“I na, te Akariro Nei Au i te au Mea Ravarai ei Mea Ou”

Te inangaro ra ainei koe tetai oraanga kopapa meitaki e te oraanga roa noou e toou pamiri? Te inangaro ra ainei koe i te noo i roto i tetai ao kare e mamae, kare e taitaia e te mate? Kare tera tu ao i te mea moemoea ua. Kare e roa atu ka kite tatou i tetai ao ou e te tuatua tika no te mea ko tera to Iehova akakoroanga. Akara ana ra e akapeea te akatupuanga o tona akakoroanga i te akatakaia mai anga i roto ia Apokalupo 21:3-5.​—E tatau.

“E nana [na te Atua] e orei i te roi-mata katoatoa.” (Apokalupo 21:4) Mei teaa te tu o te roimata tana ka orei? Kare i te roimata rekareka e kare katoa i te roimata e paruru ra i to tatou mata. Te tuatua ra te totou a te Atua i te roimata ta te taitaia e te mii e akatupu ra. Kare te Atua e tamaro ua i taua roimata ra; ka akakore takiri aia i te reira na te takore anga i te tumu o te aue koia oki, te taitaia e te mii.

“E kore rava te mate.” (Apokalupo 21:4) Ko te mate te enemi tumu e akatupu nei i te aue. Ka tatara mai a Iehova i te aronga akarongo mei te tapeka o te mate. Akapeea ra? Na te takore anga i te tumu tikai o te mate: koia te ara, tei iri mai ki runga i te tangata mei ia Adamu. (Roma 5:12) Ka akaoki akaou a Iehova i te aronga akarongo ki te turanga apa kore na roto i te atinga oko a Iesu.a I reira taua enemi openga ra ko te mate, “e akakoreia” ai. (1 Korinetia 15:26) Ka rauka i te au tangata akarongo kia noo i te oraanga mei ta te Atua i akakoro—te oraanga meitaki e tuatau ua atu.

“E kore katoa . . . te mamae.” (Apokalupo 21:4) Eaa te tu o te mamae te ka kore? Ka kore te manako taitaia, te mamae ngakau, e te mamae i te pae kopapa, no te ara e te tu apa ua tei akataitaia i te oraanga o te mirioni ua atu.

Kare e roa atu ka riro te oraanga kare e aue, kare e mate, kare e mamae ei mea tika tikai. Penei ka ui koe e, ‘kiea ra oki?’ ‘Te taputou maira ainei te Atua i tetai oraanga i te rangi?’ Kare. Akamanako ana e no teaa ra. Mea mua, kua akakiteia mai taua taputou ra na roto i teia au tuatua ‘tei ko te tangata ra i te puakapa o te Atua,’ i na te noo nei oki te tangata i runga nei i te enua. (Apokalupo 21:3) Te rua, te akataka maira taua taputou ra i tetai ao ka “kore rava te mate,” koia oki e ao tei vai ana te mate inara ka kore te reira. Kare rava te mate i tupu ana i te rangi, inara kua roa te vai ua anga te reira i te enua nei. Te taka ua ra e, ka akatupuia ta te Atua taputou no tetai oraanga meitaki atu i runga nei tikai i te enua.

Inangaro a Iehova kia irinaki tatou i tana taputou no tetai ao ou e te tuatua tika. I muri tika ake te akataka mai anga i te au akameitakianga a te tuatau ki mua, kua akapapu mai aia i tana i taputou i te na ko anga e: “I na, te akariro nei au i te au mea ravarai ei mea ou.” Kua karanga katoa mai aia e: “E tuatua-mou oki teianei au tuatua e te pikikaa kore.” (Apokalupo 21:5) Kore ei koe e apii maata atu kia kite e akapeea koe e toou au akaperepere, e o atu ei ki te aronga akamori te ka kite i te akatupuangaia te totou a te Atua?