Kare te Atua i Marie no Tana Taputou

“MEI te aa te roa, e Iehova, o toku kapiki anga, e kare koe akarongo mai!” Ko te au tuatua teia a te peroveta Epera ko Habakuka, tei ora ana i te itu anere mataiti M.T.N. Inara e aiteite ainei te tika o taua tuatua, kare ainei? E tu natura tangata ua kia rauka te au apinga ta tatou i inangaro kia tupu mai me kare ra kia viviki mai. Te tika ra teia i roto i ta tatou inangaro anga i te meitaki i teia taime.​—Habakuka 1:2.

I te anere mataiti mua, te vaira tetai aronga tei manako e kua tau te Atua kia akatupu viviki i tana au taputou. Kua rapurapu tikai ratou e kua manako e kua marie me kare kua tureti te Atua. No teia ra, kua akamaara atu te apotetoro ko Petero ia ratou e e tuke rai to te Atua manako i te tuatau mei to tatou. Kua tata a Petero: “Auraka na ra e ngaro ia kotou i teianei potonga tuatua, e aku au akaperepere, okotai rai tu i te Atu te rā tai e te mataiti okotai tausani; e te mataiti okotai tausani ra, okotai rai tu e te rā okotai nei.”​—2 Petero 3:8.

Kia tau ki teia mataara no te akataka anga i te tuatau, kua ora ua tetai tangata e 80 mataiti e rua ora, e kua pou te katoa anga o te tuatua enua o te tangata e ono ua ra. Me akara tatou i te au mea mei teia akaraanga, ka ngoie uaia no tatou kia marama i ta te Atua tu akonoanga ia tatou.

Inara, kare te Atua e manako kore ana i te tuatau. Mari ra, e manako ana aia i te tuatau. (Angaanga 1:7) No reira, a Petero i tuatuai: “Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.” (2 Petero 3:9) Kare mei te au tangata ra, kare te Atua e maroia ana kia rave i te au apinga mei te mea e te pou atura tona taime. Ei ‘Ariki mutu kore,’ e akara anga meitaki tana e ka rauka i te akataka e aea i roto i te aerenga o te tuatau ka akono ei i tana au raveanga i te meitaki maata no te katoatoa te o maira.​—1 Timoteo 1:17.

I muri ake i te akamarama anga i te tumu i marie ei te Atua, kua tuatua a Petero i teia akamatakite anga: “E tae maira te rā o te Atu mei te keia i te po ra.” Koia oki, ka tae mai te ra akavaanga i te tuatau kare te tangata i tapapa i te reira. I reira, i te irava ka aru mai, kua tou atu a Petero ki te manakonakoanga umere rava no te aronga te akaari ra i te “tu e tikai i te tuatua tapu e te akono i te Atua,” koia oki, kia ora atu ratou ki roto i ta te Atua taputou no te “rangi ou e te enua ou.”​—2 Petero 3:10-13.

Ka tau teia kia akariro ia tatou kia ariki maata e kare i tae mai ta te Atua akavaanga. Kua akariro tona tu akakoromaki e kia rauka ia tatou kia kite i tana akakoroanga e kia akatikatika i to tatou au oraanga e raukai tana au akameitakianga taputouia. Kare ainei e tau kia manako atu tatou i “te akakoromaki maata o to tatou Atu ra, ko te ora ïa,” i maro mai ei a Petero? (2 Petero 3:15) Inara, te vaira tetai atu tumu i akakoromaki ei te Atua.

Kia Akatupuia Tetai Tu Tarevake

I te apiianga i ta te Atua akonoanga i te tangata i topa, ka kite tatou e maata te taime kua tapu aia i tana akavaanga e tae roa e kua ngaro ke te manako no te akameitaki anga. Ei akatauanga, i ta te Atua akavaanga i to Kanaana, kua akakite aia i to ratou au tu ara kia Aberahama i te tuatau i mua atu ana. Inara kare i tae te tuatau no te rave i tana akavaanga. No teaa ra? Te karanga nei te Pipiria e: “Kare rai oki i rava roa te ara a te ngati Amori [a to Kanaana] ra,” me kare mei ta te urianga Knox i tata ra: “Kare i tae roa ki tona ki anga te tu kino o te ngati Amori.”​—Genese 15:16.a

Inara, vaitata e 400 mataiti i muri mai, kua tae mai ta te Atua akavaanga, e kua peke atu i ta Aberahama uanga, ia Iseraela, te enua. E meangiti ua o te au Kanaana mei ia Rahaba e te au Gibiona tei akaoraia mai no to ratou tu e te au raveanga, inara i te maata anga, kua taeria e ratou te teitei pakari o te tu viivii, mei tei akakiteia mai e te au apinga a te aronga ko enua o teia tuatau. Kua rave ratou i te akamori anga mero tane, te akaturi i roto i te iero, e te akaatinga tamariki. Kua akakite ta Halley’s Bible Handbook e: “Kua umere te aronga ko enua i te au ngai toenga teita o te au oire o Kanaana e eaa ra te Atua i kore ei i akapou viviki ia ratou i mua ake i tana i rave.” I te openga ra, kua ‘rava roa te ara’ a to Kanaana; kua “tae roa ki tona ki anga” to ratou tu kino tikai. Kare e rauka i tetai i te akaapa e kua tika kore te Atua i te akatika anga aia e kia tamaia te enua koi akaora ei i te aronga tei akaari i te tu meitaki.

Ka kite katoa tatou i tetai tutu aiteite i to Noa tuatau. Noatu e kua kino tikai te tangata i mua ake i te Vaipuke, kua iki aroa ua te Atua e kia tere ua atu to ratou tuatau no etai 120 mataiti. I tetai tuanga o te reira tuatau, kua angaanga a Noa ei “tangata i ako i te tuatua-tika ra.” (2 Petero 2:5) I te tuatau e aere ra, kua para to ratou tu rave kino. “E kua akara iora te Atua i te enua nei, e i na, kua kino roa; kua kino roa te aerenga o te tangata ravarai i te enua nei.” (Genese 6:3, 12) Kua “rava roa te ara [a ratou]”; kua apai mai te roa anga o te tuatau i to ratou inangaro i te kino ki tona take. I te rave anga te Atua kua tika tikai aia. E varu ua tangata i vai tuatua tika i to te Atua mata, e kua akaora aia ia ratou.

Kua kitea katoaia taua tutu i roto i ta te Atua akonoanga i to Iseraela. Noatu e kua tiratiratu kore e kua rave ratou i te kino na roto i tetai ua atu tu, kua akakoromaki te Atua ia ratou e anere ua atu mataiti. Te na ko ra te tata anga: “Kua tono maira . . . Iehova . . . te au karere nona . . . kare i tukumoe i te tono anga; no te mea te aroa ra aia i tona iti tangata . . . Kua taitoito ra ratou . . . e kua akavaavaa i tana tuatua, e kua takinga-kino i te au peroveta nana, e tupu rava akera te riri o Iehova i tona tangata, e kare rava akera e ravenga e oraʼi.” (2 Paraleipomeno 36:15, 16) Kua tae te tangata ki tetai take e kare e rauka te akameitaki anga mai. Ko Ieremia ua e tetai atu tei ora mai. Kare e tau kia kapikiia te Atua e kua tika kore i te apai mai anga aia i te akavaanga ki runga i te toenga.

Tei Konei te Tuatau ka Rave ei te Atua

Mei teia au akaraanga te kite nei tatou e te tapu ra te Atua i te akavaanga ki runga i teia akatereanga o te au mea tae rava e kia para te tuatau. Kua akakiteia teia na roto i te akauenga tei orongaia ki te tamate akatutu a te Atua: “Ka vero ana i te matipi sitona kokoi naau na, ka kokoti i te au kaui vine o te ao nei; kua para rava oki te vine. Kua vero maira te angela i tana matipi sitona ki roto i to te enua nei, kokoti iora i te vine o te ao nei, e kua uri atura ki roto i te taomianga maata vine ra, ko te riri o te Atua ra.” E kite kua “para rava” to te tangata tu kino, koia oki, kua tae ki tona take e kare e rauka kia akameitakiia mai. Me akono te Atua i te akavaanga, kare e ekoko anga e kua tika tikai tana akaao anga mai.​—Apokalupo 14:18, 19.

Na te akamanako anga i to runga akenei, te taka meitaki maira e te vaitata mai nei ta te Atua akavaanga i teia ao no te mea kua akono te ao i te tu tei tau ra ki ta te Atua akavaanga mei ito roa mai. I te au ngai ravarai me akara tatou, kua ki te enua i te ta ua, mei te tuatau rai i mua ake i te Vaipuke o Noa ra. Te riro maira te au tu o te tangata mei tei akatakaia ia Genese 6:5: “E kua kino anake te au manako [o te tangata] katoa, e te akakoroanga katoa o to ratou ngakau i te au rā katoa ra.” E pera i te au ara kino tikai tei apai mai i ta te Atua akavaanga i to Kanaana e mea matauia i teia tuatau.

Mei te Tamaki I i te Ao tikai, kua kite te tangata ravarai i te au taui anga viivii tikai. Kua kite ana te reira i te enua i te akakino angaia ma te toto o te au mirioni. Kua pupu mai te tamaki, te ta tangata, te tamataku anga, te ta ua, e te aati i te ture i te ao katoa. Kua tupu aere te onge, te maki, e te akaturi i roto i to tatou koropu. Te akakite maira te au kite anga pouroa e te noo nei tatou i roto i te uki kino ta Iesu e tuatua ra: “Kare e ope teianei uki, e ope ei teianei au tuatua ravarai i te tupu.” (Mataio 24:34) Te akaki nei to te ao e kia ‘rava roa te ara.’ Te para maira “te au kaui vine o te ao nei” no te kokoti anga.

Kua Tae te Tuatau Noou kia Rave Angaanga

Kua akakiteia ki te apotetoro ko Ioane kia tuatua e i te tuatau akava e vaitata maira, ka tupu e rua tu para anga. I tetai tua, “te tangata tuatua-tika kore ra, e vaio atu kia vai tika kore ua na: e te viivii ra, e vaio atu kia vai viivii ua na.” Inara i tetai tua, “e te tangata tuatua-tika ra, e vaio atu kia vai tuatua-tika ua na: e tei tapu ra, e vaio atu kia vai tapu ua na.” (Apokalupo 22:10, 11) Te tupu nei te mea openga i roto i te angaanga apii Pipiria i te ao katoa tei raveia e te Au Kite o Iehova. Ko te akakoroanga o taua angaanga koia oki kia apii i te tangata e eaa ta te Atua e umuumu maira ia ratou e raukai kia tareia ratou e kua tau kia rauka te oraanga mutu kore. Te tae nei teia angaanga ki roto i te au enua e 233 e na roto i etai 87,000 au putuputuanga.

Kare te Atua i marie. Ma te akakoromaki kua akatika aia i te au tangata tataki tai te tuatau anoanoia kia “akatangata ou oki” e tau ei no tana au taputou. (Ephesia 4:24) I teia tuatau, te tiaki nei rai te Atua, noatu te putuputu o te au turanga kino i te ao. Te rave nei te Au Kite o Iehova takapini i te ao i tei rauka ia ratou kia oronga ki to ratou au tangata tupu i te kite te ka arataki ki te ora mutu kore. (Ioane 17:3, 17) Ma te mataora, i te mataiti tataki tai e tere atu i te 300,000 tangata te ariu maira e kua papetitoia.

Ma te ora mutu kore i mua, ko teia te tuatau, kare e kia tiaki, mari ra kia rave angaanga. Kare e roa atu, ka kite tatou i te tupu anga o ta Iesu taputou: “E te tangata ora katoa nei e akarongo mai iaku ra, kare rava atu ïa e mate.”​—Ioane 11:26.

[Tataanga Rikiriki i Raro]

[Tutu i te kapi 6]

Kua akaueia tei tamate a te Atua kia vero i te matipi me para te vine o te enua nei

[Tutu i te kapi 7]

Te tauturu nei te Au Kite o Iehova i te ao katoa i te tangata kia tau no te au akameitakianga mutu kore a te Atua