• Zhromažďeňa le Jehovaskere svedkengere – so tuke anena?
    Nekfeder dživipen akanastar pro furt! – Sikhľuvas la Biblijatar
    • Lekcija 10. O murš dikhel o tekstos andre Biblija, so leske sikavel le Jehovaskero svedkos prekal o zhromažďeňe.

      LEKCIJA 10

      Zhromažďeňa le Jehovaskere svedkengere – so tuke anena?

      Imar tut vareko vičinďa pro amaro zhromažďeňe? Šaj el, hoj tut ladžas te avel. Abo daras a phučes: „Ko džanel, so pes odoj kerel? Pre soste hine lačhe? Soske odoj phirava?“ Andre kadi lekcija sikhľuvaha, hoj te odoj phireha, mek buter kameha le Devles a aveha feder manuš.

      1) Soske phiras pro zhromažďeňa?

      E Biblija sikavel, so hin oda nekbareder, soske pes zdžas pro zhromažďeňe: „Maškar o but manuša ašarava le Jehovas.“ (Žalm 26:12) The le Jehovaskere svedki igen radisaľon, sar pes jekhetane zdžan. Pal calo svetos hin o zhromažďeňa duvar kurkeste. Ašaren odoj le Devles la giľaha the la modľitbaha. Tiš keren trival beršeste bare zhromažďeňa, kaj zoraľaren peskero paťaviben andro Del.

      2) So sikhľoha pre amare zhromažďeňa?

      Pro zhromažďeňa sikhľuvas la Biblijatar, kaj savore te „achaľon a kaj te džanen, so oda znameňinel.“ (Pregen Nehemiáš 8:8) Tiš odoj sikhľuvas pal o Jehovas, savo hino. Te tut dodžaneha sar igen tut o Jehovas kamel, the tu les mek buter rado dikheha. O Del tuke sikavela, sar šaj el tiro dživipen feder. (Izaiáš 48:17, 18)

      3) So tuke ada dela, te aveha amenca pro zhromažďeňa?

      O Jehovas kamel, kaj te „das pozora jekh pre aver, hoj jekh avreske te pomožinas te sikavel o kamiben u te kerel o lačho. Na omukhas amaro zhromažďeňe.“ (Hebrejom 10:24, 25 NZ) Pro amare zhromažďeňa tut arakheha kajse manušenca, so čačes rado dikhen jekh avres. Kavka sar tu, tiš rado sikhľon pal o Del. Dičhol oda olestar, pal soste pro zhromažďeňe vakeren. (Pregen Rimanom 1:11, 12) Phiren odoj terne the fameľiji. Vaker lenca, soske hine bachtale, choč predživen pharipena. A mek hin but, so amen oda dela, te šunaha le Jehovas a phiraha pro zhromažďeňa!

      DODŽAN TUT BUTER

      So pes kerel pro zhromažďeňe le Jehovaskere svedkengero? Soske kamas furt te phirel pro zhromažďeňa, choč varekana nane lokes?

      4) Zhromažďeňa le Jehovaskere svedkengere

      Apoštola the aver kresťana pes furt jekhetane zdžanas, kaj te ašaren le Jehovas. (Rimanom 16:3–5) Pregen Kolosanom 3:16 a vakeren jekhetane:

      • Sar o kresťana ašarenas le Jehovas?

      The adaďives pes le Jehovaskere svedki jekhetane zdžan, kaj te ašaren le Jehovas. Dikh, so pes kerel pre amare zhromažďeňa. Mukh o VIDEJO. Paľis dikh pro obrazkos sar dičhol amaro zhromažďeňe a vakeren jekhetane.

      VIDEJO: So pes kerel andro kher, kaj pes zdžan le Jehovaskere svedki? (2:12)

      • So andal o Kolosanom 3:16 tiš keras pre amare zhromažďeňa?

      • So tuke pačisaľol le videjostar, abo pro obrazkos kaj hin sikado o zhromažďeňe?

      Pregen 2. Korinťanom 9:7 a vakeren jekhetane:

      • Soske pro zhromažďeňa le Jehovaskere svedkengere na mangas o love?

      Dikhen tumenge jekhetane, pal soste ela o zhromažďeňe, so hin angle tumende.

      • Pre savo kotor, so ela pro zhromažďeňe tut imar našťi doužares?

      Džanehas?

      Pre jw.org šaj arakhes kana a kaj hine o zhromažďeňa pal calo svetos.

      Obrazki: Avka, sar oda dičhol anglo, prekal a pal o zhromažďeňe. So pes kerel pro obrazki A B C D. A. Jekh Jehovaskero svedkos terďol pro podijum a del duma andal e Biblija. B. Jekh Jehovaskeri svedkiňa prekal o zhromažďeňe odphenel pre otazka. C. Le Jehovaskero svedkos pal o zhromažďeňe vakerel jekha fameľijaha. D. Le Jehovaskero svedkos chudel o vudar jekhe phure muršeske, so avel pro zhromažďeňe.

      1. Hin amen odoj prednaški, ulohi the videji. Zhromažďeňa chuden a končinen la giľaha the la modľitbaha

      2. Prekal varesave kotora pro zhromažďeňe šaj tiš vareso phenas

      3. Šaj odoj avel sako – fameľiji le čhavenca, terne the phure

      4. Ňič pes odoj na poťinel. Ňiko tumendar na mangela love

      5) Ma vzde tut, choč varekana na ela lokes

      Sikhľuv le Ježišoskera fameľijatar. Kaj on te aven pro sakoberšeskere inepi, musaj te predžan vaj 100 km prekal o heďi le Nazaretostar dži Jeruzalemoste. Pregen Lukáš 2:39–42 a vakeren jekhetane:

      • So phenes, sas lokes te predžal ajso baro drom?

      • Soske hin varekana phares te avel pro zhromažďeňe?

      • Kampel the avka te phirel? Soske?

      Obrazki: Jozef, Mária, Ježiš the le Ježišoskero phral pes richtinen pro drom. 1. O Jozef thovel o gono pro somaricis a e Mária richtinel o chaben pro drom. 2. E mapa sikavel o drom le Nazaretostar Jeruzalemoste.

      E Biblija sikavel, hoj o zhromažďeňa hin amen vašoda, kaj le Jehovaske te presikavas bari paťiv. Pregen Hebrejom 10:24, 25 a vakeren jekhetane:

      • Soske na kamas te mukhel avri o zhromažďeňa?

      VAREKO ŠAJ PHENEL: „Mange na kampel odoj te phirel, e Biblija mange šaj genav the khere.“

      • So la Biblijatar sikavel, hoj o Jehovas kamel, kaj te phiras pro zhromažďeňa?

      SO SIKHĽIĽAM

      Te phiraha po zhromažďeňa, džanaha buter pal o Jehovas, mek buter les kamaha a jekhetane sikavaha le Jehovaske, hoj ov hino amaro Del.

      So bi phenehas

      • Soske amen o Jehovas vičinel, kaj te phiras pro zhromažďeňa?

      • So sikhľoha pre amare zhromažďeňa?

      • Savi chasna tut ela olestar, te odoj phireha?

      Kam te kerel

      DIKH TUKE BUTER

      Daras abo ladžas tut te avel po zhromažďeňe? Dikh pal jekh murš, saveske sas tiš avka a so leske pomožinďa.

      Ňigda na bisteraha, save jileskere sas ke amende (4:16)

      Dikh, soske jekh terno rado phirel pro zhromažďeňa.

      Rado phiravas pro zhromažďeňa! (4:33)

      Pregen tuke, soske hin avrenge čačes mište pro zhromažďeňa.

      „Prečo je dobré chodiť na zhromaždenia Jehovových svedkov?“ (arakheha pro jw.org)

      Pregen tuke, sar jekh nalačho manuš prekerďa peskero dživipen, bo chudľa te phirel pro amare zhromažďeňa.

      „Bez zbrane som sa nepohol ani na krok“ (Strážna veža z 1. júla 2014)