Akaora Anga a te Akakite Anga Mai o Iesu Karaiti

“E rekareka ra . . . e kia akakiteia mai tona kakā, kia rekareka katoa kotou i te pereperekavana maata.”​—1 PETERO 4:13.

1. Akapeea ta Iehova akaapinga anga i tona au tavini?

KUA akaapinganui a Iehova i tona Au Kite ma te au apinga orongaia mai e manganui. Kua akamarama mai to tatou Puapii Mekameka ia tatou i te kite ki katoa i tona anoano e tana akakoroanga. Na roto i tona vaerua tapu, kua tatanu aia ki roto ia tatou i te kite kia akakaka mai i te marama ma te mataku kore. Kua akakite maira te apotetoro ko Paulo tei akauruia ra kia tatou ia 1 Korinetia 1:6, 7 (NW): “Kua akatinamouia te akakite anga ia te Karaiti i rotopu ia kotou na, kia kore kotou e topa poto ua i tetai ua atu apinga oronga uaia mai, ia kotou e tapapa matariki na i te akakite anga mai i to tatou Atu ia Iesu Karaiti.”

2. Eaa te manakonakoanga rekareka te mouia maira i te “akakite anga mai i to tatou Atu ia Iesu Karaiti ra”?

² “Te akakite anga mai i to tatou Atu ia Iesu Karaiti”​—eaa te aite anga o te reira? Te taiku ra ia i te tuatau e akakitea mai ei a Iesu ei Ariki kaka, i te akono anga i te tutaki i tana au pipi akono meitaki e te akautunga anga i te aronga akono kore i te atua ra. Te akakite maira 1 Petero 4:13 e, e tuatau te reira no te aronga Kerititiano akatainuia i te vaerua ma te tamou i te tiratiratu e pera katoa oki to ratou au oa no te urupu maata “kia rekareka katoa [ratou] i te pereperekavana maata,” no te mea te akakite maira te reira i te openga o ta Satani akatereanga i te au mea nei.

3. Akapeea tatou e tu ngaueue kore ei, mei to tatou au taeake i Tesalonia ra?

³ Kia akavaitata mai taua tuatau ra, ka akamaata roa mai a Satani i tona riri e tona taomianga ia tatou nei. Mei te riona ngunguru rai, ka tauta aia kia apuku atu ia tatou. Ka tau tatou kia akatinamou i to tatou turanga! (1 Petero 5:8-10) I te tuatau te ou ra to tatou au taeake i Tesalonia i taito ra i roto i te tuatua mou, kua mamae ratou i te au mate tei aiteite ra ki te au mea e tupu nei ki te Au Kite o Iehova i teia tuatau nei. E no reira, e mea tau katoa oki no tatou ta te apotetoro ko Paulo au tuatua kia ratou ra. Kua tata maira aia: “E mea tika i ta te Atua ra tuanga kia tutaki atu i te mate ki te aronga te akatupu maira i te mate no kotou, inara, ko kotou tei mamae ra i te mate, e akaora anga ma matou katoa nei a te akakite anga mai te Atu ko Iesu mei te rangi maira ma tana au angera mana katoa i roto i te ai mura ra, kia apai mai aia i te akautunga ki runga i te aronga kare i kite i te Atua e tei kore i akarongo i te tuatua meitaki no to tatou Atu ko Iesu ra.” (2 Tesalonia 1:6-8, NW) Ae, ka tae maira te akaora anga!

4. Eaa i tau ei te akavaanga te ka akonoia no te au orometua i te akakite anga mai ia Iesu ra?

⁴ I to Paulo tuatau ra ko te maata anga o te mate na te au arataki akonoanga ngati Iuda i akatupu mai. Mei te reira katoa oki i teia tuatau, te patoi anga i te Au Kite o Iehova te inangaro ra i te au, e putuputu te akamataia mai e te aronga te karanga ra e te komono ra ratou i te Atua, e maata atu oki ta te aronga orometua no Kerititome. Te akameamea ua ra ratou e te kite ra ratou i te Atua, inara te kopae ke ra ratou i te tuatua o te Puka Tapu e “okotai oki Iehova,” e kua komono atu iaia ma tetai Toru Tai mea ngaro ra. (Mareko 12:29) Kare ratou i akarongo i te tuatua meitaki no to tatou Atu no Iesu ra, i te akaraanga na te tutara a te tangata te akaora anga e te kopae ke anga i te tuatua meitaki o te Patireia tuatua tika o Karaiti te aere maira. Pouroa teia aronga patoi o te au akonoanga atua ra ka akapouia ratou i te tuatau o “te akakite anga mai te Atu ko Iesu mei te rangi maira”!

Te “Aerenga Mai” o Iesu Karaiti

5. Akapeea te akatutu anga taka meitaki mai i to Iesu akakite anga mai ia Mataio 24:29, 30?

⁵ Kua akaari taka meitakiia mai e Iesu taua akakite anga ra ia Mataio 24:29, 30. I te akataka anga i nga tu tuke tuke o te akairo o tona tuatau parutia e te openga o te akatere anga o te au mea nei, kua na ko maira aia: “E akapoiriia te rā, e kare te marama e kakā mai, e topa mai oki te au etu o te rangi, e te au mea mana o te rangi ra e ruruia ïa.” Ei reira “e kiteaʼi te akairo o te Tamaiti a te tangata ki runga i te rangi.” Ei reira te au kopu tangata o te ao nei “e aue ei, kia kite ratou i te Tamaiti a te tangata [te Ariki Mesia] i te aere anga mai na roto i te tiao rangi, ma te mana, e te kakā maata.” Ko teia “aerenga mai,” er·khoʹme·non i te reo Ereni, te taiku ra i to Iesu mama anga mai ei Akatika ia Iehova.

6, 7. Akapeea i reira e “e akara te au mata katoa iaia,” e koia ma te ka kapitiia atu i te reira?

⁶ Te akataka katoaia ra tei “aerenga mai” e te apotetoro ko Ioane ia Apokalupo 1:7, te ngai tana i tuatua ra: “I na, te aere mai na aia i roto i te tiao rangi.” A, kare taua au enemi ra e kite ia Iesu ma to ratou mata tikai, no te mea te akataka maira “te tiao rangi” e ka aere mai aia ma te akara koreia i te rave i te akautunga. Me ka akara te au tangata ua nei i tona kaka i te rangi ra ma to ratou mata ua nei, ka matapoia ratou, mei ia Saula rai, i te mataara ki Damaseko, kua matapoia i te mama atu anga a Iesu kaka ra kiaia i tetai marama anga veka ra.​—Angaanga 9:3-8; 22:6-11.

⁷ Te akakite maira te tataanga ia Apokalupo e “e akara te au mata katoa iaia, e te aronga i ko atu iaia ra: e ka aue te au kopu ravarai o te ao nei iaia.” Ko te aite anga o teia e ko te aronga patoi i runga i te enua nei ka kite i te akapouanga e na Iesu e tuku io ki runga ia ratou e kua aere mai aia ma te mana e te kaka maata ei Rima Rave i ta Iehova ra Akautunga anga. Eaa ra teia au enemi i akatakaiaʼi ei “aronga i ko atu iaia ra”? No te mea ko to ratou tu akono o te riri i te au tavini o Iehova i teia tuatau nei te aite ra ki to te aronga takinga kino ia Iesu. Ka papa tikai ratou, ia ‘ratou uaorai e ka aue maata nona ra.’

8. Eaa te akamatakite anga ta Paulo raua ko Iesu i akakite mai no te akapouanga viviki ra?

⁸ Akapeea ka tae mai ei taua ra o ta Iehova akautunga ra? I te totou ia Luka pene 21, kua akataka maira Iesu i te au tupuanga kikino tei akakiteia maira ei akairo no tona tuatau parutia ra mei te 1914 mairai. I roto i nga irava 34 e te 35 i reira, kua akamatakite maira Iesu: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao, ka rokoia mai ei kotou e taua rā ra, kare i manakoia atu. E rokoia mai oki tei noo i te ao katoa nei i te reira, mei te ereere ra.” Ae, ka rokoia viviki mai taua ra o ta Iehova akautunga ra! Te akapapu maira te apotetoro ko Paulo i te reira ia 1 Tesalonia 5:2, 3, i te na ko anga: “Te aere maira taua rā o te Atua ra mei te keia i te po ra. E tuatua oki te tangata e, e au, e kare e kino; ei reira ratou e rokoia uaia mai ei e te mate viviki.” Noatu rai i teianei te tuatua ra to te pa enua no te au e te tinamou e te akakoro ra kia akamaroiroi i te Taokotai Anga Enua ei akava i te au ngai taitaia na te mana vaeau.

9. Kua ‘akakakaia maira te marama’ noai ma, e no teaa ra?

⁹ I 1 Tesalonia 5 nga irava 4 e te 5, kua tuatua ua maira te apotetoro kia tatou e: “Kareka kotou, e te au taeake, kare ïa i roto i te poiri, ka rokoia mai ei kotou e taua rā ra mei te keia. E tamariki anake kotou no te mārama, e tamariki no te ao; kare tatou i to te po, e to te poiri.” Te rekareka nei tatou ei tamariki no te marama​—ei akamarama atu ia etai ke ra te inangaro ra i te au tikai, e te tinamou i roto i ta te Atua ra ao ou. Ia Salamo 97:10, 11 (NW) ka tatau tatou: “Ko kotou te aronga inangaro ia Iehova, e rikarika atu i te kino. Te tiaki ra aia i te au meta o tona aronga akono mou; te akaora ra aia ia ratou i te rima o te aronga rave kino ra. Kua akakakaia maira te marama uaorai no te tangata tuatua tika, e te rekareka anga no te aronga e tu tika ra to ratou ngakau.”

Te Akapapa Anga no te Au Tupu Anga

10. Eaa te akamatakite anga te ka tau tatou kia akono no te ra akataka anga a te Atua ra? (Apokalupo 16:15)

¹⁰ Eaa ra te akapapa anga no te au tupu anga me ka rokoia mai te mate maata ra? E eeu tatou ia Apokalupo pene 16. E akara, i tei akatakaia i nga irava 13 ki te 16, ka akaputu te au vaerua temoni, viivii ra, i to te pa enua o te ao katoa nei ki Aramakito, koia te tamaki o taua ra maata o te Atua mana katoatoa ra. Te akaketaketa akaouia maira te tu aite ki te keia te rokoia mai anga taua ra akavaanga ra, e te akamatakiteia maira tatou kia ara​—kia kakau i te kakau vaerua te ka akairo ia tatou no te ora. Kua tae mai te tuatau no te akavaanga i te au tangata o te enua nei, to te pa enua, e—​tetai ke atura. Koai te reira?

11. Akapeea ta te vaine o Apokalupo 17:5 ra akataka anga iaia uaorai?

¹¹ E vaine akatutuia aia tei tamata ra kia akameamea iaia ‘ei vaine puapinga maata.’ Kua akatakaia mai aia ia Apokalupo 17:5 ei “mea ngaro: ‘ko Babulonia Maata, ko te metua vaine o te aronga akaturi, e no te au mea viivii o te ao nei.’” Inara kare aia i te mea ngaro akaou ki te Au Kite o Iehova. Kua kitea meitaki tana akataka anga iaia uaorai e ko te patireia o te akonoanga pikikaa o teianei ao, ko te au akonoanga Kerititome te tuanga tutara ia. E mea rikarika i mua i nga mata o Iehova tona o atu anga ki roto i te au angaanga poritiki, tona riro anga “i te kona anga i te toto o te aronga tapu ra” no te takinga kinoanga i te au Kerititiano mou ra, e te riro anga nana te apainga i te toto akamaringiia “e to te aronga katoatoa i taia i teianei ao,” kapiti katoa te aronga tere atu i te tai anere mirioni tei taia i te au tamaki o teianei 20 anere mataiti ua nei.​—Apokalupo 17:2, 6; 18:24.

12. Eaa ra i vai akaapaiaʼi te au akonoanga o Kerititome ra?

¹² Ko te mea kino roa, kua apai mai te au akonoanga o Kerititome i te akakinoanga ki runga i te ingoa o te Atua ta ratou e karanga pikikaa ra e te komono ra ratou iaia. Kua apii ratou i te apiianga Babulonia e te Ereni kare ra i te Tuatua ma a te Atua ra e kua tauturu katoa oki i te ravenga tau kore a to te pa enua ravarai na te akatika anga i te tu oraanga akatika ua ra i te akakore i te au kaveinga o te Puka Tapu. Te au ravenga noinoi te tu ra ratou i rotopu ma te akaapaia e te au tuatua a Iakobo 5:1, 5 (NW): “E aere mai i teianei, kotou te aronga tangata apinganui, e aue, ma te aue maata i to kotou au mamae te aere maira ki rungao ia koe. Kua noo kotou i te oraanga navenave i runga i te enua nei e kua rave i te akamareka anga e te akakeu i te inangaro akaturi. Kua akamatu kotou i to kotou ngakau i te ra o te tainga ra.”

Turakina Ki Raro a Babulonia Maata!

13. Akapeea te aerenga mai o te akairo akatueraanga i te mate maata ra, e eaa te mea rapurapu no te raveia te akaketaketaia maira ia Apokalupo 18:4, 5?

¹³ Ka akamata mai te mate maata ma te rave anga i ta Iehova ra akautunga ki runga ia Babulonia Maata. Te akataka tika maira Apokalupo 17:15-18 i to te Atua “manako”​—kia teateamamao i “nga tara okotai ngauru,” au nuku mana ririnui no roto mai i te TE o te pa enua katoa ra koia te “puaka taae,” kia takore atu i taua vaine ra. “E nga tara okotai ngauru taau i akara ra, e te puaka taae ra, e akaviivii ïa i taua vaine akaturi ra, e e pou oki aia ia ratou i te āru, e e noo apinga kore ua aia, e e kai i tona kopapa, e e tutungi iaia ki te ai. Kua tuku oki te Atua i te manako ki roto i to ratou ngakau kia rave ratou i tona anoano.” No reira rai tetai reo maata no te rangi maira i tetai akamatakiteanga rapurapu ia Apokalupo 18:4, 5: “Ka aere ke mai ana kotou ki vao, e aku au tangata, kia kore kotou e riro ei rave katoa i tana ra au ara, kia kore kotou e mate katoa i tona ra au mate. Kua taea oki te rangi i tana au ara, e kua manako te Atua i tana au tuatua-tika kore.” Te tupu ua atu nei teia kapiki anga: E tipu ke atu i te au pirianga pouroa ma te au akonoanga pikikaa i mua ake i te tu reiti anga!

14. Koai ma te ka aue i te akatanea angaia a Babulonia Maata, e no teaa ra?

¹⁴ Akapeea ra te manako o teianei ao no te akataneaanga o Babulonia Maata? Mei te ngai mamao ke ra kua aue atura te aronga rave poritiki viivii ra​—“te au ariki o te ao nei” nona no te mea e au anere ua atu mataiti ratou i te kiteanga i te pirianga mareka i ta ratou akaturi anga i te pae vaerua. Pera katoa e aue e e tangi te au tangata noinoi o te “aronga oko . . . ko tei rauka ta ratou apinga iaia ra.” Ko teia aronga katoa kua akaatea ke atu kia mamao ke ratou uaorai mei iaia ra, e te na ko anga e: “Aue! aue te oire maata nei e, ko tei kakau i te kakau meitaki, e te purapura, e te kutekute, ko tei akamaneaia oki i te auro, e te toko memeitaki, e te poe e! Ko teianei apinga maata oki i te pou anga i te ora okotai nei e!” Pouroa te au kakau manea o te pure e te au apinga mekameka o te au are pure mamaata o teianei ao ka ngaro ke ratou e tuatau ua atu! (Apokalupo 18:9-17) Inara ka aue ainei te au tangata ravarai no Babulonia Maata?

15, 16. Eaa te tumu no te rekarekaanga te ka rauka i te au tangata o te Atua ra?

¹⁵ Te pau maira a Apokalupo 18:20, 21 e: “Kia rekareka i runga iaia, e to te rangi e, e ko kotou oki, e te aronga tapu, e te au aposetolo, e te au peroveta, kua tutaki te Atua iaia ia kotou!” Mei te toka tavirianga maata ra kua titiriia ki raro i te tai, “mei te reira katoa te oire maata ra ko Babulonia [i te] uri takiri angaia ki raro, e e kore rava e kitea akaouia atu.”

¹⁶ Mei teaa ra te tumu no te rekareka anga! Te akakite maira Apokalupo 19:1-8 i te reira. E a taime o te kapiki anga mei te rangi maira, “Aleluia” Ko nga kapiki mua e toru i te Areruia e akapaapaa ia Iehova ra no te mea kua rave aia i te akavaanga tuatua tika ki runga i taua vaine akaturi kare ra e tau kia akaperepereia, koia a Babulonia Maata. Kua kore atu taua patireia akonoanga pikikaa o te ao nei! Kua aere maira tetai reo no te terono o te Atua ra, i te na ko anga: “E akameitaki i to tatou Atua, ko kotou katoa tona au tavini, e ko kotou oki ko tei mataku iaia ra, ko te tangata rikiriki e te aronga mamaata.” Mei teaa ra te meitaki no tatou kia o atu ki taua imene ra!

Te Akaipoipo Anga o te Punua Mamoe

17. I te akaaiteite anga ia Apokalupo 11:7 e te 19:6 na teea nga tu e rua to Iehova ra akamata anga i te tutara ei Ariki?

¹⁷ Te akamata maira te a o te Areruia i tetai atu tumu tuatua: “Tei te Atu ra, tei te Atua mana katoatoa ra te au.” Inara kare ainei tetai tuatua anga mei te reira ra i taikuia ia Apokalupo 11:17 ra? Ka tatau tatou i reira e: “E akameitaki matou ia koe, e te Atu, e te Atua mana maata, . . . no te mea kua rave koe i toou mana maata e kua riro ia koe te au.” Ae. Inara, ko te au tuatua takapini ia Apokalupo 11:17 te taiku ra i to Iehova apai mai anga i te Patireia Mesia i te 1914 “kia akono ei tiaki i to te pa enua katoa ma tetai tepeta auri ra.” (Apokalupo 12:5, NW) Ko Apokalupo 19:6 tei roto ia i te tuatua anga no te akapou anga ia Babulonia Maata. Ma te takore atu anga i te akonoanga mei te vaine akaturi rai te tu, ka riro to Iehova ra Atua anga kia tu ma te akatikaia. Ka vairai te akamori anga iaia ei te Ngateitei Rava e ei Ariki i teianei atu e mutu kore ua atu ia!

18. Ka akatuera mai te takore anga ia Babulonia Maata i teea akakitekite anga rekareka tikai?

¹⁸ E no reira, ko te akakitekite anga rekareka ka tau kia raveia: “Kia rekareka tatou, e kia pereperekavana e e akameitaki oki ia [Ia]; kua tae oki ki te akaipoipo anga a te Punua-mamoe, e kua akamanea tana vaine iaia uaorai. E kua tukuia iaia te kakau i te kakau meitaki, e mea viivii kore, e te teatea e taua kakau meitaki ra, ko te tuatua-tika ïa a te aronga tapu ra.” (Apokalupo 19:7, 8) Aea tikai e raukai i te aronga akatainuia te toe nei i te enua nei to ratou tuakaouanga i te rangi kare ia i akakitea mai ana. Inara te akapapauia maira kia tatou i roto i te tataanga nei e ko to ratou kapiti anga i te akaipoipo anga o te Punua mamoe, koia Iesu Karaiti, ka riro ia ei tuatau mataora, e ka maata rava oki no te mea ka kite tikai ratou i te taakaaka angaia taua vaine akaturi akaperepere koreia ra, koia a Babulonia Maata.

Akapouanga i te Ao o Satani

19. Eaa tetai atu tupu anga te akatakaia maira ia Apokalupo 19:11-21?

¹⁹ Kua mama akaou maira te oroenua teatea tei taiku muaia maira ia Apokalupo 6:2. Ka tatau tatou ia Apokalupo 19:11: “Ko tei noo ki rungao [i te oroenua teatea] ra, kua karangaia aia, i te Pikikaa kore, e te Tuatua-mou, e akava aia, e e tamaki i te tamaki, ma te tuatua-tika.” E no reira ka akaoro atu te “Ariki o te au Ariki e te Atu o te au Atu” kia ta i to te pa enua e kia takatakai i “te taomianga vine ra, ko te wina o te riri otooto o te Atua mana katoatoa ra.” E puapinga kore ua to “te au ariki o te ao nei, e to ratou au nuku tamaki” akaputu anga kia rave i te tamakianga ia Aramakito ra. Ka oti ra i Tei Akaoro i te oroenua teatea ra tana akavi anga. Kare e apinga toe no ta Satani akaaerenga i te enua nei.​—Apokalupo 19:12-21.

20. Eaa te ka tupu ki te Tiaporo uaorai ra?

²⁰ Inara akapeea te Tiaporo uaorai? Ia Apokalupo 20:1-6; te akatakaia maira a Iesu Karaiti ei “tetai angela i te eke anga mai mei te rangi mai, e tei iaia te taviri o te vaarua takere kore ra, e pirianganaoa maata tei tona rima.” Kua opu iora aia i te taae, i taua Ovi taito ra, koia oki te Tiaporo ra ko Satani, kua tapeka iaia, e kua uri atura iaia ki raro i te vaarua, e popani atura iaia i reira, tuku iora i te akairo i rungao iaia. I te mea kua akaateaia atu a Satani e kare e rauka iaia i te akavare akaou i to te pa enua nei, ka akamata te Tutara kaka no te Tauatini Mataiti o te Punua Mamoe e tana vaine akaipoipo ou. Kare e roimata akaou no te mii! Kare e mate akaou na Adamu mai! Kare e aue e kare te mamae! “Kua kore te au mea taito.”​—Apokalupo 21:4.

21. Ia tatou e tapapa marie nei i te akakite anga mai o Iesu Karaiti ra, eaa te manako papu te ka tau no tatou nei?

²¹ Ia tatou e tapapa marie nei i te akakite anga mai to tatou Atu a Iesu Karaiti, e akaari tatou i te tu totomapu i te akakitekite anga kia etai atu i te au taputou aroa no te Patireia o te Atua ra. Te akaora anga te vaitata nei! Kia aaere atu tatou ki mua, aere tamou atu ki mua, ei au tamariki kua akamaramaia na te Atu Ngateitei ra na Iehova!

I te Akara Akaou Anga

◻ Eaa te akakite maira e te vaitata ra te akakite anga mai o Iesu Karaiti?

◻ Akapeea te taenga mai te ra o ta Iehova ra akautunga?

◻ Eaa te manako tau no te “aronga inangaro ia Iehova” no te turanga o te ao nei i teianei?

◻ Eaa te akapapa anga o te au mea ka tupu me ka rokoia mai te mate maata ra?

[Tutu i te kapi 23]

Ka ‘aere mai a Iesu ma te au tiao rangi’ ma te akara koreia i te rave i te akavaanga

[Tutu i te kapi 25]

Kare e roa atu ka takoreia atu te akonoanga pikikaa, ta Satani akatereanga kino, e pera katoa a Satani uaorai oki