И откупнина — најбаро поклон таро Девел

1, 2. а) Кеда јекх поклон туке тано вредно? б) Соске и откупнина тани најбаро поклон таро Девел?

КОВА тано о најшужо поклон со некој денѓа тут? Јекх поклон на ваљани те овел бут скупо те шај те значинел туке нешто. Кеда адава поклон керела тут бахтало или тано нешто со ваљани туке, тегани ту сиан благодарно.

² О Девел денѓа амен бут поклоња. Ама, јекх поклон со денѓа амен тано најкорисно аменге. Адава тано о најбаро поклон со денѓа ле о Девел е манушенге. Ко акава поглавје ка сикљова кај о Јехова бичхалѓа пле Чхаве, е Исусе, те шај те живина вечно. (Читин Матеј 20:28.) Адалеа со бичхалѓа е Исусе ки Пхув сар откупнина, о Јехова сикавѓа кај чаче мангела амен.

СОЈ ТАНИ И ОТКУПНИНА?

3. Соске о мануша мерена?

³ И откупнина тано начин колеа со о Јехова ослободинѓа е манушен таро грево хем таро мерибе (Ефешаните 1:7). Те шај те хаљова соске ваљани сине те дел пе откупнина, мора те џана со уло англедер бут берша ки Еденско градина. О прва мануша, о Адам хем и Ева грешинѓе. Адалеске со грешинѓе, ола муле. Амен да мераја адалеске со наслединѓем о грево таро Адам хем тари Ева. (Дикх и 9 фуснота.)

4. Со сине е Адаме?

⁴ Кеда о Јехова керѓа е прво мануше, е Адаме, денѓа ле нешто бут вредно — совршено живото. Е Адаме сине ле совршено годи хем совршено тело. Ов никогаш нане сине те насваљовел, те пхујрол хем те мерел. Адалеске со о Јехова керѓа е Адаме, ов сине леске сар дад (Лука 3:38). О Јехова редовно керела сине е Адамеа лафи. О Девел вакерѓа леске со аџикерела лестар хем денѓа ле бути ки која со шај сине те уживинел (1. Мојсеева 1:28-30; 2:16, 17).

5. Со значинела адава кеда и Библија вакерела кај о Адам сине кердо спрема „е Девлескоро лико“?

⁵ О Адам сине кердо спрема „е Девлескоро лико“ (1. Мојсеева 1:27). Адава значинела кај о Јехова денѓа ле сар пле особине, сар сој мангипе, мудрост, правда хем сила. Ов денѓа е Адамеске слободно волја. О Адам на сине роботи. О Девел керѓа ле аѓаар те шај коркори те биринел дали ка керел шукар или лошна буќа. Ако о Адам шунела сине е Девле, ка шај сине те живинел засекогаш ко рај.

6. Со нашавѓа о Адам кеда на шунѓа е Девле? Сар влијајнела адава упри аменде?

⁶ О Адам платинѓа бут бари цена башо адава со на шунѓа е Јехова, ов сине осудимо те мерел. Ов нашавѓа о паше амалипе е Јеховаја, пло совршено живото хем пло кхер, о рај (1. Мојсеева 3:17-19). О Адам хем и Ева биринѓе те на шунен е Девле, хем ленге на сине нисави надеж. Адалеске со о Адам грешинѓа, „о грево кхувѓа ко свето хем преку о грево о мерибе, хем аѓаар о мерибе ширинѓа пе ко са о мануша, соске сарине грешинѓе“ (Римјаните 5:12). Кеда о Адам грешинѓа, ов адалеа „бикинѓа“ хем пес хем амен те ова робија е гревоске хем е мерибаске (Римјаните 7:14). Иси ли аменге несави надеж? Оја, иси.

7, 8. Сој тани и откупнина?

⁷ Сој тани и откупнина? И откупнина вклучинела дуј буќа. Сар прво, и откупнина тани цена сој платими те шај те ослободинел пе некој или те иранел пе нешто со сине тло. Дујто, и откупнина тани цена која со учхарела, или платинела, и вредност таро нешто.

⁸ Нијекх мануш нашти те платинел и бари штета со керѓа ла о Адам кеда грешинѓа хем анѓа аменге о мерибе. Ама, е Јехова сине ле начин сар те ослободинел е манушен таро грево хем таро мерибе. Те сикљова нешто повише баши откупнина хем те дикха сави корист шај те овел амен латар.

САР О ЈЕХОВА ОБЕЗБЕДИНЃА И ОТКУПНИНА?

9. Сар шај сине те платинел пе и откупнина?

⁹ Нијекх амендар никогаш нашти те платинел и откупнина башо совршено живото со нашавѓа ле о Адам. Соске нашти? Соске сарине сием несовршена (Псалм 49:7, 8). Те платинел пе и откупнина, ваљанѓа јавер совршено манушикано живото. Адалеске баши лате вакерела пе „откупнина со одговоринела“ (1. Тимотеј 2:6). И откупнина ваљани сине те врединел исто кобор со врединела сине о живото е Адамескоро со нашавѓа ле.

10. Сар о Јехова обезбединѓа и откупнина?

¹⁰ Сар о Јехова обезбединѓа и откупнина? О Јехова бичхалѓа пле најмангле Чхаве ки Пхув. Акава Чхаво, о Исус, сине о прво нешто со керѓа ле о Девел (1. Јованово 4:9, 10). О Исус сине спремно те мукхел пле Даде хем о тхан коте со живинела сине ко небо (Филипјаните 2:7). О Јехова бичхалѓа е Исусе таро небо те авел ки Пхув, хем о Исус бијандило сар совршено мануш, бизо грево (Лука 1:35).

11. Шај ли јекх мануш те овел откупнина са е манушенге?

¹¹ Кеда о прво мануш, о Адам, на шунѓа е Јехова, ов нашавѓа о совршено живото со ваљани сине те овел са е манушен. Шај ли несаво јавер мануш те цидел о мерибе таро са е Адамескере чхаве? Оја шај. (Читин Римјаните 5:19.) О Исус, кова со никогаш на грешинѓа, денѓа пло совршено живото сар откупнина (1. Коринќаните 15:45). Лескоро совршено живото шај сине те овел користимо те цидел пе о мерибе таро са е Адамескере чхаве (1. Коринќаните 15:21, 22).

12. Соске о Исус ваљанѓа те цидел добором муке?

¹² И Библија вакерела аменге кобор бут цидинѓа о Исус англедер те мерел. Ов сине мардо камшикоја, ковимо ко стубо, лескоро мерибе сине бавно хем буте дукхенцар (Јован 19:1, 16-18, 30). Соске о Исус ваљанѓа те цидел добором муке? Адалеске со о Сатана вакерѓа кај нијекх мануш нане те овел верно е Девлеске кеда ка авен пхаре искушенија. О Исус сикавѓа кај јекх совршено мануш шај те овел верно е Девлеске чак кеда цидела баре муке. Замислин туке кобор сине бахтало о Јехова кеда о Исус ачхило верно! (Изреки 27:11). (Дикх и 15 фуснота.)

13. Сар сине платими и откупнина?

¹³ Сар сине платими и откупинина? Ко 33 берш, ко 14 нисан спрема о Еврејско календари, о Јехова дозволинѓа о душмања те мударен е Исусе (Евреите 10:10). Трин диве пало адава, о Јехова ваздинѓа е Исусе таро муле хем денѓа ле живото, на сар мануш, него сар духовно личност. Ама, о Исус никогаш на нашавѓа о право те живинел сар совршено мануш ки Пхув. Кеда о Исус иранѓа пе ко небо, адава право те живинел сар совршено мануш денѓа ле е Девлеске те шај о Девел те користинел ле те кинел е манушен таро грево (Евреите 9:24). О Јехова прифатинѓа адаја откупнина хем адалеске амен шај те ова ослободиме таро грево хем таро мерибе. (Читин Римјаните 3:23, 24.)

САВИ КОРИСТ ШАЈ ТЕ ОВЕЛ ТУТ ТАРИ ОТКУПНИНА

14, 15. Со ваљани те кера те шај те овен простиме амаре гревија?

¹⁴ Амен панда акана иси амен корист таро е Девлескоро најбаро поклон. Те дикха сави корист шај те овел амен акана хем ки иднина.

¹⁵ Простиме тане амаре гревија. Пхаро тано секогаш те кера адава сој исправно. Сарине грешинаја, било лафенцар или адалеа со кераја (Колошаните 1:13, 14). Сар шај те овен простиме амаре гревија? Ваљани чаче те овел аменге жал башо грешке со кераја лен хем понизно те рода о Јехова те простинел аменге. Тегани шај те овел амен доверба кај о Јехова ка простинел аменге (1. Јованово 1:8, 9).

16. Со мора те кера те шај те овел амен чисто совест?

¹⁶ Шај те овел амен чисто совест. Кеда амари совест вакерела аменге кај керѓем нешто погрешно, тегани осетинаја амен крива хем шај те мислина кај на врединаја ништо. Ама, на ваљани те откажина амен. Ако молинаја е Јехова те простинел аменге, шај те ова сигурна кај ов шунела амен хем простинела аменге (Евреите 9:13, 14). О Јехова мангела те кера леа лафи башо са амаре проблемија хем амаре слабостија (Евреите 4:14-16). Ако керѓем адава, ка ова ко мир е Девлеа.

17. Саве берекетија шај те овен амен адалеске со о Исус муло аменге?

¹⁷ Иси амен надеж те живина засекогаш. „И плата башо грево тани о мерибе, а о поклон со дела о Девел тано вечно живото преку о Христос Исус, амаро Господари“ (Римјаните 6:23). Адалеске со о Исус муло аменге, амен шај те живина засекогаш хем те овел амен совршено састипе (Откровение 21:3, 4). Со ваљани те кера те шај те добина акала берекетија?

КА ПРИФАТИНЕ ЛИ И ОТКУПНИНА?

18. Котар џанаја кај о Јехова мангела амен?

¹⁸ Сетин ту кобор значинѓа туке адава кеда некој денѓа тут несаво шужо поклон. И откупнина тани о најшужо поклон сој аменге дендо, хем ваљани таро вило те ова благодарна е Јеховаске баши лате. Ко Јован 3:16 вакерела кај „о Девел добором бут мангља о свето со денѓа пле единствено бијаме Чхаве“ (Јован 3:16). Оја, о Јехова добором бут мангела амен со денѓа аменге пле најмангле Чхаве, е Исусе. Џанаја кај о Исус да исто аѓаар мангела амен, соске сине спремно те мерел аменге (Јован 15:13). Адава со о Јехова хем о Исус денѓе и откупнина ваљани те уверинел амен кај ола чаче мангена амен (Галатите 2:20).

19, 20. а) Сар шај те ове е Јеховаскоро амал? б) Сар шај те сикаве кај прифатинеа е Исусескири жртва?

¹⁹ Акана кеда сиклиљан башо адава кобор баро мангипе иси е Јехова, сар шај те ове лескоро амал? Нане локхо те манге некас со на пенџареа ле. Ко Јован 17:3 вакерела кај шај шукар те пенџара е Јехова. Кеда кереа адава, ка манге бут е Девле, ка манге те кере адава со ов мангела хем ка ове лескоро амал. Адалеске понадари да сикљов башо Јехова адалеа со ка проучине и Библија (1. Јованово 5:3).

²⁰ Прифатин е Исусескири жртва. И Библија вакерела кај „адава со верујнела ко Чхаво, иси ле вечно живото“ (Јован 3:36). Со значинела те верујна ко Исус? Адава значинела кај ваљани те кера са со сикавѓа амен ов (Јован 13:15). Нашти само те вакера кај верујнаја ко Исус. Те шај те прифатина и откупнина, амен ваљани те кера нешто баши амари вера. Ко Јаков 2:26 пишинела: „И вера бизо те сикавел пе ко дело тани мули“.

21, 22. а) Соске ваљани секова берш те ова присутна ки Спомен-свеченост башо е Исусескоро мерибе? б) Башо со ка керел пе лафи ко шовто хем ефтато поглавје?

²¹ Ов присутно ки Спомен-свеченост башо е Исусескоро мерибе. И рат англедер те мерел, о Исус пхенѓа кај ваљани те сетина амен ко лескоро мерибе. Амен кераја адава секова берш, хем адава викинела пе Спомен-свеченост или „е Господарескири вечера“ (1. Коринќаните 11:20; Матеј 26:26-28). О Исус мангела те сетина амен кај ов денѓа пло совршено живото аменге сар откупнина. Ов вакерѓа: „Керен акава те сетинен тумен манде“. (Читин Лука 22:19.) Кеда сиан присутно ки Спомен-свеченост, ту сикавеа кај сетинеа тут ки откупно жртва хем ко баро мангипе со сикавѓе аменге о Јехова хем о Исус. (Дикх и 16 фуснота.)

²² И откупнина тани о најбаро поклон со некогаш шај те добина ле (2. Коринќаните 9:14, 15). Таро акава поклон корист ка овел лен чак милионија мануша со муле. Ко шовто хем ко ефтато поглавје ка кера лафи сар шај те овел адава.