Te Kavamani te ka Apai Mai ia Paradaiso

Ia Iesu i runga i te enua nei, kua akaue aia i tana au pipi kia pure no te Basileia o te Atua: “Kia tae mai toou basileia. Kia akonoia toou anoano i te enua nei mei to te rangi katoa ra.” (Mataio 6:9, 10) Kua tuatua tamou katoa aia no runga i “te tuatua meitaki o te basileia.” (Mataio 4:23, NW) Ko te tika, i maata atu tana tuatua no te Basileia i tana i rave no tetai atu mea. No teaa ra? No te mea ko te Basileia te apinga ta te Atua ka rave ei takore i te au manamanata te akangatā nei i te oraanga i teia tuatau. Na te Basileia, kare e roa atu ana ka akaope te Atua i te au tamaki, te onge, te maki, e te rave kino, e ka apai mai aia i te taokotaianga e te au.

Ka anoano ainei koe i te noo ki roto i te ao mei te reira? Me koia ia, ka tau koe i reira kia tatau i teia puka. I roto i reira, ka kite koe e ko te Basileia e kavamani ia, inara e meitaki atu i etai atu kavamani tei tutara ana i rungao te au tangata. Ka kite katoa koe i te mataara rekareka ta te Atua i akamarama marie ki tona au tavini i tana au akakoroanga no runga i te Basileia. Kapiti atu, ka kite koe e akapeea e raukai i te Basileia te tauturu ia koe noatu i teia tuatau.

Ko te tika, ka rauka kia riro koe ei tangata kauraro no to te Atua Basileia i teianei tikai. Inara i mua ake ka iki ei koe i teia, ka anoanoia koe kia maata atu te kite no runga i te reira. No reira te akamaroiroi nei matou ia koe kia akara matatio i teia puka. Te au mea katoa ta te reira e akakite atu kia koe no runga i te Basileia no roto mai i te Puka Tapu.

Te mea mua, e akara tatou eaa te tumu i anoano maataʼi tatou i te Basileia o te Atua.

I te akamata anga o te tuatua enua o te tangata, kua anga te Atua i te tangata apa kore e kua tuku iaia ki roto i tetai paradaiso. I te reira taime kare e anoano no te Basileia.

Tera ra, kua akarongo to tatou nga metua mua, koia a Adamu raua ko Eva kia Satani, e angela meameaau. Kua tuatua pikikaa aia kia raua no runga i te Atua e kua akariro ia raua kia meameaau katoa i te Atua. No reira kua tau raua kia mate, no te mea “E utunga te mate no te ara.”—Roma 6:23.

Kare te tangata apa, e te ki i te ara e rauka kia anau mai i te tamariki apa kore ua. No reira pouroa ta Adamu au tamariki kua anauia mai ma te tu i te apa, te ki i te ara, e te mate atura.—Roma 5:12.

Mei reira mai e nei, te anoanoia ra e te tangata te Basileia o te Atua ei tauturu ia ratou kia ora mai i te teimaa a te ara e te mate. Na te Basileia katoa oki e akaatea i te ingoa o te Atua i te au pikikaa tei tuatuaia e Satani ei akakino i te reira.

Kua taputou mai te Atua ko Iehova e ka anauia mai tetai “uanga” takake (me kare tamaiti) ei akaora i te au tangata mei te ara. (Genese 3:15) Ko te reira “uanga” ka riro koia te Ariki o te Basileia o te Atua.

Koai ra te reira?

Vaitata e 2,000 mataiti i muri ake i ta Adamu ara anga, e tangata tiratiratu tikai tetai tei ora ra i reira ko Aberahama tona ingoa. Kua akaue atu a Iehova kia Aberahama e akaruke i tona uaorai oire e e noo puakapa ua ki te Enua Taputouia ra.

Kua rave a Aberahama i te au mea katoatoa ta Iehova i akaue iaia kia rave, kapiti katoa tetai mea ngatā rava. Kua akaue a Iehova iaia kia tuku i tana tamaiti ia Isaaka ei atinga ki runga i te atarau.

Kare ra a Iehova i anoano tikai i tetai atinga tangata. Inara i anoano aia kia kite akapeea te maata o to Aberahama inangaro kiaia. Kua tae roa a Aberahama kia vaitata rava i te ta anga ia Isaaka i arai atu ei a Iehova iaia.

No runga i te maata o te akarongo o Aberahama, kua taputou a Iehova i te oronga atu i te Enua Taputouia ra no tona au uanga e kua tuatua atu e ko te Uanga taputouia ra ka riro no roto mai i tona kopu, e i to tana tamaiti katoa oki koia a Isaaka.—Genese 22:17, 18; 26:4, 5.

Anau mai ta Isaaka e maanga e rua tamaroa, ko Esau raua ko Iakoba. Kua akakite a Iehova e na roto mai ia Iakoba te Uanga taputouia ra.—Genese 28:13-15.

E 12 katoa oki tamaroa a Iakoba, koia tei tapaia ra ko Iseraela, pouroa ratou i anau tamariki ana. No reira kua akamata te tupu anga kia maata ta Aberahama tamariki.—Genese 46:8-27.

I te tupu anga tetai onge kino ki te reira ngai, kua aere atu a Iakoba e tona ngutuare tangata ki Aiphiti i te patianga mai a Pharao, koia te tutara o Aiphiti.—Genese 45:16-20.

I Aiphiti kua akakiteia mai e ko te Uanga taputouia ka riro ei uanga no Iuda koia te tamaiti a Iakoba.—Genese 49:10.

I muri akera kua mate atu a Iakoba, e kua tupu uatu te numero o tona uanga tae roa kia aite ki tetai basileia ra. I reira kua mataku to Aiphiti ia ratou e kua akariro ia ratou ei tuikaa.—Exodo 1:7-14.

I muri roa mai kua tono a Iehova ia Mose, koia tetai tangata tiratiratu rava, kia pati ki te Pharao o te reira tuatau kia tuku i te tamariki a Iseraela kia aere tapeka kore mai ki vao.—Exodo 6:10, 11.

Kare ra a Pharao i akatika, no reira kua tuku a Iehova e tai ngauru mate ki runga i to Aiphiti ra. Ei te mate openga, kua tonokia mai e ia te angela no te mate kia ta i te au tama mua o Aiphiti.—Exodo, pene 7 ki te 12.

Kua akakite atu te Atua ki to Iseraela e me ka ta ratou i tetai punua mamoe no ta ratou kaikai anga aiai e ka pipi ei i tetai ngai o tona toto ki runga i nga kopa ngutupa, e ka na runga ua te angela o te mate i to ratou au are ra. No reira kua ora te au tama mua a to Iseraela ra.—Exodo 12:1-35.

Ko tei tupu, kua ikuiku atu a Pharao i to Iseraela kia aere ki vao i Aiphiti. Inara kua taui aia i tona manako e kua arumaki ia ratou kia akaoki mai ia ratou.

Kua akatuera a Iehova i tetai mataara no to Iseraela e aere atu ei na roto i te Tai Muramura. E i te tauta anga a Pharao e tona nuku i te aru atu ia ratou, kua maremoia ratou.—Exodo 15:5-21.

Kua arataki atu a Iehova i te tamariki a Iseraela ki tetai maunga ko Sinai te ingoa i te medebera ra. I reira, kua oronga aia i tana Ture kia ratou e kua karanga atu e me ka akono ratou i te reira, ka riro ratou ei basileia kau taunga e ei iti-tangata tapu. No reira, i te tuatau i muri mai, kua rauka te tikaanga no to Iseraela kia riro ei tuanga puapinga maata no to te Atua ra Basileia.—Exodo 19:6; 24:3-8.

I muri ake i to Iseraela noo anga ki Maunga Sinai e vaitata i te okotai mataiti, kua arataki atu a Iehova ia ratou na te arataa e aere atu ei ki te Enua Taputouia ra, ko te reira te enua tana i taputou ra kia Aberahama koia to ratou tupuna.

I te Enua Taputouia ra, kua akatika te Atua i muri akera kia riro na te au ariki e tutara to Iseraela. Kua tupu i reira tetai basileia no te Atua ki runga i te enua nei.

Ko Davida te rua o te ariki o Iseraela, e uanga no Iuda. Kua riro te re ia Davida i te au enemi ravarai o Iseraela, e kua akariro aia ia Ierusalema ei oire maata no te basileia.

Kua akakite mai te au mea i tupu i to Davida tutaraanga e kia tauturu a Iehova i tetai ariki, kare e tutara o te enua nei e re iaia.

Kua akakite a Iehova e ko te Uanga taputouia ka riro ko tetai o te au uanga o Davida ra.—1 Paraleipomeno 17:7, 11, 14.

Kua tutara, a Solomona koia te tamaiti a Davida i muri ake iaia. E ariki pakari aia, e kua manuia a Iseraela i raro ake i tana tutaraanga.

Kua akatu katoa oki a Solomona i te iero manea kia Iehova i Ierusalema. Te akakite maira kia tatou te au tu i roto ia Iseraela i raro ake i ta Solomona tutara i etai o te au akameitakianga a to te Atua Basileia te ka apai mai ki te au tangata.—1 Ariki 4:24, 25.

Tera ra, e manganui to te au ariki i muri ake ia Solomona e tiratiratu kore rava ratou.

Inara i te tuatau te vaira te tutara anga a te au uanga o Davida i Ierusalema, kua akono a Iehova i tana peroveta ia Isaia ei akakite i tetai Tamaiti na Davida a muri mai te ka tutara i te enua katoa ma te tiratiratu. Ko teia te Uanga taputouia ra.—Isaia 9:5, 6 (Isaia 9:6, 7, NW).

Kua totou te peroveta ra ko Isaia e ko Tona tutara ka maata atu te kakā i to Solomona.—Isaia, pene 11 e te 65.

I reira, kua maata atu i to muana, te akamanako anga o te au tavini o te Atua e me koai te reira Uanga.

Inara i mua ake i te tae mai anga te Uanga, kua riro te au ariki o Iseraela kia kino rava e i te 607 M.T.N. (Muake i te Tuatau Noa Nei) kua akatika a Iehova kia autu to Babulonia ki rungao i te iti-tangata o Iseraela, e kua riro te maataanga o te au tangata ei tuikaa ki Babulonia. Tera ra kare te Atua i ngaropoina i tana taputou. Ka mama mai ra te Uanga no roto i te kopu o Davida.—Ezekiela 21:25-27.

Kua akaari mai tei tupu ki to Iseraela e, noatu rai e ka rauka i te ariki tangata pakari e te tiratiratu te apai mai i te au puapinga, ko te reira au puapinga kua kotingaia. Kia mate te au tangata tiratiratu e penei kare to ratou au mono i te tiratiratu. Eaa ra te rapakau? Ko te Uanga taputouia ra.

I te openga ra, i muri ake i etai tausani mataiti, kua mama mai te Uanga. Koai ra te reira?

Kua oronga tetai angela na te Atua i te pauanga ki tetai tamaine Iseraela takaua ko Maria te ingoa. Kua akakite atu kiaia e ka anau aia i tetai tamaroa ko Iesu tona ingoa. Ko teia ta te angela i tuatua:

“Ka maata aia, e ka tuatuaia i te Tamaiti na Tei Teitei: e na te Atua [na Iehova, NW] e oronga mai i te terono o tona metua o Davida nona: Ei iaia te au.”—Luka 1:32, 33.

No reira ka riro ko Iesu te Uanga tei taputouia ra e i te openga ei Ariki no to te Atua Basileia. Inara eaa a Iesu i tuke ei mei te au tangata tiratiratu tei ora ana i mua atu?

Na te semeio i anauia mai ei a Iesu. E paretenia tona metua vaine, e kare ona metua tane e tangata. I noo ana a Iesu i te rangi i muana e na to te Atua ra vaerua tapu, me kare mana rave angaanga, i rave mai i to Iesu oraanga mei te rangi ki roto i te vairanga tamariki o Maria. No reira, kare aia i akatuangaia ki te ara o Adamu. I tona oraanga katoa, kare a Iesu i rave ara.—1 Petero 2:22.

Kia tae ki te 30 ona mataiti, kua bapetizoia a Iesu.

Kua akakitekite aia ki te au tangata i to te Atua Basileia e i muri akera kua akakite iaia uaorai e ko te Ariki o te reira Basileia.—Mataio 4:23; 21:4-11.

E manganui katoa oki tana au semeio i rave.

I akaora aia i te maki.—Mataio 9:35.

Na te tu semeio kua angai aia i te aronga mate pongi ra.—Mataio 14:14-22.

Kua akatu katoa aia i tei mate.—Ioane 11:38-44.

Na teia au semeio i akaari mai eaa te tu o te au mea ta Iesu ka rave no te au tangata nei ei Ariki no to te Atua ra Basileia.

Te maara nei ainei koe i akapeea ta te Ariki ko Davida akariro anga ia Ierusalema ei oire maata no tona ra Basileia? Kua akamarama mai a Iesu e kare te Basileia o te Atua ko runga i te enua nei, mari ra ko te rangi. (Ioane 18:36) No reira te Basileia i tapaiaʼi “ko Ierusalema i te [rangi, NW] ra.”—Ebera 12:22, 28.

Kua akatakaia mai e Iesu te au ture te ka tau kia akonoia e te aronga te ka riro ei au tangata no te Basileia. Tei roto teia au ture i te Puka Tapu i teianei. Ko nga ture puapinga maata rava koia oki kia aroa te au tangata i te Atua e kia aroa tetai i tetai.—Mataio 22:37-39.

Kua akakite katoa mai a Iesu e kare ko ia anake ua i te tutara anga i tona Basileia. E au tangata etai te ka ikiia kia aere ki te rangi e ka tutara kapiti ki reira ma ia katoa. (Luka 12:32; Ioane 14:3) Eaa te manganui i reira? Te pau ra Apokalupo 14:1 e: 144,000.

Me e 144,000 ua te ka aere ki te rangi kia tutara kapiti ma Iesu katoa, eaa i reira ta te toenga o te au tangata ka rauka kia manakonako?

Te na ko ra te Puka Tapu e: “Ka riro te enua no te aronga tuatua-tika, ka noo tamou rai ratou i reira.”—Salamo 37:29.

Te tapaia ra te aronga te ka noo tamou i te enua nei ko te “mamoe ke atu.”—Ioane 10:16.

No reira e rua rai manakonakoanga. E 144,000 tei patiia ra e te Atua ko Iehova kia aere ki te rangi kia tutara kapiti ma Iesu Mesia. Inara e au milioni ua atu etai atu tei ia ratou te manakonakoanga papu no te ora anga ki runga i te enua nei e tuatau ua atu ei au tangata kauraro i tona Basileia.—Apokalupo 5:10.

I makitakita ana a Satani ia Iesu e kua patoi iaia. I muri ake i to Iesu ako anga e toru e te āpa mataiti, kua rave a Satani kia tapekaia aia e kia tamateia na te patiti angaia ki te rakau. Eaa ra te Atua i tuku ei kia raveia teia?

Kia maara e, no te mea e uanga tatou no Adamu, kua tu tatou i te ara e kua tau kia mate.—Roma 6:23.

Kia maara, katoa, e no te tu semeio o to Iesu anauia mai anga, e apa kore ua aia e kare i tau kia mate. Tera ra, kua akatika te Atua ia Satani ‘kia akaparuparu i te pooavae o Iesu,’ kia tamate iaia. Inara kua akatu mai te Atua iaia kia ora akaou ei vaerua mate kore. I te mea te vaira iaia te tika no te oraanga tangata apa kore ua, kua rauka iaia i teianei te taangaanga i te reira ei oko ia tatou tangata nei mei te ara.—Genese 3:15; Roma 5:12, 21; Mataio 20:28.

Ei tauturu ia tatou kia marama tikai eaa te aiteanga o to Iesu atinga, te tuatua ra te Puka Tapu no runga i te reira na roto i te au akaraanga totouanga ra.

Ei akatauanga, te maara nei ainei koe i akapeea ta Iehova akaue anga ia Aberahama kia tuku atinga i tana tamaiti, ei timata i tona aroa?

E akaraanga totouanga te reira no te atinga o Iesu. Kua akaari mai te reira e i akapeea te maata o to Iehova aroa no te tangata nei e kua tuku i tana tamaiti, ia Iesu, kia mate no tatou kia rauka te ora no tatou.—Ioane 3:16.

Te maara nei ainei koe i ta Iehova rave anga i te akaora i to Iseraela mei Aiphiti e te akaora anga i ta ratou anau mua na te akono anga i te angela o te mate kia na rungao ia ratou?—Exodo 12:12, 13.

E akaraanga totouanga te reira. Mei te toto o te punua mamoe i riro ra ei ora no te anau mua o to Iseraela, mei te reira katoa te toto akamaringiia o Iesu i te oronga anga i te ora no te aronga te irinaki ra iaia. E mei te au mea i tupu i te reira po ra i te oronga anga i te tu rangatira no to Iseraela ra, e pera katoa te matenga o Iesu i te oronga anga i te tu rangatira no te au tangata mei te ara e te mate.

No reira rai a Iesu i tapaiaʼi ko “te punua-mamoe a te Atua, ko tei apai ke atu i te ara a to te ao.”—Ioane 1:29.

Inara, ia Iesu i te enua nei kua akaputu katoa aia i tana au pipi e kua akamatau atu ia ratou i te tutu aere i te tuatua meitaki o te Basileia, e pera katoa oki i muri ake i tona matenga.—Mataio 10:5; Luka 10:1.

Ko te au tangata mua teia aronga tei ikiia e te Atua ei tutara kapiti ma Iesu i tona Basileia.—Luka 12:32.

Te maara nei ainei ia koe e kua taputou te Atua ki te ngati Iuda e me ka akono ratou i te Ture, ka riro ratou ei “basileia kau taunga”? I reira kua rauka te tika no ratou kia riro ei tuanga no te Basileia o te Atua e kia tavini ei kau taunga ki te rangi me ka āriki ratou ia Iesu. Inara ko te maataanga o ratou kua kopae ia Iesu.

No te reira taime mai, i kore ei te ngati Iuda i te iti-tangata ikiia no te Atua; kua kore a Palestine i te Enua Taputouia ra.—Mataio 21:43; 23:37, 38.

Mei to Iesu tuatau tae roa mai ki to tatou nei, no te akaputuputu a Iehova i teia aronga te ka tutara kapipiti ma Iesu i te rangi. E tokoiti ua te au tausani i o ratou e vai ora nei i te enua i teia tuatau. Te karanga nei tatou ia ratou ko te toenga o tei akatainuia.—Apokalupo 12:17.

I teianei, te akamata ra koe i te kite e eaa te Basileia o te Atua. E kavamani te reira i te rangi, ko tona Ariki ko Iesu Mesia ia, e kua kapiti iatu kiaia e 144,000 au tangata no te enua nei. Ka tutara te reira i rungao te au tangata tiratiratu o te enua e ka mana ratou i te apai mai i te au ki te enua nei.

I muri ake i tona matenga, kua akatuakaouia a Iesu e kua aere atu ki te rangi. I reira, kua tapapa atu aia kia tuatua mai te Atua aea te tuatau nona kia akamata i te tutara anga ei Ariki no te Basileia o te Atua. (Salamo 110:1) A naea te reira tupu ei?

I etai taime kua tuku atu a Iehova i te au moemoea ki te au tangata ei akakite i te au mea kia ratou no runga i tona Basileia.

I to Daniela tuatau ra, kua tuku mai a Iehova i te reira tu moemoea kia Nebukanesa, koia te ariki o Babulonia. No tetai rakau maata roa te reira.—Daniela 4:10-37.

Kua tipuia taua rakau ra ki raro e kua ruruia te tumu no nga mataiti e itu.

Kua akatutu te reira rakau ia Nebukanesa. Mei te tapeka anga ra i te tumu no te itu mataiti, kua ngaro to Nebukanesa manako no te itu katoa mataiti. I muri akera i akaoraiaʼi tona manako.

Pouroa te reira e akaraanga totouanga. Kua akatutu mai a Nebukanesa i to Iehova ra tutaraanga i te ao katoa nei. I te akamata anga, kua raveia te reira na roto i te au uanga o te Ariki ko Davida i Ierusalema ra. I te re anga a Babulonia ki rungao ia Ierusalema i te 607 M.T.N., kua araiia te reira kopu ariki. Kare e tu mai tetai atu ariki no to Davida kopu “e kia tae mai aia ra te pu tikai ra.” (Ezekiela 21:27) Ko Iesu Mesia te reira.

Eaa te roa mei te 607 M.T.N. e akamataʼi a Iesu i te tutara? E itu mataiti akatutu totou anga. Koia oki, e 2,520 mataiti. (Apokalupo 12:6, 14) E 2,520 mataiti mei te 607 M.T.N. kua tae mai tatou ki te 1914 T.N. (Tuatau Noa Nei).

No reira kua akamata a Iesu i te tutara ki te au rangi ra i te 1914. Eaa te aiteanga o te reira?

Te akakite maira te Puka Tapu kia tatou na roto i te orama tei kiteaia e te aposetolo ko Ioane.

I kite aia i tetai vaine i te rangi ra e kua anau maira tana e tamaiti tamaroa.—Apokalupo 12:1-12.

Kua akatutu mai te reira vaine i ta te Atua akaaerenga i te rangi ra, ko te au tavini angela katoatoa ia a te Atua i te rangi ra. Te akatutu maira te tamaiti tamaroa ra i te Basileia o te Atua. Kua “anauia mai” teia i te 1914.

Eaa tei tupu i muri mai? Ko te mea mua ta Iesu i rave ei Ariki kua uriia mai a Satani, e taua au angela tei meameaau ra ma ia katoa ra, ki vao i te rangi kua topa mai ki raro ki te enua nei.—Apokalupo 12:9.

Te akakite maira te Puka Tapu kia tatou i tei tupu: “Kia rekareka, e te au rangi e, e ko kotou katoa oki ko tei noo i reira. E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”—Apokalupo 12:12.

No reira i to Iesu akamata anga i te tutara ki te rangi ra, kua maata rava te angaanga a tona au enemi ki runga i te enua nei. Mei ta te Puka Tapu i totou maira, kua akamata aia i te tutara i rotopu i tona au enemi.—Salamo 110:1, 2.

Eaa te aiteanga o teia no te au tangata nei?

Kua akakite mai a Iesu kia tatou: e tamaki, e onge kai, e maki, e ngaruerue enua.—Mataio 24:7, 8; Luka 21:10, 11.

Kua kite tatou i te tupu anga teia au mea mei te 1914 mai, ko teia tetai atu tumu no tatou i kite ei e kua akamata te Basileia i te tutara i reira.

Ka tupu katoa oki “te mate anga o te pa enua o te ao nei i te tumatetenga . . . e te taravai anga o te ngakau tangata i te mataku.” (Luka 21:25, 26) Kua kite katoa oki tatou i te reira, mei te 1914 mai.

Kua tapiri atu te aposetolo ko Paulo e e riro te au tangata nei “ei akaperepere ia ratou uaorai, ei noinoi [moni, NW], . . . ei akaatikau koreromotu ra, ei tapepe pikikaa, ei mako kore.”—2 Timoteo 3:1-5.

Kua kite koe i teianei eaa i rave anga ngatā ei te oraanga i teia tuatau. E maata rava ta Satani angaanga. Inara te rave angaanga katoa ra te Basileia o te Atua.

I muri uake i te 1914, i akamataʼi te toenga o te aronga tei manakonako ra kia tutara ma Iesu katoa ki te rangi, i te akakitekiteanga i te tuatua meitaki e kua akanooia te Basileia. Kua totoa teia angaanga i teianei takapini te pa enua ravarai, mei ta Iesu i akakite maira e ka pera.—Mataio 24:14.

Eaa te akakoroanga no teia angaanga tutu aere?

Te mea mua, ei akakite ki te au tangata no runga i to te Atua ra Basileia.

Te rua, ei tauturu i te au tangata i te iki anga me te inangaro ra ratou kia riro ei au tangata kauraro i te Basileia.

Kua karanga a Iesu e i to tatou tuatau ka akatakaia te au tangata katoa ki roto i te tu mamoe e te tu puakanio rai.—Mataio 25:31-46.

Ko te “mamoe” ko te aronga inangaro iaia e tona au taeake. Te puakanio ko te aronga kare e rave akapera.

Ka rauka te oraanga mutu kore i te “mamoe” e kare e rauka i te puakanio.

Ko teia angaanga akataka anga te raveia nei na roto i te tutu anga i te tuatua meitaki o te Basileia.

E totou teia na te peroveta ko Isaia.

“E riro kia tae ki te au rā openga ra, e akatinamouiaʼi te maunga ra o te are o Iehova ki runga i te take o te au maunga ra; e akateiteiia ki rungao i te au tuaivi ra; e putuputu ua mairai te au etene katoara ki reira.”—Isaia 2:2.

Te aro atu nei te au tangata i “te au rā openga ra.”

Te “akateiteiia” nei te “are” akamori ia Iehova ki rungao i te au akonoanga atua pikikaa.

“E manganui te tangata e aere ma te tuatua e, Aere mai, ka aere tatou ki runga i te maunga o Iehova, ki te are o te Atua o Iakoba; e nana e apii mai ia tatou i tona au aerenga; e ka aere tatou na tona ra au arataa.”—Isaia 2:3.

No reira, e manganui no te pa enua ravarai te aere maira ki te akamori ia Iehova e te pati atura kia etai atu kia kapiti mai kia ratou. Te apii ra ratou e akapeea te akono na te mataara ta Iehova i anoano ra.

“E tupaki oki ratou i ta ratou au koke ei auri arote, e ta ratou au korare ra, ei tipitope ia: kare tetai enua e tamaki mai ki tetai enua i te koke, kare oki ratou e apii akaou i te tamaki.”—Isaia 2:4.

Te aronga te akamori ra ia Iehova te taokotaiia ra e te au ra.

Ko tei tupu no teia angaanga na te Basileia o te Atua i teianei kua vaitata i te toru milioni te au tangata i te pa enua ravarai kua riro ei tangata kauraro i te Basileia.

Kua akaputu atu ratou takapini i te toenga, o te aronga te toe maira o te aronga e manakonako to ratou kia aere ki te rangi e kia tutara kapipiti ma te Mesia katoa.

Te rauka maira ta ratou kai vaerua na roto i ta te Atua ra akaaerenga.—Mataio 24:45-47.

E taeakeanga Kerisitiano no te ao katoatoa to ratou ko tei aroa tika tikai tetai i tetai.—Ioane 13:35.

Te rekareka ra ratou i te au o te manako, e te manakonakoanga no te tuatau ki mua.—Philipi 4:7.

Kare e roa atu ana, ka oti te tutu anga i te tuatua meitaki. Ka oti te akaputu i te “mamoe.” Eaa ta te Basileia ka rave i reira?

Te maara nei ainei ia koe e kua re te Ariki tiratiratu ra koia a Davida ki rungao i te au enemi o to te Atua ra iti-tangata? I na, ka rave akapera katoa oki te Ariki ra ko Iesu.

I tetai taime kua moemoea te Ariki ko Nebukanesa no tetai tiki maata tei akatutu mai i te au basileia mamaata ravarai o teianei ao mei tona tuatau mai e tae roa mai ki to tatou nei.

I muri mai kua kite aia i tetai toka tei kokotiia mai no tetai maunga, e na te reira i akapueurikiriki i te tiki ra. E akatutu anga te reira toka no to te Atua ra Basileia.

Ko te aiteanga o teia ko te akapouanga o teianei akatereanga kino o te au mea nei.—Daniela 2:44.

Ko teia etai au mea te ka akakoreia e te Basileia.

Ka ngaro ke atu te au akonoanga atua pikikaa, mei te toka tavirianga tei titiriia ra ki raro i te tai.—Apokalupo 18:21.

Ko te tumu te reira i akamaroiroiiaʼi te aronga inangaro katoatoa i te Atua kia aere ke mai ki vao i te akonoanga atua pikikaa i TEIANEI.—Apokalupo 18:4.

A muri akera ka ta te Ariki ko Iesu “i te pa enua . . . e e mana aia ki rungao ia ratou ma te sepeta auri ra.”—Apokalupo 19:15.

E no reira, noatu te tutaki ra te au Kite o Iehova i ta ratou telo e te kauraro ra i te au ture o te enua, kare ra ratou e piri atu ki te angaanga politiki.

I te openga, kua uriia atu a Satani uaorai, koia te “taae” maata ra, ki roto i te vaarua takere kore.—Apokalupo 20:2, 3.

Ko te “mamoe” anake ua, koia te aronga tei kauraro ia Iesu ei Ariki, ka ora atu i teia mate.—Mataio 25:31-34, 41, 46.

I kite te aposetolo ko Ioane i te orama no te “au mamoe” te ka ora atu i te mate.

“Akara atura au, e i na, e aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki, i te tu ua anga ki mua i te terono, e ki mua i te Punua-mamoe, ma te kakau teatea i te kakau anga, e ma te kikau nu tamara i to ratou rima.”—Apokalupo 7:9.

Ko te “urupu maata” ko te aronga katoatoa ratou tei akarongo i te tutu anga i te tuatua meitaki.

Ka “aere mai [ratou] mei roto i te mate maata.”—Apokalupo 7:14.

Te akaari maira te “kikau nu tamara” e te āriki ra ratou ia Iesu ei Ariki no ratou.

Te akatutu maira to ratou kakau anga i te “kakau teatea” e e akarongo to ratou i te atinga o Iesu ra.

Ko te “Punua-mamoe” ko Iesu Mesia ia.

Eaa te au akameitakianga e rekarekaia e ratou i reira? Te maara nei ainei koe i te tu mataora i Iseraela i te tuatau i tutara ana te Ariki tiratiratu ko Solomona? Kua oronga mai te reira i tetai tutu mea ngiti no te tu mataora ki runga i te enua i raro ake i te Ariki ko Iesu.

Ka tupu te au tikai i rotopu i te au tangata e te tangata e te manu, mei ta Isaia rai i totou maira.—Salamo 46:9; Isaia 11:6-9.

Mei ta Iesu akaora anga i te maki iaia i te enua nei, ka takore katoa aia i te maki mei te au tangata katoatoa.—Isaia 33:24.

Mei iaia i angai ra i te au tangata e manganui, ka akakore rai aia i te onge kai mei te tangata katoatoa.—Salamo 72:16.

Mei tana akatu anga i tei mate, ka akatu katoa aia i te aronga mate kare ra i rauka te tuatau kia rava no ratou uaorai kia kauraro i te Basileia o te Atua.—Ioane 5:28, 29.

Ka rave marie ua aia, i te apai i te au tangata katoa kia tae akaou ki te tu apa kore ua tei ngaro ra ia Adamu.

Kare ainei te reira i tetai tuatau umere roa ki mua? Ka anoano ainei koe kia kite i te reira? Me koia ia, e rave kia rauka ia koe uaorai te kauraro i teianei ki to te Atua Basileia e akariro ia koe ei “mamoe.”

E apii i te Puka Tapu e kia kite koe i te Atua ia Iehova e Iesu Mesia.—Ioane 17:3.

E kapiti atu ki te aronga e kauraro katoa ra i te Basileia.—Ebera 10:25.

E apii i te au ture o te Basileia e ka akono atu i te reira.—Isaia 2:3, 4.

E akatapu i toou oraanga kia tavini ia Iehova, e ka bapetizoia‘i.—Mataio 28:19, 20.

E kopae ke atu i te au mea kikino ra mei te keia rai, te pikikaa, te akaturi, e te kona-kava, tei akamareka kore ra i te Atua ia Iehova.—1 Korinetia 6:9-11.

E piri atu i te tutu anga i te tuatua meitaki o te Basileia.—Mataio 24:14.

Ei reira ma te tauturu a te Atua, ka kite koe i te Paradaiso tei ngaro ia Adamu no tona au uanga i te akatupu akaou angaia, e ka kite koe i te akatupu angaia teia totou nei: “Kua akarongo atura au i tetai reo maata no te rangi maira, i te na ko anga mai e, I na, tei ko te tangata ra te puakapa o te Atua, e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa, e e kore rava te mate, e te aue, e te mii, e te mamae oki, e kore katoa ia, no te mea kua kore te au mea taito.”—Apokalupo 21:3, 4.

[Tiati i te kapi 20]

(No te akanooanga tikai o te tataanga, akara I te puka)

607 M.T.N. 1914 T.N.

M.T.N. | T.N.

500 1,000 1,500 2,000 2,520

[Au Tutu i te kapi 11]

Aberahama

Isaaka

Iakoba

Iuda

Davida

[Tutu i te kapi 14]

144,000

[Au Tutu i te kapi 16]

Adamu

Iesu