ЛЕКЦИЈА 51
Бирин лафија со ка керен бахтало е Јехова
Кеда створинѓа амен, о Јехова денѓа амен јекх бут шужо поклон — и способност те кера лафи. Дали тано леске важно сар користинаја адава поклон? Оја, сигурно! (Читин Јаков 1:26.) Адалеске, те дикха сар шај те користина амари способност те кера лафи ко начин сар со мангела о Јехова.
1. Сар шај ко шукар начин те користина амаре лафија?
И Библија вакерела аменге: „Охрабринен тумен машкар туменде хем изградинен јекх јекхе“ (1. Солуњаните 5:11). Дали пенџареа некас каске со ваљани охрабрување? Со шај те кере те шај те осетинел пе пошукар? На пример, шај те вакере леске кај ов тано туке важно, те спомнине леске нешто со ценинеа ки лесте или те роде несаво библиско стихо со ка охрабринел ле. Ки Библија иси бут асавке охрабрувачка стихија со шај те бирине. Исто аѓаар, ма бистре кај о начин сар ка вакере адала лафија тано бут важно. Адалеске, секогаш трудин тут те ове обѕирно хем те кере лафи љубезно (Изреки 15:1).
2. Саве лафија на ваљани те користина?
И Библија вакерела: „Нијекх лошно лафи те на икљол таро тумаро муј“. (Читин Ефешаните 4:29.) Адалеске, на користинаја груба хем навредлива лафија со шај те поврединен е јаверен. Исто аѓаар, на ваљани те оговорина хем те клеветина е јаверен. (Читин Изреки 16:28.)
3. Со ка поможинел аменге те кера лафи ко јекх охрабрувачко начин?
Бут пути амаре лафија сикавена со иси амен ко вило хем со вртинела пе аменге ки годи (Лука 6:45). Адалеске, ваљани те трудина амен те размислина башо позитивна буќа — буќа сој тане праведна, чиста, со ка поттикнинен амен ко мангипе хем сој пофална (Филипјаните 4:8). Акава ка овел аменге полокхо ако мудро биринаја амари забава хем амаре амален (Изреки 13:20). Исто аѓаар, ка овел шукар, англедер те вакера нешто, те размислина сар амаре лафија ка влијајнен упро јавера. И Библија вакерела: „О лафија сој вакерде бизо те мислинел пе посавена сар мачи, ама и чхиб е мудро манушенгири сасљарела“ (Изреки 12:18).
ДОЗНАЈН ПОВИШЕ
Сикљов сар шај те кере лафи ко начин со ка керел е Јехова бахтало хем со ка охрабринел е јаверен.
4. Размислин англедер те вакере нешто
Понекогаш, сарине вакераја нешто башо со пало адава пераја пишмани (Јаков 3:2). Читин Галатите 5:22, 23, а пало адава керен лафи башо акала пучиба:
Башо кола таро акала особине шај те молине тут те шај те поможинен туке те пазине ко тле лафија? Сар шај те поможинен туке акала особине?
Читин 1. Коринќаните 15:33, а пало адава керен лафи башо акава пучибе:
Сар о друштво хем и забава шај те влијајнен упро адава сар кераја лафи?
Со шај те влијајнел упро адава сар кереа лафи е јаверенцар?
Читин Проповедник 3:1, 7, а пало адава керен лафи башо акава пучибе:
Со мислинеа, ко кола ситуацие ка овел пошукар те чутине или те аџикере пошукар моменти те шај те вакере нешто?
5. Кер шукар лафи е јаверендар
Со ка поможинел аменге те на повредина е јаверен амаре лафенцар или те на вакера нешто лошно баши ленде? Дикх о ВИДЕОКЛИПИ, а пало адава керен лафи башо акала пучиба:
Соске о пхрал мангља те менинел о начин сар керела лафи башо јавера?
Со керѓа о пхрал те шај те менинел пе?
Читин Проповедник 7:16, а пало адава керен лафи башо акава пучибе:
Со на ваљани те бистра кеда сием ко искушение те вакера нешто лошно башо јавера?
Читин Проповедник 7:21, 22, а пало адава керен лафи башо акава пучибе:
Сар акала стихија шај те поможинен туке те на хољане сигате кеда некој ка вакерел нешто лошно тутар?
6. Ов љубезно кеда кереа лафи тле фамилијаја
О Јехова мангела љубезно хем мангипаја те кера лафи амаре фамилијаја. Дикх о ВИДЕОКЛИПИ, а пало адава керен лафи башо акава пучибе:
Со ка поможинел туке те кере лафи љубезно тле фамилијаја?
Читин Ефешаните 4:31, 32, а пало адава керен лафи башо акава пучибе:
Сар ваљани те кера лафи амаре фамилијаја те шај те осетинен пе цениме?
О Јехова отворено вакерѓа пле Чхавеске, е Исусеске, кај мангела ле. Читин Матеј 17:5, а пало адава керен лафи башо акава пучибе:
Сар шај те џа пало е Јеховаскоро пример кеда кереа лафи тле фамилијаја?
Роде прилике те пофалине е јаверен
НЕСАВЕ ШАЈ ВАКЕРЕНА: „Ме само вакерава адава со мислинава. Баш манге гајле сар осетинена пе о јавера“.
Дали ту да мислинеа аѓаар? Соске мислинеа аѓаар?
СО СИКЛИЛЕМ
Амаре лафија шај или те поможинен или те поврединен е јаверен. Адалеске, ваљани шукар те пазина со вакераја, кеда вакераја хем сар вакераја.
Сар ка одговорине?
Сар шај ко шукар начин те користина амаре лафија?
Сар на ваљани те кера лафи?
Со ка поможинел аменге амаре лафија секогаш те овен љубезна хем охрабрувачка?
ИСТРАЖИН
Дикх со ка поможинел туке те на пере ки замка те оговорине.
Дикх сар о Јехова поможинѓа јекхе манушеске те чхинавел те акошел.
„Почнав да размислувам што правам со својот живот“ (Стражарска кула таро 1 август 2013)