Akara Oonu i te Nuti
“Apinga Kino Rava Atu”
Te au tamanu anga tei tukuia e te aronga maki tei tuia e tetai maki mate na roto i te pamu anga toto kua oronga te reira i tetai turanga ou kia matakite te manganui o te au pangika toto. Te tae anga ki te rotopu o te 1989, kua tere atu i te 300 au tamanu anga tei ripotiia no te patoi i te au pangika toto i te au Tuanga Enua Taokotaiia. Kua akatika a Gilbert Clark, te akaaere tauturu o te American Association of Blood Banks e “ka inangaro te katoatoa i te toto meitaki ma te apa kore,” inara kua tuatua e kare te reira e akapapuia.
Ma te aiteite rai, kua ripoti te Parade Magazine i te tangata kite no te toto, ko te Taote Charles Huggins, tei tuatua no te toto “kia tamanakoia ma te kore e ekoko e kare i te mea meitaki.” Te akatutu ra aia i te toto e ko “te apinga kino rava atu te reira ta tatou e taangaanga ra i roto i te vairakau.” Mei te akamataanga o te 1989 kua tupu te au maki piri te ka kiteia e te au pangika toto kua tere roa atu ki te rima (HTLV-1, piri atu ki te T-cell rukimia maata, te maki opi, te Hepatitis B, te AIDS e te Hepatitis C). Inara, i tau ki te aronga mana o te Red Cross o Marike, ko S. Gerald Sandler, “te akaraanga e kare e roa atu ana ka kite akaouia mai tetai maki tuke tei akatotoaia e te pamu anga toto.” Noatu tana kino maata ka akatupu, mei te 4 mirioni au Marike i te tua Tokerau tei tapapaia no te pamu toto i te tuatau 1990. Te manamanata, i tau ki te tangata tata i tetai ngai o te nutipepa ko te Taote W. Gifford-Jones, koia oki “te maata anga o te aronga maki eiaa te au Kite o Iehova, kare e uriuri ana no te ravenga pamu toto.”
No tetai tuatau roa, te au Kite o Iehova ma te tu tiratiratu i te ‘kopae anga mei te toto’ i tetai ua atu tu mei ta te Tuatua a te Atua i akaue mai ia Angaanga 15:28, 29; 21:25. Te akakite maira teia paruru anga tei orongaia kia ratou mei te au maki piri tei na roto mai i te au pamu anga toto i te tika tikai o ta ratou akarongo anga ki te au ture a te Atua ko Iehova.
Ngaro ma te Kore e Kiteia?
Kua tuatua a Joachim Cardinal Meisner, tetai tangata tei akatupu i tetai taumaro anga i tona akataoonga angaia ei orometua maata o Cologne, i Tiamani ia Peperuare i topa akenei e, ko tona mataku maata rava atu penei a tetai ra ka “ngaro te ekaretia—e penei kare te au tangata e kite.” I tau ki te nutipepa Tiamani Rheinische Post, kua tuatua a Meisner e: “Te taitaia nei toku meta e te manako nei te au tangata i te ekaretia ei apinga puapinga kore.” Tetai tumu penei, tana i kite, no ta “tatou tuatua maata roa no runga i te enua e kare e rava meitaki ana to te rangi, maata roa no runga i teianei e e meangiti rava no runga i te mutu kore.”
Na te akariro anga ia ratou uaorai ei taeake ki te au akatereanga poritiki e te kimi anga puapinga o te enua nei kare i irinaki i te mana no te rangi mai no te rapakau i te au manamanata o teianei ao, kua pikikaa i reira te au akonoanga Kerititome i ta ratou tika anga e te komono ra i te au apinga inangaro a Iehova. Ka tupu mai te au turanga kino mei teia. I tau ki ta te Puka Tapu, kare e roa ka ngaro ke te au akonoanga pikikaa—e angaanga ka kitea uaia e “te au ariki o te enua” (NW) e “te aronga okooko aere o te enua” (NW), koai te ka aue me ka tupu teia raveanga. Te kopaeanga i te aue ma ratou, kua akakiteia ki te aronga inangaro i te tuatua tika: “Ka aere ke mai . . . ki vao [i te akonoanga pikikaa] . . . kia kore kotou e riro ei rave katoa i tana ra au ara, kia kore kotou e mate katoa i tona ra au mate.”—Apokalupo 18:4, 9, 11.
Te Kiteia Atu Nei te Openga
Kua tuatua etai au nutipepa i te au ta ua tei raveia e te au kavamani me kore au akaaerenga tei paruruia e ratou e ko te “Taanga Tuanga Enua.” Te tika, i te 1988 i tuatuaʼi te vaa tuatua o te Amnesty International ko Gerry O’Connel, “kua tupu maata te aati anga o te au tika anga tangata e tae ua mai ki te 1989.” Kua tapiri atu aia: “Kua taea te au tamate anga no te aati anga i te au ture kiteia i te ao katoa e pini ua ake ki tetai tare anga maata rava.”
I tau ki te ripoti mataiti a te Amnesty, e toanu tikai ki te mokotua teia au numero: I te tuatau 1988 kua taiaia i rotopu i te 50,000 e te 100,000 au tangata i te au enua e 29 i raro ake i te akara anga a teia Tuanga Enua. I rotopu i teia ko te tamariki, te au tangata ruaine, e te au vaine, ta ratou ara ua nei no tei o atu ratou ki roto i tetai pupu poritiki me kore kara ke me kore te noo ra i te au ngai tei tamakiia e nga tua patoi. Te aronga na ratou e rave i teia au tamate anga ko te pupu tamate, te aronga orureau, te aronga kimi apinga akakona, e tetai pae au pupu te taangaanga ra i te ta ua ei au angaanga poritiki. Kua akakite mai te La Repubblica e “e maata te taime e pipini ana te Tuanga Enua ki muri i te au pupu vaeau no te tamate atu tikai i te aronga patoi e tetai ua atu akatere anga mako kore.”
Kare rava i reira e tumu, e i roto i ta Iehova Tuatua akauruia, te akaaite ra a Iehova i te kavamani tangata ki tetai “puaka taae.” (Apokalupo 13:2) Inara, kare teia kino tei akakeuia e te angaanga poritiki e aere ua atu. Mei ta Salamo 92:7 e tuatua ra: “Me tupu te aronga kino mei te ngangaere, e me ruperupe katoa te aronga i rave i te kino ra; i ruperupe ïa, kia tipu akaruke takiri roaia ra.” Ka rave to te Atua Patireia i te rangi i roto i nga rima o Iesu Mesia, te “Ariki no te Au” i te reira.—Isaia 9:6, NW; Daniela 2:44.