Akapeea me Akamaata i Taau Angaanga Orometua

TE TAE anga te taime no Iesu kia tono i tana au pipi kia tutu aere i te Patireia, kua akakite aia e: “Te maata ua nei te mou, te iti nei ra te aronga e kokoti.” No te mea e maata te angaanga, karanga akaou aia e: “E pure kotou i te Atu o te mou, kia unga mai aia i tetai aronga ei rave i taua mou nana ra.” (Mata. 9:37, 38) Kua akakite aia ki tana au pipi akapeea me rave i ta ratou angaanga orometua. Tana karere, e mea rapurapu te reira: “Kare e kako te au oire o Iseraela ia kotou, e tae mai ei te Tamaiti a te tangata.”—Mata. 10:23.

² I teia tuatau, e maata katoa te angaanga e anoano ra kia raveia. Te poto roa nei te tuatau e ka anoanoia tatou kia tutu aere i te tuatua meitaki o te Patireia i mua ake i te openga! (Mare. 13:10) I te mea ko teianei ao te ngai tutu evangeria, te aro atu nei tatou i tetai turanga mei ta Iesu e tana au pipi i aro atu, tera ra e maata roa atu i to tatou nei tuatau. E tokoiti ua tatou me akaaiteia atu ki te pirioni ua atu o te tangata i teia ao, e mea papu e ka tauturu mai a Iehova ia tatou. Ka tutu aereia te tuatua meitaki o te Patireia e kako rava ake te ao katoa, e i te tuatau tei tau ia Iehova, ka tae mai te openga. Ka tuku ainei tatou i to Iehova Patireia na mua kia oti takiri te angaanga orometua? Eaa ta tatou e parani nei i te rave no ta tatou angaanga Patireia?

³ Te akakite anga i ta Iehova e pati maira ki tona au tavini akatapuia, kua karanga a Iesu e: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mare. 12:30) Te anoanoia maira tatou kia akamori ia Iehova ma te ngakau katoa. Ka akaari tatou i te oonuanga o to tatou inangaro ia Iehova e te tu tiratiratu ki to tatou akatapuanga na te rave akaope anga i ta tatou angaanga orometua. (2 Timo. 2:15) E maata te au atianga e tuera maira kia tatou tataki tai, tei tau ki to tatou au turanga e to tatou maroiroi. Akamanako ana eaa etai o teia au atianga, e oti iki i te au akakoroanga e ō maira te akamorianga a te Atua.

EI PAPURITIA NO TE PUTUPUTUANGA

⁴ Te aronga pouroa tei āriki i te tuatua mou, e tikaanga ngateitei to ratou kia akakite aere i te tuatua meitaki. Ko te angaanga puapinga teia ta Iesu i akaue i tana au pipi kia rave. (Mata. 24:14; 28:19, 20) E mea matauia no tetai pipi a Iesu kia akamata i te akakite aere i te tuatua meitaki o te Patireia me akarongo aia i te reira. Kua akapera rai a Anederea, Philipa, Korenelio, e etai atu aronga. (Ioa. 1:40, 41, 43-45; Anga. 10:1, 2, 24; 16:14, 15, 25-34) Ka tau ainei kia akakite aere i te tuatua meitaki i mua roa ake ka papetito ei tetai tangata? Ae! Me tau tetai tangata i roto i te putuputuanga kia riro ei papuritia kare i papetitoia, ko tera te taime kia piri aia ki te tutu evangeria mei tera are ki tera are. Ka rauka iaia kia piri ki tetai au tuanga ke o te angaanga orometua te ka tau ki tona maroiroi e tona au turanga.

⁵ Me papetitoia tetai papuritia, papu e ka inangaro aia i te rave i tana ka rauka i te tauturu i etai ke kia kite i te tuatua mou. E tikaanga to te au tane e te au vaine kia rave i te angaanga tutu evangeria. E akameitakianga tikai kia piri ki roto i tetai manga tuanga ua o te akakite anga i te Patireia o te Atua. Tetai ua atu ka rauka i te akamaata i tana tuanga i roto i te angaanga orometua, ka mataora aia.

AU NGAI TEI ANOANOIA TE TAUTURU

⁶ Penei e angaanga putuputuia ana te ngai tutu a te putuputuanga e kua kite matauia te karere Patireia. Me koia ïa, penei ka inangaro koe te akamaata atu i taau ka rave, e kia neke ki te ngai e anoano maataia ra te tauturu. (Anga. 16:9) Me e tangata pakari koe me kore e tavini tauturu, penei e putuputuanga tetai ka inangaro i taau tauturu. Penei ka rauka i toou akaaere kotinga kia akakite atu e akapeea koe te tauturu anga i tetai putuputuanga i roto i te kotinga. Me ka inangaro koe i te tavini i tetai ngai ke mai o tera enua, ka rauka i te opati Betela i te akamārama atu i te ka anoanoia.

⁷ Ka inangaro ainei koe te tavini i tetai enua ke? Me koia ïa, ka anoanoia koe kia akamanako meitaki i te reira. Kore koe tuatua atu ki te aronga pakari i roto i toou putuputuanga? Ka akatuke teia i toou turanga e to tetai ua atu ka aru mai ia koe. (Luka 14:28) Inara me kare koe e manako ana kia noo roa atu, penei e meitaki atu kia neke ki tetai ngai ke mai i toou enua.

⁸ I tetai au enua, ko te au taeake e akono ra i te apainga a te au tiaki, e au tangata ou ua ratou i roto i te tuatua mou. E tu akaaka to teia au taeake e ka āriki ua ratou i te aronga pakari tei neke mai ki roto i te putuputuanga kia tauturu. Me e tangata pakari koe e manako ra i te neke ki taua enua ra, e akamaara e ko toou akakoroanga kare kia mono i te au taeake i reira. Mari ra kia tavini kapiti e ratou. Akamaroiroi ia ratou kia aruaru e kia āriki i te au apainga i roto i te putuputuanga. (1 Timo. 3:1) Akakoromaki me kare e raveia tetai angaanga mei tei matauia i toou enua. E taangaanga i toou karape ei tangata pakari, ei tauturu i te au taeake. Me oki i reira koe ki toou enua, kua tukatau te aronga pakari i te akono i te putuputuanga.

⁹ Mua ake ka oronga mai ei te opati Betela i te ingoa o te putuputuanga ka puapingaia mei taau tauturu, ka inangaroia toou Kumiti Raverave o te Putuputuanga kia tuku i tetai reta akameitaki kia ratou. Ka anoanoia teia reta me te tavini ra koe ei tangata pakari, ei tavini tauturu, ei painia, me ei papuritia. Ka tuku tika te kumiti raverave i tetai reta akameitaki, e taau reta, i te pati i tetai aratakianga ki te opati Betela o te enua e inangaro ra koe i te aere.

TUTU AERE I ROTO I TETAI REO KE

¹⁰ Kia rauka ia koe i te akamaata atu i taau ka rave, penei ka inangaro koe i te apii i tetai reo ke, kapiti mai te reo akairo. Mei te mea e ko toou akakoroanga kia tutu aere i roto i tetai reo ke, kore koe tuatua atu ki te aronga pakari e te akaaere kotinga? Ka rauka ia ratou te oake mai i tetai au manako e te akamaroiroianga. I raro i te aratakianga a te opati Betela, kua akanooia tetai au pupu apii reo ei tereni i te au papuritia, e te au painia tukatau kia tutu aere i roto i tetai reo ke.

ANGAANGA PAINIA

¹¹ Kia akamatau te au papuritia pouroa ia ratou ki te au umuumuanga no te painia tauturu, painia tamou, painia takake e tetai atu au angaanga orometua tamou. Kia riro te au painia ei akaraanga meitaki, e kia rauka ia ratou i te akapou i tetai au ora i te tutu aere i te tuatua meitaki. Na te Kumiti Raverave o te Putuputuanga e iki me ka ārikiia te patianga kia painia tauturu e te painia tamou, kareka te au painia takake, na te opati Betela e iki.

¹² Te au painia tauturu, ka tavini ratou mei te okotai marama e tetai ua atu marama ka aereia, me kore ka painia ua atu rai ratou no tetai tuatau tei tau ki to ratou turanga. Maata te au papuritia e inangaro ana kia painia tauturu i te tuatau Akamaaraanga, me kore i te marama ka atoro mai te akaaere kotinga. Tetai pae, i te au marama orote. Te au tamariki apii kua papetitoia penei ka painia tauturu ratou i te tuatau orote o te apii. Kua akaitiia te ora kia rauka i te au papuritia kia painia tauturu i roto ia Mati e Aperira, e i te marama ka atoro mai te akaaere kotinga. Noatu eaa toou turanga, me e tu meitaki toou e te akono ra koe i te au kaveinga Pipiria, ka taeria ainei ia koe te ora tei anoanoia, e ka rauka ia koe te painia tauturu no te okotai marama me kore tere atu i te reira? Ka rekareka roa te aronga pakari i te āriki i taau patianga no teia tikaanga manea.

¹³ Kia tau ei painia tamou, ka anoanoia kia tae toou ora tei akatakaia no te au painia, i te mataiti. Ei painia tamou ka anoanoia koe kia taokotai ki te putuputuanga. E akameitakianga tikai te au painia maroiroi no te putuputuanga, i te akakeu i te inangaro no te angaanga orometua e te akamaroiroi i etai ke kia painia. I mua ake ka tuku ei i taau patianga kia riro ei painia tamou, e mea tau kia meitaki toou akaraanga i roto i te putuputuanga e kua pou e ono marama i toou papetitoanga.

¹⁴ Au painia takake, ka ikiia mai ratou no roto i te au painia tamou tei kiteaia to ratou tukatau i roto i te angaanga orometua. Kia papa ua ratou i te tavini i te ngai ua atu ka tuku te opati Betela ia ratou. Maataanga te taime, e au ngai mamao teia ka tukuia ratou kia kimi i te aronga tei tau, e kia akatumu i te au putuputuanga ou. Tetai au taime ka tukuia te au painia takake ki te au putuputuanga tei anoano tauturu i roto i ta ratou ngai tutu evangeria. Tetai au painia takake e aronga pakari, e tukuia ana ratou kia tauturu i te au putuputuanga rikiriki noatu kare tikai e anoanoia te aronga angaanga no te ngai tutu. E orongaia ana tetai manga moni tauturu na te au painia takake ei akono ia ratou. Tetai au painia tauturu e ikiia ana ratou kia tavini no tetai tuatau poto ua.

MITINARI

¹⁵ Na te Kumiti Raverave o te Pupu Akaaere e iki i te au mitinari, e oti ka tuku te Kumiti Opati Betela ia ratou kia angaanga i roto i te au ngai e manganui ua atu te tangata. Riro ta ratou angaanga ei akatinamou e ei akaketaketa i te turanga o te angaanga tutu evangeria e te putuputuanga. E tereniia ana te au mitinari i ko i te Apii no te Aronga Tutu Evangeria o te Patireia. Ka orongaia tetai ngai nooanga no ratou e tetai manga moni tauturu ei akono ia ratou.

ANGAANGA KOTINGA

¹⁶ Te aronga tei ikiia e te Pupu Akaaere ei au akaaere kotinga, ka tereniia ratou na mua kia tukatau ei au tauturu akaaere kotinga. E mea inangaro na teia au tangata te angaanga orometua e to ratou au oa Kerititiano. E au painia aruaru ratou e te maroiroi i te apii i te Pipiria, e te tukatau i te ako e te apii. E mea umere tikai to ratou tu i te akatupu i te ua o te vaerua, tu ngaueue kore, tu tau, e te kite pakari. Me e taeake akaipoipo aia, e mako tana vaine painia e tona tu ki etai ke. E vaine maroiroi aia e te tukatau i roto i te angaanga tutuanga. Kua mārama katoa aia i tana apainga ei vaine kauraro, kare aia e maani i te ikianga no tana tane, e kare aia e maani e nana ua te tuatua. E ngatā te apainga a te au akaaere kotinga e ta ratou au vaine, te ō maira te angaanga pakari. Te aronga e inangaro ra i te rave i teia angaanga, ka anoanoia te oraanga kopapa matutu. Kare te au painia e tuku i te patianga no te angaanga kotinga mari ra ka akakite ratou ki te akaaere kotinga, nana e akamārama mai eaa ta ratou ka rave.

APII TERENI OROMETUA A IEHOVA

¹⁷ Apii no te Aronga Tutu Evangeria o te Patireia: E maata te aronga tutu evangeria o te Patireia e anoanoia nei ei tutu i roto i te au ngai kare e angaanga putuputuia ana, e te tauturu i te putuputuanga. Ka rauka i te au taeake e te au tuaine kare i akaipoipo, e te au tokorua akaipoipo, kia tuku i ta ratou patianga kia tereniia i ko i te Apii no te Aronga Tutu Evangeria o te Patireia. Me oti ratou i te tereniia, ka tukuia ratou kia tavini ei au painia tamou i te au ngai e anoano maataia ra te tauturu i to ratou enua. Te aronga ka inangaro, ka orongaia tetai au tuanga angaanga ke atu i to ratou enua me kore i tetai enua ke. Ka tukuia etai atu kia tavini ei au painia tauturu me kore ei au painia takake. Te au painia ka inangaro i te aere ki teia apii, ka akakiteia te au umuumuanga kia ratou i roto i te uipaanga ka raveia no teia akakoroanga i ko i te uruoaanga tapere.

¹⁸ Apii Pipiria Punanga Tiaki o Gileada: Te au taeake e te au tuaine kare i akaipoipo, e te au tokorua akaipoipo tei ikiia kia aere ki teia apii, ka kite ratou i te reo papaa e te tavini ra ei tavini tamou. Ka tukatau ratou i te turu e te akamou ki te au akanoonooanga no te angaanga tutu evangeria me kore, te akaaere anga o te opati Betela. Te kiteia ra to ratou rekareka i te tavini i to ratou au taeake, e ka rauka ia ratou te tauturu i etai ke na roto i te tu maru, kia kite e kia akono i ta Iehova aratakianga na roto i tana Tuatua. Te pati atu nei te Kumiti Opati Betela i te aronga ka inangaro, kia tuku mai i ta ratou patianga. Ka tukuia te aronga tei oti ta ratou apii ki te au ngai tutu evangeria me kore ki te opati Betela i tetai enua ke me kore i to ratou enua.

ANGAANGA I BETELA

¹⁹ E tikaanga ngateitei tikai kia tavini i Betela. Te aiteanga o te ingoa Betela, koia oki ko te “Are o te Atua,” e kua tau rai teia ingoa no teia au ngai e raveia nei te au angaanga a te Atua. E angaanga puapinga ta te au taeake e te au tuaine e rave nei i Betela, i te nenei, te uri e te tuʼa aere i te au puka apii Pipiria. E mea puapinga tikai ta ratou angaanga ki te Pupu Akaaere e oronga maira i te aratakianga no te au putuputuanga i te ao katoa. I raro i te akatereanga a te opati Betela, e maata te au taeake uri reo no Betela e noo ra i te au ngai e tuatuaia ra te reo ta ratou e uri ra. Na teia mataara ka rauka ia ratou kia akarongo i te reo e tuatuaia ra i te au rā ravarai. Ka kite ratou i reira e me te mārama ra te tangata i te urianga o te reo i taangaangaia i roto i te au puka.

²⁰ Te angaanga e raveia ana i Betela, kare i te mea māmā. Te maataanga o te au taeake tei patiia kia aere ki Betela, e au mapu maroiroi e te matutu te kopapa e kua akatapu ratou i to ratou oraanga na roto i te papetitoanga. Me inangaro koe i te tavini i Betela, te opati e akono ra i toou enua, e maata atu taau ka kite no runga i te au umuumuanga mei ko mai i te aronga pakari o taau putuputuanga.

ANGAANGA PĀTU ARE

²¹ Te angaanga pātu i te au are akamori ia Iehova, ko tetai tuanga ïa no ta tatou akamorianga, mei te pātu anga rai i te iero o Solomona. (1 Ari. 8:13-18) E mea umere tikai te tu o te au taeake e te au tuaine i te oronga ua i to ratou taime e te apinga kia piri ki teia angaanga.

²² Ka rauka ainei ia koe te tauturu? Me kua papetitoia koe e te inangaro ra kia piri ki teia angaanga, ka āriki rekareka rava te au taeake e akono ra i te angaanga pātuanga i taau tauturu e ka inangaro ratou i te tereni ia koe. Kore ei koe akakite ki te aronga pakari i reira, e ka inangaro koe i te tauturu? Tetai au taeake papetitoia tei tau, kua inangaro ke ana i te piri ki te angaanga pātu i te au are akamori ia Iehova i tetai au enua ke mai.

²³ E maata te ka rauka i te rave i roto i te angaanga pātu are. Tetai aronga kua papetitoia, noatu e meangiti ua to ratou kite pātu are, kua riro ei aronga tauturu i te angaanga a te Local Design/Construction vaitata mai kia ratou. Tetai pae, kua tauturu i te angaanga pātu are i te ngai mamao no tetai tuatau poto e kua ikiia e te opati Betela ei aronga tauturu pātu are no tetai rua epetoma ki te toru marama. Kua kapikiia te aronga tei ikiia kia tauturu no tetai tuatau roa e ko te au tavini pātu are. Me angaanga ratou i tetai enua ke, ka riro mai ratou ei tavini pātu are no te enua ke. Na te Pupu Pātu Are koia oki te au tavini e te au aronga tauturu pātu are e rave maata ana i te angaanga ma te tauturu a te Local Design/Construction e te au putuputuanga. E neke aere ana te au Pupu Pātu Are mei tetai angaanga ki tetai i roto i te ngai e akono ra te opati Betela.

TAAU KA RAVE EI TAVINI IA IEHOVA

²⁴ Me kua akatapu koe i toou oraanga kia Iehova, kua inangaro koe i te tavini Iaia e tuatau ua atu. Eaa te au mea taau ka rave ei tavini ia Iehova? Ka tauturu te reira ia koe kia taangaanga meitaki i toou maroiroi e etai atu au mea. (1 Kori. 9:26) Ka akaketaketa te reira i toou akarongo e ka tauturu ia koe kia akamou ki te au mea maata atu te puapinga, ia koe e tauta ra no tetai au tikaanga ke mai kia tavini ia Iehova.—Phili. 1:10; 1 Timo. 4:15, 16.

²⁵ Kua akanoo te apotetoro a Paulo i tetai akaraanga meitaki kia aru tatou i roto i te akamorianga a Iehova. (1 Kori. 11:1) Kua angaanga pakari a Paulo i te tavini ia Iehova. Kua irinaki aia e na Iehova i oronga mai te tikaanga nona kia tavini Iaia. Ki te au taeake i Korinetia kua tata a Paulo e: “E ngutupa maata e te meitaki tei kiritiia iaku nei.” Kua tupu teia kia tatou me kare ainei? Ae, e manganui te au atianga no tatou kia tavini ia Iehova na roto i te putuputuanga, i te tutu aere anga i te tuatua meitaki o te Patireia. Inara mei ia Paulo rai, e rauka ai kia na roto i taua “ngutupa maata” ra, te ō maira te patoi pakari anga i te ‘enemi e manganui.’ (1 Kori. 16:9) Kua tauta pakari a Paulo i te akakoromaki. Karanga aia e: ‘Te moto nei au i taku kopapa kia vi.’ (1 Kori. 9:24-27) Mei tera ainei to tatou aerenga manako?

²⁶ Te akamaroiroiia nei te katoatoa kia rave maroiroi i ta ratou ka rauka i te tavini ia Iehova. E maata te tavini tamou nei i teia tuatau, no te mea kua akapapa ke ana ratou i te mapuanga kia tavini i te Atua. To ratou tamarikianga, kua akamaroiroi to ratou au metua e etai ke ia ratou. No reira i rauka ai ia ratou te mataora mou i roto i te akamorianga a Iehova—kare roa ratou i ekoko ana i ta ratou ikianga. (Mase. 10:22) Tetai au akakoroanga tau no te tavini tamou ia Iehova, penei kia piri ki te angaanga orometua i te au epetoma, kia akamata i tetai apii Pipiria, e kia akapapa meitaki no te au uipaanga. Te mea puapinga, kia vai ngaueue kore tatou e kia rave akaope i ta tatou angaanga orometua. Me akapera tatou, ka akangateitei ua atu rai tatou ia Iehova e tae ua atu ki te openga o ta tatou i akakoro koia oki, kia tavini ia Iehova e mutu kore ua atu.—Luka 13:24; 1 Timo. 4:7e, 8.