Kauraro Akaaka ki te Au Tiaki Aroa
“E akarongo i to kotou au arataki, e kauraro atu kotou.”—EBERA 13:17.
1, 2. Eaa te au irava te akaari maira e e nga Tiaki aroa a Iehova raua ko Iesu?
E NGA Tiaki aroa te Atua ko Iehova raua ko tana Tamaiti, ko Iesu Karaiti. Kua totou a Isaia: “I na, e aere mai te Atu ra ko Iehova ma te mana, e na tona uaorai rima e akatupu i tana. . . . E angai aia i tana anana mei te tiaki mamoe ra: e akaputu aia i te au punua i tona rima, e ei runga ratou i tona umauma kia apai, e e arataki marie aia i te au tinana akangote punua ra.”—Isaia 40:10, 11.
2 Kua akatupu muaia taua totou no te akaoki akaou anga i te oki anga mai te toenga o te ngati Iuda ki Iuda i te 537 M.T.N. (2 Paraleipomeno 36:22, 23) Kua akatupu akaouia te reira i te akaoraia anga mai te toenga akatainuia mei ia “Babulonia maata” i te mataiti 1919 e Kuro Maata, ko Iesu Karaiti. (Apokalupo 18:2; Isaia 44:28) Koia te “rima” tutara o Iehova, i te akaputuputu taokotai anga mai i te mamoe e te tiaki anga ia ratou ma te maru. Kua karanga a Iesu e: “Ko au te tiaki mamoe meitaki ra: kua kite au i taku uaorai, e kua kitea au e ratou.”—Ioane 10:14.
3. Akapeea a Iehova i te akaari anga i te manako aroa no te tu e akonoia ra tana mamoe?
3 Te akakite maira te totou o Isaia 40:10, 11 i te tu maru i te tiaki anga a Iehova i tona au tangata. (Salamo 23:1-6) I te tuatau o tana angaanga orometua i te enua nei, kua akaari katoa a Iesu i te manako aroa no tana au pipi e no te au tangata noa nei. (Mataio 11:28-30; Mareko 6:34) Kua riri tikai a Iehova raua ko Iesu i te tu takinga kino anga a te au tiaki, me kore a te au arataki o Iseraela, tei akono kore e te akavare i ta raua anana. (Ezekiela 34:2-10; Mataio 23:3, 4, 15) Kua taputou mai a Iehova e: “E akaora au i taku anana, e kare ratou e riro akaou ei aōnga; e naku e akatau i te tuatua i rotopu i tetai [“mamoe e tetai mamoe,” NW]. E naku e tuku i te tiaki okotai ki runga ia ratou, e nana ratou e angai, ko toku tavini nei ko Davida; nana ratou e angai, e koia te ka riro ei tiaki no ratou.” (Ezekiela 34:22, 23) I teia tuatau openga, ko Iesu Karaiti, te Davida Maata, te “tiaki okotai” ta Iehova i iki ki rungao i Tona au tavini ravarai i te enua nei, te au Kerititiano tei akatainuia e te vaerua e te “mamoe ke atu.”—Ioane 10:16.
Au Apinga Aroa no te Rangi Mai ki te Putuputuanga
4, 5. (a) Eaa te apinga aroa akaperepere ta Iehova i oronga mai ki tona au tangata i te enua nei? (e) Eaa te apinga aroa ta Iesu i oronga ki tana putuputuanga?
4 Na te akatu anga mai na rungao i Tona au tavini i te enua nei i te “tiaki okotai”—ko Iesu Karaiti—kua oronga mai a Iehova i tetai apinga aroa akaperepereia ki te putuputuanga Kerititiano. Kua totouia mai teia apinga aroa ei Arataki mei te rangi mai i roto ia Isaia 55:4 e: “I na, kua oronga au iaia ei Kite no te au tangata nei, ei Arataki, e ei Tutara no te au tangata nei.” Kua akaputuputuia mai te au Kerititiano akatainuia e te au mema o te “aronga maata rava” mei roto mai i te pa enua, te au kopu, te iti tangata, e te au reo. (Apokalupo 5:9, 10; 7:9) Kua akapupuia mai ratou ki roto i tetai putuputuanga no te pa enua, e “okotai oki anana,” i raro ake i te arataki anga a te “tiaki okotai,” ko Iesu Karaiti.
5 Kua oronga katoa a Iesu i tetai apinga aroa akaperepereia ki tana putuputuanga i runga i te enua nei. Kua oronga mai aia i te au tiaki akono meitaki, na te aru anga ia Iehova e ia Iesu, i te tiaki maru anga i te anana. Kua tuatua te apotetoro ko Paulo i teia apinga aroa i roto i tana reta ki te au Kerititiano i Ephesia. Kua tata aia e: “‘Iaia i kake ki runga, e aronga tuikaa e manganui tana i arataki, e kua oronga ua maira te meitaki i te tangata nei.’ . . . E kua akono oki aia i tetai pae, ei aposetolo; tetai pae, ei peroveta; tetai pae, ei apii evangelia; e tetai pae, ei tiaki, e ei orometua; Ei [“akatikatikaanga,” NW] i te aronga tapu, no te angaanga orometua, kia meitaki oki te kopapa o te Mesia ra.”—Ephesia 4:8, 11, 12.
6. Akapeea te au akaaere akatainuia te tavini ra i roto i te pupu o te aronga pakari i te akatutuia anga mai i roto ia Apokalupo 1:16, 20, e eaa te karangaia ra no runga i te aronga pakari tei ikiia no roto mai i te mamoe ke atu?
6 Te “meitaki i te tangata nei” ra ko te au akaaere ia, me kore ko te aronga pakari, ta Iehova raua ko tana Tamaiti i iki, na roto i te vaerua tapu, kia tiaki ma te maru i te mamoe. (Angaanga 20:28, 29, NW) I te akamata anga, e au tane Kerititiano akatainu pouroaia teia au akaaere. I roto ia Apokalupo 1:16, 20, ko te aronga tei tavini ana i roto i te pupu o te aronga pakari i roto i te putuputuanga akatainuia ra kua akatutuia mai e e “au etu” me kore e ‘au angela’ i te rima katau o Karaiti, koia oki, i raro ake i tana akatere anga. Inara, i teia tuatau openga nei te meangiti ua atura te numero o te au akaaere akatainuia tei te enua nei rai, te maata anga o te aronga pakari Kerititiano i roto i te au putuputuanga no roto mai i te mamoe ke atu. Mei te mea e kua ikiia teia aronga nei e te au komono o te Pupu Akaaere i raro ake i te arataki anga a te vaerua tapu, kua karanga katoaia ratou e tei raro ake i te rima katau, (me kore, i raro ake i te aratakianga) a te Tiaki Meitaki, ko Iesu Karaiti. (Isaia 61:5, 6) No te mea e te kauraro ra te aronga pakari i roto i to tatou putuputuanga kia Karaiti, te Upoko o te putuputuanga, te anoanoia ra tatou kia taokotai pu tikai kia ratou.—Kolosa 1:18.
Akarongoanga e te Kauraroanga
7. Eaa te akoanga ta te apotetoro ko Paulo i oronga mai no to tatou tu ki te au akaaere Kerititiano?
7 Te inangaro nei to tatou nga Tiaki i te rangi, te Atua ko Iehova e Iesu Karaiti, kia akarongo e kia kauraro tatou ki te au tiaki ta raua i oronga atu i te au apainga i roto i te putuputuanga. (1 Petero 5:5) I raro ake i te akauruanga, kua tata te apotetoro ko Paulo: “E akamanako i to kotou au arataki, ko tei tuatua mai kia kotou i te tuatua a te Atua: e aru atu i to ratou akarongo, ma te manako i te openga o ta ratou tuatua. E akarongo i to kotou au arataki, e kauraro atu kotou: te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.”—Ebera 13:7, 17.
8. Eaa ta Paulo e pati maira kia tatou kia “manako,” e akapeea tatou i te ‘akarongo anga’?
8 E akamanako ana e te pati maira a Paulo ia tatou kia “manako,” me kore kia akara matatio, i te tu akono meitaki o te aronga pakari e kia aru i to ratou au akaraanga no te akarongo. Pera katoa, te ako maira aia ia tatou kia akarongo e kia kauraro ki te aratakianga a teia au tane tei ikiia. Te akamarama maira te tangata apii Pipiria ko R. T. France e i roto i te reo Ereni mua, te tuatua i konei tei uriia kia “akarongo” kare oki e “ko te tuatua tikai no te akarongo, inara te aiteanga tikai ‘kia akakeuia,’ te akakite maira i te ariki puareinga anga i ta ratou arataki anga.” Te akarongo ra tatou ki te aronga pakari kare e no te mea kua akaueia mai tatou i roto i te Tuatua a te Atua e kia rave i te reira, mari katoa ra, no te mea kua akakeuia tatou e te manako tikai maira ratou i te anoano o te Patireia e ia tatou. Ka mataora tikai tatou me ariki puareinga ua tatou i ta ratou arataki anga.
9. Eaa ra tatou i anoanoia ai kia “kauraro” pera katoa kia akarongo?
9 Akapeea ra, me kare tatou e papu roa ana e i roto i tetai tu te riro ra te aratakianga a te aronga pakari e ko te mataara meitaki roa atuia i te rave i te au mea? Te umuumuia ra i reira te kauraroanga. E mama ua ake i te akarongo me takataka ua te au mea ravarai e kua ariki tatou i te reira, inara ka akaari tatou e te kauraro tikai ra tatou me tuku ua tatou i te au noatu e kare tatou e marama tikai ana i te akaueanga tei orongaia mai. Kua akaari a Petero, tei riro mai i muri mai ei apotetoro, i teia tu kauraroanga.—Luka 5:4, 5.
E A Tumu no te Taokotaianga Puareinga
10, 11. I na roto i teea tu i ‘tuatua ai te au akaaere i te tuatua a te Atua’ ki to ratou au taeake Kerititiano i te anere mataiti mua e i teia tuatau?
10 I roto ia Ebera 13:7, 17, tei taikuia mai i runga akenei, kua oronga mai te apotetoro ko Paulo e a tumu e eaa tatou ka akarongo ei e ka kauraro ei ki te au akaaere Kerititiano. Te mea mua koia oki kua ‘tuatuaia mai te tuatua a te Atua’ kia tatou. Kia maara ra e ko te “meitaki i te tangata nei,” ta Iesu i oronga mai ki te putuputuanga ra no te “akatikatikaanga i te aronga tapu.” (Ephesia 4:11, 12) Kua akatikatika aia i te manako e te tu o te au Kerititiano i te anere mataiti mua na roto i te au tiaki akono meitaki, ko tetai papaki ia ratou kua akauruia kia tata i te au reta ki te au putuputuanga. Kua taangaanga aia i taua au akaaere tei ikiia e te vaerua kia arataki e kia akamaroiroi i te au Kerititiano mua.—1 Korinetia 16:15-18; 2 Timoteo 2:2; Tito 1:5.
11 I teia tuatau, te arataki nei a Iesu ia tatou na roto i “te tavini akono meitaki e te pakari,” tei akatutuia mai e tona Pupu Akaaere e te aronga pakari tei ikiia. (Mataio 24:45) Ei akangateitei anga i “te Tiaki maata,” ko Iesu Karaiti, e akarongo atu tatou ki ta Paulo akoanga e: “Kia manako i te aronga te angaanga pakari ra i rotopu ia kotou e te akaaere ra ia kotou i te Atu ra e te akamaroiroi ra ia kotou.”—1 Petero 5:4; 1 Tesalonia 5:12, NW; 1 Timoteo 5:17.
12. Akapeea te au akaaere i te ‘tiaki anga i to tatou au vaerua’?
12 Te rua o te tumu no te taokotaianga ki te au akaaere Kerititiano koia oki “te tiaki ra ratou i to [tatou] au vaerua.” Me kite ratou i tetai apinga i roto i to tatou tu me kore i roto i te manako te ka akakino i to tatou tu i te pae vaerua, ka viviki ua ratou i te oronga mai i te ako te anoanoia ra e tatou ma te akakoroanga i te akatikatika ia tatou. (Galatia 6:1) Te tuatua Ereni tei uriia e “tiaki” te aiteanga tikai, koia oki “kare e varea e te moe.” Kia tau ki ta tetai tangata apii Pipiria, te “tuatuaia ra no te akono roiroi kore anga a te tiaki.” Kapiti mai i te akono anga ratou ma te matakite i te pae vaerua, kare te aronga pakari e varea i te moe no te manako ua anga i to tatou oraanga i te pae vaerua. Kare ainei tatou e taokotai puareinga ua ki taua au tiaki aroa, te rave meitaki ra ratou i te aru i te tu maru tei orongaia mai e Iesu Karaiti, “te tiaki mamoe maata” ra?—Ebera 13:20.
13. Kiaai ma e na roto i teea au tu te akakite ra te au akaaere e te au Kerititiano katoatoa i te tuatua ki te Atua?
13 Te toru o te tumu ka taokotai puareinga ai tatou ki te au akaaere koia oki te tiaki nei ratou ia tatou i te ‘akakite anga oki ta ratou tuatua ki te Atua.’ Te maara ra i te au akaaere e e au tiaki ratou, te tavini anga i raro ake i nga Tiaki i te rangi, ko te Atua ko Iehova e Iesu Karaiti. (Ezekiela 34:22-24) Te Ona o te au mamoe ko Iehova, ko “tana i oko ra i te toto o tana uaorai Tamaiti,” e te mou nei Aia i te au akaaere tei ikiia kia akakite atu i te tuatua no runga i te tu ta ratou e akono ra i Tana anana, koia oki “ma te tu maru.” (Angaanga 20:28, 29, NW) No reira, e pau anga katoa ta tatou pouroa kia Iehova no te tu e akarongo ra tatou ki tana aratakianga. (Roma 14:10-12) Te akapapu katoa ra to tatou akarongo ki te aronga pakari tei ikiia i to tatou kauraroanga kia Karaiti, te Upoko o te putuputuanga.—Kolosa 2:19.
14. Eaa te ka arataki atu i te au akaaere Kerititiano te tavini ra “ma te aue,” e eaa te ka tupu mai?
14 Kua oronga mai a Paulo i te a o te tumu e eaa tatou ka kauraro akaaka ai ki te au akaaere Kerititiano. Kua tata aia e: “Kia akakite ra ratou ma te rekareka, eiaa ma te aue; kare oki e puapingaia ta kotou i te reira.” (Ebera 13:17) Ma ta ratou au apainga teiaa no te apiianga, te tiakianga, e te aratakianga i te angaanga tutu anga, te utuutuanga i to ratou au pamiri, e te akono anga i te au manamanata i roto i te putuputuanga, e apainga teiaa ta te aronga pakari Kerititiano e apai nei. (2 Korinetia 11:28, 29) Me kare tatou e taokotai kia ratou, ka akateiaa roa atu tatou i ta ratou apainga. Ka akatupu mai teia i “te aue” kia ratou. Kare a Iehova e mareka mai me kare tatou e akaari i te tu taokotaianga e ka riro mai ei akakino anga ia tatou. Inara, me akaari tatou i te akangateitei anga e te taokotaianga tau, ka rauka i te aronga pakari i te apai i ta ratou au angaanga ma te rekareka, e te akatupu ra teia i te tu taokotai e te piri rekareka anga ki roto i te angaanga tutu anga i te Patireia.—Roma 15:5, 6.
Akaari Anga i to Tatou Kauraroanga
15. Akapeea tatou i te akaari anga e te akarongo ra e te kauraro ra tatou?
15 E manganui te au mataara tau ka rauka ia tatou i te taokotai atu ki te au akaaere tei ikiia. Ma te akakoro anga kia akatano ki te au turanga ou i roto i te ngai tutu anga, kua akapapa ainei te aronga pakari i te au uipaanga no te angaanga koro i te au ra e te au taime te umuumuia ra te au tauianga i roto i ta tatou akanoonooanga matauia? E rave tatou i tetai tauta anga kia turu i te au akanoonoo anga ou. Penei ka rauka mai ia tatou te au akameitakianga kare i tapapaia. Ka atoro mai ainei te akaaere tavini i ta tatou Apii Puka a te Putuputuanga? Kia o pu tikai tatou ki roto i te angaanga tutu anga i taua epetoma. Kua rauka mai ainei ia tatou tetai tukuanga angaanga i roto i te Apii Orometua Teokaratiki? E tauta tatou kia tae atu e kia rave i ta tatou tukuanga angaanga. Kua akakite mai ainei te akaaere o te Apii Puka a te Putuputuanga e na to tatou pupu e tama i te Are Uipaanga Patireia? E oronga tatou i te turu anga ki katoa kiaia, te ka rauka i to tatou oraanga kopapa e te maroiroi. Na roto i teia e tetai au mataara ke e manganui, e akaari tatou i to tatou kauraroanga ki te au tane ta Iehova raua ko tana Tamaiti i iki kia akono i te anana.
16. Me kare tetai tangata pakari e rave ana i te au mea tei akaueia mai, eaa ra e kare teia ei tumuanga no tatou kia meameaau?
16 I tetai au taime, penei kare tetai tangata pakari e rave ana i tetai au mea tei akakiteia mai e te pupu tavini akono meitaki e tona Pupu Akaaere. Me ka rave ua rai aia i teia, e akakite anga tuatua tana kia Iehova, “te tiaki e te akaaere o to [tatou] au meta.” (1 Petero 2:25, NW) Inara ko tetai ua atu apa me kore te au tarevake a tetai aronga pakari ra kare e akatikaia te tu akarongo kore mei ia tatou. Kare a Iehova e akameitaki mai i te akarongo kore e te meameaau.—Numero 12:1, 2, 9-11.
Akameitaki a Iehova i te Taokotaianga Puareinga
17. Eaa to tatou tu ki to tatou au akaaere?
17 Kua kite te Atua ko Iehova e e aronga apa ua teia au tane tei ikiia ei au akaaere. Inara, te taangaanga nei aia ia ratou, e na roto i tona vaerua tapu, te tiaki ra aia i tona au tangata i runga i te enua nei. E tika rai ki te aronga pakari—e kia tatou katoatoa—e ‘riro te mana maata meitaki nei na te Atua, auraka ia tatou.’ (2 Korinetia 4:7) No reira e akameitaki tatou ia Iehova no tana i akatupu mai na roto i to tatou au akaaere akono meitaki, e kia akaari tatou i te taokotaianga puareinga kia ratou.
18. Na te kauraro anga ki to tatou au akaaere, eaa tikai ta tatou e rave ra?
18 E tauta pakari ana te au akaaere i te akono i ta Iehova akatakaanga no te au tiaki tei ikiia i rungao i tana anana i teia tuatau openga, tei kiteaia i roto ia Ieremia 3:15: “E e oronga atu au i te tiaki no kotou e tau ki toku uaorai ngakau, ko te ka angai ia kotou ki te kite e te pakari.” Papu tikai e te rave ra te aronga pakari i rotopu ia tatou i tetai angaanga memeitaki no te apiianga e te paruruanga i ta Iehova mamoe. Kia akaari ua rai tatou i to tatou ariki anga rekareka i ta ratou angaanga pakari na roto i ta tatou taokotaianga puareinga, to tatou akarongo, e to tatou kauraroanga. Na te rave anga i te reira, te akaari ra tatou i to tatou ariki anga rekareka no to tatou nga Tiaki i te rangi, ko te Atua ko Iehova e Iesu Karaiti.
Na te Akamanako Akaou Anga
• Akapeea a Iehova raua ko Iesu Karaiti i te akapapu anga mai ia raua uaorai ei nga Tiaki aroa?
• Kapiti atu ki te akarongo, eaa ra i anoanoia ai te kauraroanga?
• Na roto i teea au tu tau e akaari ei tatou i to tatou kauraroanga?
[Tutu i te kapi 27]
Te kauraro ra te aronga pakari Kerititiano ki ta Karaiti arataki anga
[Au Tutu i te kapi 29]
E manganui te au mataara i te akaari i to tatou kauraroanga ki te au tiaki ikiia e Iehova