E Mou Tikai “i To Inangaro Mua”

“E mou tikai i tei rauka ia koe na.”​—APO. 3:11.

1, 2. Eaa toou manako i te kite anga koe e ko taau i kite mai no runga ia Iehova ko te tuatua mou tikai ia?

MAARA ainei ia koe i te akarongo mua anga koe i te manakonakoanga umere ta Iehova i oronga mai ki te au tangata akarongo? Me e mema koe no tetai akonoanga i mua ana, eaa toou manako i te akamaramaia atu anga te au akakoroanga o te Atua kia koe na roto i te Tuatua Tapu me kore i te akamaramaia atu anga te au apiianga kia koe? Penei kua kite mai koe e kua akavareia koe. Inara rekareka koe i teianei e kua kite mai koe i te tuatua mou! Me na nga metua Kerititiano i utuutu mai ia koe, te maara ra ainei ia koe e eaa toou manako i te ariki anga koe e ko taau i kite mai no runga ia Iehova ko te tuatua mou ia e kua iki koe i te aru kia rotai ki taau i kite mai?​—Roma 12:2.

² E manganui toou au taeake te ka akakite atu kia koe e te rekareka tikai ra ratou, te piri vaitata anga kia Iehova, e te mareka nei e kua akavaitata mai aia ia ratou. (Ioa. 6:44) Na to ratou mataora i akakeu ia ratou kia piri atu ki roto i te au angaanga Kerititiano. E maata tikai to ratou rekareka i inangaro ei ratou i te akamarama atu ki te katoatoa i ta ratou i kite mai. I tupu ana ainei tetai mea mei te reira rai kia koe?

3. Eaa te turanga tei tupu ana i roto i te putuputuanga i Ephesia i te tuku atu anga a Iesu i tetai karere kia ratou?

³ I te tuatua anga ki te putuputuanga Kerititiano o te anere mataiti mua i Ephesia, kua tuatua a Iesu no runga i “to inangaro mua ra.” E manganui te au tu meitaki o te au Ephesia, inara ko te inangaro ta ratou i akaari ana kia Iehova i mua ana kua iti mai te reira. No reira, kua akakite a Iesu kia ratou e: “Kua kite au i taau angaanga, e toou roiroi, e toou akakoromaki, e kare koe e tau i te aronga kikino ra: e kua timata koe i te aronga e tuatua ra e, e aposetolo ratou, e kare, e kua kite koe e pikikaa ratou: E kua akatupua ua koe, e kua akakoromaki marie, no toku nei ingoa, e kua tauta marie, e kare i potopoto to aʼo. Te vai nei ra taku akaapa anga ia koe, i te mea kua vaoo koe i to inangaro mua ra.”​—Apo. 2:2-4.

4. Eaa ra te karere a Iesu ki to Ephesia i puapinga ai i teia tuatau?

⁴ E mea tau ta Iesu akoanga ki to Ephesia e ki tetai au putuputuanga tana i tuatua atu i roto i te puka o Apokalupo i te akamanako anga i te au turanga te tupu ra no tetai tuatau i rotopu i te au Kerititiano akatainuia mei te mataiti 1914 e aere ua atu. (Apo. 1:10) Penei ake e ka ngaro katoa i etai au Kerititiano to ratou “inangaro mua” no Iehova e no te tuatua mou Kerititiano. No taua manako ra, ka akara matatio ana tatou e akapeea ra, na te akamaara anga e te akamanako anga i tei tupu ana kia koe uaorai, ka rauka ia koe i te akono tamou, i te akaoraora, e te akamaata i te inangaro e te maroiroi no runga i taau uaorai i kite mai i mua ana no te Atua e te tuatua mou.

Eaa te Akapapu Maira kia Koe e ko te Tuatua Mou Teia?

5, 6. (a) Eaa ta te Kerititiano tataki tai ka akapapu kiaia uaorai? (e) Eaa tei akapapu mai kia koe e te apii ra te Au Kite o Iehova i te tuatua mou? (nga) Eaa te ka tauturu i tetai tangata kia akaoraora i tona inangaro mua?

⁵ Te aronga katoatoa tei rave i tetai akatapuanga kia Iehova kia “taka tikai” kiaia uaorai na mua e eaa ‘tei meitaki, e te tau, e te apa kore ki to te Atua ra anoano.’ (Roma 12:1, 2) Ko tetai au mea te o maira koia oki te apiianga i te tuatua mou o te Pipiria. Penei e tuke te irinaki anga o tetai tangata e te apii ra te Au Kite o Iehova i te tuatua mou mei ta tetai e irinaki ra. Te maara ra i etai e kua tupu mai te taui anga maata i te tatau anga ratou i te ingoa o te Atua i roto i te Pipiria me kore te marama anga ratou e eaa tikai te turanga o te aronga tei mate. (Sala. 83:18; Kohe. 9:5, 10) Te mea e akakeu ra i tetai pae koia oki te aroa i rotopu i te au tangata o Iehova. (Ioa. 13:34, 35) Kua akamanako rai tetai pae i te aiteanga e kare ratou i to teianei ao. Kua iki ratou e kare te au Kerititiano mou e o atu ki roto i te au taumaro anga poritiki me kore te au tamaki a tetai ua atu pa enua.​—Isa. 2:4; Ioa. 6:15; 17:14-16.

⁶ No te au tangata e manganui, na teia au manako e tetai atu au manako i akakeu mai i to ratou inangaro mua no te Atua. E akamanako marie e eaa tei akapapu mai kia koe e ko te tuatua mou teia taau e apii nei. E tangata tuke tikai koe ma te au turanga tuke e te au peu tuke, no reira e tuke rai toou au manako no te inangaro anga ia Iehova e te irinaki anga i roto i tana au taputou mei to tetai atu. Papu e, te tau ua ra taua au manako kia koe i teia tuatau i to akarongo mua anga i te reira. Kare te tuatua mou i taui. No reira, i te akara akaou anga i taua au manako e te au manako ngakau ka rauka i te akaou e te akaoraora i toou inangaro mua no te tuatua mou.​—E tatau ia Salamo 119:151, 152; 143:5.

E Akaketaketa i Toou Inangaro Mua

7. Eaa ra tatou ka anoano ei kia akaketaketa i to tatou inangaro mua no te tuatua mou, e akapeea tatou i te rave anga i te reira?

⁷ Penei e maata te au taui anga i roto i toou oraanga mei te taime mai i rave ei koe i taau akatapuanga kia Iehova. E puapinga maata toou inangaro mua no te tuatua mou, inara i te tuatau e topa ua atura, te anoanoia ra koe kia akaketaketa i toou inangaro kia rauka i te aro atu i te au turanga ou te timata maira i toou akarongo. Inara, kua tauturu mai a Iehova ia koe. (1 Kori. 10:13) No reira, e puapinga katoa tikai te au mea taau i kite mai i te au mataiti i aereia mai kia koe. Kua tauturu mai te reira ia koe kia akaketaketa i toou inangaro mua, e kua akatupu mai teia i tetai mataara ke atu kia akataka tikai kia koe uaorai i te meitaki e te tau i to te Atua ra anoano.​—Iosu. 23:14; Sala. 34:8.

8. Akapeea a Iehova i te akataka anga iaia uaorai kia Mose, e akapeea te ngati Iseraela i te kite meitaki tikai anga i te Atua?

⁸ Ei akatutuanga, e akamanako ana i te turanga o te ngati Iseraela tei kite mai ratou ia ratou uaorai i te akakite anga a Iehova i tona akakoroanga kia akaora mai ia ratou mei te tuikaa anga i Aiphiti. Kua akataka maira te Atua iaia uaorai kia Mose, i te tuatua anga e: “Te vai nei au, ko au rai e vai nei [“Ka riro au i taku rai ka akariro,” NW].” (Exo. 3:7, 8, 13, 14) Te aiteanga o teia, te karanga ra a Iehova e ka riro mai aia i tei anoanoia kia akarangatira mai i tona iti tangata. I roto i te au tupuanga tei aru mai e te umuumuia ra e te au turanga, kua kite atu te ngati Iseraela i te akaari anga mai a Iehova i te au tu e manganui o tona tu peretana​—ei Mana Katoatoa, ei Akava, ei Arataki, ei Akaora, ei Tumutoa, e Tei Oronga mai.​—Exo. 12:12; 13:21; 14:24-31; 16:4; Nehe. 9:9-15.

9, 10. Eaa te tu o te turanga te ka tauturu i tetai kia kite mai i te Atua, e eaa ra i meitaki ei kia akamaara i taua au mea ra i tupu ana?

⁹ E tuke rai toou turanga i to te ngati Iseraela i taito. Noatu rai, penei e au mea tetai tei tupu ana kia koe tei akapapu mai kia koe e te manako maira te Atua ia koe, e kua akaketaketaia toou akarongo. Penei kua akapapu mai a Iehova iaia uaorai na roto i etai tu ko Tei Oronga mai, ei Akapumaana, me kore ei Puapii. (E tatau ia Isaia 30:20e, 21.) Me kore kua kite ana koe i tetai pauanga taka meitaki ki tetai pure. Penei kua aro ana koe i tetai akaaoanga, e kua tauturu mai i reira tetai taeake Kerititiano ia koe. Me kore na roto i taau uaorai apii kua kite mai koe i te au irava te tau ra kia koe.

¹⁰ Me ka akakite koe i taua au mea ra tei tupu ana ki tetai ke, penei kare etai pae e mareka mai. Ko te tika, kare te mea tei tupu i te temeio. Inara te kite ra koe i te reira ei mea puapinga maata. Ae, kua riro mai rai a Iehova i tana i anoano ra noou. E akamanako ana i toou au mataiti i roto i te tuatua mou. Te maara ra ainei ia koe i etai au atianga i te kite anga koe i to Iehova uaorai manako anga mai ia koe? Me koia ia, na te akamaara anga i taua au mea i tupu ra e mei teaa ra toou manako no runga i te reira, ka akatupu te reira i taua inangaro rai no Iehova taau i kite ana i mua ana ki roto i toou ngakau. E akaperepere i taua au mea ra i tupu ana. E akamanako i te reira. E akapapu anga te reira e te manako tikai maira a Iehova ia koe uaorai, e kare e rauka i tetai ke i te akaatea i taua irinakianga mei ia koe.

Akara Matatio i Toou Turanga

11, 12. Me kua iti mai te inangaro o tetai Kerititiano no te tuatua mou, eaa ra te tumu, e eaa te akoanga ta Iesu i oronga mai?

¹¹ Me kare koe e manako ana i taua inangaro ra no te Atua e te tuatua mou taau i manako ana i mua ana, kare ra no te mea e kua taui aia. Kare rava a Iehova e taui ana. (Mala. 3:6; Iako. 1:17) Kua manako mai ana aia ia koe i mua ana, e te manako maira rai aia ia koe i teianei. Eaa i reira, me e apinga tetai, tei taui i roto i toou pirianga kia Iehova? Penei te manako ra koe e tei raro ake koe i te taomianga maata, te taitaia maata ra i te au apiapi anga? Penei i te tuatau i topa kua pure akatenga koe, kua apii maroiroi, kua akamanako putuputu. I maroiroi ana ainei koe i roto i te angaanga orometua e te aere putuputu anga ki te au uipaanga a te putuputuanga mei taau e rave ra i teianei?​—2 Kori. 13:5.

¹² Penei kare koe i kite mai ana i taua au manako ra, inara me te kite ra koe i te reira, eaa ra tei arataki atu ki te reira? Penei na te au manako manamanata, mei te akono tau anga i toou ngutuare tangata, te akono anga i toou oraanga kopapa, e te vai atura, i akaparuparu i toou manako no te tu rapurapu i te vaitata anga mai te ra o Iehova? Kua akakite a Iesu ki tana au apotetoro e: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao, ka rokoia mai ei kotou e taua rā ra, kare i manakoia atu. E rokoia mai oki tei noo i te ao katoa nei i te reira, mei te ereere ra. E tenana, e ara kotou, e tamou tikai i te pure, kia tau ia kotou te ora i teianei au mea katoa e vaitata mai nei.”​—Luka 21:34-36.

13. Te akaaite ra a Iakobo i te Tuatua a te Atua ki teaa?

¹³ Kua raurau te tangata tata Pipiria akauruia ko Iakobo i tona au taeake irinaki kia akara matatio tikai ia ratou uaorai na roto i te Tuatua a te Atua. Kua tata a Iakobo e: “Ei aronga rave oki kotou i te tuatua nei, auraka ei aronga akarongo ua, i te pikikaa ua anga ia kotou uaorai. Ko te tangata oki e akarongo ua i te tuatua, e kare aia i rave, e tau aia i te tangata e akara ua i tona uaorai mata ki roto i te io ra: Te akara ra aia iaia uaorai, e aere atura, ngaropoina ua iora tona tu iaia uaorai i reira ra. Ko te akara ra ki roto i te ture tika rava o te rangatira ra, ma te tamou tikai, no te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.”​—Iako. 1:22-25.

14, 15. (a) Akapeea te Pipiria i te tauturu anga ia koe kia akameitaki mai i toou turanga pae vaerua? (e) Eaa te au uianga taau ka akamanako?

¹⁴ Ka rauka i tetai tangata i te akara ki roto i tetai io ei akapapu anga e te mako ra tona tu. Ei akaraanga, me kite atu tetai tangata e kua ipa tona neketae, ka rauka iaia i te akatika i te reira. Me kite atu tetai vaine e kare e manea ana tona rouru, ka rauka iaia i te akatanotano i te reira. Pera katoa, ka rauka i te au Tuatua Tapu i te tauturu mai ia tatou i te akara matatio e mei teaa rai to tatou tu. Me akaaite tatou ia tatou uaorai ki ta te Pipiria e akakite maira kia akapera tatou, te taangaanga ra tatou i te reira mei tetai io rai. Inara eaa ra te tumu ka akara ai ki roto i tetai io me kare tatou e akatikatika i te tarevake ta tatou e kite atura? Me rave tatou i tei tau ki ta tatou e kite atura “i roto i te ture tika rava” a te Atua, ka riro mai tatou “ei aronga rave oki” i te reira. No reira, me kite mai tetai tangata e kua iti mai to ratou inangaro mua no Iehova e te tuatua mou e mea meitaki i te akamanako i teia au uianga e: ‘Eaa te au taomianga taku e aro atu nei i roto i te oraanga, e akapeea au i te ariu anga atu ki te reira? Eaa ra toou manako i mua ana? Kua taui ainei tetai apinga?’ Me te akaari maira taua akara matatio anga ia tatou uaorai i tetai tu ngere, auraka e kopae i te reira. Me te anoanoia ra te au akatikatika anga, e rave i te reira auraka e taroaroa.​—Ebe. 12:12, 13.

¹⁵ Ka rauka i taua akamanako anga i te tauturu katoa ia koe kia akanoo i te au akakoroanga tau no te tupuanga i te pae vaerua. Kua oronga mai te apotetoro ko Paulo i te akoanga akauruia ki tona taeake angaanga ko Timoteo no te akameitaki anga i tana angaanga orometua. Kua raurau a Paulo i te tangata mapu e: “Ka akamanako tikai i teianei au tuatua; ko taau ïa e rave auraka e tivata; kia kite te tangata katoa i te tupu anga o toou kite.” E meitaki katoa rai kia akamanako tatou, i te Tuatua a te Atua, e eaa te tupu anga te ka rauka ia tatou i te maani.​—1 Timo. 4:15.

16. Eaa te kino te anoanoia ra kia matakite koe me akara matatio koe ia koe uaorai na roto i te Tuatua a te Atua?

¹⁶ Me akara matatio koe ia koe uaorai, ka akaariia mai etai au tu paruparu. Penei ka akataitaiaia tetai, inara auraka e tuku ua kia tupu mai te reira kia koe. Ko te tikaanga, te akakoroanga no te akara matatio anga ia koe uaorai koia oki kia akara e ko teea te ngai ka akatanotanoia. E tika rai, te inangaro ra a Satani i tetai Kerititiano kia manako e e puapinga kore ua aia no tona au tu apa ua. Ko te tika, kua raveia te akaapa anga e te akavaavaa ra te Atua i te au tauta anga ravarai kia tavini iaia. (Iobu 15:15, 16; 22:3) Kua patoi pakari a Iesu i taua pikikaa; te manako akaperepere maira te Atua ia tatou tataki tai. (E tatau ia Mataio 10:29-31.) Te kite meitaki anga i toou au tu apa e mea tau kia tauta akaaka i te akameitaki mai ia koe uaorai, ma ta Iehova tauturu anga. (2 Kori. 12:7-10) Me no te maki me kore te ruaine i kotingaia ai te ka rauka ia koe i te rave, e akanoo i reira i te au akakoroanga tei tau, inara auraka e tuku ua kia iti mai toou inangaro.

Kia Rekareka i te Au Akameitaki Anga

17, 18. Eaa te au akameitakianga no te akamaroiroi anga i to inangaro mua?

¹⁷ E maata te au akameitakianga te ka rauka mai na te patu anga ki runga i te tango o toou inangaro mua. Ka rauka ia koe i te akaoonu i toou kite no te Atua e te ariki rekareka anga koe i tana arataki anga aroa. (E tatau ia Maseli 2:1-9; 3:5, 6.) “Tei te akono i [te au tuatua tau a Iehova] te tutaki maata,” i karanga ai te tata taramo. “Te tuatua-akakite a Iehova, e mea mou ïa, e pakari ei te kamakura.” Pera katoa, “e ao to te aronga apa kore i te arataa, ko tei aaere na te ture a Iehova.”​—Sala. 19:7, 11; 119:1.

¹⁸ Ka akatika katoa koe e e manganui te au apinga meitaki taau e mareka ra. Kua marama koe i te au tumu e eaa te tupu ra i roto i teianei ao i teia tuatau. Ka puapingaia koe e te au mea pae vaerua katoatoa ta te Atua e oronga maira ki tona au tangata i teia tuatau. Kare e ekokoanga e te mareka katoa ra koe, e kua akapiri vaitata mai a Iehova ia koe ki tona putuputuanga i te ao katoa e kua oronga mai i te akameitaki anga i te riro anga mai koe ei Kite nona. E akamanako oonu i te au akameitakianga! Me ka rave koe i tetai papaanga no runga i te reira, penei e papaanga roaroa te reira. Na te rave putuputu anga i te reira kare e ekokoanga e ka tauturuia koe kia akono i te akoanga e: “E mou tikai i tei rauka ia koe na.”​—Apo. 3:11.

19. I te pae mai i te akamanako anga no runga i toou pirianga ki te Atua, eaa te mea puapinga te ka rauka i te akono tamou i toou pirianga meitaki ki te Atua?

¹⁹ I te akamanako anga e akapeea toou akarongo i te tupu mai anga i te aerenga o te tuatau ko tetai takainga ia te ka rauka i te tauturu ia koe kia mou tikai i tei rauka ia koe na. E akakite putuputu mai ana teia tianara i tetai au mea puapinga te ka tauturu mai ia tatou kia akono tamou i tetai pirianga meitaki ki te Atua. I roto i te reira ko te pure, te aere anga e te paupau anga i ko i te au uipaanga Kerititiano, e te piri maroiroi anga ki roto i te angaanga tutu anga. Ka rauka i teia au mea nei i te tauturu ia koe kia akaou, kia akaoraora, e kia akamaroiroi i to inangaro mua.​—Ephe. 5:10; 1 Pete. 3:15; Iuda 20, 21.

Akapeea Koe me Pau?

• Akapeea toou au manako no te inangaro anga ia Iehova i riro mai ei ei tumu tamou no te akamaroiroianga kia koe i teianei?

• Na te akamanako anga i te au mea i tupu ana kia koe uaorai i te au mataiti ra te akapapu maira kia koe i teaa?

• Eaa ra koe ka akara matatio ei i toou inangaro i te Atua?

[Tutu i te kapi 23]

Eaa ra te mea tei ariu mai e tei akapapu mai kia koe e ko te tuatua mou teia?

[Tutu i te kapi 25]

Te kite ra ainei koe i te au mea no runga ia koe uaorai te anoanoia ra kia akatikatikaia?