Борин тут против и љубомора хем кер мир

1. Сар влијајнѓа и љубомора упри е Јосифескири фамилија?

О ЈАКОВ мангља са пле чхавен. Ама, најмангло сине леске о Јосиф. Сар реагиринѓе о јавера чхаве ко акава? Уле леске љубоморна хем адалеске почминѓе те мрзинен ле. Е Јосифескере пхрален на сине лен нисави причина те мрзинен ле соске ов на керѓа ленге ништо. Сепак, кеда сине ле 17 берш, ола бикинѓе ле сар робо хем ховавѓе пле даде кај несаво диво животно мударѓа лескере мангле чхаве. Адалеске со дозволинѓе те бајрол ки ленде љубомора, ола руминѓе о мир ки фамилија хем керѓе пумаре даде бут тажно (1. Мој. 37:3, 4, 27-34).

2. Спрема Галатите 5:19-21, соске и љубомора тани добором опасно?

² Ки Библија, и љубомораb тани спомними машкар „о постапке е грешно телоскере“ кола со шај те чхинавен некас те кхувел ко е Девлескоро Царство. (Читин Галатите 5:19-21.) И љубомора обично тани корено башо јавера лошна постапке, сар сој о душманлуко, о акошибе хем и холи.

3. Башо со ка кера лафи ки акаја статија?

³ Таро пример е Јосифескере пхраленгоро дикхаја сар и љубомора шај те руминел о односија е јаверенцар хем те уништинел о мир ки фамилија. Иако никогаш на би постапинаја сар е Јосифескере пхраља, саринен иси амен несовршено хем ховавно вило (Ерем. 17:9). Адалеске, нане чудно со понекогаш сием љубоморна е јаверенге. Те дикха несаве примерија тари Библија кола со ка поможинен аменге те хаљова соске ко амаро вило шај те бајровел љубомора. Пало адава ка дикха со шај те кера те шај те борина амен акале лошно особинаја хем сар шај те кера те овел мир машкар аменде.

СОСКЕ ШАЈ ТЕ ОВА ЉУБОМОРНА?

4. Соске о Филистејција сине љубоморна е Исакоске?

⁴ Кеда некој тано барвало. О Исак сине барвало мануш, хем о Филистејција сине леске љубоморна башо адава (1. Мој. 26:12-14). Ола чак учхарѓе пхувјаја о бунарија колендар со о Исак дела сине пани пле животненге (1. Мој. 26:15, 16, 27). Слично сар о Филистејција, несаве мануша авдиве почминена те овен љубоморна околенге сој тане побарвале лендар. Ола на само со мангена о буќа со иси е јаверен него мангена о јавера те нашавен адава со иси лен.

5. Соске о верска водачија сине љубоморна е Исусеске?

⁵ Ако некој тано мангло хем ценимо. О Еврејска верска водачија сине љубоморна е Исусеске соске бут мануша мангена ле сине (Мат. 7:28, 29). О Исус сине е Девлескоро претставнико, хем сикавела сине е јаверен башо чачипе. Ама, адала верска водачија ширинена сине ховајба баши лесте те шај те руминен лескоро шукар анав (Мар. 15:10; Јован 11:47, 48; 12:12, 13, 19). Со шај те сикљова таро акава извештај? На смејнаја те ова љубоморна околенге сој тане мангле таро пхраља хем пхења ко собрание башо ленгере шуже особине. Наместо адава, ваљани амен да те развина асавке особине (1. Кор. 11:1; 3. Јов. 11).

6. Сар сикавѓа о Диотреф кај тано љубоморно е јаверенге?

⁶ Ако некас иси теократска одговорностија. Ко прво веко, о Диотреф сине љубоморно околенге со предводинена сине ко христијанско собрание. Ов мангела сине „те овел прво машкар“ о пхраља, хем адалеске вакерела сине бут лошна буќа башо апостол Јован хем башо јавера пхраља те шај те руминел ленгоро анав ко собрание (3. Јов. 9, 10). Иако никогаш на би кераја адава со керѓа о Диотреф, шај амен да те почмина те ова љубоморна кеда несаво пхрал ка добинел одговорност која со амен би мангаја те овел амен — посебно ако мислинаја аменге кај амен да сием добором способна те кера ла, па чак поспособна.

7. Сар шај и љубомора те влијајнел упри аменде?

⁷ И љубомора тани сар отровно чар. Ако лакоро семе почминела те мукхел корено ко амаро вило, шај те овел пхаро те уништина ле. О негативна чувствија, сар сој и гордост хем и себичност шај те керен и љубомора те овел панда побари. Сар јекх отровно чар со чхинавела јекх лулуди те бајровел, и љубомора шај те чхинавел амен те развина јавера шуже особине, сар сој мангипе, сочувство хем шукарипе. Само со ка приметина кај и љубомора почминела те мукхел корено ко амаро вило, ваљани одма те икала ла корендан. Сар шај те борина амен акале особинаја?

СИКАВ ПОНИЗНОСТ ХЕМ ОВ ЗАДОВОЛНО АДАЛЕА СО ИСИ ТУТ

8. Кола особине шај те поможинен аменге те борина амен е љубомораја?

⁸ Ако трудинаја амен те ова понизна хем задоволна адалеа со иси амен, ка шај те борина амен е љубомораја. Кеда развинаја акала шуже особине ко амаро вило, ки лесте нане те овел тхан е љубомораке те бајрол. О понизно мануш нане те мислинел баши песте повише него со ваљани хем нане те мислинел кај ов заслужинела повише таро јавера (Гал. 6:3, 4). Окова сој задоволно адалеа со иси ле на спорединела пе е јаверенцар (1. Тим. 6:7, 8). Ако иси амен акала особине, ка ова бахтале кеда некој јавер ка добинел нешто шукар.

9. Спрема Галатите 5:16 хем Филипјаните 2:3, 4, ко со шај те поможинел амен о свети дух?

⁹ Те шај те на ова љубоморна, хем те ова понизна хем задоволна адалеа со иси амен, ваљани аменге помош таро е Девлескоро свети дух. (Читин Галатите 5:16; Филипјаните 2:3, 4.) Пле духоја, о Јехова шај те поможинел аменге те испитина амаре најхор мисле хем мотивија. Адалеске со поможинела амен о Девел, шај те цида амендар о лошна мисле хем чувствија хем те почмина те мислина позитивно (Пс. 26:2; 51:10). Те дикха о пример е Мојсеескоро хем е Павлескоро, кола со успешно боринѓе пе против и љубомора.

10. Која ситуација шај сине те овел испит е Мојсееске? (Дикх и слика тари насловно страна.)

¹⁰ Е Мојсее сине ле баро авторитети упро е Девлескоро народо, ама ов на пробинела сине те чхинавел е јаверен да те овел лен адава авторитети. На пример, ки јекх прилика о Јехова леља дело таро свети дух со сине упро Мојсеј хем денѓа ле упри јекх група израелска старешине кола со терѓона сине паше узо свето шатори. Кратко пало адава, о Мојсеј шунѓа кај дуј старешине кола со на сине узо шатори исто аѓаар добинѓе свети дух хем почминѓе те понашинен пе сар пророкија. Сар реагиринѓа ов кеда о Исус Навин вакерѓа леске те чхинавел лен ко адава? О Мојсеј на сине љубоморно адале дује старешиненге баши чест со сикавѓа ленге о Јехова. Наместо адава, ов сине понизно хем бахтало со шај сине ола да те пророкујнен (4. Мој. 11:24-29). Со шај те сикљова таро Мојсеј?

11. Сар шај о старешине те џан пало е Мојсеескоро пример?

¹¹ Ако сиан старешина, дали некогаш сиан сине замолимо те обучине некас баши несави собраниско одговорност која со ту бут мангеа ла? На пример, шај секова курко уживинеа те водине о Проучибе и Стражарско кула. Ако сиан понизно сар о Мојсеј, нане те мислине кај врединеа похари кеда ка ваљани те обучине јавере пхрале те шај ов да јекх диве те керел адаја задача. Наместо адава, ка ове бахтало со шај те поможине леске ко адава.

12. Сар бут христијања авдиве сикавена кај тане понизна хем задоволна адалеа со иси лен?

¹² Те дикха јекх јавер ситуација колаја со соочинена пе бут попхуре пхраља. Несаве лендар бут берша служинѓе сар координаторија ко старешинство. Ама, кеда пхерена 80 берш, ола спремно откажинена пе тари адаја одговорност. О покраинска надгледникија кеда пхерена 70 берш чхинавена адале службаја хем понизно прифатинена јавер задача ки служба. А ко последна некобор берша, бут џене тари бетелско фамилија сине бичхалде те служинен ко подрачје. Асавке верна пхраља хем пхења нане хољаме околенге со керена о задаче кола со англедер ола керена лен сине.

13. Соске о Павле шај сине те овел љубоморно е 12 апостоленге?

¹³ О апостол Павле тано панда јекх шукар пример сар христијани кова со сикавѓа понизност хем сине задоволно адалеа со иси ле. Ов на дозволинѓа ки лесте те бајрол љубомора. Иако бут трудинѓа пе ки служба, ов понизно вакерѓа: „Ме сиум најтикно таро апостолија хем на заслужинава те овав викимо апостоли“ (1. Кор. 15:9, 10). О 12 апостолија сине заедно е Исусеа џикоте керела сине пли служба ки Пхув, ама о Павле уло христијани чак откеда о Христос муло хем воскреснинѓа. Иако покасно добинѓа задача те служинел сар апостоли „ко јавера народија“, е Павле никогаш на сине ле адаја посебно чест те овел јекх таро адала 12 апостолија (Рим. 11:13; Дела 1:21-26). Наместо те овел љубоморно адале 12 пхраленге хем башо ленгоро паше амалипе со сине лен е Исусеа, о Павле сине задоволно адалеа со иси ле.

14. Со ка кера ако сием понизна хем задоволна адалеа со иси амен?

¹⁴ Ако сием понизна хем задоволна адалеа со иси амен, ка ова сар о Павле хем ка сикава кај поштујнаја о авторитети кова со о Јехова дела ле е јаверенге (Дела 21:20-26). О Девел мукхља ко христијанско собрание те овен именујме пхраља кола со ка предводинен. Иако тане несовршена, ов дикхела лен сар „мануша денде сар поклон“ (Еф. 4:8, 11). Кеда поштујнаја лен хем понизно шунаја ленгоро водство, ачховаја паше е Јеховаја хем иси амен мир амаре пхраленцар хем пхењенцар.

„ТЕ ДА АМЕНДАР СА ТЕ КЕРА МИР“

15. Со ваљани те кера?

¹⁵ Адатхе коте со иси љубомора нашти те овел мир. Ваљани корендан те икала и љубомора таро амаро вило хем те пазина те на кера о јавера те овен љубоморна. Мора те кера акала дуј важна буќа те шај те шуна е Јехова, кова со заповединѓа аменге „те да амендар са те кера мир хем те поможина јекх јекхеске те ова зорале“ (Рим. 14:19). Со конкретно шај те кера те шај те поможина е јаверенге те боринен пе е љубомораја, хем сар шај амен те кера мир ко собрание?

16. Сар шај те поможина е јаверенге те боринен пе е љубомораја?

¹⁶ Амаро стави хем амаре постапке шај бут те влијајнен упро јавера. О свето мангела те фалина амен е буќенцар со иси амен (1. Јов. 2:16). Ама, асавко стави шај те керел некас љубоморно. Те шај те на авел џи ко адава, шукар тано те на кера секогаш лафи башо буќа со иси амен или башо адава со мангаја те кина. Нане те бајрара некасте љубомора ако сием скромна хем ако пазинаја сар понашинаја амен кеда иси амен одговорностија ко собрание. Ако секогаш кераја лафи башо амаре одговорностија, кераја шукар пхув колате со и љубомора шај те бајрол. Спротивно таро адава, ако сикаваја искрено интерес е јаверенге хем ако фалинаја лен башо шукар буќа со керена, ка поможина ленге те овен задоволна адалеа со иси лен хем ка кера те овел мир хем јекхипе ко собрание.

17. Со успејнѓе те керен е Јосифескере пхраља, хем соске?

¹⁷ Шај те победина и љубомора! Те ирана амен ко пример е Јосифескере пхраленцар. Пало бут берша откеда бикинѓе ле сар робо, ола дикхле пе леа ко Египет. Англедер те вакерел кој тано, о Јосиф испитинѓа пле пхрален те шај те дикхел дали променинѓе пе. Ов викинѓа лен ко ручко, ама ки адаја прилика ов бут повише денѓа хајбе пле најтикне пхралеске, е Венијаминеске (1. Мој. 43:33, 34). Сепак, на сине ништо со сикавела кај о јавера пхраља сине љубоморна е Венијаминеске. Наместо адава, ола сикавѓе кај искрено интересинена пе хем леске хем пумаре дадеске, е Јаковске (1. Мој. 44:30-34). Адалеске со на сине више љубоморна, ола керѓе те иранел пе о мир ки ленгири фамилија (1. Мој. 45:4, 15). Ако амен да корендан икалаја и љубомора таро амаро вило, ка поможина те икерел пе о мир ки фамилија хем ко собрание.

18. Спрема Јаков 3:17, 18, саво ка овел о резултати ако кераја мир?

¹⁸ О Јехова мангела те борина амен е љубомораја хем те кера мир. Те шај те успејна ко адава, мора бут те трудина амен. Сар со дикхлем ки акаја статија, ко секова јекх амендар шај те појавинел пе љубомора (Јак. 4:5). Освен адава, живинаја ко свето кова со ширинела и љубомора. Ама, ако сием понизна хем задоволна адалеа со иси амен хем ако амаро вило тано пхердо благодарност, тегани ки лесте нане те овел тхан баши љубомора. Машкар аменде ка владинел мир хем сарине ка развина хем ка сикава шуже особине. (Читин Јаков 3:17, 18.)