“Te Evangelia” Mei te Apokalupo Maira

“Akara atura au i tetai angela i te rereanga na rotopu i te mareva nei, ma te evangelia mutu kore, e tutu ki te aronga e noo i te ao nei.”​—APOKALUPO 14:6.

1. I te irinaki anga te Au Kite o Iehova e e mea akauruia te puka o Apokalupo, eaa ra ratou i kore ei mei tetai “akonoanga apokarupo rai”?

E TUKE ki te au akaapa anga ia ratou ra, kare te Au Kite o Iehova i tetai “akonoanga apokarupo rai” me kare tetai “akonoanga akavaanga.” Inara, te ariki ra ratou i te Apokarupo, me kare te puka o Apokalupo, ei tuanga no te Tuatua akauruia a te Atua ra. E tika, tei roto ia Apokalupo te au tuatua akavaanga i te aronga rave kino ra. Inara i roto i ta ratou akakitekiteanga ki te au tangata, te tou maata ra te au tavini o te Atua ki runga i te manakonako anga meitaki tei akanooia ki roto i te Pipiria, kapiti katoa ia Apokarupo. No reira, kare ratou e kapiti atu me kare ka akaatea i tetai apinga mei te au tuatua totou te kitea ra i roto ra.​—Apokalupo 22:18, 19.

Aronga Akakitekite Evangeria

2. Eaa etai au tuatua tapu ta te Au Kite o Iehova e rave putuputu ana i te taiku i ta ratou angaanga tutu aere?

² Ko tetai tumu Tuatua Tapu putuputu tei tataia no te angaanga orometua a te Au Kite o Iehova ko te tuatua a Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) E eaa “te evangelia o te basileia nei”? E manganui te Au Kite te ka pau mai na te taikuanga mai i te au irava mei ia Apokalupo nga pene 20 e te 21 te tuatua ra i te Tutara Anga Tauatini Mataiti o Karaiti ma tona kavamani Patireia e te taiate tangata, i reira ka“kore ei” te mate, te aue, e te mamae oki.​—Apokalupo 20:6; 21:1, 4.

3. Te tau atura te angaanga orometua tutu aere a te Au Kite o Iehova ki teaa?

³ Ei aronga akakitekite i teianei evangeria, e vaa tuatua tikai te Au Kite o Iehova no tetai karere akatutuia no te rangi maira tei akatakaia maira tana angaanga i roto ia Apokalupo. “Akara atura au i tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata.” (Apokalupo 14:6) “Te evangelia mutu kore” te kapiti ra i te akakiteanga e ko “te basileia [me kare, tutaraanga] o teianei ao” “kua riro ïa ei au basileia no to tatou Atu e no tana Mesia” e kua tae mai ta Iehova ‘tuatau’ e ‘mate ei iaia te aronga i mate ei to te ao ra.’ (Apokalupo 11:15, 17, 18) Kare ainei te reira i tetai nuti meitaki tikai?

Ta Apokalupo e Mou Maira no Tatou

4. (a) Eaa te au tuatua mou tumuanga te akapapaia ra i te pene 1 o Apokalupo? (e) Eaa te umuumuia ra i te aronga tei anoano ra kia puapingaia mei te evangeria ra?

⁴ Te pene akamataanga o te puka o Apokalupo te akakite maira ia Iehova e ko “te Alepha e te Omega, . . . ko te vai nei, e tei vai ana oki, e te ka tae mai, ko te Mana katoatoa ra.” E te akakite maira i tana Tamaiti, ko Iesu Karaiti, e ko “te kite tuatua-mou,” “te tama mua mei te mate maira,” e “te ariki o te au ariki o te ao nei.” Te tuatua katoa ra no Iesu e ko “tei aroa mai ia tatou nei, e kua tamā ia tatou i ta tatou ara i tona uaorai toto.” (Apokalupo 1: 5, 8) No reira, mei te akamataanga maira, kua akanoo mai a Apokalupo i te tumuanga no te akaora anga tuatua mou. “Te aronga e noo i te ao nei” kare e puapingaia i te evangeria akakiteia mai kia ratou me ka kore ratou e ariki i te ngateitei o Iehova, e te akarongo oki i te toto akamaringiia o Iesu, e kia irinaki e na Iehova i akatuakaou mai iaia e ko Karaiti i teianei te Tutara akataoongaia e te Atua no te enua nei.​—Salamo 2:6-8

5. I roto i teea tuanga i akakiteia mai ei a Karaiti i te Apokalupo pene 2 e te 3 o Apokalupo?

⁵ Nga pene e rua i muri akera te akatutu maira ia Iesu Karaiti e ko te Akaaere aroa i te rangi no te au putuputuanga o tana au pipi i te enua nei. Kua tuatua mai te puka ra ki etai putuputuanga Kerititiano e itu tei ikiia tei vaira ki Asia Minora i te anere mataiti mua T.N. e akamaroiroi anga e te akoanga ngaueue kore to te reira te mana nei i teia tuatau. Te au tuatua tei tukuia ki te au putuputuanga kua akamata ma te au tuatua mei “kua kite au i taau angaanga,” me kare ‘kua kite au i toou tumatetenga.’ (Apokalupo 2:2, 9) Ae, kua kite tikai a Karaiti e eaa te tupu ra i te au putuputuanga o tana au pipi. Kua akapaapaa aia i tetai papaki no to ratou aroa, te akarongo, te angaanga orometua, te akakoromaki, e te tiratiratu ki tona ingoa e tana tuatua. Kua ako atu aia i etai no to ratou tuku anga e kia anu to ratou inangaro no Iehova e tana Tamaiti, me kare kua topa akaou ratou ki roto i te ainga tau kore, te akamori itoro, me kare akonoanga apoteiti ra.

6. Eaa ta te orama tei tataia maira i te Apokalupo pene 4 te tauturu ra i te au tangata kia marama?

⁶ Apokalupo Pene 4 te oronga maira i tetai orama akauru mataku anga no te terono o te Atua ko Iehova i te rangi. Kua oronga mai te reira i tetai akara anga i te kaka o to Iehova ra parutia e no te akapapa tutaraanga i te rangi tana ka taangaanga. Te aronga tutara akakoronaia, tei koropini ra to ratou au terono i te terono maata o te ao katoa e pini ua ake, kua akamori ia Iehova e kua na ko atu: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.”​—Apokalupo 4:11.

7. (a) Eaa ta te angera e akaue maira i te au tangata o te enua nei kia rave? (e) Eaa tetai tuanga puapinga maata o ta tatou angaanga apiianga?

⁷ E aite anga ainei to teianei ki te au tangata o teia tuatau nei? Ko te tika ia. Me te inangaro ra ratou i te oraanga i raro ake i te Patireia Tauatini Mataiti, ka tika ratou kia akarongo ki ta te “angela i te rere anga na rotopu i te mareva nei” i te na ko anga: “Ka mataku i te Atua, e akakakā iaia; kua tae oki ki te ora akautunga anga nana.” (Apokalupo 14:6, 7) Tetai au akakoroanga maata no te angaanga apiianga Pipiria te raveia nei e te Au Kite o Iehova kia tauturu i “te aronga e noo i te ao nei” kia kite e kia akamori oki ia Iehova, kia kite e koia Tei Anga maira, e kia kauraro puareinga roa ki tona ngateitei tuatua tika ra.

Te Punua Mamoe Tau kia Akangateiteiia

8. (a) Akapeea to Karaiti ra akatutu angaia mai i te Apokalupo pene 5 e te 6? (e) Eaa ta te katoatoa te ka akarongo atu ki te evangeria ka kite mei teianei orama?

⁸ Nga pene e rua ka aru mai, te Apokalupo pene 5 e te 6, te akakite maira ia Iesu Karaiti e ko tetai Punua Mamoe tei tau ra kia vavai i te au akairo e itu o te puka ra, i te akakiteanga i te reo akatutuia i te au tupu anga te tupu nei i to tatou tuatau. (Akaaite ia Ioane 1:29.) Ki teianei Punua Mamoe akatutuia, te na ko ra te au reo i te rangi e: “E tau koe kia rave i te buka e kia vavaʼi i te au akairo ra: i taia na oki koe, e kua oko koe ia [ratou] ei tangata no te Atua i toou uaorai toto, no roto i te au kopu ravarai, e te au reo katoa, e te au iti-tangata katoa, e te pa enua katoa; E kua akariro koe ia [ratou] ei ui ariki e ei kau taunga na to matou Atua, e e riro ia [ratou] te au i teianei ao.” (Apokalupo 5:9, 10) Te apii maira teianei orama e na te tumuanga o te toto akamaringiia o Karaiti, kua kapikiia etai au tangata no te au tu ravarai kia kapiti atu kiaia ki te rangi e “te au i teianei ao.” (Akaaite ia Apokalupo 1:5, 6.) Kua akakiteia mai to ratou numero kotingaia i muri akera i roto ia Apokalupo.

9. Akapeea to Karaiti akatutu angaia mai i te Apokalupo pene 6 ra?

⁹ I roto i tetai atu orama, kua akakiteia mai a Karaiti e ko tetai tangata akaoro koronaia ra no tetai oroenua teatea, kua aere atura aia ma “te upokotu atu e kia upokotu atu rai.” E mea mataora ra, ka upokotu aia i te au tupuanga kikino tei akatutuia maira e etai atu tangata akaoro oroenua e toru o Apokarupo ra, tei apai maira ta ratou akaoroanga viviki ra i te tamaki, te onge, e te mate oki ki te au tangata mei te mataiti tauianga o te 1914 ra. (Apokalupo 6:1-8) Ko te tuanga taka ke a Karaiti, koia te Punua Mamoe a te Atua ra, i te ora no te au tangata e i te akatupuangaia te au akakoroanga meitaki a Iehova ra ko tetai tumu maata ia no te angaanga apiianga Pipiria a te Au Kite o Iehova ra.

10. (a) Eaa te akakiteanga puapinga maata te orongaia maira i te Apokalupo pene 7? (e) Akapeea ta Karaiti tuatua no te aronga te ka ariki i te Patireia?

¹⁰ I te Apokalupo pene 7 e evangeria tikai. I roto anake i te puka o Apokalupo ka kiteai e tatou te numero o te aronga ta Iesu i kapiki e ko te “anana iti ra” kia ratou kua oronga te Metua o te Punua Mamoe i te Patireia ra. (Luka 12:32; 22:28-30) Kua akairoia ratou e te Atua ko Iehova na tona vaerua tapu. (2 Korinetia 1:21, 22) Kua akakite te apotetoro ko Ioane, tei rauka ra iaia te Apokalupo e: “Kua akarongo atura au i te maata anga o te aronga i akairoia ra: okotai anere e a ngauru ma a i te tausani i akairoia ra.” (Apokalupo 7:4) Kua akapapuia mai ko teianei te numero tikai i tetai pene i muri akera e ko te katoa anga o te aronga tei “okoia no roto i teianei ao” kia tutara ma te Punua Mamoe ra ki runga ia Maunga Siona i te rangi ra. (Apokalupo 14:1-4) I te au akonoanga o Kerititome e oronga ra i te au akataka anga marama kore no teia numero, e meitaki tikai kua tuatua tetai tangata kite i te Pipiria ko E. W. Bullinger no te reira: “Ko te tuatua anga mama ua ia no te tika: ko tetai numero papu kare i te numero papu kore i teianei pene tikai.”

11. (a) Eaa te evangeria te ka kitea i te Apokalupo pene 7 ra? (e) Eaa te manakonako anga te akatueraia ra ki mua i te au mema o te “aronga maata rava” ra?

¹¹ Ko teea numero papu kore ta Bullinger i taiku ra? I te Apokalupo 7 irava 9, kua tata te apotetoro ko Ioane: “E i muri ake i te reira, akara atura au, e i na, e aronga maata rava, kare takiri i pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki.” (Apokalupo 7:9) Koai ma teianei aronga maata rava, eaa oki to ratou turanga ki mua i te Atua i teianei, e eaa ta te tuatau ki mua e mou ra no ratou? E tuatua meitaki te pauanga a Apokarupo no te aronga ka noo ki te enua nei. Ka tatau tatou: “Ko te aronga teia i aere mai mei roto i te mate maata, e kua orei i to ratou kakau, e kua akateatea i te toto o te Punua-mamoe ra.” No te akarongo i te toto akamaringiia o Karaiti ra, ka paruruia ratou i te tuatau o “te mate maata” ra. Na Karaiti “e arataki oki ia ratou ki te au pupui anga o te vai ora, e na te Atua e orei i to ratou roi-mata katoa i to ratou mata.” (Apokalupo 7:14-17) Ae, e au mirioni ua atu te au tangata te ora nei i teia tuatau te ka rauka kia riro ei tuanga no te urupu kare ra e rauka kia tatauia te ka ora atu i te openga o teianei akatereanga kino o te au mea nei. Ei au tangata i raro ake i te Ariki ko Iesu Karaiti i te tuatau o tona Tutara Anga Tauatini Mataiti, nana e arataki ia ratou ki te oraanga mutu kore ki runga i te enua nei. Kare ainei te reira i te nuti meitaki?

‘E Mou e te Tika Tana Tuku Anga Utunga’

12, 13. (a) Eaa tei roto i te au Apokalupo pene 8 tae roa ki te 19 ra? (e) Eaa ra i kore ei e tau te au tangata ngakau tiratiratu kia manamanata no taua au totou ra?

¹² Te au Apokalupo pene 8 ki te 19 e maata ra te tumu no te manakoia e ko te puka Apokalupo, koia tetai puka totouanga i te au tupu anga mataku. Te vaira i roto i reira te au akakite anga utunga ketaketa (tei akatutuia mai na te tangianga pu, te au mate, e te au kapu no te riri tu-Atua ra) tei akatikaia mai ki te au tuanga o ta Satani akatereanga o te au mea nei. Ko teianei au utunga ka raveia, te mea mua ki te akonoanga pikikaa (kia “Babulonia Maata”), i muri mai ki te au akatereanga poritiki tau kore i te Atua, tei akatutuia mai e te au puaka taae.​—Apokalupo 13:1, 2; 17:5-7, 15, 16.a

¹³ Te akatutu maira teianei au pene i te tamaanga o te au rangi ra, i te uriia mai anga a Satani e tana au temoni ki te tuanga o te enua nei. Na teia i oronga mai te akatakaanga tau no te au pekapeka kikino tei tupu mai mei te 1914 mairai. (Apokalupo 12:7-12) Te akataka katoa maira ratou, i te reo akatutuanga, i te akapouanga o ta Satani akatereanga kino o te au mea i te enua nei. (Apokalupo 19:19-21) Ka tau ainei te au tangata ngakau tiratiratu kia poitirere na taua au tupu anga mamaata ra? Kare, no te mea i te tuatau o ta te Atua ra au akautunga, kua kapiki mai te reo o tetai urupu maata i te rangi: “Aleluia; ko te ora, e te tapu, e te ngateitei, e te mana, ei te Atu, ei to tatou Atua ïa. E mea mou oki e te tika tana tuku anga utunga.”​—Apokalupo 19:1, 2.

14, 15. (a) Akapeea ra te openga o teianei akatereanga kino e apaiia mai ei ma te tuatua tika? (e) Eaa i tau ei teia tuanga o te Apokarupo kia riro ei rekarekaanga no te aronga ngakau tiratiratu?

¹⁴ Kare a Iehova e apai mai i tetai akatereanga tuatua tika no te au mea nei ma te kore e akaatea mei te enua i te aronga tei akakino ra i te reira. (Apokalupo 11:17, 18; 19:11-16; 20:1, 2) Inara, kare e tika no tetai pupu tangata me kare enua poritiki me kare e mana kia rave i teianei. Ka rauka anake ia Iehova e tana Ariki e te Akava tei akataoongaia ra e ia, kia rave i te reira ma te tuatua tika.​—2 Tesalonia 1:6-9.

¹⁵ Mei ta Apokarupo e akaari marama maira, e te akakoro ra a Iehova kia akaope i teianei akatereanga kino. Ka tau teia ei tumu no te rekarekaanga no te au tangata e te au vaine “i aue ua, e kua kapiki ua, i te au mea viivii katoa i raveia.” (Ezekiela 9:4) Ka tau teianei kia tuku ki runga ia ratou i te umuumuanga rapurapu kia akarongo ki te kapiki a te angera ma te reo maata: “Ka mataku i te Atua . . . kua tae oki ki te ora akautunga anga nana; e akamori kotou iaia i te anga i te rangi, e te enua.” (Apokalupo 14:7) Kia akamori oki taua au tangata ra e kia tavini ia Iehova i te pae o tona Au Kite, “ko tei akono i te au akauenga a te Atua ra, i tei mou marie i te tuatua-akakite a Iesu Mesia ra.”​—Apokalupo 12:17.

Te Tauatini Mataiti Tutara Anga Kaka

16. (a) Eaa ra te au akonoanga Kerititome i kopae ke ei i te manakonakoanga Tauatini Mataiti? (e) Eaa ra te Au Kite o Iehova i irinaki ei e ka pauia te pure akaraanga ra?

¹⁶ Nga Apokalupo pene 20 ki te 22 o te puka o Apokalupo te akakite maira i te tumuanga Tuatua Tapu no te manakonako anga i te Tauatini Mataiti. Ko teianei anake te tuanga o te Pipiria te taiku tika maira i tetai tuatau e tauatini mataiti te ka akamata mai i tetai mataora anga mutu kore ki te rangi e ki runga oki i te enua. Kua kopae ke te au akonoanga o Kerititome i te manakonako anga Tauatini Mataiti ra. I te mea i te apii anga ekaretia te akakite ra e ko te aronga tuatua tika te ka aere ki te rangi e ko te aronga rave kino ki era, kare a te reira ngai no tetai enua parataito. Te pure akaraanga, te pati ra i te Atua “kia akonoia toou anoano i te enua nei, mei tei te ao katoa na,” kua ngaro katoa tona aiteanga no te maataanga o te au mema o te au akonoanga o Kerititome ra. (Mataio 6:10, New International Version) Inara kare te reira i te tika no te Au Kite o Iehova. Te irinaki ngaueue kore ra ratou e kare te Atua ko Iehova i anga ei “mea puapinga kore ua” te enua nei, mari ra “kia tangataia.” (Isaia 45:12, 18) No reira, te totou taito, te pure akaraanga e te manakonako anga apokarupo ra no te Tauatini Mataiti te akatika katoa ra. I te tuatau o tona Tutara Anga Tauatini Mataiti, ka akono a Karaiti kia raveia te anoano o Iehova i runga i te enua nei, mei tei raveia ra i te rangi.

17. Eaa te akakite maira e ka tika te “okotai tausani i te mataiti” ra kia irinakiia e tika tikai ia?

¹⁷ Te tuatua “nga mataiti okotai tausani” me kare “okotai tausani i te mataiti” kua tataia e ono taime ki roto i nga irava mua e itu o Apokalupo pene 20 irava 1-7 ra. E mea tau ra te tika e i roto i The New World Translation kua tataia te atikara “te,” ei akaarianga e te taiku ra i tetai tauatini mataiti tikai, kare i tetai tuatau roa kare ra i akatakaia, mei ta te aronga tuatua o Kerititome e anoano nei kia irinaki tatou. Eaa te ka tupu i te tuatau o te Tauatini Mataiti? Te mea mua, ka akaangaanga koreia a Satani no taua tuatau katoa ra. (Apokalupo 20:1-3; akaaite ia Ebera 2:14.) Mei teaa ra te reira ei nuti meitaki!

18. (a) Eaa ka raukai kia tapaia te Tauatini Mataiti e ko tetai “ra” akavaanga? (e) Eaa te ka tupu i te openga o te tauatini mataiti?

¹⁸ I te mea ka orongaia “te mana akava” ki te aronga “e e au to ratou iaia [ia Karaiti] e kia okotai tausani i te mataiti,” ko teianei tuatau, e tika, e “ra” tauatini mataiti no te akavaanga. (Apokalupo 20:4, 6; akaaite ia Angaanga 17:31; 2 Petero 3:8.) Ka akatuakaouia mai tei mate ra e, kapiti katoa ma te aronga e ora atu i “te mate maata” ra, ka akavaia kia tau ki ta ratou angaanga, me kare au ravenga, a taua taime ra. (Apokalupo 20:12, 13) A te openga o te tauatini mataiti ra, ka tukuia mai a Satani no tetai tuatau poto ua kia timata openga i te au tangata i muri akera ka akapouia aia, tana au temoni, e etai ua atu aronga e rave meameaau ki runga i te enua te ka aru atu iaia e tuatau ua atu. (Apokalupo 20:7-10) Te au tangata te ka re i te timataanga ra ka tata taka meitakiia to ratou au ingoa ki roto i “te buka ora ra” e ka apaiia atu ki roto i tetai oraanga mataora mutu kore ra, i te tavinianga e te akamorianga ia Iehova ki runga i tetai enua parataito.​—Apokalupo 20:14, 15; Salamo 37:9, 29; Isaia 66:22, 23.

19. (a) Eaa ka papu ei ia tatou e te au taputou akanooia mai i te puka o Apokalupo ka akatupuia kare e poka? (e) Eaa te ka uriuri manakoia i te atikara te ka aru mai?

¹⁹ Ko te reira te evangeria tei akanooia maira i te Apokarupo. Kare ia i te au taputou puapinga kore ua tei maaniia mai e te tangata nei. Kua tata te apotetoro ko Ioane: “Kua tuatua maira tei noo ki runga i te terono ra, I na, te akariro nei au i te au mea ravarai ei mea ou. E kua tuatua maira aia kiaku, Ka tata ana: e tuatua-mou oki teianei au tuatua e te pikikaa kore.” (Apokalupo 21:5) Eaa ta tatou ka tika kia rave kia o atu ei ki te tupu anga o teianei evangeria? E maata te akoanga i roto i te puka Apokalupo no te aronga te anoano ra kia akamareka i te Atua. Na te aruanga i taua akoanga ra ka apai mai i te mataora maata kia tatou, i teianei e tuatau ua atu, mei ta te atikara ka aru mai ka akakite.

[Tataanga Rikiriki i Raro]

Au Tumu no te Akamanako Akaou

◻ Eaa te au tuatua mou tumuanga te kitea ra i te pene 4 ki te 6 o Apokalupo te akapapa maira i tetai tuanga puapinga maata no te evangeria ra?

◻ Eaa te evangeria te kitea ra i te pene 7 o Apokalupo?

◻ Eaa i tau ei kia kore te au tangata ngakau tiratiratu e pekapeka i te au tuatua no te akautunga te kitea ra ia Apokalupo?

◻ Na roto i teea au tu ka riro ei te Tauatini Mataiti ei “ra” akautunga anga?

[Tutu i te kapi 10]

Ka takore takiriia e te Ariki ko Iesu Karaiti te tamaki i te enua nei, te onge, e te mate