Мло бахтало живото е Јеховаске ки служба

О следно берш, о пхраља ко Бетел известинѓе кај ки Јужноафриканско подружница ваљанена доброволција соске добинѓе неви машина печатибаске. Ме пријавинѓум ман сар доброволцо хем бут сиум сине бахтало со биринѓе ман. Исто аѓаар, јавера да трин пхраља таро Бетел ки Канада сине бириме, о Денис Лич, о Бил Меклелан хем о Кен Нордин. Вакерѓе аменге кај ка ачхова ки Јужно Африка бут време.

Јавинѓум ман ме дајаке хем вакерѓум лаке: „Иси ман те вакерав туке нешто. Ка џав ки Јужно Африка!“ На вакерѓа бут, ама џанљум кај поддржинела ман. Ми дај на сине џувли која со керела сине бут лафи, ама сине ла зорали вера хем бут мангела сине е Јехова. Иако мо дад хем ми дај сине тажна со ка џав добором дур, сепак ола никогаш на жалинѓе пе баши мли одлука.

ЏАВА КИ ЈУЖНО АФРИКА

Прво гелем ко Бетел ко Бруклин коте со добинѓем трин масек обука баши јекх посебно машина печатибаске. Пало адава, бродеа гелем џи ко Кејптаун, Јужно Африка. Тегани сине ман само 20 берш. Хем кеда реслем атхе астарѓем раќате о вози те џа џи ко Јоханесбург. Рано сабајле, ачхилем те одморина амен ки јекх тикни диз, ко Кару, кова со сине пустинско подрачје. Чаче сине бут тато хем бут прашина. Соштар џене дикхлем таро џами хем пучаја амен сине: „Кај алем? Со ка кера акате бути?“ Ама, пало бут берша халилем кај акава подрачје сине бут шужо хем мирно тхан.

Некобор берш керава сине ки линотип машина која со спреминела сине те печатинен пе о списанија Стражарско кула хем Џангавѓовен! И подружница печатинела сине списанија ко бут афричка чхибја, на само баши Јужно Африка, него исто аѓаар башо бут јавера пхувја ки Африка. Сием сине бут бахтале со акаја машина печатибаске, баши колаке со алем чак тари Канада, сине бут корисно!

Покасно, керава сине бути ки канцеларија која со грижинела пе сине башо печатибе, транспорт хем превод. Сиум сине бут зафатимо хем задоволно ко живото!

БРАКО ХЕМ НЕВИ ЗАДАЧА

Ко 1968 берш, женинѓум ман јекхе пионеркаја, и Лора Боуен, која со живинела сине паше узо Бетел. Ој исто аѓаар куцинела сине башо преведувачко одделение. Ко адава време, о неве брачна парија обично нашти ачховена сине ко Бетел. Адалеске и подружница денѓа амен неви задача сар специјална пионерија. Сиум сине хари секиримо. Пало деш берш ко Бетел, коте со сине манге обезбедимо хајбе хем тхан живибаске, сар акана ка успејна те грижина амен башо са адава е хари паренцар со добинаја лен сине сар специјална пионерија? Секова масек добинаја сине по 25 рандија, (кола со тегани врединена сине 35 доларија), само ако пхераја сине о саатија со родена пе амендар, кераја сине повторна посете хем даја сине доволно литература. Адале паренцар мора сине те платина и кирија, хајбаске, превоз, о докторија хем јавера трошакија.

Сием сине доделиме те служина ки јекх група паше узи диз Дурбан, узо Индиско Океани. Ко адава тхан живинена сине бут Индиција, соске ленгере предција ко 19 веко але ки Јужно Африка те керен бути ко плантаже баши шекерно репка. Акана лен иси лен јавер бути, ама понадари да икерѓе пли култура хем пло начин сар хранинена пе, сар сој о вкусно кари. Хем адалеске со керена сине ки англиско чхиб лафи, ки служба сине аменге бут полокхе.

Ко адава време, о специјална пионерија ваљани сине те керен 150 саатија ко масек. Адалеске и Лора хем ме планиринѓем о прво диве те џа шов саатија ки служба. Сине бут тато хем влажно. На сине амен посете, а ни библиска курсија, ваљани сине те проповедина шов саатија само таро кхер ко кхер. Пало несаво време откеда почминѓем е службаја дикхљум ко мло саати хем само 40 минутија накхле! Пучава ман сине, дали ка издржина ки акаја специјално пионерско служба?

Ама, сигате успејнѓем те организирина амен. Секова диве спреминаја сине аменге сендвичија, хем чхиваја сине аменге супа или кафа ко термос. Кеда ваљани сине аменге пауза, ка паркирина сине амаро тикно врда ки сенка тело јекх каш. Понекогаш околу аменде кхедена пе сине пхердо чхаве кола со дикхена амен сине соске сием сине поразлично лендар. Хем некоборе дивенге халилем кај пало дуј, трин саатија, о диве накхела сине бут сигате.

Сием сине бут бахтале со шај сине те вакера о чачипе тари Библија е манушенге таро адава подрачје. Дикхлем кај о Индиција поштујнена е јаверен, кај тане љубезна хем кај дарана таро Девел. Бут хиндусија прифатинѓе о шукар хабери. Ола мангле те сикљовен баши Библија, башо Јехова, башо Исус, башо нево свето хем баши надеж е муленге. Пало јекх берш сине амен 20 библиска курсија. Секова диве хаја сине ручко различно фамилијаја касаја со проучинаја сине. Бут сием сине бахтале!

Ама, сигате пало адава добинѓем неви задача — сием сине бичхалде те служина ки покраинско служба узо бут шужо Индиско Океани. Секова курко сием сине гостија ко различна фамилие, џикоте посетинаја сине о собранија хем соработинаја сине ленцар те шај те охрабрина лен. Улем дело таро ленгере фамилие хем уживинаја сине ленгере чхавенцар. Аѓаар, сигате накхле дуј бут шуже берша. Тегани јавинѓе пе манге тари подружница. О пхрал вакерѓа манге: „Мангаја те иранен тумен ко Бетел“. Ме одговоринѓум леске: „Бут шукар аменге акате коте со сием“. Ама џанѓола пе, сием сине спремна те прифатина секоја задача со ка добина ла сине.

ИРАНАЈА АМЕН КО БЕТЕЛ

Кеда палем иранѓум ман ко Бетел, почминѓум те керав бути ко Одделение баши служба, коте со сине ман чест те соработинав буте зрела хем искусна пхраленцар. Ко адава време, откеда о покраинско надгледнико ка посетинел сине о собрание, пали пли посета ов бичхалела сине извештај џи ки подружница. Пало адава, и подружница бичхалела сине јекх писмо џи ко собрание со темелинела пе сине ко адава извештај. И цел акале писмонгири сине те охрабринен хем те ден несаве упатствија ако ваљани сине. Е секретарен сине лен бут бути соске ваљани сине те превединен о извештај таро покраинско надгледнико тари чхиб коса, зулу хем јавера чхибја ко англиски. А пало адава, о писмија тари подружница џи ко собранија, ваљани сине те превединен пе таро англиски ко адала чхибја. Бут сиум сине благодарно адале вредна преведуваченге, кола со исто аѓаар поможинѓе манге те хаљовав кола пхарипа сине амаре пхрален хем пхењен тари кали раса.

Ко адава време, ки Јужно Африка секоја раса сине ла пло дело коте со ваљани сине те живинел. Адалеске, ни јекх раса на смејнела сине те дружинел пе јавере расаја. Амаре пхраља со сине кале, керена сине лафи, проповединена сине хем џана сине ко состанокија ки пумари чхиб.

На џанава сине буте пхрален тари кали раса, соске мло собрание сине ко подрачје коте со керела пе англиски лафи. Ама, ко Бетел сине ман прилика повише те сикљовав баши ленгири култура хем обичаија. Дикхљум кола проблемија иси амаре пхрален башо традицие хем о религиозна верувања со иси адари. Иако сине лен противибе тари фамилија хем таро цело гав, ола сине храбра соске откажинѓе пе таро традицие со на сине библиска хем таро спиритизам! Ко адала изолириме тхана сине баро чоролипе. Бут џене лендар на геле ки школа, ама сепак поштујнена сине и Библија.

Сине ман прилика те керав бути ко некобор правна случаија коте со сине вклучими амаре пхраленгири верско слобода хем и неутралност. Бут охрабринѓа ман и верност хем и храброст е чхавенгири кола со сине бркиме таро школе соске одбинѓе те учествујнен ко ленгере религиозна молитве.

Амаре пхраља соочинѓе пе панда јекхе пхаре ситуацијаја ки јекх тикни афричко пхув која со тегани викинела пе сине Свазиленд. Кеда муло о цари Собуза II, таро са о граѓанија родела пе сине те жалинен ко јекх одредено традиционално начин. О мурша мора сине те керен пе герале, а о џувља те чхинен пле бала кратко. Бут пхраља хем пхења сине прогониме соске на мангле те учествујнен ко асавке обичаија со сине поврзиме е муленцар. Ленгири верност спрема о Јехова керѓа амен бут бахтале! Сиклилем бут баши верност хем баши стрпливост таро амаре пхраља ки Африка хем адава керѓа амари вера позорали.

ПАЛЕМ ИРАНЃУМ МАН КИ ПЕЧАТНИЦА

Ко 1981 берш, палем иранѓум ман те керав бути ки печатница, те шај те поможинав те користинен пе компјутерија ки печатарско бути. Акава сине бут интересно време! О печатарска методе бут менинѓе пе. О претставнико тари јекх фирма денѓа е пхраленге неви машина печатибаске која со шај сине те користина ла бизо паре. Хем адалеске заменинѓем о ења пуране линотип машине, панџе неве машиненцар печатибаске. Исто аѓаар, лелем јекх неви печатарско преса. Печатинаја сине литература сар никогаш англедер!

О компјутерија поможинѓе аменге те измислина неве методе баши композиција, сар сој и програма МЕПС (Систем кова со електронски превединела ко повише чхибја о фотослог). И технологија бут напредујнѓа откеда амен о штар бетелитија тари Канада алем те кера бути ки Јужно Африка (Иса. 60:17). Ко адава време, о соштар сием сине више жениме духовно зрела пхењенцар. Ме хем о Бил панда служинаја ко Бетел. А о Кен хем о Денис, иси лен акана фамилие.

И бути ки подружница бајрола сине. Са повише литература сине печатими, преведими хем ингарди ко јавера подружнице. Адалеске, ваљани сине нево бетелско објекти. Хем о пхраља градинѓе јекх бут шужо нево Бетел ко западно дело таро Јоханесбург со сине посветимо ко 1987 берш. Сине ман бари чест те овав дело таро адава напредок хем бут берша те служинав ко одбор тари подружница ки Јужно Африка.

ДОБИНЃЕМ ПАНДА ЈЕКХ НЕВИ ЗАДАЧА

Ко 2001 берш, сием сине бут изненадиме кеда викинѓе амен те служина ко Одбор е подружницакоро ко САД, кова со сигенде сине кердо. Иако сине аменге жал со ваљанѓем те мукха амари бути хем амален ки Јужно Африка, сием сине бут бахтале со шај сине те почмина нево живото сар дело таро тари бетелско фамилија ки Америка.

Сием сине хари секириме, соске ка ова сине дур тари е Лоракири дај. Амен нашти сине бут те кера таро Њујорк, ама е Лоракере пхења нудинѓе пе те поможинен ла физички, емоционално хем финансиски. Ола вакерѓе: „Амен нашти те ова ки полновремено служба, ама ако грижинаја амен амаре дајаке, адава туменге ка поможинел те продолжинен ки полновремено служба“. Бут сием ленге благодарна.

Исто аѓаар, мо пхрал хем лескири ромни, кола со тегани живинена сине ко Торонто (Канада), грижинена пе сине ме дајаке. Ој више 20 берш живинела сине ленцар. Хем бут сием благодарна баши грижа хем о мангипе со сикавѓе лаке џи ко лакоро мерибе. Баро берекети тано кеда о јавера членија тари фамилија тане спремна те керен промене ко пло живото те шај те грижинен пе е попхуре родителенге, а адава понекогаш шај те овел пхаро!

Мли неви задача ко Бетел ки Америка сине ки печатница, кола со сине ла панда поневи хем поедноставно технологија. А акана керава бути ко Одделение баши набавка. Баро берекети сине манге со о последна 20 берш, шај сине те овав дело тари акаја бари подружница, коте со акана отприлика иси 5.000 бетелитија хем околу 2.000 бетелска соработникија!

Англедер 60 берш, никогаш на би авела манге сине ки годи кај ка овав акате. Са акала берша и Лора спремно поддржинѓа ман. Сине ман чаче шужо живото! Бут ценинаја секоја задача со сине амен хем са е манушен коленцар со сине амен прилика те соработина, машкар коленде сој бут џене таро подружнице со посетинѓем лен ко бут делија таро свето. Адалеске со акана иси ман повише таро 80 берш, керава похари бути соске акана иси бут терне пхраља кола сој тане обучиме те завршинен адала задаче.

О псалмисти пишинѓа: „Бахтало тано о народо каскоро Девел тано о  Јехова“ (Пс. 33:12). Акава тано чаче аѓаар! Бут сиум благодарно со сине ман прилика те служинав е Јеховаскере бахтале народоја.