Kisa i lé lantikris ?
Sak la Bib i di
Lantikris lé pa rienk in moun ou rienk in lorganizasion, parské la Bib i di ké néna « bonpé lantikris » (1 Jan 2:18). Lo mo « lantikris » sé in mo grèk k’i vé dir « kont (oubien a la plas dé) Kris ». I ansèrv mo-la pou domoun k’i :
vé pa rokonèt ké Jézu lé lo Kris (ou Mési), ou alor ké li lé lo Garson Bondié (1 Jan 2:22) ;
drès azot kont Jézu, ké Bondié la choizi (Psom 2:1, 2 ; Luk 11:23) ;
fé pas azot pou lo Kris (Matié 24:24) ;
maltrèt bann disip lo Kris, parské pou Jézu, kan zot i fé sa, an vré, zot la pou maltrèt ali (Akt 9:5) ;
prétan ké zot lé krétien, mé anfin d’kont, zot i fé bann mové zafèr (Matié 7:22, 23 ; 2 Korintien 11:13).
La Bib i apèl bann moun k’i fé bann zafèr-la bann lantikris, mé èl i di osi ké zot tout ansanm zot i apèl « lantikris » (2 Jan 7). Sé dann tan bann zapot ké lantikris la aparèt, é juska jordi li kontinié aji. Bann profési dan la Bib lavé anons sa (1 Jan 4:3).
Koman rokonèt bann lantikris ?
Banna i fane la mansonjri su Jézu (Matié 24:9, 11). Par égzanp, sak i done lamontraj su la Trinité oubien k’i di ké Jézu lé lo Bondié Toupuisan, an vré zot la pou drès azot kont bann lamontraj Jézu, ké la di : « Lo Papa lé pli gran k’moin » (Jan 14:28).
Bann lantikris i bord su koté sak Jézu la di su lo fason lo roiyom Bondié i aji. Par égzanp, désèrtin chèf la rolijion i di ké lo Kris i ansèrv bann gouvèrnman su la tèr pou fé son volonté. Alor ké sa i akord pa èk sak Jézu la di : « Mon roiyom lé pa dan so monn-la » (Jan 18:36).
Banna i di ké Jézu lé zot Ségnèr, mé zot i obéi pa bann komandman Jézu, an parmi néna lo komandman alé prèch lo gayar nouvèl lo Roiyom (Matié 28:19, 20 ; Luk 6:46 ; Akt 10:42).