Јован
2 А ко трито диве сине бијав ки Кана тари Галилеја, хем е Исусескири дај сине адатхе. 2 Исто аѓаар ко бијав сине каниме о Исус хем лескере ученикија.
3 Кеда ачхило лен бут хари мол, е Исусескири дај вакерѓа леске: „Нане лен више мол“. 4 А о Исус вакерѓа пле дајаке: „Соске ме хем ту те грижина амен башо адава? Мло време панда на ало“. 5 Тегани и дај лескири вакерѓа околенге со служинена сине: „Керен са со ка вакерел туменге“. 6 А адатхе сине шов ќупија пањеске таро бар, те шај те тховен пумаре васта англедер те хан маро, сар со сине е Евреенгоро обичај. Секова ќупи шај сине те кхедел околу 44 џи ко 66 литре. 7 О Исус вакерѓа ленге: „Пхерен о ќупија пањеа“. Хем ола пхерѓе лен џи упре. 8 Пало адава вакерѓа ленге: „Лен хари адатхар хем ингарен околеске сој одговорно башо бијав“. Хем ола ингарѓе леске. 9 А кеда окова со сине одговорно башо бијав пробинѓа и мол која со сине керди таро пани, бизо те џанел котар тани и мол (а о слуге со анѓе леске те пробинел, џанле), ов викинѓа е џамутре 10 хем вакерѓа леске: „Секова мануш икалела прво и шужи мол, а кеда о мануша ка маќовен икалела и мол со нане добором шужи. А ту гаравѓан и шужи мол са џи акана“. 11 Аѓаар о Исус керѓа пло прво чудо ки Кана тари Галилеја хем адалеа сикавѓа пли моќ хем лескере ученикија верујнѓе ки лесте.
12 Пало адава ов пле дајаја, пле пхраленцар хем пле учениконцар гело ко Капернаум, ама ачхиле адатхе само некобор диве.
13 Кеда ало паше о време те славинел пе и Пасха* е Евреенгири, о Исус гело ко Ерусалим. 14 Кеда ало ко храми дикхља околен со бикинена сине гурувен, бакхрен хем гулубен, хем околен со менинена сине паре сар бешена адатхе. 15 Тегани керѓа камшико таро шеле хем леа палдинѓа лен заедно е бакхренцар хем е гурувенцар. Хем растуринѓа о паре околенгере со менинена сине паре хем превртинѓа ленгере асталија. 16 Хем вакерѓа околенге со бикинена сине гулубија: „Циден акала буќа акатар! Чхинавен те керен мле Дадескоро кхер пазари!“ 17 Кеда о ученикија дикхле са адава, сетинѓе пе ко адава сој пишимо: „О мангипе башо тло кхер ка овел сар јаг со тхабљола ко мло вило“.
18 Адалеске о Евреија вакерѓе леске: „Сикав аменге знако со ка докажинел кај иси тут право те кере акала буќа“. 19 А о Исус вакерѓа ленге: „Рушинен акава храми хем ме трине дивенге палем ка градинав ле“. 20 Тегани о Евреија вакерѓе: „Акава храми сине градимо 46 берша, а ту ка градине ле трине дивенге?“ 21 Ама кеда вакерѓа башо храми ов мислинѓа башо пло тело. 22 Кеда воскреснинѓа, лескере ученикија сетинѓе пе ко акала лафија хем верујнѓе ко адава со пишинела ко света списија хем ко адава со вакерѓа о Исус.
23 А кеда сине ко Ерусалим башо празнико и Пасха,* бут џене верујнѓе ки лесте кеда дикхле о чудија со керела лен сине. 24 Ама е Исусе на сине ле доверба ки ленде, соске џанела лен сине саве тане 25 хем никој на ваљани сине те вакерел леске нешто башо мануш, соске ов џанела сине со иси е мануше ко вило.