Осетинава ман сигурно соске иси ман доверба ко Јехова

САР ПОЧМИНЃУМ ТЕ ОВЕЛ МАН ДОВЕРБА КО ЈЕХОВА

Бијандиљум ко 1948 берш ко јекх тикно гав ки југозападно Нигерија. Ко адава време ме дадескоро потикно пхрал о Мустафа хем мо најпхуро пхрал о Вахаби крстинѓе пе хем уле Јеховаскере сведокија. Кеда сине ман ења берш мо дад муло. Адава сине манге бут пхаро. О Вахаби вакерѓа манге кај палем ка шај те дикха амаре даде кеда ка воскреснинел. Акала лафија утешинѓе ман хем адава поттикнинѓа ман те проучинав и Библија. Аѓаар, ко 1963 берш крстинѓум ман. Исто аѓаар, ме јавера да трин пхраља крстинѓе пе.

Ко 1965 берш гељум ко мо попхуро пхрал о Вилсон ко Лагос, хем адари уживинѓум ко друштво е општо пионеренцар таро собрание Игбоби. Ленгири радост хем ревност бут поттикнинѓе ман хем адалеске ко јануари 1968 ме да почминѓум те служинав сар пионери.

Јекх пхрал со служинела сине ко Бетел, о Алберт Олегбеби, организиринѓа јекх посебно состанок е потерненцар коте со керѓа лафи кај иси потреба таро специјална пионерија ки северно Нигерија. Панда сетинава ман ко лескере поттикнувачка лафија: „Тумен сиен терне хем шај те користинен тумаро време хем сила е Јеховаске. Адари иси бари потреба!“ Мангљум те овав сар о Исаија хем спремно те џав сегде коте со ка бичхалел ман о Јехова. Адалеске пхерѓум и молба (Иса. 6:8).

Ко мај 1968 берш сиум сине бичхалдо те служинав сар специјално пионери ки диз Кано, северно Нигерија. Служинѓум адари џикоте трајнела сине и Биафранско војна (1967-1970). И војна анѓа бут муке хем мерибе ки северно Нигерија хем пало адава ширинѓа пе ки источно Нигерија. Јекх пхрал кова со мислинела сине башо мло шукарипе пробинѓа те убединел ман те на џав адари соске дарала сине кај ка случинел пе манге нешто. Ама ме вакерѓум леске: „Ов састо со грижинеа тут манге. Ама уверимо сиум кај ако о Јехова мангела те служинав ко адава тхан, ов ка грижинел пе манге“.

ИСИ МАН ДОВЕРБА КО ЈЕХОВА КО ТХАН СО СИНЕ УНИШТИМО ТАРИ ВОЈНА

Сине бут жално адава со случинѓа пе ко Кано. И граѓанско војна уништинѓа акаја бари диз. Џикоте џаја сине ки служба, понекогаш дикхаја сине ки улица муле манушен со сине мударде ки војна. Иако ко Кано сине некобор собранија, сепак повише таро пхраља нашле. Ачхиле похари таро 15 објавителија хем ола сине бут обесхрабриме хем дарана сине. Акала пхраља хем пхења сине бут радосна кеда ме хем панда панџ специјална пионерија реслем ко Кано. Амен охрабринѓем лен хем ола осетинѓе пе пошукар. Поможинѓем ленге те организиринен о состанокија хем палем те почминен е службаја, те бичхален извештаија хем те поручинен литература таро Бетел.

Са о специјална пионерија со сием сине адатхе почминѓем те сикљова и чхиб хауса. Адалеске со проповединаја сине ки ленгири чхиб, бут мануша мангена сине те шунен амен. Ама несавенге тари главно религија со сине адатхе на свиџинѓа пе адава со проповединаја. Хем адалеске мора сине бут те пазина. Ки јекх прилика пали манде хем пало пхрал со сине манцар ки служба прастандило јекх мануш чхурикаја. Ама адалеске со сигате прастандилем, ов нашти сине те ресел амен. Иако сине бут опасна ситуацие, о Јехова поможинѓа аменге те живина бизи дар. О број е објавителенгоро почминѓа те бајрол (Пс. 4:8). Авдиве иси повише таро 500 објавителија кола со служинена ко 11 собранија ко Кано.

ПРОГОНСТВО КО НИГЕР

Ко Кано служинѓум само некобор масекија хем одма пало адава ко август 1968, заедно јавере дује специјално пионеренцар бичхалѓе ман те служинав ко Нијамеј, и главно диз ки Република Нигер. На ваљанѓа те накхел бут време те шај те хаљова кај о Нигер кова со аракхљола ки западно Африка тано јекх таро најтате тхана ки пхув. Освен со ваљани сине те издржина о баро татипе, ваљани сине исто аѓаар те сикљова и француско чхиб која сој службено чхиб ко адава тхан. Иако акала буќа на сине локхе те керен пе, сепак сине амен доверба ко Јехова хем почминѓем те проповедина ки главно диз заедно е некоборе објавителенцар кола со живинена сине адатхе. Башо кратко време, секова јекх таро Нијамеј кова со џанела сине те читинел добинѓа о лил Чачипе кова со ингарела ко вечно живото. О мануша почминѓе чак коркори те авен хем те роден лила!

Сигате халилем кај о властија на мангена е Јеховаскере сведокон. Ко јули 1969 берш кхединѓем амен те шај те икера о прво покраинско конгрес ки пхув коте со сине околу 20 присутна. Едвај аџикераја сине те дикха сар ка крстинен пе дуј неве објавителија. Ама ко прво диве таро конгрес али и полиција хем чхинавѓа и програма. Ман, е јавере специјално пионерен хем е покраинско надгледнико ингарѓе амен ки полициско станица. Откеда испитинѓе амен нарединѓе аменге о тајсутно диве палем те ирана амен ки полициско станица. Халилем кај о властија шај те керен аменге проблемија хем адалеске организиринѓем о говор башо крстибе те икерел пе ко јекх приватно кхер хем пало адава е дује кандидатен тајно крстинѓем лен ки јекх река.

Некобор курке покасно, и влада нарединѓа манге хем е јавере панџе специјално пионеренге те џа аменге тари пхув. Вакерѓе аменге кај иси амен 48 саатија те кера адава хем мора сине коркори те снаџина амен. Шунѓем адаја наредба хем гелем директно ко Бетел ки Нигерија коте со добинѓем јавера задаче.

Сиум сине бичхалдо те служинав ко гав Орисунбари (Нигерија). Адатхе уживинѓум ки служба хем ко водибе библиска курсија заедно е тикне групаја објавителија со живинена сине адатхе. Ама пало шов масек, о Бетел вакерѓа манге те иранав ман палем ко Нигер коркори. Ко почеток сиум сине бут изненадимо хем секиримо ама пало адава едвај аџикерава сине палем те дикхав ман е пхраленцар таро Нигер.

Иранѓум ман ко Нијамеј. О дујто диве откеда ресљум, јекх бизнисмени тари Нигерија халило кај сиум Сведоко хем почминѓа те пучел ман пучиба баши Библија. Почминѓум те проучинав леа хем откеда чхинавѓа те пушинел хем те маќол, крстинѓа пе. Сине манге мило те џав ки служба е пхраленцар хем е пхењенцар ко различна делија таро Нигер хем те дикхав сар ко са акала берша о мануша прифатинена о чачипе. Кеда ресљум ки пхув атхе сине 31 објавителија, а кеда гељум манге сине 69.

„НА ЏАНАЈА БУТ БАШО АКТИВНОСТИЈА БАШО ЦАРСТВО КИ ГВИНЕЈА“

Ко декември 1977 берш, иранѓум ман ки Нигерија те шај те добинав обука. Пало трин курке обука, о координатор таро Одбор е подружницакоро о Малколм Виго, денѓа ман те читинав јекх писмо таро Бетел ки Сиера Леоне. Ола родена сине јекх пхрал кова сој беќари, со иси ле шукар састипе, сој тано пионери хем со џанела те керел англиски хем француски лафи те шај те служинел сар покраинско надгледнико ки Гвинеја. О пхрал о Виго вакерѓа манге кај и обука со добинѓум ла сине баш баши адаја задача. Ов исто аѓаар јасно вакерѓа манге кај адаја нане баш локхи задача. Хем вакерѓа манге: „Шукар размислин англедер те ане одлука“. Ме одма одговоринѓум леске: „Ако о Јехова бичхалела ман, ме ка џав“.

Гељум ки Сиера Леоне хем адари керѓум лафи е пхраленцар таро Бетел. Јекх члени таро Одбор е подружницакоро вакерѓа манге: „На џанаја бут башо активностија башо Царство ки Гвинеја“. Иако о Бетел тари Сиера Леоне сине одговорно баши проповедничко активност ки Гвинеја, ола нашти сине те авен ко контакт е објавителенцар адари соске и политичко ситуација на сине шукар. Хем иако некобор пути о Бетел пробинѓа те бичхалел пхрален те шај те посетинен е пхрален адари, адава на успејнѓа ленге. Адалеске пучле ман дали шај те џав ки главно диз тари Гвинеја, ко Конакри, хем те пробинав те добинав престој адари.

Кеда ресљум ко Конакри, гељум ки Нигеријанско амбасада хем керѓум лафи е амбасадореа. Вакерѓум леске кај мангава те проповединав ки Гвинеја. Ов вакерѓа манге те на ачховав соске шај и полиција те астарел ман или те случинел пе манге нешто полошно. Вакерѓа манге: „Иран тут ки Нигерија хем проповедин адари“. А ме вакерѓум леске: „Одлучинѓум те ачховав акате“. Адалеске пишинѓа јекх писмо џи ко министери башо Внатрешни работи тари Гвинеја колесте со замолинѓа ле те поможинел манге хем о министери љубезно приминѓа ман.

Кратко пало адава, иранѓум ман ко Бетел ки Сиера Леоне хем вакерѓум е пхраленге сави одлука анѓа о министери — сине манге одобримо престој ки Гвинеја! О пхраља сине бут радосна кеда шунѓе сар о Јехова водинѓа ман хем поможинѓа манге.

Таро 1978 џи ко 1989 служинѓум сар покраинско надгледнико ки Гвинеја, ки Сиера Леоне хем сар заменико е покраинско надгледникоске ки Либерија. Ко почеток бут пути насваљовава сине. Понекогаш адава случинела пе манге сине кеда сиум сине ко изолириме тхана. Ама о пхраља керена сине са со шај те шај те ингарен ман ки болница.

Јекх пути бут насвалиљум, астарѓум маларија а ко исто време сине ман глистија ко цревија. Кеда пало несаво време састиљум, дознајнѓум кај о пхраља више керена сине лафи башо адава коте те парунен ман! Иако сиум сине ко ситуацие коте со мло живото сине ки опасност, никогаш на ало манге ки годи те откажинав ман тари мли задача. Хем сиум сине уверимо кај и чачутни сигурност авела таро Девел кова со шај те ваздел е мулен.

МЛИ РОМНИ ХЕМ МЕ СИКАВАЈА ДОВЕРБА КО ЈЕХОВА

Ко 1988 запознајнѓум е Дорка, јекх понизно хем духовно зрело пхен која со сине пионерка. Лелем амен хем ој заедно манцар патујнела сине ки покраинско служба. И Дорка докажинѓа кај тани шукар хем кај тани спремно те керел жртве башо Јехова. Те шај те реса таро јекх собрание џи ко јавер, мора сине те пхира пешки 25 километре амаре куференцар. А те шај сине те реса џи ко подур собранија, користинаја сине било саво превоз со ка аракха хем патујнаја сине ко чикале друмија коте со сине бут дупке.

И Дорка тани бут храбро. На пример, понекогаш ваљани сине те накха таро реке коте со сине пхердо крокодилија. Јекх пути ваљани сине те патујна панџ диве хем ваљани сине те накха тари јекх река. Ама адалеске со о каштунале мостија сине пхаге мора сине те користина кану. Кеда и Дорка мангља те икљол таро кану, пели ки река која со сине хор. О солдуј на џанаја сине те пливина, а ко пани сине бут крокодилија. Сине амен среќа со несаве терне рупинѓе ки река хем спасинѓе ла. Несаво време пало адава настан сине амен кошмарија, ама продолжинѓем амаре задачаја.

Ко почеток таро 1992 берш, сием сине бут изненадиме кеда дознајнѓем кај и Дорка ачхили кхамни. Ко почеток на сием сине сигурна дали адава ка чхинавел амен ки полновремено служба. Ама тегани вакерѓем аменге: „О Јехова денѓа амен поклон!“ Адалеске, амаре чхајаке чхивѓем о анав Јахгифт, кова со ко англиски значинела поклон таро Јехова. А пало штар берш бијандило о Ерик. О солдуј амаре чхаве докажинѓе кај тане чаче поклон таро Јехова. И Јахгифт несаво време служинѓа ки преведувачко канцеларија ко Конакри, а о Ерик тано слуга-помошнико.

Иако и Дорка пало несаво време чхинавѓа те служинел сар специјално пионери, ој продолжинѓа те служинел сар општо пионери иако ваљани сине те аракхел е чхавен. Адалеске со поможинѓа манге о Јехова ме продолжинѓум е специјално полновремено службаја. Откеда амаре чхаве бариле, и Дорка шај сине палем те почминел е специјално полновремено службаја. Акана о солдуј џене служинаја сар мисионерија ко Конакри.

О ЈЕХОВА ЗАШТИТИНЕЛА АМЕН

Секогаш џава сине адари коте со ингарѓа ман о Јехова. Ме хем ми ромни бут пути осетинаја сине лескири заштита хем благослов. Адалеске со сине амен доверба ко Јехова наместо ко материјална буќа сине амен похари проблемија хем похари секирацие. Таро лично искуство ме хем и Дорка халилем кај таро Јехова авела и чачутни сигурност, о Девел кова со спасинела амен (1. Лет. 16:35). Уверимо сиум кај о живото околенгоро со иси лен доверба ки лесте „ка овел ко сигурно тхан“ (1. Сам. 25:29).