“Ei Aronga Rave Oki Kotou i te Tuatua”

1-2. Eaa te iti tangata o te Atua i mataora ai? (Iakobo 1:​22-25)

INANGARO a Iehova e tana Tamaiti ia tatou kia mataora. Karanga a Salamo 119:2: “E ao to tei akono i tana au tuatua-akakite, ko tei kimi iaia ma te ngakau katoa.” Kua karanga katoa a Iesu: “Ko tei akarongo i te tuatua a te Atua e kua akono atura, ko ratou tei meitaki roa.”—Luka 11:28.

² E iti tangata mataora to Iehova. No teaa ra? E maata te tumu, inara ko te mea puapinga koia oki, ko te tatau putuputu anga i te Tuatua a te Atua e ka tauta tatou i te taangaanga i ta tatou e apii ra.—E tatau ia Iakobo 1:​22-25.

3. Akapeea tatou e puapinga ai me taangaanga i ta tatou e tatau ra i roto i te Tuatua a te Atua?

³ Me riro mai tatou ei “aronga rave” i te tuatua, e maata te au puapinga ka rauka mai. Ko teia tetai ravenga puapinga no te akamareka ia Iehova. Ka mataora tatou me akono tatou i te Tuatua a te Atua. (Kohe. 12:13) Pera katoa, ka meitaki atu to tatou pirianga ki to tatou ngutuare tangata e te putuputuanga. E mea papu kua tupu teia i roto i toou oraanga. Ka kopae tatou i te au manamanata tei tupu ki te aronga tei kore i akarongo i ta Iehova au akauenga. Mei ta te Ariki ko Davida i tuatua no te au imene, te ture, te au akakiteanga, e te akavaanga a Iehova, karanga aia: “Tei te akono i te reira te tutaki maata.”—Sala. 19:​7-11.

4. Eaa te tumu kare e māmā ana i te taangaanga i ta tatou e tatau ra mei te Pipiria?

⁴ Kare e māmā ana ia tatou i te tatau i te Pipiria e te taangaanga i ta tatou i apii mai. Ka anoanoia tatou kia akanoo i te tuatau no te tatau e te apii i te Pipiria e kia mārama i to Iehova anoano. No reira, ka uriuri tatou i tetai au ravenga te ka tauturu ia tatou kia tatau putuputu i te Pipiria. Ka akamanako katoa tatou eaa te ka tauturu ia tatou i te tatau e te taangaanga i te reira i roto i to tatou oraanga.

AKANOO I TE TUATAU NO TE TATAU I TE PIPIRIA

5. Eaa te au apainga te ka akapou maata i toou taime?

⁵ E maata te au apainga a te iti tangata o Iehova te ka akapou i to ratou taime. Ei akaraanga, ka angaanga moni te maata anga ia tatou ei akono ia tatou e to tatou ngutuare tangata. (1 Timo. 5:8) E maata te au Kerititiano tei akono i to ratou kopu tangata ruaine e te makimaki. E ka pou tetai tuatau no te akono i to tatou oraanga kopapa. I te pae mai i teia au apainga, e au angaanga ta tatou i roto i te putuputuanga. Ko tetai angaanga puapinga, ko te tauta i te tutu aere i te nuti meitaki. No te maata i ta tatou au apainga, akapeea e rauka ai te tuatau no te tatau putuputu e te akamanako i te Pipiria, e te taangaanga i ta tatou e apii ra?

6. Akapeea koe me akanoo i te tuatau no te tatau i te Pipiria? (Akara katoa i te tutu.)

⁶ Ei au Kerititiano, ko te tatau Pipiria tetai o “te au mea e maata ua atu te meitaki,” no reira ka anoanoia tatou kia rave i te reira. (Phili. 1:10) Karanga te salamo no runga i tetai tangata mataora: “Ko tei inangaro ra i te ture a Iehova; e tei tana ture tona manako anga i te po e te ao.” (Sala. 1:​1, 2) Taka meitaki ua, ka anoanoia tatou kia akapou i te tuatau no te tatau i te Pipiria. Eaa te taime meitaki i te rave i te reira? Te pauanga, ko te taime tau kia koe. Tei puapinga, kia akanoo tatou i te reira taime no te tatau putuputu i te Pipiria. Karanga te taeake ko Victor: “E reka ana au i te tatau i te Pipiria i te popongi. Noatu kare au e reka ana i te ara vave i te popongi, e taime meitaki ra te reira e kare e maniania. Ka māmā ua iaku i te akamou ki runga i taku apii.” Akapeea koe? E ui kia koe uaorai, ‘Eaa te taime meitaki noku no te tatau i te Pipiria?’

E AKAMANAKO I TAAU E TATAU RA

7-8. Eaa te ka arai ia tatou kia kore e puapinga mei ta tatou tatau Pipiria? Akatutu mai.

⁷ Me akanoo koe i tetai taime no te tatau i te Pipiria, e apinga ke atu taau ka anoanoia i te rave. Ei akaraanga, kua tatau ainei koe i tetai apinga e i muri mai kare e maara ia koe i te reira? Kua tupu ana teia kia tatou pouroa. Te mea tangi, ka tupu katoa teia me tatau tatou i te Pipiria. Penei kua akanoo tatou i tetai akakoroanga no te tatau i tetai au pene o te Pipiria i te au rā. E mea meitaki tera. Ka anoanoia tatou kia akanoo i te au akakoroanga e te tauta i te akatupu i te reira. (1 Kori. 9:26) Inara, kia puapingaia tatou mei ta tatou tatau Pipiria, e maata atu ta tatou ka anoanoia kia rave i te pae mai i te tatau ua.

⁸ Akamanako ana i teia akatutuanga: Ka anoanoia te ua kia tupu te ’ua rakau. Inara, me pakari te ua kare te reira e meitaki no te ’ua rakau e ka puke te vai. Inara me toriri te ua, ka akameitaki te reira i te one e ka tupu ruperupe te au ’ua rakau. Mei te reira katoa, te tatau anga i te Pipiria, auraka e rapurapu e kare o tatou taime i te akamanako e te taangaanga i ta tatou e tatau ra.—Iako. 1:24.

9. Eaa taau ka rave me te rapurapu ra koe i taau tatau Pipiria?

⁹ Kua rapurapu ainei koe i taau tatau Pipiria i tetai au atianga? Eaa taau ka rave? E tatau marie. E akapou i te taime no te akamanako i taau i tatau. Kare teia i te mea ngatā i te rave. Penei ka akaroa atu koe i toou tuatau i te apii na te akamanako oonu i taau e tatau ra. Me kore ka akaiti koe i te maata o taau ka tatau e ka akapou i te toenga o te tuatau no te akamanako i te reira. Karanga a Victor, “E tapoto ana au i taku tatau Pipiria, penei e tai pene. No te mea ka tatau au i te au popongi, ka riro te reira ei akamanako anga naku i tera rā.” No reira, tei ia koe te maata i taau ka tatau, inara te mea puapinga kia tatau marie ma te akamanako i taau e tatau ra.—Sala. 119:97; akara i te pia “Au Uianga ei Akamanako.”

10. Akatutu mai akapeea koe me taangaanga i taau e apii ra. (1 Tesalonia 5:​17, 18)

¹⁰ Noatu eaa te taime ka tatau koe i te Pipiria e te maata i taau ka tatau, e kimi i te au ravenga no te taangaanga i taau e tatau ra. Ia koe e tatau ra i te Pipiria, e ui kia koe uaorai, ‘Akapeea au me taangaanga i teia i teianei me kore a te tuatau ka aereia mai?’ Ei akatutuanga, akamanako ana e te tatau ra koe ia 1 Tesalonia 5:​17, 18. (E tatau.) Me oti ia koe i te tatau i teia nga irava, penei ka tāpu koe e ka akamanako mei teaa te putuputu e te maata i taau pure. Pera katoa, ka rauka ia koe i te akamanako i te au mea ka inangaro koe i te akameitaki i te Atua. Penei ka iki koe e toru apinga ka akameitaki ia Iehova. No reira me akapou koe i tetai nga miniti no te akamanako i te au apiianga i roto i taau tatau Pipiria, ka rauka ia koe i te mārama i te Tuatua a te Atua e te akono i te reira. Ia koe e rave ra i te tatau Pipiria i te au rā, e akamanako i te puapinga ka rauka mai! Ka riro koe ei tangata rave i te Tuatua a te Atua. Akapeea me maata taau ka anoanoia kia taangaanga?

AKANOO I TE AU AKAKOROANGA TAU

11. Eaa ra tatou ka akaparuparuia ai i tetai au atianga? Oronga mai i tetai akatutuanga.

¹¹ Me tatau koe i te Pipiria, penei ka akaparuparuia koe no te maata i taau au tauianga ka rave. Akamanako i teia akaraanga: I teia rā i roto i taau tatau Pipiria, kua kite koe i te akoanga no te tu papakitai. (Iako. 2:​1-8) Ka anoanoia koe kia akameitaki atu i toou tu me akono i tetai ke, no reira kua rave koe i te au tauianga. E meitaki tena! E apopo, kua tatau koe akapeea me akatere i taau tuatua. (Iako. 3:​1-12) Kua kite mai koe i tetai au atianga, e urutoe ana koe i tetai ke. No reira kua akamaroiroi koe i tetai ke na roto i taau tuatua. E oti i tera mai rā, kua tatau koe i te au akamatakiteanga kia riro mai ei oa no teianei ao. (Iako. 4:​4-12) Kua kite mai koe e ka anoanoia koe kia iki meitaki i taau tamataoraanga. E i te ā o te rā, ka apiapi koe e ngatā tikai ia koe te rave i teia au tauianga.

12. Eaa te tumu kare tatou e taitaia me anoanoia tatou kia rave i te au tauianga? (Akara katoa i te tataanga rikiriki.)

¹² Auraka e taitaia me e maata te au tauianga ka anoanoia koe kia rave. E akapapuanga teia e e ngakau tika toou e te akaaka. Me e tu akaaka e te tu tika to tatou, ka tatau tatou i te Pipiria e te kimi ravenga no te akameitaki atu i to tatou tu.a E akamaara, ka anoanoia tatou kia “akatangata ou” ia tatou. (Kolo. 3:10) Eaa te ka tauturu ia koe kia riro mai ei tangata rave i te Tuatua a te Atua?

13. Eaa tetai ravenga meitaki no te taangaanga i taau e apii ra? (Akara katoa i te tutu.)

¹³ Auraka e tauta i te taangaanga i te au mea pouroa taau e tatau ra, mari ra e akanoo e tai me kore e rua akakoroanga. (Mase. 11:2) E tamata i teia: E tata i te au tauianga ka anoanoia koe i te rave, e oti e iki e tai me kore e rua apiianga ka tauta koe i te taangaanga, e akaruke i te toenga no te tuatau ka aereia. Eaa te mea mua taau ka tamata?

14. Eaa te au akakoroanga taau ka akanoo?

¹⁴ Penei ka akamata koe na te akanoo anga i tetai akakoroanga māmā ua i te rave. Me kore penei ka iki koe i tetai tu ka inangaro koe i te akameitaki atu. Me kua akanoo koe i taau akakoroanga, e rave i te kimikimianga i roto ta tatou au puka mei te Watch Tower Publications Index me kore te Research Guide for Jehovah’s Witnesses. E pure kia Iehova ma te akakite i toou akakoroanga e te pati iaia no “te inangaro e te rave” i te reira. (Phili. 2:13) E oti e tauta i te taangaanga i taau i apii. Me kite koe e kua rauka ia koe i te rave i te au tauianga me kore te akameitaki atu i toou tu Kerititiano, ka akamaroiroiia koe kia rave ua atu i te au tauianga, pera katoa ka māmā ua ia koe i te rave i te au tauianga.

E TUKU I TE PIPIRIA KIA “ANGAANGA MAROIROI I ROTO IA KOTOU”

15. Akapeea to Iehova iti tangata i tuke ei mei te manganui tei tatau i te Pipiria? (1 Tesalonia 2:13)

¹⁵ Karanga tetai pae e e maata te taime kua tatau ratou i te katoa anga o te Pipiria. Inara te irinaki ra ainei ratou i ta te Pipiria e apii maira? Kua taangaanga ainei ratou i ta ratou i tatau e kua rave i te au tauianga i roto i to ratou oraanga? Te pauanga, kare, kare te maata anga o te tangata i akono i ta te Pipiria i apii. E tuke ra to Iehova iti tangata! Mei te au Kerititiano mua rai, kua āriki tatou i te Pipiria “ei tuatua ra na te Atua, e koia tika rai oki.” Pera katoa, ka tauta pakari tatou i te taangaanga i te ako a te Pipiria.—E tatau ia 1 Tesalonia 2:13.

16. Eaa te ka tauturu ia tatou kia riro mai ei aronga rave i te Tuatua?

¹⁶ Kare i te mea māmā i te tatau e te taangaanga i te Tuatua a te Atua. Penei e ngatā i te akanoo i tetai taime no te tatau Pipiria. Me kore penei ka rapurapu tatou i te tatau Pipiria e kare e taime no te akamanako i ta tatou i tatau. Me kore ka taitaia tatou no te maata i te au tauianga ka anoanoia tatou kia rave. Noatu eaa toou turanga, ka tauturu a Iehova ia koe kia autu i teia au manamanata. E āriki i tana tauturu kia riro mai ei aronga rave i te tuatua kare ei aronga akarongo ua. E mea papu, me tatau e me taangaanga koe i te Tuatua a te Atua i roto i toou oraanga, ka mataora koe.—Iako. 1:25.