata pakari ra i te meitaki rava no te ako i te putuputuanga, e mea tau kia apii meitaki aia i te Tuatua a te Atua e kia rava tona kite i te apii e te ako i te aronga akarongo ra, ko ratou te apii katoa ra i te Puka Tapu. (2 Korinetia 11:6) Ka tau tikai aia kia oronga i te “apiianga tuatua ora” te ka tauturu i te au ngutuare tangata e te aronga tatakitai kia aruaru i te oraanga no te akono i te Atua.​—Tito 2:1-10.

21. (a) Eaa ka tau ei kia tuatuaia e kare te tangata pakari i te tangata momoto? (e) Eaa te aiteanga no te tangata kia riro ei tangata manako maru? (ng) Eaa te aiteanga o te tangata kare e tauetono?

²¹ Eiaa ei tangata momoto, ei tangata manako maru ra, eiaa ei tangata tauetono. (1 Timoteo 3:3; Tito 1:7) No te au ua, kare te tangata pakari e ta i te tangata me kare, e tuatua tamamae ia ratou na te au tuatua akakino anga. (Akaaiteia atu kia 2 Korinetia 11:20.) (No te tuatua i mua akera e “kare aia ei tangata tauetono me kona” te akakite mai ra e ka akakore aia i te inu maata i te kava te putuputu ra te taki atu ki te kino.) No te “manako maru” (me kare, “akono meitaki”), kare i te mana ketaketa e te ngata kia akamarekaia, kare aia e maro no te au mea rikiriki ua. (1 Korinetia 9:12; Philipi 4:5; 1 Petero 2:18) I te mea e kare te tangata pakari e tauetono, me kare e maro, ka akakore aia i te taumaro anga e kare “e riri ua.”​—Tito 3:2; Iakobo 1:19, 20.

22. Eaa te akakiteia maira e te tika e ko te tangata pakari auraka e maro i tona uaorai anoano?

²² Auraka ei tangata māro i tona uaorai anoano. (Tito 1:7) Tona aiteanga tikai “eiaa e akamareka iaia anake uaorai.” (Akaaiteia atu kia 2 Petero 2:10.) Auraka te tangata pakari e maro ua i tana tika mari ra kia taakaaka ua tona manako i tona au kite. Auraka kia manako e e meitaki atu aia no te rave i te au apinga ia etai ke atura, ka tua katoa aia i etai apainga ma etai ke atu ma te akaaka e ka manako aia kia maata te aronga kimi tuatua.​—Numero 11:26-29; Maseli 11:14; Roma 12:3, 16.

23. (a) Akapeea taau akataka i “te tangata inangaro i te meitaki”? (e) Eaa te aiteanga e ei tangata tuatua tika?

²³ Ei tangata inangaro i te meitaki; te tuatua-tika. (Tito 1:8) Kia tau tikai tetai ei tangata pakari, ka tau aia kia inangaro i te mea meitaki e te tuatua tika. Te inangaro ra te tangata inangaro i te mea meitaki i to Iehova akara anga, ka rave i te takinga meitaki e te tauturu anga, e ka akaari i te ariki anga no te meitaki o etai ke ra. (Luka 6:35; akaaiteia atu kia Angaanga 9:36, 39; 1 Timoteo 5:9, 10) Te aiteanga o te tuatua tika ko te aruanga i ta te Atua au ture e tana au turanga. I etai atu au apinga katoa, kare te reira tangata e akavaavaa ka mou ra i te tuatua tika, te viivii kore, e te au mea rekarekaia ki roto i tona manako. (Luka 1:6; Philipi 4:8, 9; Iakobo 2:1-9) I te mea e manga tuke te meitaki mei te tuatua tika i te mea e mamao atu tana ka rave i ta te tika e umuumu maira, ko te maata atu ta te tangata inangaro i te meitaki ka rave na etai ke ra e kia umuumuia kiaia ra.​—Mataio 20:4, 13-15; Roma 5:7.

24. Eaa te anoanoia ra i te tangata tiratiratu?

²⁴ Tiratiratu. (Tito 1:8, NW) Ko te tangata tei tau tikai ei tangata pakari ka tamou i te akamori anga i te Atua e ka akono i te ture a te Atua, noatu eaa te timata anga i tona tu tiratiratu. Ka rave rai aia i ta Iehova e umuumu maira iaia, e ka kapiti teia i te tavinianga ei akakitekite pikikaa kore i te Patireia ra.​—Mataio 24:14; Luka 1:74, 75; Angaanga 5:29; 1 Tesalonia 2:10.

Akonoanga i te au tu Tau Tikaʼi

25. Te umuumuia ra iaai ma te au tu tau tikai tei uriuri manakoia akenei, e akapeea e raukaʼi te reira au tu tau tikai?

²⁵ Ko te maataanga o te au tu tau tikai tei uriuri manakoia akenei te kapiti ra i te au mea tei umuumuia ra e te au Kite katoatoa o Iehova e te rauka maira na roto i te akameitakianga a te Atua i te apii a te aronga tatakitai, tana tautaanga, te pirianga oa meitaki, e te pure. Penei e maroiroi atu tetai no etai au tu tau tikai ia etai ke ra. Inara no te tuanga tau, te au tavini angaanga orometua e te aronga pakari ka tau kia akono i te au umuumuanga ravarai no to ratou taoonga ra.

26. Eaa te au tangata Kerititiano ka akapapaʼi ia ratou no te apainga a te putuputuanga?

²⁶ E mea tika no te au Kite pouroa o Iehova ra kia inangaro i te rave i te au mea ravarai te ka rauka ia ratou i ta te Atua ra angaanga. Na teia vaerua e akakeu i te au tangata Kerititiano kia oronga ia ratou uaorai no te apainga a te putuputuanga. Ko koe ainei tetai e tangata akatapuia, e kua papetitoia? Me koia ia, e itae atu e kia tauta pakari ei kia tau tikai koe ei tavini!

[Au Tataanga Rikiriki i Raro]

Akapeea Koe Me Paʼu?

◻ Eaa ra i anoano maataiaʼi te au tangata papetitoia kia ariki i te apainga a te putuputuanga i teianei?

◻ Eaa etai au tu tau tikai kia rauka i te au tavini angaanga orometua i te akono?

◻ Eaa etai au umuumuanga ka tau kia rauka i te aronga pakari i te akono?

◻ Eaa i tikai kia kite te tangata pakari e akapeea te arataki meitaki i tona ngutuare?

◻ Na teaa e akakeu i te au tangata Kerititiano kia akapapa ia ratou uaorai no te au angaanga o te putuputuanga?

[Tutu i te kapi 24, 25]

Ka tau te aronga pakari e te au tavini angaanga orometua ei au arataki i to ratou uaorai ngutuare kia tika ki te au kaveinga Puka Tapu