Akaoraanga i te Enua mei te Takino Anga

E TAI taime i te tuatua enua o te tangata nei, kua akaora te Atua i te enua mei te takinoia anga i te au rima o te tangata. Kua rave aia i teia na roto i te vaipuke i te ao katoa i te au ra o Noa. Kare a tatou papaanga e i takino ana te tangata i te mareva i te reira taime. Inara kua takinoia te enua i tetai tu tuke e i manako ei te Atua i te anoano no te rave i te takore.

Kua ripoti te Puka Tapu: “Kua kino roa ra te enua i mua i te aroaro o te Atua; e kua ki te enua i te [ta ua, NW]. E kua akara iora te Atua i te enua nei, e i na, kua kino roa; kua kino roa te aerenga o te tangata ravarai i te enua nei.” (Genese 6:4, 11, 12) Ae i to Noa tuatau kua manakoia e kua takinoia te enua no te ta ua e te tu kino o te au tangata.

Aiteite katoa rai, i te akamataanga a Iseraela i taito i te apai i te Enua Taputouia, kua akamatakite te Atua: “Auraka koe e akataero i te enua taau e noo ra; no te mea na te toto e akataero ana i te enua . . . E auraka koe e akaviivii i te enua.” (Numero 35:33, 34, NW) No reira, kua takinoia a Kanaana no tei apa i te toto o tona iti tangata. Tetai akaraanga kino o teia ko ta ratou taangaanga anga i te akaatinga i te tamariki rikiriki ki to ratou au atua.

E pakari tikai te angaanga tau kore a te au Kanaana, e kua akatuke i te manako o te Atua no te enua. Kua akamatakiteia a Iseraela: “Auraka kotou e akaviivii ia kotou uaorai i taua au mea katoa nei [au ravenga tau kore]; ko te au mea oki teia i viivii ei te au iti-tangata taku e vaitata i te tuaru i mua ia kotou nei: Kua viivii oki te enua . . . e na te enua uaorai e akaruaki i tona au tangata ki vao.” (Levitiku 18:24, 25) Kua takino maata tikai te ravenga tau kore e te akamaringi toto ia Kanaana i akapou ei te Atua i te au pa enua o Kanaana.

Te Takinokino Anga i te Enua

Akapeea i teia tuatau? Kare ainei tatou e noo nei i tetai tuatau o te ta ua kare e rauka i te akaaere, te akamaringi toto, e te au ravenga tau kore? Noatu ta te tangata tauta anga i te akameitaki akaou i te kino tei tupu ki te enua nei, kare rava e rauka iaia i te akaoki akaou mai ki te ora tei tamanakoia e tai anere mirioni tei mate i tana au tamaki i teia tai anere mataiti i topa; kare rai e rauka iaia i te akaoki akaou mai i te au mirioni ua atu tei taiaia e te aronga ta tangata me kore te maata ua atu o te aronga tei mate i te pongi. E tikai kare e rauka iaia i te akaoki akaou mai tei tamanakoia e 40 ki te 60 mirioni au pepe kare i anauia mai tei tamateia to ratou oraanga na roto i te titiri anga pepe i te au mataiti tatakitai. Ka ekoko ainei tatou e i to te Atua akara anga e te takinoia ra to tatou enua e teia au mea​—e te au ravenga tau kore te tupu maata nei i teia tuatau?

Te akakite maira te tumu ka rave ei te Atua i te akaora i te enua mei ta te tangata nei au angaanga takino anga, e te akapapu maira te Puka Tapu i teia. Inara eaa tana ka rave? Te tuatua ra te Puka Tapu iaia e “ka apai mai i te takino ki te aronga takinokino i te enua.” (Apokalupo 11:18, NW; akaaiteia atu kia Mataio 24:3-14.) Mei ta tetai tangata kainga titiri anga i tetai tangata tei mako kore ra, no reira ka “titiri” katoa te Atua i te aronga tei takino i tana mea i anga ma te manea, koia te enua.

Te akakite ra te Puka Tapu: “Ka tipu keia ra te aronga kino i te enua nei, e te aronga rave ara ra, ka kiriti tumuia ïa.” (Maseli 2:22) Te kapiki ra te Puka Tapu i teia angaanga no te Atua mai e ko Aramakito. (Apokalupo 16:16) Kua kapiki katoa a Iesu i te reira “e mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e kare oki a muri atu.” (Mataio 24:21) Ka maata rava atu te reira i te Vaipuke.

E tukuanga tika maata rava me kare e tika kore ainei teia? Kare, e tika anga to te Atua tei Anga i te enua no te manako e koai te ka noo i reira. Tei iaia katoa te tika i te akaapa i te tangata nei no tana au angaanga. Tei maata atu, me tuku ua te Atua i te tangata kia rave tamou ua atu i tona kaveinga ma te kore e akaraia, ka takinoia te enua o te katoatoa, e ka ngata te rave anga i te oraanga. I tetai tua, na te ‘apai mai anga i te takino ki te aronga te takinokino ra i te enua,’ ka akono te Atua i to tatou tuanga enua no te aronga te ariki rekareka ra. Te taputou maira te Puka Tapu: “Na te aronga tiratiratu oki e noo i te enua, e te aronga apa kore te ka akatinamouia ki reira.”​—Maseli 2:21.

Ma to te Atua tauturu, e mirioni ua atu tei kitea te maroiroi no te akaari ia ratou uaorai ei apa kore no te mea te inangaro ra ratou kia vaooia kia rekareka i ta te Atua au mea i anga. Te aru katoa ra ratou i ta te Atua au turanga tau e te kopae i te ta ua e te apa i te toto noatu e kare e tano ana. No reira, kare ratou i te aronga takino i te enua i teia tamanako anga puapinga.

Tetai Enua Akaoraia Mei te Takino Anga

E manakonakoanga mataora to teia aronga nei i te kiteanga i te enua me tauiia mei tona tu takinoia i teianei ki tetai parataito oraora. Ka tama katoaia to ratou au kopapa, ka akateateaia te au tu takinoia o te ara. Te akatutu maira te puka openga o te Puka Tapu i ta te Atua oronga anga no te akariro i teia au mea ei akaaiteanga ko te “kauvai o te vai no te ora.” I te nga tua o teia kauvai, “te vaira te au tumu rakau o te ora te uaanga mai e okotai ngauru ma rua tu ua rakau, te uaanga mai i te au ua rakau i te au marama tatakitai. E kua riro te au rau o te au tumu rakau e ko te rapakauanga ia o te pa enua.”​—Apokalupo 22:1, 2, NW.

E akapapu anga tareuia teia tei akauruia e ka akaora te Atua i te enua e te tangata katoa i runga i reira mei te takinoia anga. Te oronga maira tetai au totou i te akaraanga na mua ake o te reira enua i te akaoki akaou angaia mai. E tamanako ana ei akaraanga, i ta Isaia akaraanga na mua mei te tu o te pee ra: “Te medebara, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare. E maata ïa i te pua tiare anga, e rere ua i te rekareka e te imene.” (Isaia 35:1, 2) I te reira taime kare e akataero akaouia te tai, te one takinoia, me kore te mareva poitini.

Te mea maata rava atu, kare te enua e takinoia e te ta ua, te akamaringi toto, me kore te au ravenga tau kore. Ko te aronga ua tei akangateitei i te Atua, e tana au turanga, e tana au mea i anga ka noo ki reira. (Apokalupo 21:7, 8) E akarongo mai i teianei ki te au taopenga anga kaka o teia au mea pouroa: “E [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito. . . . I na, te akariro nei au i te au mea ravarai ei mea ou.”​—Apokalupo 21:4, 5.

Mei teaa te mataora i te ka tupu! Mei teaa tikai to tatou rekareka e kare e roa atu te Atua ka “apai mai i te takino ki te aronga takinokino i te enua”! E mei teaa ta teia au taputou akauruia te akakeu anga ia tatou kia inangaro i te tavini i te Atua te ka akaora mai i te enua mei te takino angaia e te maani anga i te reira ei kainga parataito no te au tangata ngakau tika!

[Tataanga i te kapi 6]

Te tuatua ra te Puka Tapu i te Atua e ka “apai mai i te takino ki te aronga takinokino i te enua.”​—Apokalupo 11:18, “NW.”