E Aaere mei ta Iehova i Apii Maira

“E apii mai koe, e Iehova, i toou ra arataa, kia aere au i taau ra tuatua-mou; kia tavaitai toku ngakau i te mataku anga i to ingoa.”​—SALAMO 86:11.

1, 2. Eaa te akakeu ra i te au Kite o Iehova kia kore e ariki i te pamu anga toto?

PENEI te tika ra te au Kite o Iehova i te akakoreanga i te au apinga e toto to roto, no te mea e tika e e maata te numero o te au apinga te ka akatupu i te maki mate ka rauka katoa i te akatotoa na te pamu anga toto.”​—E nutipepa Varani no te rapakau Le Quotidien du Médecin, Titema 15, 1987.

² Ko tetai papaki tei tatau i taua tuatua ra penei kua manako e e mea tupu ua mai te akakore anga te au Kite o Iehova i te pamu anga toto i mua roa atu i te kitea angaia e e kino, ka mate oki, i te reira. Inara kare i te mea tupu ua mai te turanga o te au Kite o Iehova no runga i te toto, e kare katoa oki i te ture tei maaniia e tetai akonoanga tu ke a te tangata nei, tetai turanga tei tupu mai no te mataku e kare i te meitaki te toto. Mari ra, kua akakore te au Kite o Iehova i te toto no to ratou inangaro kia aaere ma te akarongo ki mua i to ratou Puapii Meitaki​—koia te Atua.

3. (a) Eaa to Davida manako no runga i te irinaki anga kia Iehova? (e) Eaa te tupu anga ta Davida i tapapa atu no tona irinakianga i te Atua ra?

³ Kua kite te Ariki ko Davida, i tona irinaki anga ki te Atua, e kua inangaro nana e apii iaia e ‘kia aere i tana tuatua-mou.’ (Salamo 86:11) Kua apiiia a Davida i tetai tuatau e kia kopae aia i te apa i te toto i mua i te mata o te Atua ra, ‘ka ruruia tona meta ki roto katoa i te opa ora ma Iehova ra.’ (1 Samuela 25:21, 22, 25, 29, NW) Mei ta te au tangata ruru anga i te au apinga ei paruru e ei akono meitaki ia ratou, mei te reira katoa to Davida oraanga kua paruruia e kua akono meitakiia e te Atua. I te arikianga i taua apiianga pakari ra, kare a Davida i kimi kia riro nana e akaora iaia uaorai na tana tauta anga, mari ra kua irinaki aia i Tei kaiou ra aia no tona oraanga: “Ka akakite mairai koe iaku i te ara ora; tei mua i to aroaro te ki anga o te rekareka; tei to rima katau te pereperekavana e tuatau ua atu.”​—Salamo 16:11.

4. Eaa a Davida i anoano ei kia apiiia mai aia e Iehova?

⁴ Ma te reira tu manako, kare a Davida i manako e ka rauka iaia i te iki ko teea au ture a te Atua te mana ra me kare te anoanoia ra kia akarongoia. Ko tona tu manako: “E apii mai koe, e Iehova, i toou ra arataa, e arataki iaku na te arataa tikai.” “E apii mai koe, e Iehova, i toou ra arataa, kia aere au i taau ra tuatua-mou; kia tavaitai toku ngakau i te mataku anga i to ingoa. Ka akameitaki rai au ia koe, e [Iehova], e taku Atua, ma toku ngakau katoa ra.” (Salamo 27:11; 86:11, 12) I etai tuatau penei e akara anga manamanata te aere i te tuatua mou ki mua i te Atua me kare e atinga maata roa ia, inara kua inangaro a Davida kia apiiia aia i te arataa tika e kia aere na reira.

Apiiia no te Toto

5. Eaa ta Davida kua kite ke ana no runga i to te Atua turanga no te toto?

⁵ E mea tau no tatou kia manako e mei tona tamaiti anga maira, kua apiiia a Davida i to Atua ra manako no te toto, ko te reira manako kare ia i te mea ngaro na te akonoanga. I te tatau angaia te Ture ki te iti tangata ra, kua akarongo atura Davida i teia: “Tei roto i te toto te meta o te kopapa, e naku uaorai i tuku ki runga i te atarau no kotou ei tapokianga ara no to kotou meta, no te mea ko te toto oki tei riro ei tapokianga ara na te meta tei roto i te reira ra. No reira au i tuatuaʼi ki te tamariki o Iseraela: ‘Auraka tetai meta o kotou na e kai i te toto e auraka katoa tetai tangata ke e tuitarere i roto ia kotou na e kai i te toto.’”​—Levitiku 17:11, 12, NW; Deuteronomi 4:10; 31:11.

6. Eaa i anoanoiaʼi kia apii tamouia te au tavini o te Atua no runga i te toto?

⁶ I te tuatau ko Iseraela to te Atua ra iti tangata akaputuia e ia, kua anoanoia te aronga inangaro kia akamareka iaia kia apiiia no runga i te toto. Mei tetai uki ki tetai uki o to Iseraela ra kua apiiia te au tamaroa e te au tamaine i te reira. Inara ka rave ua atu ia ainei te reira apii anga i muri ake i ta te Atua ariki anga i te putuputuanga Kerititiano, e te akariroanga ia ratou ei “te Iseraela o te Atua”? (Galatia 6:16) Ae, e tika rava. Kare i tauiia to te Atua ra manako no te toto. (Malaki 3:6) Ko tona turanga no runga i te kore e akono tarevake i te toto i vai ana i mua ake i te akamana angaia te Ture Koreromotu ra, e kua vai mairai i muri ake i te akaoti angaia te Ture ra.​—Genese 9:3, 4; Angaanga 15:28, 29.

7. Eaa ra i puapinga maataʼi kia apiiia tatou e te Atua no runga i te toto?

⁷ Ko te akangateitei i te toto e tumu maata ia i te akonoanga Kerititiano. ‘Kare ainei te reira i te tuatua akamaata ua?’ penei ka ui tetai papaki. Inara, eaa te tumu maata i te akonoanga Kerititiano me kare ki te atinga o Iesu? Kua tata te apotetoro ko Paulo: “Nona [no Iesu] i raukaʼi te ora ia tatou i tona toto, i te akakore anga i te ara nei, no te maata o tona aroa ua.” (Ephesia 1:7) Kua uriia taua irava ra e The Inspired Letters, na Frank C. Laubach i uri: “Na te toto o te Mesia i oko ia tatou e i teianei kua riro tatou nei e Nana.”

8. Eaa te irinaki anga o te “urupu maata” i te toto no te ora anga?

⁸ Pouroa te aronga te manakonako ra kia ora atu i te “mate maata” te vaitata mai nei e kia rekareka i te au akameitakianga a te Atua ki runga i te enua parataito tei runga te reira i te toto akamaringiia o Iesu ra. Te akataka maira a Apokalupo 7:9-14 ia ratou mei te mea rai e kua tupu e kua na ko maira: “Ko te aronga teia i aere mai mei roto i te mate maata, e kua orei i to ratou kakau, e kua akateatea i te toto o te Punua-mamoe ra.” E tamanako i te tuatua anga i konei. Kare te reira i karanga ko teia aronga tei akaoraia na roto i te mate maata e kua ‘ariki ia Iesu’ me kare ‘kua akarongo kiaia,’ e tika rai e e au tu maata te reira. Kua rave ra i tetai takainga mamao atu kua na ko maira e “kua orei i to ratou kakau, e kua akateatea i te toto o [Iesu] ra.” Ko te reira no te mea e toto puapinga tona no te oko anga.

9. Eaa i apinga maataʼi te akarongoanga ia Iehova no runga i te toto?

⁹ Na te ariki anga i teia puapinga e tauturu i te au Kite o Iehova kia tuku i te tika e auraka e akono tarevake i te toto, noatu me ka karanga te taote ma te ngakau tae e ka anoanoia te pamu anga toto. Penei te irinaki ra aia e ko te au puapinga no te pamu anga toto ka maata roa atu i te au kino te ka tupu mei te toto maira. Inara kare e rauka i te Kerititiano i te akakore i te kino maata atu, koia te ngereanga i to te Atua ra mareka anga na te akatikaanga kia akono tarevake i te toto. Kua tuatua a Paulo i te aronga “rave akakoro i te ara i muri ake i te rauka anga te kite tika i te tuatua mou.” Eaa ra i kino roaʼi te ara mei te reira te tu? No te mea ko tera tu tangata “kua takatakai i te Tamaiti a te Atua e . . . kua manako e mea noa ua te toto o te koreromotu tei akatapuia ra aia.”​—Ebera 9:16-24; 10:26-29, NW.

Tauturu ia Etai ke Kia Apiiia

10. Eaa te turu ra i to tatou manako papu kia akakore i te toto?

¹⁰ Ko tatou te aronga ariki i te atinga oko o Iesu te matakite ra kia kore e rave i te ara, na te kopaeanga i te puapinga o te mana akaora o tona toto. I te oti anga te akamanako anga i te reira tumu, kua kite tatou e ko te akameitaki kairo koreia i te Atua no te oraanga ka tau kia akakeu ia tatou kia kopae ke i tetai ua atu tu akakore anga i tana au ture tuatua tika, te papu ra ia tatou e kua orongaia no tona ngakau mai ei meitaki no tatou​—ei meitaki no tatou no te tuatau roa. (Deuteronomi 6:24; Maseli 14:27; Koheleta 8:12) Inara, akapeea ta tatou au tamariki?

11-13. Eaa te manako tarevake o tetai papaki o te au metua Kerititiano no runga i ta ratou tamariki e te toto, e no teaa ra?

¹¹ I te tuatau te rikiriki ra ta tatou tamariki me kare e ou roa kia marama, ka akara te Atua ko Iehova ia ratou e viivii kore e ka arikiia mai i runga i te tumu anga o to tatou akarongo. (1 Korinetia 7:14) No reira e tika e ko te au tamariki varevare i te ngutuare Kerititiano penei kare i marama ake e kia iki i te akarongoanga i te ture a te Atua no te toto. Inara, te rave ra ainei tatou i te meitaki te ka rauka ia tatou i te apii atu ia ratou i teia tumu maata? Ka tau rai te ai metua Kerititiano kia akamanako papu i te reira, no te mea ko etai metua te akara anga te tarevake ra te manako no ta ratou tamariki e te toto. I te akara anga ko tetai papaki te manako ra kare tikai o ratou mana ki rungao i ta ratou tamariki no te pae i te pamu anga toto. Eaa ra i tarevake ei te manako mei teia te tu?

¹² E ture to te au enua e manganui me kare e aronga rima rave no te kavamani ei paruru i te tamariki kare e akonoia ana e te takinga kinoia ra. Kare te au tamariki a te au Kite o Iehova e akono koreia ana me kare te takinga kinoia ra kia kore nga metua e akatika kia pamuia te toto i ta raua tamaroa me kare tamaine akaperepere, ma te patianga i reira kia akonoia etai atu tu vairakau te rauka mai ra i te vairakau ou o teia tuatau nei. Noatu rai i te manako anga a te aronga rapakau, kare teia i te manako kore e te takinga kino, i te akamanakoanga i te au kino no te pamu anga toto. Ko te akono anga ia i te tika kia paunu i te au kino te o mai ra e ei reira ka iki ei i te rapakau anga.a Inara, kua tukua ki te ture e tetai papaki o te aronga rapakau i te kimianga i te mana kia raveia te pamu anga toto kare ra i anoanoia.

¹³ Ko etai au metua, i te kite anga e e ngoie ua no te aronga rapakau kia rauka te turuanga a te akavaanga no te pamu anga toto i tetai tamaiti rikiriki, e penei ka manako e kare i to ratou rima te tika, e kare e apinga e rauka i nga metua kia rave. Mei teaa ra te tarevake o te reira manako!​—Maseli 22:3.

14. Akapeea te apii anga ia Davida raua ko Timoteo i to raua vai mapu anga ra?

¹⁴ Kua kite tatou e i apiiia a Davida i te arataa o te Atua ra mei tona mapu anga maira. Na te reira i akapapa iaia kia manako i te oraanga e e apinga oronga mai na te Atua e kia kite ko te toto ko te ora ia. (Akaaiteia atu kia 2 Samuela 23:14-17.) Kua apiiia a Timoteo i to te Atua ra manakoanga mei te “tamariki anga mairai.” (2 Timoteo 3:14, 15) Kare aina koe e akatika e noatu rai ia Davida raua ko Timoteo kare i tae ake ki te mataiti a te ture i teia tuatau no te aronga kua pakari mai, kua rauka ia raua uaorai i te akakitekite i to raua manako no te au tumu te kapiti ra i to te Atua anoano? Mei te reira katoa, i mua roa ake i te taeanga te mataiti, ka tau te au Kerititiano ou i teia tuatau kia apiiia i to te Atua ra arataa.

15, 16. (a) Eaa te manako tei tupu maira i etai ngai no runga i te au tika o te tamariki? (e) Eaa tei taki atu ki te pamu anga toto ki tetai tamaiti ra?

¹⁵ I etai ngai te orongaia ra te au tika ki te au tamariki te karangaia ra e e pakari mei to te aronga kua pakari rai. Akatumuia ki runga i te mataiti me kare te pakari o te manako, me kare nga mea e rua ravarai, penei ka manakoia tetai mapu e kua araiia tona pakari no te tuku i tana uaorai au tika no te akono anga rapakau. Noatu rai i te ngai kare ra te reira i te ture, penei ka oronga te au akava e te aronga mana i te tika no ta tetai mapu ka inangaro tei rauka ra iaia i te akataka ngaueue kore i tana tika no te toto. I te tuke anga, kia kore e rauka i tetai mapu i te akataka meitaki i tona akarongo e kia pakari, penei ka manako tetai akavaanga e nana e tuku te tika i tana akara anga ko te meitaki, mei tana ka rave no te pepe ra.

¹⁶ Kua apii tetai tangata ou i te Puka Tapu i etai tuatau no etai mataiti, inara kare i papetitoia. Noatu rai e itu ua epetoma toe e tae ei tona mataiti no te “tuku anga tika kia akakore i te akono anga rapakau nona uaorai,” kua kimi tetai are maki tei reira ra aia e akonoia ana no te cancer, kia turuia mai e te akavaanga kia pamuia i te toto kare ra aia i anoano e pera katoa tona nga metua. Kua uiuiia e te akava pakari ra te manako iaia ra no runga i tona akarongo i te toto e kua ui atu i etai uianga tumuanga, mei te au ingoa o nga puka mua e rima o te Puka Tapu ra. Kare i rauka te tangata mapu i te akakite i nga ingoa, e kare katoa i rauka iaia i te akakite atu e te marama ra aia i te tumu i kore ei aia e akatika i te toto. E mea mii ra, kua oronga te akava i te tika kia pamuia o te toto, ma te tuatuaanga: “Ko tona akakore anga i te pamu toto kare i akatumuia ki runga i te kite pakari i tona uaorai akarongo akonoanga.”

17. Eaa te turanga i raveia e tetai tamaine e 14 ona mataiti no runga i te toto, e eaa tei tupu?

¹⁷ Penei e tu ke te tupu anga no tetai mapu ou tei apii meitakiia i to te Atua arataa e kua aaere tikai i Tana tuatua mou. E Kerititiano ou mai tetai i tu katoa i taua maki cancer ra. Kua kite taua tamaine ra e tona nga metua e kua ariki i tetai vairakau maru mai na tetai taote karape i tetai are maki rongonui. Tera ra, kua raveia ki te akavaanga. Kua tata maira te akava: “Kua akakite a D.P. e ka kopae aia i te pamu anga toto i te au mataara katoa te ka rauka iaia. Kua akamanako aia i te pamu anga toto e e takinga kinoanga i tona kopapa e kua akaaite atura i te reira ki te kukumi anga. Kua pati aia ki te akavaanga kia ariki i tana iki anga e kia akatikaia aia kia noo atu i [te are maki ra] e auraka te Akavaanga e ikuiku i te pamu anga toto.” Kua rauka mai te tauturu iaia no te apiianga Kerititiano ra no teia tuatau rave anga ngata.​—E akara i te pia.

18. (a) Eaa te turanga ngaueue kore o tetai tamaine tei makiia ra no runga i te raveanga toto? (e) Eaa ta te akava tika i tuku no tona rapakau anga?

¹⁸ E tamaine tetai e 12-mataiti tei akonoia ra no te maki rukimia. Kua raveia e tetai rima rave no te akono tamariki ki te akavaanga kia raukai te pamuia ki te toto. Kua tuatua taopenga mai te akava e: “Kua akakite papu mai a L. na roto i tetai turanga ketaketa e, me ka tautaia te pamu anga iaia ki te toto, ka tamaki aia ma tona ririnui katoa te ka rauka iaia. Kua karanga aia, e te irinaki nei au iaia, e ka kapiki maata aia e ka tamaki e ka kukumi aia i te apinga pamu ki vao i tona rima e ka tamata aia i te akapou atu i te toto i roto i te pute i runga ake i tona roi. Kare au e akatika i te tuku i tetai ikuiku anga te ka akariro i teia tamaine kia rave i taua apinga ra . . . I teia tamaine maki ko te akonoanga tei akapapaia e te are maki ra, ko te maki anake i te pae kopapa ra. Kare i akono i tei anoanoia no tona manako ngakau e tona akarongo i te pae o te akonoanga atua.”

Te au Metua​—E Apii ma te Mako

19. Eaa te apainga taka ke ta te au metua ka tau kia rave no ta ratou tamariki?

¹⁹ Te akakitekite maira te reira au tupu anga i tetai akakite anga ririnui no te au metua tei anoano ra e kia akono to ratou ngutuare tangata katoa kia tau ki te ture a te Atua no te toto. Ko tetai tumu o Aberahama i riro ei ei oa no te Atua no Tona kite anga e ka rave taua paterearika ra “e ako rai aia i tana tamariki, e tona ngutuare katoa, kia akono ratou i te tuatua a Iehova a muri atu, i te rave anga i te tuatua-tika.” (Genese 18:19) Kare ainei e tau te reira no te au metua Kerititiano o teia tuatau nei? Me ko koe tetai e metua, te apii nei ainei koe i taau tamariki akaperepere kia aere i te arataa o Iehova e kia tika ua rai ia ratou “kia akakite atu ki te tangata katoa e ui mai . . . i te manako i roto ia [ratou ra], ma te maru e te kauraro marie atu”?​—1 Petero 3:15.

20. Eaa te mea maata ta tatou ka tau kia anoano no ta tatou tamariki kia kite e kia irinaki no runga i te toto? (Daniela 1:3-14)

²⁰ E meitaki ra kia akakite atu ki ta tatou tamariki no runga i te kino o te maki e etai atu au tu kino no te pamu anga toto, ko te apiianga ra i ta tatou tamariki i te ture apa kore ua a te Atua no te toto kare te aiteanga e kia akatupu i te mataku i te toto. Ei akatauanga, me ka ui atu tetai akava ki tetai tamaine e eaa aia i kore ei e anoano kia pamuia ki te toto e ko tana pau anga e ko tona manako e kino me kare e mea mataku, eaa te ka tupu i reira? Penei ka manako te akava e no tona tu kamakura e te mataku maata, mei te mataku rai aia i tetai vai anga i te kopu e ka aue aia e ka arai i teia vai anga noatu rai e te manako ra tona nga metua e ei meitaki nona. Pera katoa, mei ta tatou i kite i mua akenei e ko te tumu maata ka akakore ei te au Kerititiano i te pamu anga toto kare no te mea e viivii te toto mari ra no te mea e apinga maata ia na to tatou Atua, Tei Oronga mai i te Ora ra. Ka tau rai kia kite ta tatou tamariki i te reira, e pera katoa oki te au kino penei ka tupu mai no te toto na te reira e oronga i te akaketaketa anga ki to tatou turanga i te pae o te akonoanga.

21. (a) Eaa ta te au metua ka tau kia kite no runga i ta ratou tamariki e te manako o te Puka Tapu no te toto? (e) Akapeea e raukai i te au metua i te tauturu i ta ratou tamariki no runga i te toto?

²¹ Me e tamariki taau, te papu ra ainei ia koe e te akatika ra ratou, e ka rauka katoa oki ia ratou te akataka i te turanga a te Puka Tapu no te pamu anga toto? Te irinaki tika ra ainei ratou i teia turanga e ko te anoano ia o te Atua? Te papu ra ainei to ratou manako e kia aati i te ture a te Atua e mea kino roa ia e ka akakino i te manakonako anga o te Kerititiano no te oraanga mutu kore? Ka uriuri manako akaou te au metua pakari i teia au tumu ma ta ratou tamariki, me te ou ra e me kua pakarikari mai. E meitaki te au metua kia akataka i te au tuatau no te akamatau anga, e tuku atu i te au uianga ki te au mapu tataki tai penei ko ta te akava ka ui mai me kare ta tetai opita o te are maki. Kare te akakoro anga e kia tuatua ua tetai mapu no te kite i etai tumu ikiia me kare i etai pauanga. Ko te mea maata kia kite ratou i ta ratou e irinaki ra, e no teaa te tumu. Tera ra, i te akavaanga, penei ka oronga katoa nga metua me kare etai ke atu i etai akakitekite anga no te au kino penei ka tupu mai no te toto e te vaira etai atu apinga rapakau. Inara penei ko ta te akava me kare tetai opita ka kimi kia kite i te tuatua anga ma ta tatou tamariki, me kua kite pakari ainei ratou i to ratou turanga e te au apinga ke te vai maira e pera katoa oki me no ratou uaorai to ratou manako e to ratou irinaki anga ngaueue kore katoa ra.​—Akaaiteia atu kia 2 Ariki 5:1-4.

22. Eaa te tupu anga mutu kore i to tatou apii angaia e te Atua no runga i te toto?

²² Ka tau tatou katoatoa kia ariki e kia mou marie i to te Atua ra manako no te toto. Te akataka maira a Apokalupo 1:5 i te Mesia e ko tei ‘aroa mai ia tatou nei, e kua tamā ia tatou i ta tatou ara i tona uaorai toto.’ Na te arikianga anake i te puapinga o to Iesu toto e raukai ia tatou te ki anga e te tamouanga i te akakore anga i ta tatou ara. Te taka meitaki ra te tuatua ia Roma 5:9: “E teianei kua akatikaia tatou i tona toto, e maata ua atu to tatou ora iaia i te riri otooto.” E pakari tikai, i teianei, no tatou e ta tatou tamariki kia apiiia mai e Iehova no runga i teia tumu e kia akapapu i to tatou manako kia aere i tona arataa e tuatau ua atu!

[Au Tataanga Rikiriki i Raro]

Etai Tumu Maata no te Apii Anga

◻ Eaa te manako tau no tatou i te apiiia mai e Iehova ra?

◻ Eaa i puapinga maataʼi kia akarongo atu i ta te Atua ra ture no te toto?

◻ Eaa i puapingaʼi e kia rauka i te au mapu i te akataka meitaki e kia ngaueue kore to ratou irinaki anga no runga i te toto?

◻ Akapeea ka raukai i te au metua Kerititiano i te tauturu i ta ratou tamariki kia apii meitakiia i ta Iehova ture no te toto?

[Pia i te kapi 17]

KUA MANAKO ARIKI TE AKAVAANGA

Eaa te tuatua o te tuku anga tika a te akavaanga no D.P., tei taikuia i te parakarapa 17?

“Kua manako ariki meitaki te akavaanga i te kite, te tu mako, te tapunui, e te maroiroi o teia tamaine ou e 14-1/2 ona mataiti. Penei kua poitirere aia i te kitea angaia e e tu maki cancer kino tona . . . Inara, e tamaine ou pakari tikai tei aere mai ki te akavaanga i te tuatua akakite mai. I te akara anga kua tamou taka meitakiia tona manako ki runga i te rave anga ngata tei aro maira iaia. Kua aere atu aia ki te au akaputu anga no te apii, kua akatika i tetai parani no te rapakau, kua akanoo i te apiianga tau e ka akapeea aia ei tangata nei i te aro atu anga i teia akaaoanga rapakau anga, e kua aere mai aia ki te akavaanga ma te patianga itae i te ngakau: akangateitei mai i taku tika . . .

“Kapiti katoa ki tona tu pakari, kua rava ta D.P. akakitekite anga no tana tuku anga tika kia arikiia mai e te Akavaanga. Te pae vaerua, te manako, te tu mako, e te manako ngakau katoa oki ka akakino iaia tetai parani rapakau te ka kapiti atu i te pamu anga toto. Ka ariki rai te Akavaanga i tana iki anga no te parani rapakau anga.”

[Tutu i te kapi 16]

Penei ka anoano tetai akava me kare tangata akaaere no te are maki kia kite eaa tikai ta tetai mapu Kerititiano e irinaki ra, e eaa oki te tumu