Au Apii Teokaratiki—Akapapu Anga i to Iehova Aroa

KO IEHOVA to tatou “Pu Ikuiku Maata Rava Atu.” (Isa. 30:20, NW) Na te aroa i akakeu iaia kia apii e kia tereni i tetai ke. Ei akaraanga, no tona aroa maata kua akaari a Iehova kia Iesu “i te au mea katoa tana tikai e rave ra.” (Ioa. 5:20) No tona aroa ia tatou, tona Au Kite, kua akakeuia a Iehova kia oronga mai kia tatou “i te arero o te aronga i apiiia,” ia tatou e tauta pakari ra i te akangateitei iaia e te tauturu i tetai ke.—Isa. 50:4.

Na te aru anga i to Iehova tu aroa, e taangaanga ana te Kumiti Apiianga o te Pupu Akaaere e tai ngauru apii teokaratiki i te tereni i te aronga e inangaro ra e te tau ra to ratou au turanga kia tomo mai ki roto i teia apiianga. Te manako ra ainei koe i teia au apii ei akapapu anga i to Iehova aroa?

Kia mataora i te tatau no runga i te au apii teokaratiki e te au tuatua a te aronga i tae ana ki te reira. E oti, e ui kia koe uaorai e, ‘Akapeea au me puapingaia mei teia apiianga a te Atua?’

PUAPINGAIA MEI TE TERENIANGA TEOKARATIKI

Ei ‘Atua no te aroa,’ kua oronga mai a Iehova i te terenianga kia puapingaia to tatou oraanga, te akapapa anga ia tatou kia autu i te au akaaoanga, e te tauturu anga ia tatou kia mataora tikai i ta tatou angaanga orometua. (2 Kori. 13:11) Mei te au pipi o te anere mataiti mua rai, kua papa meitaki tatou i te tauturu i tetai ke, i te ‘apii anga ia ratou kia akono i te au mea katoa’ tei akaueia mai kia tatou.—Mata. 28:20.

Noatu e kare e rauka ia tatou i te aere ki teia au apiianga pouroa, ka puapingaia tatou me rave tatou e tai me kore maata atu te apiianga. E ka rauka ia tatou i te taangaanga i te ikuikuanga akatumuia ki runga i te Pipiria. Ka rauka katoa ia tatou i te akamaata atu i to tatou tu karape i roto i te angaanga orometua na te angaanga kapiti anga ki te au tavini tereni meitakiia o Iehova.

Ui kia koe uaorai e, ‘Te akatika ra ainei toku au turanga iaku kia aere atu ki teia au apii?’

E tikaanga ngateitei no te aronga akamori o Iehova kia turuturu i teia au apii puapinga e kia apiiia i reira. Kia riro te terenianga taau i rauka mai ei akavaitata atu ia koe ki te Atua e kia tauturu ia koe kia rave i taau au apainga i mua iaia, tei puapinga atu ra ko te tutu rapurapu anga i te tuatua meitaki.

AKARAANGA I TE AU APII TEOKARATIKI

Apii Orometua Teokaratiki

Akakoroanga: Ei terenianga i te au papuritia kia riro mai ei aronga tutu aere e ei au puapii tukatau no te tuatua meitaki.

Te Roa: Ka rave uaia rai te reira.

Te Ngai: Are Uipaanga Patireia i te reira ngai.

Aronga ka Tau: Te katoatoa te piri putuputu ra ki te putuputuanga, te ariki ra i te au apiianga a te Pipiria, e te rotai ra to ratou oraanga ki te au kaveinga Kerititiano.

Akapeea me o Atu: Na te akaaere Apii Orometua Teokaratiki e tuku atu i te aronga apii kia o atu.

Kua tuatua a Sharon, tei tuia e te maki akangoru no te amyotrophic lateral sclerosis (ALS), e: “Kua apii mai te Apii Orometua Teokaratiki iaku kia rave i te au kimikimianga e kia tuatua i te au manako tau. Kua apii katoa au kia akamanako i te au anoano pae vaerua o tetai ke—eiaa i toku uaorai.”

Kua akakite mai a Arnie, e akaaere tutaka kua roa te tavini anga e: “E tuatua teetee ua ana au mei toku meangiti mai anga e e ngata ana iaku i te akara tika atu ki tetai ke. Kua tauturu mai teia apii iaku kia irinaki papu e kia manako e e puapinga toku. Ma ta Iehova tauturu na roto i teia terenianga, kua kite mai au i te au ravenga no te akaaea meitaki anga e te akamanako meitaki anga. Mataora tikai au e kua rauka iaku i te akapaapaa i te Atua i roto i te putuputuanga e i roto i taku angaanga orometua.”

Apii na te au Mema Ou o Betela

Akakoroanga: Ei tauturu i te au mema ou tei tae mai ki Betela kia puapingaia mei ta ratou tavinianga.

Te Roa: E 45 miniti i te epetoma tataki tai no tetai 16 epetoma.

Te Ngai: Betela.

Aronga ka Tau: E mema tinamou no te pamiri o Betela me kore e tangata tauturu no tetai tuatau poto ua tei akatikaia kia tavini i Betela e tai mataiti me kore roa atu.

Akapeea me o Atu: Ka o atu te au mema o te pamiri Betela.

Kua tuatua a Demetrius, tei aere ana ki teia apii i te au mataiti 1980 e: “Kua tauturu mai teia apii i te akameitaki mai i taku apiianga e te akapapa iaku no te tavinianga i Betela no tetai tuatau roa. Kua rauka i te au puapii, te au apiianga tukeke, e te akoanga tau i te akapapu mai kiaku i to Iehova manako aroa iaku e tona inangaro i te tauturu iaku kia puapingaia i roto i taku tavinianga i Betela.”

Kua tuatua mai a Kaitlyn e: “Kua tauturuia au kia akamanako i te au mea puapinga rava atu—kia riro mai ei tamaine pae vaerua. Kua riro teia Apii no te au Mema Ou ei akamaata atu i toku ariki rekareka ia Iehova, tona are, e tana akaaerenga.”

Apii Orometua no te Patireia

Akakoroanga: Ei terenianga i te au akaaere tutaka, te aronga pakari e i tetai au taime te au tavini orometua kia akaaere e kia akono meitaki i ta ratou au apainga. (Anga. 20:28) E uriuriia ana te au turanga, te au peu, e te au anoano o te au putuputuanga i ko i teia apii. E raveia ana teia apii no tetai au mataiti tei ikiia e te Pupu Akaaere.

Te Roa: Te au mataiti i topa akenei, kua raveia ana teia apii i raro ake i te toru ra no te au akaaere tutaka, e tai e te apa ra no te aronga pakari, e e tai ra no te au tavini orometua.

Te Ngai: Mei tei matauia i te Are Uipaanga Patireia me kore i te Are Akaputuputuanga.

Aronga ka Tau: Te au akaaere tutaka, aronga pakari, me kore au tavini orometua.

Akapeea me o Atu: Ka oronga te akaaere kotinga i tetai patianga ki te aronga pakari e te au tavini orometua. Na te opati manga e pati atu i te au akaaere tutaka.

“Noatu e maata te au manako e uriuriia ana i roto i te apii i roto i tetai tuatau poto ua, te tauturu ra te reira i te aronga pakari kia mataora e kia maroiroi ‘ei au tangata pakari’ i roto i ta Iehova angaanga. Ka apiiia te aronga pakari ou e te aronga pakari kua roa te tavini anga kia tukatau i te tiaki e kia taokotai i roto i te ‘manako okotai.’”—Quinn.

“Kua riro teia terenianga ei tauturu ia matou kia marama meitaki i te au mea no runga i to matou akarongo, te akamatakiteanga ia matou i te au mea kino, e te akakite mai anga i te au mea tau no te akono anga i te anana. Meitaki tikai kua tauturu mai a Iehova ia matou.”—Michael.

Apii Tavini Anga Painia

Akakoroanga: Ei tauturu i teau painia kia ‘rave tamou i ta ratou au angaanga orometua.’—2 Timo. 4:5, NW.

Te Roa: E rua epetoma.

Te Ngai: Na te opati manga e iki i te reira; mei tei matauia i te Are Uipaanga Patireia.

Aronga ka Tau: E painia tamou tei painia ana e tai mataiti me kore kua roa te painia anga.a

Akapeea me o Atu: Ka o atu teau painia tau e ka akakite atu te akaaere kotinga i te reira kia ratou.

“Kua tauturu mai taua apii ra iaku kia akakoromaki i te au akaaoanga i roto i te angaanga orometua e i roto i toku oraanga,” i karanga ai a Lily. “Kua meitaki mai te tu e apii ana au, e me apii i tetai ke, e te taangaanga anga i te Pipiria. Kua papa meitaki au i te tauturu i tetai ke, te turuturu i te aronga pakari, e te tauturu anga i te putuputuanga kia tupu.”

Kua akakite mai a Brenda, tei aere ana ki teia apii no te rua o te taime e: “Kua tauturu te reira iaku kia maroiroi tikai i roto i taku akamorianga, kia akaketaketa i toku akava ngakau, e kia akamanako i te tauturu i tetai ke. Taka ua ra e, e tu oronga ua to Iehova!”

a Me kare e rava ana te au painia ou no te pupu apii, penei ka patiia atu tetai au painia kare i aere ana ki te apii i roto i te rima mataiti i topa, kia aere akaou ki teia apii.

Apii na te Aronga Pakari o te Putuputuanga

Akakoroanga: Ei tauturu i te aronga pakari kia akono meitaki i ta ratou au apainga i roto i te putuputuanga e kia marama tikai i to ratou turanga pae vaerua.

Te Roa: E rima ra.

Te Ngai: Na te opati manga e iki i te reira; mei tei matauia i te Are Uipaanga Patireia me kore i te Are Akaputuputuanga.

Aronga ka Tau: Aronga pakari.

Akapeea me o Atu: Na te opati manga e pati atu i te aronga pakari.

Akara i te au tuatua a tetai pae i roto i te pupu apii 92, i Marike:

“Kua puapinga maataia au mei te apii, te tauturu anga iaku kia akara iaku uaorai e akapeea au me akono i te au mamoe a Iehova.”

“Kua papa au i te akamaroiroi atu i te katoatoa na te akamarama anga i te au tumu manako i roto i te au Tuatua Tapu.”

“Ka taangaanga au i teia terenianga no te katoaangao toku oraanga.”

Apii na te Au Akaaere Tutaka e ta Ratou Au Vaine

Akakoroanga: Ei tauturu i te au akaaere kotinga e te au akaaere tapere kia tukatau meitaki i te tavini i roto i te au putuputuanga ia ratou ‘e angaanga maata ra i te akoanga e te apiianga.’—1 Timo. 5:17; 1 Pete. 5:2, 3.

Te Roa: E rua marama.

Te Ngai: Na te opati manga e iki i te reira.

Aronga ka Tau: E taeake akaaere kotinga me kore e taeake akaaere tapere.

Akapeea me o Atu: Na te opati manga e pati atu i te au akaaere tutaka e ta ratou au vaine.

“Kua maata atu to matou tu ariki rekareka no to Iesu taoonga upoko o te akaaerenga. Kua marama matou e ka anoanoia kia akamaroiroiia te au taeake e kia akaketaketaia te taokotaianga o te au putuputuanga tataki tai. Kua mataora matou i te kite e noatu ka oronga te akaaere tutaka i te akoanga me kore te akatanotanoanga i tetai au taime, tona akakoroanga maata koia oki kia tauturu i te au taeake kia kite e te aroa maira a Iehova ia ratou.”—Joel, pupu mua, 1999.

Apii Pipiria na te Au Taeake Kare i Akaipoipo

Akakoroanga: Ei terenianga i te aronga pakari e te au tavini orometua kare i akaipoipo no tetai au apainga ke atu i roto i te akaaerenga a Iehova. Ka orongaia tetai tukuanga angaanga ki te maata anga o te aronga tei na roto ana i te apii i roto i to ratou enua, te ngai e anoanoia ra te tauturu. Penei ka tukuia atu tetai pae ki tetai enua ke. E penei ka tavini tetai pae ei au painia takake no te tuatau poto ua kia akatuera e kia akamaata atu i te angaanga i roto i te au ngai mamao.

Te Roa: E rua marama.

Te Ngai: Na te opati manga e iki i te reira; mei tei matauia i te Are Uipaanga Patireia me kore i te Are Akaputuputuanga.

Aronga ka Tau: Au taeake kare i akaipoipo, e 23 mataiti ki te 62 mataiti, meitaki te oraanga kopapa e te inangaro ra i te tavini i te au ngai e anoanoia ra te tauturu. (Mare. 10:29, 30) Kua tavini ana ratou ei painia tamou e rua mataiti e kua tavini ana ei aronga pakari me kore ei au tavini orometua e rua mataiti.

Akapeea me o Atu: Ka raveia tetai uipaanga no te oronga mai anga i tetai au akakiteanga i ko i te akaputuputuanga kotinga no te aronga e inangaro ra.

“Kua riro te piri tikai anga ki roto i teia apii i te akatika i to Iehova vaerua kia rave i te au akatanotanoanga,” i karanga ai a Rick, mei te pupu apii 23, i Marike. “Me oronga mai a Iehova i tetai tukuanga angaanga, ka turuturu mai aia ia koe kia rave i taua angaanga ra. Kua kite mai au e me akamanako au i to te Atua anoano e kare i toku uaorai, ka akamaroiroi mai aia iaku.”

“Kua marama mai au i te mataara ta te akaaerenga o te Atua e angaanga ra mei tetai temeio rai i teia tuatau,” i akakite mai ei a Andreas, tei tavini ana i Tiamani. “Kua tauturu te terenianga iaku kia papa au no te angaanga a te tuatau ki mua. Kua apii katoa mai te au akaraanga Pipiria iaku i teia tuatua puapinga: Ka mataora tikai au me tavini au i toku au taeake e ia Iehova.”

Apii Pipiria na te Au Tokorua Akaipoipo Kerititiano

Akakoroanga: Ei tereni meitakianga i te au tokorua akaipoipo kia taangaanga meitakiia e Iehova e tana akaaerenga. Ka tukuia te maata anga o te aronga tei rave i te apii kia tavini i te ngai te anoanoia ra te tauturu i to ratou enua. Ka orongaia tetai apainga ki tetai pae kia tavini i tetai enua ke me ka rauka ia ratou. E penei ka tavini tetai pae ei au painia takake no te tuatau poto ua kia akatuera e kia akamaata atu i te angaanga i roto i te au ngai mamao.

Te Roa: E rua marama.

Te Ngai: Ka raveia teia apii i Marike, e ka akamata i roto ia Tepetema 2012, e ka rave katoaia i roto i te au ngai o te opati manga tei ikiia i te ao katoa, mei tei matauia i te Are Uipaanga Patireia me kore i te Are Akaputuputuanga.

Aronga ka Tau: Au tokorua akaipoipo e 25 mataiti ki te 50 mataiti, meitaki te oraanga kopapa e te tau ra te au turanga kia tavini i te ngai e anoanoia ra te tauturu, e ka ariki e: “I na, teia au; ko au taau e tono.” (Isa. 6:8) Kua akaipoipo ana ratou e rua mataiti e kua rave ana i te tavinianga tamou e rua mataiti kare i akamutu ana. Kua riro ana te tane ei tangata pakari me kore ei tavini orometua e rua mataiti kare i akamutu ana.

Akapeea me o Atu: Ka raveia tetai uipaanga no tetai au akakiteanga i ko i te uruoaanga tapere no te aronga e inangaro ra. Me kare e uipaanga i ko i te au uruoaanga i roto i toou enua e ka inangaro koe kia tae atu, e tata atu ki toou opati manga no tetai atu au akakiteanga.

“Kua riro teia apii e varu epetoma ei tauianga maata i to maua oraanga e ei tikaanga ngateitei no te au tokorua akaipoipo te inangaro ra kia tavini maata atu ia Iehova! Ka tauta maua i te aru i tetai oraanga tau te ka tauturu ia maua kia taangaanga meitaki i to maua taime.”—Eric e Corina, pupu mua, 2011.

Apii Pipiria Punanga Tiaki o Gileada

Akakoroanga: Ei terenianga i te aronga apii kia tavini ei au mitinari i roto i te au ngai e maata te au tangata, kia riro mai ei au akaaere tutaka, me kore e mema no Betela. Ko te akakoroanga kia akamaroiroi e kia akatinamou i te angaanga tutuanga e te akaaerenga o te opati manga.

Te Roa: E rima marama.

Te Ngai: Ngai Apii Anga Punanga Tiaki i Patterson, New York, U.S.A.

Aronga ka Tau: Au tokorua akaipoipo e tavini ra i roto i tetai tuanga o te tavinianga tamou takake—koia oki, ei au mitinari kare i aere ana ki te apii, au painia takake, au akaaere tutaka, me kore e au mema no Betela. Kua tavini ana ratou i roto i teia au angaanga e toru mataiti kare i akamutu ana. Kia tukatau ratou i te tuatua, te tatau, e te tata i roto i te reo Papaa.

Akapeea me o Atu: Penei na te Kumiti Manga e pati atu i te au tokorua akaipoipo.

Te tavini nei a Lade raua ko Monique no Marike mai i Aperika. “Kua akapapa te Apii Gileada ia maua kia aere ki tetai ua atu ngai i teianei ao, e kia angaanga kapiti atu ki to maua au taeake,” i karanga ai a Lade.

Kua tuatua katoa a Monique e: “Iaku e taangaanga ra i taku i apii mai mei te Tuatua a te Atua, kua mataora tikai au i taku tukuanga angaanga. Kua kite mai au i taua tu mataora ra ei akapapu anga i to Iehova aroa.”

Apii na te Au Mema o te Kumiti Manga e ta Ratou Au Vaine

Akakoroanga: Ei tauturu i te aronga e tavini ra i roto i te au Kumiti Manga kia akaaere i te au kainga Betela, kia akono i te au mea e tupu ra i roto i te au putuputuanga,e kia akaaere i te au kotinga e teau tapere. Ka apii katoa ratou no runga i te uri reo, te neneianga, e te tukuanga i te au puka.

Te Roa: E rua marama.

Te Ngai: Ngai Apii Anga Punanga Tiaki i Patterson, New York, U.S.A.

Aronga ka Tau: E taeake no roto i te Kumiti Manga me kore Kumiti Enua me kore kua ikiia aia no te reira.

Akapeea me o Atu: Na te Pupu Akaaere e pati atu i te au taeake tau e ta ratou au vaine.

Te tavini ra a Lowell raua ko Cara, mei te pupu apii 25, i Naiteria. “Kua akamaaraia mai kiaku e noatu e maata taku angaanga me kore eaa te angaanga tei tukuia mai kiaku, ko te rave anga i te au mea pae vaerua te taviri no te akamarekaanga ia Iehova,” i karanga ai a Lowell. “Kua apii katoa mai te reira ia tatou i te puapinga kia aru tatou i te tu aroa ta Iehova e akaari ra ki tona au tavini.”

“E akamanako ua ana au i teia tuatua,” i tuatua mai ei a Cara. “Me kare e rauka iaku i te akamarama i tetai apinga na roto i te tu mama ua, ka anoanoia au kia apii i taua tumu manako ra i mua ake ka apii atu ei au i tetai ke.”