Ta te Aere Anga ki te Uipaanga e Akakite Maira no Runga ia Tatou

1-2. (a) Eaa ta Iehova e kite maira, me akaputuputu mai e mirioni ua atu, ki te Kaikai Anga Aiai a te Atu? (Akara i te tutu i te kapi mua.) (e) Eaa ta tatou ka uriuri i teia atikara?

AKAMANAKO ana i ta Iehova e kite maira, me akaputuputu mai e mirioni ua atu i te ao katoa ki te Kaikai Anga Aiai a te Atu. E maata atu tana e kite ra; te kite meitaki ra aia i te tangata tataki tai i reira. Ei akaraanga, te kite ra aia i te aronga tei tae tiratiratu mai i te au mataiti ravarai. I rotopu ia ratou penei e aronga tei aere mai noatu te au takinokino anga. Kare tetai pae e aere putuputu ana ki tetai au uipaanga mai, inara kua kite ratou e e mea puapinga kia tae mai ki te Akamaaraanga. Te kite katoa ra a Iehova i te aronga tei aere mai ki te Akamaaraanga no te taime mua, penei kia kite eaa te tupu ana i reira.

² Papu e, te mareka maira a Iehova i te kite i te manganui tei tae mai ki te Akamaaraanga. (Luka 22:19) Inara, kare a Iehova e manako maata atu ana i te numero o te aronga tei tae mai. Inangaro maata ra aia i te kite i te tumu i aere mai ei ratou. I teia atikara, ka uriuri tatou i tetai uianga puapinga tikai: Eaa te tumu i aere ei tatou ki te Akamaaraanga i te au mataiti e te au uipaanga epetoma, ta Iehova i oronga mai no te aronga tei inangaro iaia?

NA TE TU AKAAKA E AKAKEU IA TATOU KIA AERE

3-4. (a) Eaa tatou ka aere ei ki te au uipaanga? (e) Eaa ta te aere anga ki te au uipaanga e akakite maira no runga ia tatou? (ng) Tei akakiteia ia 1 Korinetia 11:23-26, eaa te tumu auraka tatou e akatau i te Akamaaraanga?

³ Te tumu i aere ei tatou ki te au uipaanga putuputuanga, no te mea e tuanga te reira no ta tatou akamorianga. Ka aere katoa tatou no te mea ka apiiia tatou e Iehova i ko i te au uipaanga. Kare te aronga ngakau parau e inangaro ana kia apiiia ratou. (3 Ioa. 9) Ei akatuke anga, te inangaro nei tatou kia apiiia mai e Iehova e tana akaaerenga.—Isa. 30:20; Ioa. 6:45.

⁴ Te akakite maira ta tatou aere anga ki te au uipaanga—e e tu akaaka to tatou, e te inangaro ua ra kia apiiia tatou. I te po o te Akamaaraanga i te mate o Iesu, ka aere tatou kare no te mea e apainga te reira, mari katoa ra, no te mea te akarongo akaaka ra tatou ki te akaueanga a Iesu: “E pera kotou ei manako anga iaku.” (E tatau ia 1 Korinetia 11:23-26.) Ka akaketaketa te reira uipaanga i to tatou manakonakoanga no te tuatau ki mua, e te akamaara maira i to Iehova aroa maata no tatou. Inara, kua kite a Iehova e te anoanoia ra tatou kia akamaroiroiia e kia akaketaketaia e tere atu i te okotai taime i te mataiti. No reira te oronga maira aia i te au uipaanga i te epetoma tataki tai e te akamaroiroi maira ia tatou kia tae. Na te tu akaaka e akakeu ia tatou kia akarongo. E akapou maata ana tatou i te ora i te au epetoma ravarai no te akapapa e kia tae ki te au uipaanga.

5. No teaa te aronga akaaka ka āriki ei i te patianga a Iehova?

⁵ I te au mataiti ravarai, e āriki ana te aronga akaaka i te patianga a Iehova kia apiiia e ïa. (Isa. 50:4) E reka ana ratou i te aere ki te Akamaaraanga, e oti kua aere katoa ki te au uipaanga. (Zeka. 8:20-23) Te rekareka kapiti pouroa ra tatou kia apiiia e kia aratakiia e Iehova, “[to tatou] tauturu e [to tatou] ora.” (Sala. 40:17) E tikai, eaa te mea mataora roa atu—te mea puapinga rava atu—i te āriki i tetai patianga kia apiiia e Iehova e Iesu, te Tamaiti tana e akaperepere tikai ra?—Mata. 17:5; 18:20; 28:20.

6. Akapeea te tu akaaka te tauturu anga i tetai tangata kia aere mai ki te Akamaaraanga?

⁶ I te au mataiti tataki tai, e tauta ana tatou i te pati i te katoatoa kia aere mai ki te Akamaaraanga o te matenga o Iesu. E manganui te aronga akaaka tei puapingaia na te āriki anga i ta tatou patianga. Akamanako ana i tetai akaraanga. No tetai au mataiti i topa ake nei, kua tae tetai patianga Akamaaraanga ki tetai tangata, inara kua akakite aia ki te taeake tei oake atu i te reira e kare aia e tae mai. Inara, i te po o te Akamaaraanga, kua poitirere te taeake te kite anga i te reira tangata te tomo anga mai ki roto i te Are Uipaanga Patireia. Kua umere tikai te reira tangata i te tu oaoa o te au taeake e kua akamata aia i te aere mai ki te au uipaanga epetoma. Te tika, e toru rai taime kare aia i tae mai ki te au uipaanga i tera mataiti. Eaa tei tauturu iaia kia āriki i te reira? No tona tu akaaka i taui ei aia i tona manako. I muri mai, karanga te taeake tei pati iaia, “E tangata akaaka tikai aia.” Kare e ekoko e na Iehova i akavaitata mai i teia tangata Kiaia, e i teianei e taeake papetitoia aia.—2 Samu. 22:28; Ioa. 6:44.

7. Akapeea ta tatou e apii ra i ko i te au uipaanga e te tatau ra i roto i te Pipiria me tauturu ia tatou kia akaaka?

⁷ Ta tatou e apii ra i ko i te au uipaanga e ta tatou e tatau ra i roto i te Pipiria, ka tauturu te reira ia tatou kia akaari i te tu akaaka. I te au epetoma i mua ake i te Akamaaraanga, ka akamou ta tatou uipaanga ki runga i te akaraanga e te tu akaaka o Iesu, tana i akaari i te oronga anga i tona oraanga ei atinga oko. E i te au rā i mua ake i te Akamaaraanga, kua akamaroiroiia tatou kia tatau i te au irava Pipiria no runga i te matenga e te tuakaouanga o Iesu. Na roto i ta tatou i apii mai i taua au uipaanga e i tatau i roto i te au irava Pipiria, ka āriki maata atu tatou i te atinga oko o Iesu. Te akakeuia ra tatou kia aru i tona tu akaaka e kia rave i to Iehova anoano, noatu te ngata i te reira.—Luka 22:41, 42.

KA TAUTURU TE TU NGAKAU TOA IA TATOU KIA AERE

8. Akapeea a Iesu te akaari anga i te tu ngakau toa?

⁸ Ka tauta katoa tatou i te aru i to Iesu tu ngakau toa. Akamanako ana i tona tu ngakau toa i te au rā i mua ake i tona matenga. Kua kite meitaki aia e ka taakama tona au enemi iaia, ka papa, e ka tamate atu iaia. (Mata. 20:17-19) Noatu rai, kua puareinga ua aia i te mate. Te tae anga mai te tuatau, karanga aia ki tana au apotetoro tiratiratu, i te pae iaia i Getesemane: “Ka tu, e taki aere tatou: i na, te vaitata mai nei te pikikaa iaku nei.” (Mata. 26:36, 46) Te tae anga mai te pupu kino no te tapeka iaia, kua tu aia ki mua ia ratou, ma te akataka iaia uaorai, e kua akaue i te au vaeau kia tuku i tana au apotetoro kia aere. (Ioa. 18:3-8) Mei teaa atura to Iesu tu ngakau toa! I teia tuatau, te tauta nei te au Kerititiano akatainuia e te au mamoe ke i te aru i te tu ngakau toa o Iesu. Akapeea ra?

9. (a) Eaa tatou ka anoano ei i te tu ngakau toa kia aere putuputu ki te au uipaanga? (e) Akapeea to tatou akaraanga me akakeu i te au taeake akarongo i roto i te areauri?

⁹ Kia tae putuputu ki te au uipaanga, penei ka anoanoia tatou kia akaari i te tu ngakau toa noatu te au turanga ngata. Te aere ra tetai pae o te au taeake e te au tuaine ki te au uipaanga noatu to ratou mamae, te taitaia, me kore te au manamanata i te pae kopapa. Ma te ngakau toa, ka tae tetai pae ki te au uipaanga noatu te patoi anga pakari a te kopu tangata e te aronga kavamani. Akamanako ana akapeea to tatou akaraanga me akamaroiroi i te au taeake akarongo i roto i te areauri. (Ebe. 13:3) Me rongo ake ratou e kua tavini ua atu tatou ia Iehova noatu te au timataanga, ka akamaroiroiia ratou kia akarongo, kia ngakau toa, e kia vai tiratiratu ua rai. Kua tupu rai teia ki te apotetoro ko Paulo. Iaia i roto i te areauri i Roma, kua rekareka aia i te akarongo e te tavini tiratiratu ra tona au taeake i te Atua. (Phili. 1:3-5, 12-14) I mua ua ake me kore i muri ake i tona tukuia anga kia aere, kua tata a Paulo i tana reta ki to Epera. I roto i tana reta kua akamaroiroi aia i te au Kerititiano tiratiratu “kia vai marie mairai [to ratou] aroa taeake” e auraka rava e akaruke i to ratou akaputuputu anga.—Ebe. 10:24, 25; 13:1.

10-11. (a) Koai ma ta tatou ka pati ki te Akamaaraanga? (e) Eaa ta Ephesia 1:7 tumu no te reira?

¹⁰ Ka akaari tatou i te tu ngakau toa me pati i te au kopu tangata, te au oa angaanga, e tetai ke ki te Akamaaraanga. Eaa te tumu ka pati ei tatou i teia aronga? Te mareka tikai ra tatou i ta Iehova e Iesu i rave no tatou, e kare tatou e tapupu i te pati i tetai ke kia tae mai ki te Akamaaraanga. Ka inangaro tatou kia puapinga katoa ratou mei to Iehova tu “aroa ua” na roto i te atinga oko.—E tatau ia Ephesia 1:7; Apo. 22:17.

¹¹ Me akaari tatou i te tu ngakau toa na te aravei kapiti anga, te akaari katoa ra tatou i tetai akaou tu, tei akaari meitakiia e te Atua e tana Tamaiti.

KA AKAKEU TE TU AROA IA TATOU KIA AERE

12. (a) Akapeea ta tatou au uipaanga te akaketaketa anga i to tatou aroa no Iehova e Iesu? (e) Eaa ta 2 Korinetia 5:14, 15 e akamaroiroi maira ia tatou kia rave te aru anga ia Iesu?

¹² Na to tatou aroa no Iehova e Iesu, e akakeu ana ia tatou kia aere ki te au uipaanga. Na roto i ta tatou e apii ra i ko i te au uipaanga, ka oonu atu to tatou aroa no Iehova e tana Tamaiti. Te akamaara putuputuia maira tatou i ko i te au uipaanga no ta raua i rave no tatou. (Roma 5:8) Te riro ra te Akamaaraanga ei akamaara mai i to raua aroa oonu no tatou, pera katoa no te aronga kare i āriki ake i te puapinga o te atinga oko. Ma te tu mareka, ka tauta tatou i te aru i to Iesu tu i te au rā ravarai. (E tatau ia 2 Korinetia 5:14, 15.) Kapiti mai, ka akakeu katoaia to tatou ngakau kia akapaapaa ia Iehova no tei oronga mai i te atinga oko. Tetai mataara ka rauka ia tatou i te akapaapaa iaia, na te paupau anga ma te ngakau tae i ko i ta tatou au uipaanga.

13. Akapeea tatou me akaari i to tatou aroa maata no Iehova e tana Tamaiti? Akamārama mai.

¹³ Ka akaari tatou i to tatou aroa maata no Iehova e tana Tamaiti na te akaatinga anga ia tatou uaorai no raua. Te maata anga o te taime, kia akaatinga ua rai tatou i te tuatau kia tae ki te au uipaanga. E manganui te au putuputuanga te rave ra i tetai o ta ratou uipaanga i muri ua ake me akaoti te ngai angaanga e penei kua roiroi ratou. Te raveia ra tetai mai uipaanga i te openga epetoma, te taime tikai te akangaroi ra te tangata. Te kite maira ainei a Iehova e te aere nei tatou ki te au uipaanga noatu to tatou roiroi? Ae! Te tika, ko te maata atu i ta tatou tauta anga, ko te maata atu ïa ta Iehova mareka anga i to tatou aroa nona.—Mare. 12:41-44.

14. Akapeea a Iesu te akaari anga i te aroa akaatinga?

¹⁴ Kua akanoo a Iesu i te akaraanga o te aroa akaatinga. Kua puareinga ua aia i te mate no tana au pipi e kia akatupu i to ratou au anoano i te au rā ravarai i mua ake i tona. Ei akaraanga, kua aravei kapiti aia ki tana au pipi noatu tona roiroi e te ngakau taitaia. (Luka 22:39-46) E kua akamou aia ki runga i tana ka rauka i te oronga ki tetai ke, kare ki runga i tana ka rauka mei ia ratou. (Mata. 20:28) Me e aroa ketaketa to tatou no Iehova e no te au taeake, ka rave tatou i ta tatou ka rauka kia tae ki te Kaikai Anga Aiai a te Atu, pera katoa te au uipaanga pouroa a te putuputuanga.

15. Koai tikai ta tatou ka inangaro i te tauturu?

¹⁵ Tei roto tatou i te akataeake anga Kerititiano mou, e te rekareka ra tatou i te akapou maata i te tuatau no te pati i te aronga ou kia kapiti mai kia tatou. Inara, te inangaro tikai ra tatou i te tauturu i te aronga o “te ngutuare o te akarongo ra,” koia oki, te aronga tei paruparu te akarongo. (Gala. 6:10) Te akapapu ra tatou i to tatou aroa no ratou, na te akamaroiroi anga ia ratou kia aere mai ki te au uipaanga, i te tuatau tikai o te Akamaaraanga. Mei ia Iehova e Iesu, te mataora tikai ra tatou me oki mai te aronga tei paruparu te akarongo kia Iehova, to tatou Metua aroa e te Tiaki.—Mata. 18:14.

16. (a) Akapeea tatou me akamaroiroi i tetai e tetai, e eaa ta te au uipaanga ka akatupu? (e) No teaa teia, i riro ei ei tuatau meitaki no te akamaara i te au tuatua a Iesu ia Ioane 3:16?

¹⁶ I te au epetoma e tu maira, e pati i te katoatoa kia aere mai ki te Akamaaraanga a te aiai Varaire, Aperira 19, 2019. (Akara i te pia “Ka Pati Ainei Koe ia Ratou?”) I teia mataiti e tu maira, kia akamaroiroi tatou i tetai e tetai na te aere putuputu anga ki te au uipaanga katoatoa ta Iehova e oronga maira. I te openga o teia akatereanga e vaitata maira, ka anoanoia ta tatou au uipaanga kia tauturu ia tatou kia vai akaaka, kia ngakau toa, e kia aroa ua. (1 Tesa. 5:8-11) Ma te ngakau katoa, e akaari tatou kia Iehova e tana Tamaiti i to tatou mareka anga, no to raua aroa maata ia tatou!—E tatau ia Ioane 3:16.