BANN JEUN I POZ AZOT BANN KÉSTION
Frékanté (1è parti) : Èské mi lé paré ?
Dan lartik-la
Kosa i vé dir frékant in moun ?
Pou désèrtin moun, frékanté sé in pastan kom in not. Parkont, dan lartik-la, kan i di « frékanté », sé kan in jènjan é in jènfi, i vé oir si zot i pé marié ansanm inn é lot. Pousa, zot i fé bann zaktivité pou oir si zot dé i akord. Donk, kan i frékant, sé dan lintansion marié é pa jus pou fé son joli kèr.
Moman doné, sa va mèn aou pran in désizion : soi marié soi arèt frékanté. I fo dé zafèr-la i rès bien dan out tèt, kan ou komans frékanté.
O final : Si ou di, ou lé paré pou frékanté, sé ké ou lé paré pou marié osi.
Si ou frékant in moun san lintansion marié èk li, sé kom si ou té sava pas in lantrotien, mé ou vé pa gingn lo travay.
Èské ou lé paré ?
Kom frékant in moun i pé fini par in mariaj, alor réfléchi bien su out poin for èk out poin fèb, pou oir koman sa i pé èd aou dan out ménaj. Par égzanp, ala détroi zafèr pou réfléchi dési :
Koman ou lé èk out famiy : Lo fason ou trèt out paran é out bann frèr é sèr, surtou kan lo strès i mont su ou, i pé fé mont aou koman ou va trèt out madam oubien out mari.
Lamontraj la Bib : « Rojèt loin d’zot tout kalité dépitasion malfondé, la raj, la kolèr, kri é jurman, é osi tout lèspès méchansté. » (Éfézien 4:31).
Domand aou : « Èské mon bann paran é mon bann frèr é sèr i trouv ké mi trèt azot èk rèspé ? Kan nou tonb pa dakor, èské mi gingn rès kalm oubien mi pran la kolèr ?»
Si ou énèrv dèk out bann paran i di aou in zafèr, ou pans k’i sra otroman kan ou sra marié ?
Fé pas bézoin lé zot avan lé not : Kan ou sra marié, fodra ou fé in kont èk sak out mari oubien out madam i vé, é souvandéfoi, fé pas sa avan sak ou mèm ou préfèr.
Lamontraj la Bib : « I fo pa ké chakèn i rod son prop lintéré, i fo li rod sak lé zot. » (1 Korintien 10:24).
Domand aou : « Èské toultan i fo fé bann zafèr mon fason ? Èské domoun i oi amoin kom in moun rézonab ? Èské mi fé pas bann bézoin lé zot avan lé mièn ? »
Pran pa nou su la otèr : Si nou vé nout ménaj i march, i fo nou lé kapab èskuz anou kan nou néna tor.
Lamontraj la Bib : « Parské nout tout, souvandéfoi nou fé zérèr » (Jak 3:2, ti not).
Domand aou : « Èské lé fasil pou moin, rokonèt ké moin la tronpé, oubien mi trouv amoin bann zèskuz ? Èské moin lé parèy sansitiv kan i done amoin bann konsèy ? »
Larjan : Bien souvan, disput dan la kaz i ariv akoz larjan. Sé pousa i fo konèt ansèrv ali in manièr rèsponsab.
Lamontraj la Bib : « Si inn an parmi zot i vé konstrui in tour, èské li va pa asiz avan pou kalkul la dépans é gard si li néna asé pou fini ali ? » (Luk 14:28).
Domand aou : « Èské mi gingn bien jèr mon larjan oubien èské mi dépans sak moin na poin ?»
Bann zabitud èspirituèl : In Témoin Jéova ké néna bann bon zabitud èspirituèl i étudié la Bib tou lé jour é i mank pa bann rénion.
Lamontraj la Bib : « Sak i rokoné ké zot la bézoin Bondié, zot lé kontan » (Matié 5:3).
Domand aou : « Èské mi fé bann zéfor pou ké mon foi i rès for ? Èské mon bann zabitud èspirituèl i pas avan, oubien mi lès tout kalité zafèr kapar amoin ? »
O final : An vré, kisa la anvi marié èk in moun lé pa sérié ? Pèrsone ! Alor fé d’zéfor pou dovni in moun sérié èk in bon tanpéraman, é ou nora plis chans gingn in moun parèy ké ou.