Pene 127

Tanumia i te Varaire​—E Ra Tapati Kare i Roto i te Menema

KUA tae ki te tuanga openga o te avatea aiai i te Varaire, e ka akamata te Tapati o Nisana 15 i te opunga o te ra. Te tautau ua ra te kopapa mate o Iesu i runga i te rakau, mari ra ko nga tangata rave kino e rua i te pae iaia te ora ua ra raua. Kua tapaia te avatea o te Varaire ko te Teateamamao Anga no te mea i reira kua teateamamao te au tangata i ta ratou manga e kua akaoti i etai angaanga kare ra e tau kia akarukeia i muri ake i te Tapati.

Ko te Tapati te vaitata ra i te akamata kare ia i te Tapati ua nei (koia te ra itu o te epetoma) mari ra e rua ona tuanga, me kare e Tapati “maata” ia. Kua tapaia i te reira no te mea ko Nisana 15, koia te ra mua o te itu ra o te Oroa Areto Akaopue Koreia ra (e e Tapati ia, noatu ko teea ra o te epetoma e rokoia mai ei), ka tupu ia i taua ra rai mei te Tapati te tupu ra i tona tuatau tikai.

Kia tau ki te Ture a te Atua ra, kare te au kopapa e akatikaia kia akarukeia ki runga i te rakau i te po. No reira kua pati atura te ngati Iuda kia akavivikiia te matenga o taua nga tangata e tamateia ra na te aatianga i to ratou au vaevae. E no reira, kua aati atura nga vaeau i nga vaevae o nga tangata rave kino e rua ra. Inara no te akara anga e kua mate a Iesu, kare tona nga vaevae i aatiia. Na teia i akatupu i tei tataia ra: “Kare tetai ivi nona e aatiia.”​—⁠NW.

Inara, ei akakore i te ekoko anga e me kua mate tikai a Iesu, kua ko atura tetai vaeau i tona kaokao i te korare. Kua ko atura te korare i te ngai tikai o tona pukuatu, e kua taʼe tika maira te toto e te vai i reira. Kua akakiteia maira e te apotetoro ko Ioane, koia ra tetai i kite mata, e kua akatupu teia i tetai atu tataanga e: “E akara ratou i ta ratou i ko ra.”

I reira katoa oki a Iosepha no te oire o Arimatea ra i taua tamate anga ra, koia tetai mema akangateiteiia no te Sunederi. Kare aia i akatika i te tuku anga tika a te akavaanga teitei no tera rave anga tika kore kia Iesu. E pipi tikai a Iosepha na Iesu, inara e mataku tona i te akakite iaia uaorai e koia tetai. Inara, i teianei, kua akamaroiroi aia e kua aere atura e pati kia Pilato i te kopapa o Iesu. Kua karanga atura a Pilato i te rangatira vaeau i reira, e i muri ake i te akapapu anga taua rangatira vaeau ra e kua mate tikai a Iesu, kua tuku atura Pilato i te kopapa.

Kua rave maira a Iosepha i te kopapa kua vai atura i te kakau oronga ma no te teateamamao anga no te tanumanga. Na Nikodemo koia tetai atu mema o te Sunederi i tauturu atu iaia. Ko Nikodemo katoa tetai kare i aaki i tona akarongo ia Iesu no te mataku e ka kore tona taoonga. Inara i teianei kua apai maira aia i tetai takai, te manongi e te au aloe oko maata e 33 kiro karama. Kua vaiia te kopapa o Iesu ki roto i te au kakau e rakau kakara to roto, na te ravenga tikai ta te ngati Iuda i matau ana no te teateamamao anga i te au kopapa no te tanumanga.

Kua tukuia atura te kopapa ki roto i te menema akamaaraanga ou o Iosepha tei taraiia ra ki roto i te toka i te kainga vaitata ua maira. I te openga, kua uriia atu tetai toka maata ei arai i mua i taua menema ra. Kia oti ei taua tanumanga ra i mua ake i te Tapati, kua rapurapuia te teateamamao anga i te kopapa ra. No reira, kua aere viviki atura Maria Magadala raua ko Maria te metua vaine o Iakobo iti ra e akapapa i etai atu rakau e te inu kakara, penei ko raua katoa etai i te tauturu i te teateamamao anga ra. I muri ake i taua Tapati ra, te parani ra raua e e akono ua atu i te kopapa o Iesu kia roa te tuatau e vai meitaki ei.

I tetai ra mai, koia te Maanakai (ko te Tapati ia), kua aere atura te kau taunga nunui e te au Pharisea kia Pilato e kua na ko atura: “E te atu, te maara nei matou e, kua tuatua taua tangata pikikaa nei, i te ora anga ra e, E tu akaou au ki runga i te po toru. E teianei e akaue ake koe, kia tapapaia te tanumanga, e kia po toru ake, ko te tiki mai aea tana au pipi e keia iaia i te po, ka karanga atu ei ki te tangata tini e, Kua tu akaou mai aia mei te mate maira: kino maata atura te reira pikikaa openga i tei muatangana ra.”

Kua karanga atura Pilato, “e tiaki oki to kotou; ka aere, e akamou tikai i taua tanumanga ra i ta kotou e anoano ra.” E kua aere atura ratou e akamou rava atura i taua tanumanga ra, na te akairoanga i te toka e te akanooanga i te au vaeau Roma ei tiaki.

I te akirata i te Ra Tapati ra, kua apai atu a Maria Magadala, e Maria te metua vaine o Iakobo, ma Salome, e Ioana, e etai atu vaine katoa e rakau kakara ta ratou i rave atu ki te menema ra ei akono i te kopapa o Iesu. I te mataara kua karanga ratou tetai ki tetai: “Naai i uri ke atu i te toka i te ngutupa o te menema akamaaraanga?” (NW) Inara i te taeanga atu, kite akera ratou e kua tupu tetai ngaruerue enua e kua uri ke ia atu e te angera a Iehova te toka. Kua aere te au tiaki, e kare e apinga i te menema ra! Mataio 27:​57–​28:2; Mareko 15:​42–​16:4; Luka 23:​50–​24:​3, 10; Ioane 19:​31–​20:1; 19:14, 12:42; Levitiku 23:​5-7; Deuteronomi 21:​22, 23; Salamo 34:20; Zekaria 12:10.

▪ Eaa te Varaire i tapaiaʼi ko te Teateamamao Anga, e eaa te Tapati “maata”?

▪ Eaa nga tataanga tuatua tapu tei akatupuia i to Iesu ra kopapa?

▪ Eaa ta Iosepha raua ko Nikodemo i rave no to Iesu ra tanumanga, e eaa to raua pirianga kia Iesu?

▪ Eaa ta te kau taunga ra pati anga kia Pilato, e eaa tana pauanga?

▪ Eaa tei tupu i te popongi o te Ra Tapati?