Èske sé in vi komsa ke Bondieu té ve pou nou ?
KOSA ou lir dann journal ? Kosa ou voi dann télé é ou ékout dann radio ? I mont ke néna bann krim, bann gèr é bann téroris. É petèt ou mèm ou souf parske ou lé malad oubien parske in moun ou ièm lé mor.
Kalkul in kou bann késtion la :
Èske sé sa Bondieu té ve pou moin é pou mon fami ?
Kèl koté mi pe trouv lèd pou afront mon bann problèm ?
Èske in jour nora la pé su la tèr ?
La Bib i donn bann répons pou bann késtion la.
LA BIB I DI KE BONDIEU VA APORT BANN GAYAR CHANJMAN SU LA TÈR.
Bann domoun va pu konèt la soufrans, zot va pu viéyi é zot va pu konèt la mor (Révélasion 21:4).
« Le moun i boit va soté kom in kabri » (Izai 35:6).
Bann zaveug va voir klèr (Izai 35:5).
Bann mor va reviv (Jan 5:28, 29).
Okin moun va tonm malad (Izai 33:24).
Tout bann domoun nora manjé an grann kantité (Psom 72:16).
SAK LA BIB I ANSÈGN I PE ÈD A OU
Petèt ou pouré pansé ke bann promès ke lé ékri dan bann paj 4 é 5 dann liv la, lé jus in rèv. Mé Bondieu i promèt ke li va réaliz tousala dann pa lontan. La Bib i ésplik koman li va fé sa.
Mé la Bib i fé plus ke sa : li mont a nou osi koman èt vréman ereu koméla mèm. Majinn sak i trakas a ou toutsuit la. Èske sé in mové santé ? Bann problèm dan la fami ? Bann problèm larjan ? In moun ke ou ièm lé mor ? La Bib i pe èd a ou afront bann problèm la. Li donn osi bann répons ki konsol a nou su bann késtion an d’sou la :
Akoz nou souf ?
Koman afront nout bann problèm ?
Koman nout fami i pe èt ereu ?
Kosa i éspas apré la mor ?
Èske in jour nou va revoir bann moun nou ièm é ke lé mor ?
Pou kosa nou pe èt sur ke Bondieu va réaliz tout sak li la promèt ?
Si ou lir liv la, sé ke ou ve konèt sak la Bib i ansègn. Liv la va èd a ou. Dann chak paragraf, néna bann késtion ke va pèrmèt a ou mieu konprann la Bib. Domoun par milion i ièm koz su la Bib avèk bann Témoin Jéova. Nou éspèr ou va aprésié sa osi. Nou souèt ke Bondieu i béni bann zéfor ou fé pou dékouv sak la Bib i ansègn !