Akoz bann Témoin Jéova i fé pa la gèr ?
Ala poukosa nou fé pa la gèr :
Nou obéi Bondié. Dan la Bib, nou lir ké bann sèrvitèr Bondié, i doi « transform zot bann lépé an zouti pou travay la tèr » é zot i doi pu aprann fé la gèr (Izai 2:4).
Nou obéi Jézu. In jour, Jézu la di èk lapot Pièr : « Romèt out lépé son plas, parské tout sak i pran lépé va mor avèk lépé » (Matié 26:52). Par sa, Jézu la fé mont ké son bann disip té sar pa ansèrv bann zarm pou fé la gèr.
Bann disip Jézu i suiv son bann zinstruksion pou pa fé « parti lo monn ». Sé pousa zot i may pa dutou dan bann zafèr politik (Jan 17:16). Zot i fé pa manifèstasion pou mont, zot lé kont tout bann zaksion militèr. É zot i opoz pa zot kont bann domoun k’i angaj azot dann sèrvis militèr.
Nou èm domoun. Jézu la komand son bann disip èm azot inn é lot (Jan 13:34, 35). Donk zot noré fé parti in gran fami dan lo monn antié, é jamé pèrsone an parmi zot, noré alé konbat zot bann frèr é sèr (1 Jan 3:10-12).
Nou fé parèy bann promié krétien. Nou lir dann l’Encyclopédie de la religion et de la guerre (angl.) ké « Bann promié disip Jézu té vé pa fé la gèr é fé sèrvis militèr » parské zot té oi ké tousa té « akord pa avèk lo fason Jézu té oi lamour é avèk son komandman pou èm zot zènmi ». Pou alé dan lo mèm sans, lèspésialis alman pou la rolijion, Peter Meinhold la di : « Pou bann promié krétien [...] té pa posib èt krétien é solda an mèm tan. »
Bann bon sitoiyen
Bann Témoin Jéova i fé bann zafèr util la ousa zot i viv. Zot i roprézant okin danjé, zot i poz pa problèm pou la sékurité bann péi ousa zot i viv. Zot i rèspèk bann domoun k’i roprézant lo gouvèrnman, parské zot i suiv bann komandman ké néna dan la Bib, kom sak la :
« Ké tout domoun i obéi bann gouvèrnman » (Romin 13:1).
« Donk, rand Sézar sak i rovien Sézar, mé rand Bondié sak i rovien Bondié » (Matié 22:21).
Bann Témoin Jéova i obéi bann loi, zot i pèy zinpo é zot i soutien bann zéfor bann gouvèrnman i fé, pou ké tout i èspas bien pou la populasion.