Отфрлин секова размислибе сој спротивно таро адава со сикавела о Девел!

1. Саво предупредување денѓа о Павле е христијаненге со сине помазиме?

О ПАВЛЕ предупрединѓа: „Ма мукхен понадари да те обликујнел тумен акава свето“ (Рим. 12:2). Акала лафија пишинѓа лен е христијаненге ко прво веко. Соске о Павле денѓа асавко директно предупредување е муршенге хем е џувленге кола со више служинена сине е Девлеске хем сине помазиме свети духоја? (Рим. 1:7).

2-3. а) Сар пробинела о Сатана те цидел амен таро Јехова? б) Сар шај те откорнина о погрешна ставија со мукхле хор корено ки аменде?

² О Павле сине секиримо соске сине јасно кај упро несаве христијања влијајнѓе о штетна ставија хем сикајба со ширинела сине о свето е Сатанаскоро (Еф. 4:17-19). Адава шај те случинел пе секаске амендар. О Сатана, о владетели акале светоскоро, трудинела пе са пле силенцар те цидел амен таро Јехова, а те шај те керел адава користинела разна тактике. На пример, ако иси амен желба те истакнина амен или иси амен себично амбиција, о Сатана ка искористинел адава. Исто аѓаар, шај те пробинел те искористинел нешто таро амаро потекло, околина или образование те шај те теринел амен те размислина сар ов со мангела.

³ Дали шај те откорнина о буќа со мукхле хор корено ки амари годи? (2. Кор. 10:4). Приметин саво одговор дела о Павле: „Рушинаја погрешна размислиба хем секоја пречка која со чхинавела е манушен те пенџарен е Девле, контролиринаја секоја мисла те шај те овел послушно е Христосеске“ (2. Кор. 10:5). Чаче, е Јеховаскере силаја амен шај те отфрлина о погрешна ставија. Исто сар со несаво противотров шај те цидел о лошна последице таро несаво отров, аѓаар е Девлескоро Лафи шај те поможинел аменге те цида о лошно влијание таро свето е Сатанаскоро.

„МЕНИНЕН ТУМАРО НАЧИН САР РАЗМИСЛИНЕНА“

4. Саве промене ваљани сине бут џене амендар те керен кеда прифатинѓе о чачипе?

⁴ Размислин башо промене со ваљани сине те кере лен кеда прифатинѓан о чачипе таро е Девлескоро Лафи хем одлучинѓан те служине е Јеховаске. Буте џененге амендар акава значинела сине те чхинава те кера несаве неисправна буќа (1. Кор. 6:9-11). Бут сием благодарна со поможинѓа аменге о Јехова те кера адала промене!

5. Спрема Римјаните 12:2, кола дуј буќа ваљани те кера?

⁵ Ама, никогаш на смејнаја те мислина кај на ваљани понадари да те менина амен. Иако на кераја више о сериозна гревија со кераја лен сине англедер те крстина амен, сепак ваљани те да са амендар те избегина са со шај те чхивел амен палем те кера адала сериозна гревија. Со ка поможинел амен ко адава? О Павле пишинѓа: „Ма мукхен понадари да те обликујнел тумен акава свето, него менинен тумен аѓаар со ка менинен тумаро начин сар размислинена“ (Рим. 12:2). Значи мора те кера дуј буќа. Прво, на ваљани те дозволина понадари да те обликујнел амен акава свето. Дујто, ваљани те менина амен аѓаар со ка менина о начин сар размислинаја.

6. Со сикљоваја таро е Исусескере лафија сој пишиме ко Матеј 12:43-45?

⁶ И промена баши која со мислинѓа о Павле на значинела само те менина амаро изглед. (Дикх и рамка „Менимо или керела пе?“) Мора те кера целосно промена ки амари годи — амаре најхор мисле, чувствија хем ставија. Адалеске, секова јекх амендар ваљани те пучел пе: „Дали о промене со керава лен те шај те овав послично е Исусеа тане само површна или керава хор промене ки мли личност?“ Акава тано бут важно пучибе. О Исус вакерѓа со ваљани те кера. Адава дикхјола пе таро лескере лафија сој пишиме ко Матеј 12:43-45. (Читин.) Таро акала лафија сикљоваја нешто важно: нане доволно само те отфрлина о лошна мисле — ваљани те менина лен мисленцар кола со керена бахтало е Девле.

КЕР ПРОМЕНЕ КИ ТЛИ ЛИЧНОСТ

7. Сар шај те кера промене ки амари личност?

⁷ Дали шај те кера промене ко начин сар размислинаја? Е Девлескоро Лафи вакерела аменге кај шај. Ки лесте пишинела: „Понадари да размислинен ко нево начин хем уравен и неви личност која сој керди спрема е Девлескири волја ки чачутни праведност хем верност“ (Еф. 4:23, 24). Значи, шај те кера промене ки амари личност, ама адава нане локхо. Нане доволно само те борина амен против о погрешна желбе хем те чхинава те постапина погрешно. Ваљани те менина амаре желбе, мотивија, хем о начин сар понашинаја амен. Те шај те кера акава мора секогаш те трудина амен.

8-9. Сар о искуство јекхе пхралескоро сикавела кобор тано важно таро корено те менина амари личност?

⁸ Те дикха о пример јекхе пхралескоро со англедер бут пиела сине хем сине насилно. Ов чхинавѓа те пиел хем те марел пе хем пало адава крстинѓа пе. Адалеа денѓа бут шукар сведоштво ко тхан коте со живинѓа. Ама јекх рат, кратко откеда крстинѓа пе, сине испитимо ко начин со на аџикерѓа. Јекх мато мануш ало лесте кхере хем мангља те марел пе леа. Ко почеток, амаро пхрал контролиринѓа пли желба те марел пе. Ама кеда о мануш почминѓа те вакерел лошна буќа башо Јехова, о пхрал добором бут нервиринѓа пе со нашти сине више те контролиринел пе. Иклило аври хем марѓа е мануше. Коте сине о проблеми? Иако о проучибе и Библија поможинѓа леске те боринел пе против и желба те марел пе, ов панда на менинѓа пло начин сар размислинела сине. Јавере лафенцар, ов на менинѓа чаче пли личност.

⁹ Ама, акава пхрал на чхинавѓа те керел промене (Изр. 24:16). Адалеске со о старешине поможинѓе леске, ов понадари да духовно напредујнела сине. Сар со накхела сине о време, ов уло старешина. Пало адава, јекх рат англи дворана, аракхлило ки слично ситуација сар англедер. Јекх мато мануш мангља те марел јекхе таро старешине. Со керѓа амаро пхрал? Ко јекх љубезно хем мирно начин керѓа лафи е мате манушеа, смиринѓа и ситуација хем ингарѓа ле џи кхере. Соске ки акаја ситуација о пхрал реагиринѓа појавер? Амаро пхрал таро корено менинѓа пло начин сар размислинела сине. Хор ки песте, ов менинѓа пе ки мирно хем понизно личност. Адалеа анѓа фалба е Јеховаске.

10. Со ваљани те кера те шај те променина амари личност?

¹⁰ Акала промене на овена сигате или коркори пестар. Шај ка ваљани бут те трудина амен хем адава повише берша (2. Пет. 1:5). Асавке промене нане те овен само адалеске со бершенцар служинаја е Јеховаске. Ваљани те да са амендар те шај те менина амари личност. Те шај те кера акаја промена иси некобор основна буќа со ваљани те кера. Те дикха несаве лендар.

САР ТЕ МЕНИНА АМАРО НАЧИН САР РАЗМИСЛИНАЈА

11. Сар и молитва поможинела аменге те менина амаро начин сар размислинаја?

¹¹ Прво важно бути тани те молина амен. Ваљани те молина амен сар о псалмисти кова со вакерѓа: „Кер ки манде чисто вило, Девла, хем де ман нево духо, кова со ка поможинел манге те овав верно“ (Пс. 51:10). Мора те признајна кај ваљани те менина амаро начин сар размислинаја хем мора те молина е Јехова те поможинел аменге ко адава. Сар шај те ова сигурна кај о Јехова ка поможинел аменге те променина амен? Шај те охрабринел амен о ветување со денѓа ле е о Јехова е тврдоглава Израелцонге кола со живинена сине ко време е Езекиелескоро: „Ка дав лен јекх вило хем ка чхивав ки ленде нево духо... хем ка дав лен ковло вило“, јавере лафенцар вило кова со спремно шунела о водство е Девлескоро (Езек. 11:19). О Јехова сине спремно те поможинел адале Израелцонге те менинен пе, а спремно тано те поможинел аменге да.

12-13. а) Спрема Псалм 119:59, башо со ваљани хор те размислина? б) Кола пучиба ваљани те пуча амен?

¹² Дујто важно бути со ваљани те кера тани хор те размислина. Џикоте читинаја е Девлескоро Лафи секова диве, ваљани те одвојна време хор те размислина кола ставија хем чувствија ваљани те менина ки аменде. (Читин Псалм 119:59; Евр. 4:12; Јак. 1:25.) Бут тано важно те пенџара секова амаро стави хем секова амаро чувство упро кова со влијајнѓа и мудрост таро акава свето. Ваљани те ова искрена аменцар хем те признајна амаре слабостија хем пало адава бут те трудина амен те ослободина амен лендар.

¹³ На пример, пуч тут: „Дали ки манде иси барем хари љубомора или завист?“ (1. Пет. 2:1). „Дали мислинава кај сиум пошукар таро јавера башо мло потекло, образование или финансиско ситуација?“ (Изр. 16:5). „Дали дикхава сар потеле мандар околен сој почороле или околен сој тари јавер нација?“ (Јак. 2:2-4). „Дали привлечинена ман о буќа со нудинела лен е Сатанаскоро свето?“ (1. Јов. 2:15-17). „Дали привлечинела ман неморално хем насилно забава?“ (Пс. 97:10; 101:3; Амос 5:15). Кеда ка одговорина ко акала лична пучиба, шај ка хаљова саве промене ваљани те кера. Ако успејнаја те менина акала ставија или чувствија со мукхле хор корено ки аменде, ка кера бахтало амаре Даде сој ко небо (Пс. 19:14).

14. Соске тано бут важно те бирина шукар амала?

¹⁴ Трито важно бути тани те бирина шукар амала. Бизи разлика дали сием свесна или на, амаре амала бут влијајнена ки аменде (Изр. 13:20). Ки школа или ки бути, амен веројатно сием узо мануша кола со на поможинена аменге те размислина аѓаар сар со мангела о Девел. Ама, ко амаре состанокија шај те аракха о најшукар амала. Адатхе шај те ова поттикниме „те сикава мангипе хем те кера шукарипе“ (Евр. 10:24, 25).

„АЧХОВЕН ЗОРАЛЕ КИ ВЕРА“

15-16. Сар пробинела о Сатана те влијајнел упри амари годи?

¹⁵ На ваљани те бистра кај о Сатана тано одлучно те влијајнел упри амари годи. Ов користинела различна тактике те шај те керел те сумнина амен ки мудрост тари Библија хем те уништинел о шукар влијание со сине ла упри аменде.

¹⁶ О Сатана понадари да пучела о исто пучибе со пучља е Ева ки рајско градина: „Чаче ли о Девел вакерѓа кај...?“ (1. Мој. 3:1). Ко свето колеа со владинела о Сатана, бут пути шунаја пучиба кола со шај те чхивен амен те сумнина ко адава со верујнаја. На пример, шунаја пучиба сар сој: „Чаче ли о Девел на дозволинела хомосексуална врске? Чаче ли о Девел на мангела те славинен празникија хем роденденија? Чаче ли тумаро Девел на дозволинела те приминен рат преку трансфузија? Чаче ли о Девел, кова сој пхердо мангипаја, родела тумендар те на контактиринен тумаре фамилијаја хем амаленцар сој тане исклучиме?“

17. а) Со ваљани те кера кеда пучена амен пучиба коленцар со шај те чхивен амен те сумнина амен? б) Спрема Колошаните 2:6, 7, саво ка овел о резултати таро адава?

¹⁷ Ваљани целосно те ова увериме ко адава со верујнаја. Ако на сием увериме ко одговорија таро пучиба сар сој адала таро англуно пасус, шај те сумнина амен кај адава ко со верујнаја нане чаче. Сар со ка накхел о време, адала сумње шај те чхивен амен погрешно те размислина хем те уништинен амари вера. Тегани, со ваљани те кера? Е Девлескоро Лафи поттикнинела амен те менина амен аѓаар со ка менина амаро начин сар размислинаја, те шај те ова увериме со мангела о Девел те кера — „буќа сој тане шукар, совршена хем прифатлива леске“ (Рим. 12:2). Адалеа со редовно ка проучина, шај те уверина амен кај адава со сиклилем ле таро е Девлескоро Лафи тано чачипе. Исто аѓаар, адава ка поможинел аменге те ова сигурна кај е Јеховаскере мерилија тане исправна. Тегани, слично сар јекх каш со иси ле зорале коренија, ка мукха хор коренија хем ка ачхова зорале ки вера. (Читин Колошаните 2:6, 7.)

18. Со ка поможинел аменге те отфрлина хем те заштитина амен таро лошно влијание таро свето е Сатанаскоро?

¹⁸ Само ту шај те кере тли вера зорали. Никој нашти те керел адава туке. Адалеске, понадари да кер промене ко тло начин сар размислинеа. Секогаш молин е Јехова те поможинел туке пле свети духоја. Хор размислин хем понадари испитин тле ставија хем мотивија. Бирин амала кола со ка поможинен туке те кере о промене со ваљани. Аѓаар, ка заштитине тут таро лошно влијание таро свето е Сатанаскоро хем ка отфрлине са о „погрешна размислиба хем секоја пречка која со чхинавела е манушен те пенџарен е Девле“ (2. Кор. 10:5).