Дали мангеа те де молба баши Школа башо полновремена објавителија?

Дали иси тут машкар 23 хем 65 берш хем сиан ки полновремено служба? Дали иси тут шукар састипе, хем дали шај те служине ко тхана коте со иси побари потреба? Ако тло одговор тано оја, дали размислинѓан те де и молба баши Школа башо полновремена објавителија? Панда таро прво класи, бут брачна парија хем пхраља хем пхења со нане ко брако денѓе и молба. Сепак, ваљани аменге повише бижениме пхраља те ден и молба. Молин е Јехова те бајрарел тли желба те кере лескири волја хем те џа пало лескере Чхавескоро пример (Пс 40:8; Мт 20:28; Ев 10:7). Пало адава, размислин дали иси тут несаве обврске, сар сој фамилијарна одговорностија, бути или борчи хем дали шај те кере несаве промене ки ленде те шај те исполнине о условија баши школа.

Ко саве начинија хем ко кола тхана шај те служинен адала со добинѓе обука ки школа? Несаве лендар сине бичхалде те служинен ко подрачја коте со керела пе лафи ко јавера чхибја или те учествујнен ки посебно програма сведочибаске ко прометна тхана. А јавера служинена сар заменикија е покраинско надгледникоске, сар покраинска надгледникија, или сар мисионерија ко подрачје. Џикоте размислинеа ко саве начинија шај те служине е Јеховаске, шај иси тут о исто стави сар о пророко о Исаија кова со вакерѓа: „Аке сиум ме! Бичхал ман!“ (Иса 6:8).

ДИКХ О ВИДЕОКЛИПИ МИСИОНЕРИЈА —  РАБОТНИКИЈА КИ ЖЕТВА, А ПАЛО АДАВА ОДГОВОРИН КО АКАЛА ПУЧИБА:

• 

  Сар биринена пе мисионерија?

• 

  Сави шукар бути керена о мисионерија?

• 

  Кола тане несаве берекетија тари мисионерско служба?