Ko Iesu Ainei te Atua Mana Katoatoa?

Au pauanga matauia:

▪ “Ae, ko Iesu te Atua Mana Katoatoa.”

▪ “Na Iesu i akatutu mai i te tu o te Atua i roto i te kopapa.”

Eaa ta Iesu i tuatua?

▪ “Naringa kotou i anoano mai iaku, kua rekareka kotou, ko au i karanga e ka aere au ki te Metua ra: e maata oki toku Metua iaku.” (Ioane 14:28) Kua akakite a Iesu e kare raua ko tona Metua e aiteite ana.

▪ “Te aere nei au ki toku Metua ra, e ki to kotou Metua ra; ki toku Atua, e ki to kotou Atua ra.” (Ioane 20:17) Kare a Iesu i tuatua ana e ko te Atua aia inara kua tuatua aia i te Atua ei Peretana ke atu.

▪ “Kare oki i taku uaorai te tuatua taku i karanga atu na; na te Metua ra i tono mai iaku nei, i akaue mai iaku i te tuatua, kia tuatua au e kia apii au.” (Ioane 12:49) Kare ta Iesu au apiianga e nana uaorai; no ko mai ra te reira i te Metua.

KUA tuatua a Iesu iaia ei Tamaiti na te Atua, kare e ko te Atua Mana Katoatoa. Naringa a Iesu e ko te Atua, te pure ra aia i reira kiaai, iaia i runga nei i te enua? (Mataio 14:23; 26:26-29) E mea papu e kare a Iesu e akamea ua ra e te tuatua ra aia ki tetai tangata ke!

Te patianga tetai nga pipi a Iesu kiaia no tetai nga taoonga i roto i tona Patireia, kua pau atu aia e: “Kareka te noo i taku rima katau, e i taku rima kaui, kare ïa e tika iaku kia oronga atu, mari ra no te aronga i akonoia e taku Metua no ratou ra.” (Mataio 20:23) Te pikikaa ra ainei a Iesu ia raua i tona tuatua anga e kare iaia te mana i te oronga i ta raua e pati maira? Kare rava ia! Inara, te akakite akaaka ra aia e tei te Atua anake ua te mana i te rave i taua au ikianga ra. Kua akamarama katoa a Iesu e ko tetai au mea kare aia e te au angera i kite, inara ko tona Metua anake ua tei kite i te reira.—Mareko 13:32.

E iti mai ainei a Iesu i te Atua no te tuatau ua iaia i runga nei i te enua ei tangata? Kare. I muri ake i tona mate anga e tona tuakaouanga mai, kua akataka mai te Pipiria ia Iesu e tei raro ake aia i te Atua. Te akamaara maira te apotetoro a Paulo kia tatou e “to te Mesia upoko, ko te Atua ïa.” (1 Korinetia 11:3) Te karanga ra te Pipiria e i te tuatau ki mua ka “tuku tikaia te au mea ravarai ki raro ake iaia ra, ei reira e kitea puiaʼi e, i raro katoa ake te Tamaiti uaorai iaia, i tei tuku i te au mea katoa i raro ake iaia ra; kia riro ko te Atua i rungao i te au mea katoa i te au ngai ravarai.”—1 Korinetia 15:28.

Te taka meitaki ra e, kare a Iesu e ko te Atua Mana Katoatoa. No tera tumu i tuatua ai aia i tona Metua e ko “taku Atua.”—Apokalupo 3:2, 12; 2 Korinetia 1:3, 4.a

[Tataanga Rikiriki i Raro]

[Tataanga i te kapi 7]

Kua tuatua a Iesu e ko tetai au mea kare aia e te au angera i kite, inara ko tona Metua anake ua tei kite i te reira