BANN JEUN I POZ AZOT BANN KÉSTION
Koman choizi bann bon légzanp pou suiv ?
« Kan moin lavé problèm lékol, sak té èd amoin, sé kan mi té pans in moun, ké moin lavé anvi imité, é ké lavé viv mèm zafèr ké moin. Aprésa, mi té ésèy suiv son légzanp. Kan nou néna in modèl pou suiv, lé plis fasil trouv lo bout kan nou viv bann situasion difisil » (Haley).
Avèk in modèl pou suiv, ou pé évit bann problèm é ou ariv fé sak ou la désidé. Mé pou sa, i fo choizi in bon légzanp pou suiv.
Akoz i fo bien choizi bann légzanp pou suiv ?
Lo moun ké ou va choizi kom légzanp, va détèn dési tout sak ou fé.
La Bib i ankouraj bann krétien pou imit bann moun ké lé bann bon légzanp : « Pensez à leur façon de vivre [...], et prenez-les pour modèles de votre foi » (Ébré 13:7, Parole vivante).
In konsèy : Bann moun ké ou va choizi kom légzanp va détèn dési ou, an bien ou an mal ; alor choizi bann moun ké néna vréman bann joli kalité, choizi pa rienk domoun ké lé konu partou oubien sak néna mèm laj ké ou.
« Ma la aprann bonpé zafèr avèk inn mon bann kamarad ké lé krétien, li apèl Adam, ma la aprann plin zafèr dési son fason pansé é osi dési son fason konport ali toultan. Lé inkroiyab, lé ankor fré dan mon tèt, mi souvien bien bann zafèr ké li té di oubien sak li té fé. Li koné mèm pa, a kèl poin li la détèn dési moin » (Colin).
Lo moun ké ou choizi kom légzanp, va détèn dési out fason pansé.
La Bib i prévien anou : « Attention ! Les mauvais amis poussent à faire le mal » (1 Korintien 15:33, Parole de Vie).
In konsèy : Choizi in moun ké néna bann joli kalité ; baz pa ou rienk dési laparans, sinon riskab, sa i désoi aou.
« Afors konpar aou avèk bann moun ké lé joli, ou trouv ké ou vo pa rien é ou lé vilin. É out lèspri va rès toultan kalé rienk dési out laparans » (Tamara).
Kosa ou pans ? Kèl pièj néna si ou choizi kom légzanp bann moun sélèb oubien bann moun konu dan lèspor ?
Lo moun ké ou choizi kom légzanp, sé sa i pé èd oir si ou va ariv fé sak ou voudré.
La Bib i di : « Sak i march èk domoun saj va ni saj » (Provèrb 13:20).
In konsèy : Choizi kom légzanp, bann moun ké néna déja bann joli kalité, ké ou vé aoir. Kan ou va bien rogard banna, sa va èd aou oir su kèl zafèr i fo ou travay, pou ariv fé sak ou la désidé.
« Olèrk ou koné pa tro, kèl poin ou vé travay, é ké ou di par égzanp : “Mi voudré èt in moun pli sèrié”, ou pé di aou : “Mi voudré èt in moun pli sèrié, kom Jane. Jane i ariv toultan a lèr é èl i fé tout èk sèrié” » (Miriam).
Rotien sa : Pou dévnir lo moun ké ou voudré èt, ou doi choizi in bon légzanp pou suiv.
Kan ou suiv lo bon légzanp, sé kom pran in rakoursi pou réaliz sak ou voudré fé !
Koman choizi bann légzanp pou suiv ?
Néna dé fason posib pou choizi in légzanp pou suiv :
Choizi in joli kalité ké ou voudré travay, é aprésa trouv in moun ké ou voudré imité, ké néna joli kalité-la.
Choizi in moun ké ou voudré imité, aprésa gard in joli kalité ké lo moun néna é ké ou èmré travay.
Lo fich laktivité pou réfléchi dési, ké néna dann lartik-la, va èd aou fé sa.
Bann légzanp pou ou suiv i pé èt...
...bann jèn out laj. « Mi voudré èt parèy mon méyèr kopine. Èl i trouv toujour in tan pou arèt aèl é pou fé in kont èk lé zot. Èl lé pli jèn ké moin, mé èl néna bann joli kalité ké mi na poin, é sa i done amoin anvi suiv son légzanp » (Miriam).
...bann gran moun. I pé èt out papa momon oubien in moun dan out rolijion. « Lé klèr : mon papa é mon momon lé bann légzanp pou moin. Zot néna bann supèr joli kalité. Lé vré, mi oi bien ké banna néna bann défo, mé sak mi oi surtou, sé ké sa i défand pa zot èt fidèl Bondié. Kan mi nora zot laj, mi èspèr ké lé zot va di mèm zafèr pou moin » (Annette).
...bann moun dan la Bib. « Ma la choizi suiv légzanp plizièr moun dan la Bib : Timoté, Rut, Job, Pièr, lo ti fi Israélit, é ma la choizi chakèn pou in rézon diféran. Plis mi aprann plin zafèr dési zot, plis lé komsi mi koné azot vréman. Mi èm bonpé étudié lo liv Imitez leur foi, é mi ansèrv osi l’“Index des modèles” ké néna dan lo dé liv Les jeunes s’interrogent » (Melinda).
In konsèy : Kontant pa ou suiv légzanp in sèl moun. Lapot Pol la di èk dot krétien : « Kal zot zié su sak i aji in fason pou mont ké zot i suiv légzanp ké nou done azot » (Filipien 3:17).
Èské ou koné sa ? Aou osi, ou pé èt in bon légzanp pou lé zot ! La Bib i di : « Fé mont ou lé in légzanp pou bann fidèl, kisoi dan out bann parol, dan out manièr fé, dan out lamour, dan la foi, é parské ou amèn in vi prop » (1 Timoté 4:12).
« Mèm si ou la ankor bézoin chanj out tanpéraman pou ké li dévien méyèr, ou pé kan mèm èd dot moun pou fé bann progré. Ou koné pa vréman kisa lé antrinn vèy aou. Kisa i koné ? Pétèt ou pé di in zafèr ké va chanj la vi in moun » (Kiana).