Au Uianga a te Aronga Tatau

Kua orongaia ki tetai o te Au Kite o Iehova te angaanga te o maira te au are akonoanga me kare tetai ngai. Eaa to te Tuatau Tapu manako no runga i te reira angaanga?

Penei ka aro atu teia maro anga i te au Kerititiano tei inangaro ngakau tae i te taangaanga i ta 1 Timoteo 5:8, tei tuatua maata no runga i te puapinga no te oronga anga i te pae kopapa no to tetai ngutuare. Koi tau ei e kia taangaanga te au Kerititiano i te reira ako anga, kare te reira e akatika ana i ta ratou ariki anga i etai e tetai ua atu au tu angaanga, noatu e eaa te tu. Te ariki ra te au Kerititiano i te anoano kia kite i tetai atu au akakite anga o te anoano o te Atua. Ei akaraanga, to tetai tangata anoano no te turu i tona ngutuare tangata kare e akatika i tana aatianga i ta te Pipiria e tuatua ra no runga i te akono tau kore me kare te ta tangata. (Akaaite ia Genese 39:4-9; Isaia 2:4; Ioane 17:14, 16.) E puapinga katoa e kia akono rotai te au Kerititiano i te akauenga e kia aere mai ki vao mei ia Babulonia Maata, te patireia o te akonoanga pikikaa i te ao.​—Apokalupo 18:4, 5.

Takapini i te koropu, kua aro atu te au tavini o te Atua i te au turanga angaanga e manganui. Ka puapinga kore e kare e teia matou te mana kia tauta i te akapapa i te au rauka anga e kia tata i te au ture no te reira. (2 Korinetia 1:24) Inara, e akatika mai e kia taiku atu matou i etai au tumu ka tau te au Kerititiano kia akamanako i te tuku anga i te au iki anga angaanga naau uaorai. Kua akanooia teia au manako ma te poto ua i roto i The Watchtower o Tiurai 15, 1982, i roto i tetai atikara no runga i te puapinga anga mei to tatou akava ngakau orongaia mai e te Atua. Kua taiku tetai pia e rua nga uianga puapinga e oti kua akapapa i tetai atu au tumu tauturu.

Ko teia te tumu uianga mua: Kua akaapaia ainei taua angaanga noa ua i roto i te Pipiria? Te tuatua anga no runga i teia, kua akakite Te Punanga Tiaki e te akaapa ra te Pipiria i te keiaanga, te akono kore i te toto, e te akamori anga itoro. Ka tau tetai Kerititiano kia kopae i te angaanga te akamaata tika ra i te au angaanga kare te Atua e mareka ana, mei tei taikuia i runga akenei.

Te rua o te uianga: I te rave anga i teia angaanga te akariro ra ainei i tetai e te turu ra i te angaanga akaapaia? Te taka meitaki ra, e ko tetai tangata tei tutakiia kia rave angaanga i roto i tetai ngai pere moni, i tetai kiriniki titiri anga pepe, me kare tetai kainga akaturi te turu ra i te au ravenga angaanga araiia e te irava. Noatu me e tama anga i te taua me kare te tuatua ra ki runga i te terepaoni tana angaanga i te au ra i reira, te turu ra aia i tetai ravenga tei akaapaia e te Tuatua a te Atua.

E manganui te au Kerititiano tei aro atu i te au iki anga angaanga kua kite e na te akara anga i te reira au uianga kua tauturu ia ratou kia iki no ratou uaorai.

Ei akatauanga, mei nga uianga e rua, ka kite tetai e eaa ra tetai tangata akamori mou kare e kia angaanga na te akaaerenga akonoanga pikikaa, te angaanga anga e i roto i te are pure. Te akaue maira a Apokalupo 18:4 e: “Ka aere ke mai ana kotou ki vao, e aku au tangata, kia kore kotou e riro ei rave katoa i tana ra au ara.” Ka piri atu tetai tangata ki roto i te au angaanga e te au ara a Babulonia Maata me e angaanga putuputu ana aia na tetai akonoanga te apii ra i te akamori anga pikikaa. Noatu me e tangata akono aua tiare, e tangata tama, e tangata ripea apinga, me kare e tangata tare moni, ka riro tana angaanga e kia akamaata i te akamori anga te patoi ra i te akonoanga mou. Pera katoa, me kite mai te tangata i teia tangata angaanga e angaanga ra i te akamanea anga i te are pure, te ripea ra, me kare te rave ra i te au anoano akonoanga ka manako e e ko tana akonoanga ia.

Inara, akapeea tetai tangata kare i te tangata angaanga tamou o tetai ekaretia me kare tetai akaaerenga akonoanga? Penei kua kapikiia aia e kia rave i te ripea i tetai paipa vai ngaa i raro ake i te are pure. Kare ainei e te tuke ra te reira mei tana oronga anga i tetai tuanga o te koreromotu, mei te arai anga me kare te tuku anga i te arai i roto i te tauu are pure?

Ka rauka akaou rai kia akamanakoia te au turanga tukeke. No reira ka akara ana tatou e rima tuanga kapiti mai tei akanooia e Te Punanga Tiaki:

1. E angaanga ua ainei te reira na te tangata e kare te reira e patoi ana i te Tuatua Tapu? E akara ana i te akaraanga o te tangata mere. Kare ko te aite anga o tana angaanga apai aere i te mere e te tuatua akamaata ra aia no runga i te ravenga akaapaia me ko tetai o te are i te ngai tana e akono ra e are pure ia me kare e kiriniki titiri pepe. Te oronga ra te Atua i te marama o te ra kia kaka na roto i te au maramarama o te au are katoatoa, kapiti mai te are pure me kare te kiriniki. (Angaanga 14:16, 17) Penei ka taopenga tetai Kerititiano e tangata mere e te rave ra aia i tetai angaanga na te tangata ki te katoatoa, mei tetai ra ki tetai ra. Ka aiteite rai te reira ki tetai Kerititiano tei ariu atu ki tetai tumatetenga​—kua kapikiia tetai tangata maani paipa vai kia akamutu i te vai puke i roto i te are pure me kare kua kapikiia tetai tangata rapakau te mamae kia akono i tetai tangata tei topa mai i te tuatau raveanga angaanga i te are pure. Penei ka manako aia i teia ei angaanga tauturu ua i te tangata.

2. Eaa te mamao i te mana akaaere o tetai tangata ki runga i tei raveia ra? Kare tetai ona toa Kerititiano e akatika kia ota e kia oko i te au itoro, te ei purepure, te au avaava, me kare te totiti tei maaniia mei te toto. Ei ona koia te akaaere. Penei ka raurau te tangata iaia kia oko i te au avaava me kare te au itoro e puapingai, inara ka rave tamou aia ma tana au irinaki anga Tuatua Tapu. I tetai tua, penei ka tukunaia tetai tangata angaanga Kerititiano ki tetai are toa maatamaata kia akono i te ngai tutaki anga moni, kia akakanapa i te au taua, me kare kia rekoti i te moni. Kare e nana e akaaere ana e eaa te au apinga ka otaia me kare ka okoia, noatu te patoiia ra e meangiti ua o teia, mei te au avaava me kare te au apinga no te orote akonoanga.a (Akaaite ia Luka 7:8; 17:7, 8.) Te tau ra teia ki te tumu ka aru mai.

3. Eaa te mamao o te tangata i o maira? E oki ana tatou ki te akaraanga o te are toa. Penei ko tetai tangata angaanga tei tutakiia kia akono i te ngai oronga anga moni me kare kia akaki i te paata ki te au avaava i tetai ua atu atianga me kare i tetai au apinga akonoanga; ko te reira tetai tuanga o te katoa anga o tana angaanga. Inara, mei teaa ra te tuke anga, ma tetai tangata angaanga i roto rai i taua are toa te angaanga ra i te ngai oronga anga avaava! I te katoa anga o tana angaanga, i te au ra, te akono ra i tetai apinga tei tuke ki te au irinaki anga Kerititiano. (2 Korinetia 7:1) Te akatutu ra teia kia akaraia e eaa ra te mamao i te o atu anga me kare te aravei anga i te iki anga i te au uianga ngai angaanga.

4. Eaa te tumu o te tutaki anga me kare te ngai te raveia ra te angaanga? E tamanako ana e rua nga atianga. E akameitaki ei i to te reira ngai akaraanga, kua iki tetai kiriniki titiri pepe i te tutaki i tetai tangata kia tama i te mataara o te ngai tangata. Te aere maira tana tutaki anga mei te kiriniki titiri pepe, inara kare aia e angaanga ana ki reira, e kare tetai tangata e kite ana iaia i roto i te kiriniki i te au ra katoa. Mari ra, ka kite ratou iaia e rave ra i tetai angaanga no te tangata kare te reira e patoi ana i te au Tuatua Tapu, noatu e koai te tutaki ra iaia. I teianei ei akatuke anga. I te enua kua akamanaia te akaturi anga, kua tutaki te are maki o te papuriki i tetai neti kia angaanga ki roto i te are akaturi, te akara anga i te pae kopapa i te anoano anga no te akameangiti te totoa anga o te au maki pirianga ainga tau kore. Noatu kua tutakiia aia e te are maki oraanga kopapa no te papuriki, i te katoa anga o tana angaanga tei te ngai akaturi anga, te akariro anga kia meitaki te angaanga akaturi, e kia ariki uaia. Te akatutu maira teia au akaraanga e eaa ra kia akamanakoia te tumu tutaki anga e te ngai angaanga anga.

5. Eaa te tupu anga no te rave anga i te angaanga; ka akakino ainei i to tetai akava ngakau me kare ka akaturori i to tetai atu? Ka tau kia akamanakoia te akava ngakau, i to tatou uaorai e to tetai atu. Noatu i te akara anga kua arikiia tetai angaanga (kapiti i tona ngai e te tumu tutaki anga) ki te maata anga o te au Kerititiano, penei ka kite tetai e ka tamanamanata te reira i tona uaorai akava ngakau. Kua akakite te apotetoro ko Paulo, tei akanoo i te akara anga meitaki, e: “Kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.” (Ebera 13:18) Ka tau tatou kia kopae i te angaanga te ka tamanamanata ia tatou; inara, ka tau katoa tatou auraka kia akaapa i tetai e tuke to ratou au akava ngakau. Me tuatua uaia, penei kare tetai Kerititiano e kite i te patoi anga ma te Pipiria i tana rave anga i tetai angaanga, inara kua kite aia e penei ka tamanamanata te reira i te manganui i roto i te putuputuanga e te ngai tangata. Kua akaata a Paulo i te tu tau i tana au tuatua: “Kare rava i tuku i te turorianga ki te tangata ravarai, kia kore e akakinoia te taoonga nei; Te akakite ua nei ra matou ia matou uaorai e e rave angaanga na te Atua i te au mea katoa nei.”​—2 Korinetia 6:3, 4.

Inara kia oki akaou tatou ki te uianga maata no te angaanga anga i runga i tetai are pure, mei te akanoo anga i te maramarama ou, te tamaanga i te moenga, me kare te ripea anga i te umu ai. Akapeea e o mai ei te au tumu i runga akenei ki roto?

E akamaara ana i te tuanga o te mana akaaere. Ko tetai Kerititiano ainei te ona me kare te manitia te ka rauka i te iki me ka rave i te angaanga i runga i te are pure? Ka inangaro ainei tetai Kerititiano e mana tona kia piri atu kia Babulonia Maata na te oronga anga i tetai angaanga me kare te koreromotu anga kia tauturu i etai akonoanga te akamaata ra i te akamori anga pikikaa? Kare ainei te reira e aiteite ana ki te iki anga kia oko i te au avaava me kare te au itoro i to tetai are toa?​—2 Korinetia 6:14-16.

Me e tangata tutakiia te Kerititiano ma te kore e tika anga kia iki no runga i te angaanga te arikiia ra, ka tau kia akamanakoia atu tetai tumu ke, mei te ngai e mei teaa te maata o te o atu anga. Kua pati uaia ainei te tangata tutaki kia oronga ua me kare kia tuku i te au noo anga ou i tetai atianga me kare kia oronga i tetai angaanga ki te tangata, mei te tangata tamate i te ai i roto i te are pure i mua ake ka totoai? E manganui ka kite i te tuke i teia mei tetai tangata tutakiia no tetai pitiniti i te akapouanga i tetai tuatau roa i te penianga i te are pure me kare te tanutanu putuputu ra kia akariro i te reira kia manea. Ka kapiti taua angaanga putuputu me kare te maata o te aravei anga kia manako te manganui i tetai Kerititiano ki taua akonoanga te tuatua ra aia kare no te reira, te akaturori anga ia ratou.​—Mataio 13:41; 18:6, 7.

Kua akara ana matou i tetai au akamanako anga puapinga no te ngai angaanga. Kua orongaia teia i roto i te papa anga tei tau ra ki te uianga te o maira te akonoanga pikikaa. Inara, ka rauka ratou kia akamanako aiteiteia ma tetai atu au tu angaanga. I te au tuanga tataki tai, ka tau kia raveia te akara anga na roto i te pure, te akamanako anga i te au tuanga​—e penei te tuke​—o te au atianga. Kua tauturu takere te au manako i runga akenei i te au Kerititiano ngakau tae e manganui kia tuku i te au ikianga tau i te akava ngakau te akaata ra i to ratou anoano kia aaere tika e kia tiratiratu ki mua ia Iehova.​—Maseli 3:5, 6; Isaia 2:3; Ebera 12:12-14.

[Tataanga Rikiriki i Raro]