СТАТИЈА ПРОУЧИБАСКЕ 48
Нека овел тут доверба кај о Јехова ка поможинел тут ко пхаре диве
Овен силна... соске ме сиум туменцар, вакерела о Јехова о заповеднико е војскенгоро (АГЕЈ 2:4)
ГИЛИ 118 Де амен панда вера
БАШО СО КА КЕРА ЛАФИa
1-2. а) Саве сличностија иси машкар аменде хем о Евреија со иранѓе пе ко Ерусалим? б) Вакер несаве пхарипа со сине е Евреен. (Дикх и рамка „Ко време е Агеескоро, е Захаријаскоро хем е Езраскоро“.)
ДАЛИ понекогаш секиринеа тут со ка овел ки иднина? Шај нашавѓан тли бути хем секиринеа тут сар ка грижине тут тле фамилијаке. Или секиринеа тут тле фамилијаке адалеске со и политичко ситуација нане шукар, иси прогонство или противибе башо амаре активностија. Дали иси тут несаве таро акала проблемија? Ако оја, акаја статија ка охрабринел тут соске ки лате ка дикха сар о Јехова поможинѓа е Израелцонге таро пурано време колен со сине лен слична проблемија.
2 Е Евреенге кола со цело пло живото живинѓе ко Вавилон ваљанѓа силно вера те шај те мукхен о удобно живото со сине лен хем те џан ки пхув колаке со повише џене на џанле бут. Кратко откеда ресле, соочинѓе пе економска хем политичка проблеменцар хем сине лен противибе. Адалеске несавенге сине пхаро о градибе е храмескоро те чхивен ко прво тхан ко пло живото. Тари адаја причина околу 520 берш а.а.е., о Јехова бичхалѓа дује пророкон е Агеје хем е Захарија те поможинен е народоске те иранен пли ревност (Агеј 1:1; Зах. 1:1). Сар со ка дикха акала пророкија успејнѓе те охрабринен е народо. Сепак, отприлика 50 берш покасно е Евреенге со иранѓе пе ко Ерусалим ваљанѓа палем охрабрување. Пало адава о Езра, о вешто препишувачи е законескоро, ало таро Вавилон ко Ерусалим те охрабринел е Девлескере народо те чхивен о чачутно обожавибе ко прво тхан ко пумаро живото (Езра 7:1, 6).
3. Кола пучиба ка дикха ки акаја статија? (Изреки 22:19).
3 О пророштвија таро Агеј хем o Захарија поможинѓе е Девлескере народоске таро пурано време понадари да те овел лен доверба ко Јехова иако сине лен противибе. Ола шај те поможинен аменге да те ова увериме кај о Јехова ка поможинел амен бизи разлика саве пхарипа ка овен амен ко живото. (Читин Изреки 22:19.) Џикоте кераја лафи баши е Девлескири порака со денѓа ла преку о Агеј хем о Захарија хем џикоте дикхаја е Езраскоро пример, ка добина одговор ко акала пучиба: Сар влијајнѓе упро Евреија адава со сине лен различна пхарипа? Соске ваљани е Девлескири волја те овел аменге ко прво тхан ко живото чак кеда накхаја таро пхаре времија? Сар шај те овел амен побари доверба ко Јехова кеда иси амен пхарипа?
САР ВЛИЈАЈНЃЕ О ПХАРИПА УПРО ЕВРЕИЈА
4-5. Соске шај о Евреија нашавѓе пумари ревност палем те градинен о храми?
4 Кеда о Евреија иранѓе пе ко Ерусалим, аџикерѓа лен бут бути. Ола одма почминѓе те градинен е Јеховаскоро жртвенико хем чхивѓе е храмескере темелија (Езра 3:1-3, 10). Ама и ревност со сине лен ко почеток сигате накхља. Соске? Освен со ваљанѓе те градинен о храми, ола ваљанѓе те градинен песке кхера, те обработинен о ниве хем те грижинен пе пумаре фамилиенге (Езра 2:68, 70). Хем упро са адава, сине лен противибе таро душмања кола со керѓе плани те чхинавел пе е градибаја е храмескоро (Езра 4:1-5).
5 Освен адава, акала Евреија соочинѓе пе економска хем политичка проблеменцар. Ко адава периоди ленгири пхув сине дело таро персиско царство. Откеда ко 530 берш а.а.е., о персиско цари о Кир муло, ко лескоро тхан уло цари о Камбис кова со мангља те освојнел о Египет. Џикоте џала сине ко Египет, лескере војникија шај накхле тари израелско територија хем веројатно родинѓе хајбаске, пијбаске хем тхан коте со несаво време шај сине те раќарен, а адава керѓа панда попхаро те овел е Израелцонге. Кеда ко персиско царство почминѓа те владинел о Дариј I, атхе панда сине политичка проблемија хем о мануша ко несаве тхана бунинена пе сине против о властија. Са акава сигурно керѓа несаве Евреија те секиринен пе башо адава сар ка грижинен пе пумаре фамилиенге. Башо са акала пхарипа несаве Евреија мислинѓе кај панда нане време те градинел пе е Јеховаскоро храми (Агеј 1:2).
6. Спрема Захарија 4:6, 7, саве јавера пхарипа сине е Евреен, хем ко со уверинѓа лен о Захарија?
6 Читин Захарија 4:6, 7. Освен о економска хем о политичка проблемија, е Евреен сине лен хем прогонство. Ко 522 берш а.а.е., о душмања успејнѓе те влијајнен упри персиско власт те забранинел е Евреенге те градинен е Јеховаскоро храми. Ама, о Захарија уверинѓа е Евреен кај о Јехова ка користинел пли моќно сила те цидел секоја пречка. Ко 520 берш а.а.е., о цари о Дариј дозволинѓа те продолжинел пе те градинел пе о храми хем чак денѓа лен о потребна средствија те шај те градинен. Ов исто аѓаар заповединѓа е управителенге таро адава тхан те поможинен лен (Езра 6:1, 6-10).
7. Сар о Јехова благословинѓа е Евреен со иранѓе пе ко Ерусалим коленге со е Јеховаскири волја сине најважно?
7 Преку о Агеј хем о Захарија о Јехова ветинѓа пле народоске кај ка поддржинел лен ако ко прво тхан чхивена о градибе е храмескоро (Агеј 1:8, 13, 14; Зах. 1:3, 16). Адалеске со сине охрабриме таро пророкија, о Евреија почминѓе палем те градинен о храми ко 520 берш а.а.е., хем башо похари таро панџ берш завршинѓе е градибаја. Адалеске со е Евреенге сине најважно те керен е Девлескири волја чак ко пхаре времија, о Јехова поможинѓа лен хем ко материјално хем ко духовно поглед. А адава анѓа ленге бари радост џикоте служинена сине е Јеховаске (Езра 6:14-16, 22).
Е ДЕВЛЕСКИРИ ВОЛЈА НЕКА ОВЕЛ ТУКЕ КО ПРВО ТХАН
8. Сар шај о лафија таро Агеј 2:4 те поможинен амен те концентририна амен те кера е Јеховаскири волја? (Дикх хем и фуснота.)
8 Адалеске со и бари неволја тани бут паше, бут тано важно те ова послушна ки заповед те џа те вакера о шукар хабери (Марко 13:10). Сепак шај те овел аменге пхаро те чхива и служба ко прво тхан ако иси амен финансиска проблемија, или противибе ки служба. Сар шај е Јеховаскири волја те овел аменге најважно ко живото? Адава со ка ова увериме кај „о Јехова о заповеднико е војскенгоро“b тано тари амари страна. Ов ка поможинел аменге ако понадари аменге важно те кера лескири волја а на амари. Адалеске, нане состар те дара. (Читин Агеј 2:4.)
9-10. Сар јекх брачно пари дикхља кај адава со вакерѓа о Исус ко Матеј 6:33 тано чаче?
9 Те дикха о пример јекхе брачно парескоро со викинена пе Олег хем Иринаc кола со служинена сар пионерија. Откеда преселинѓе пе ко јавер тхан те поможинен ко јекх собрание ола ачхиле бизи бути адалеске со сине економска проблемија ки адаја пхув. Иако скоро јекх берш нашти сине те аракхен бути колате со шај сине те ачхон, сепак ола цело време осетинѓе е Јеховаскири поддршка хем понекогаш добинена сине помош таро пхраља хем пхења. Со поможинѓа ленге те икљовен ко крајо акале пхарипаја? О Олег кова со ко почеток сине разочаримо вакерела: „Адава со сием сине зафатиме ки служба поможинѓа аменге те концентририна амен ко адава сој најважно ко амаро живото“. Џикоте понадари да родена сине бути, ола сине зафатиме е службаја.
10 Јекх диве кеда иранѓе пе тари служба, јекх таро ленгере комшие вакерѓа ленге кај ленгоро паше амал патујнѓа околу 160 километре те шај те анел ленге дуј торбе хајбаја. О Олег вакерела: „Адава диве панда јекх пути халилем кобор бут о Јехова хем о пхраља грижинена пе аменге. Увериме сием кај о Јехова никогаш на бистрела пле слуген бизи разлика кобор хем те овел пхари ленгири ситуација“ (Мат. 6:33).
11. Со шај те очекујна ако понадари да концентриринаја амен те кера е Девлескири волја?
11 О Јехова мангела и најважно бути те овел аменге те кера ученикија соске аѓаар спасинена пе животија. Сар со дикхлем ко ефтато пасус, о Агеј поттикнинѓа е народо палем те почминел е свето службаја. О Јехова ветинѓа пле слугенге кај ако палем почминена те градинен, ов кај ка дел лен пло благослов (Агеј 2:18, 19). Амен да шај те ова сигурна кај о Јехова ка благословинел амаро трудо ако ко прво тхан чхиваја и задача која со ов денѓа амен.
САР ШАЈ ТЕ БАЈРАРА АМАРИ ДОВЕРБА КО ЈЕХОВА
12. Соске е Езраске хем е јавере Евреенге ваљанѓа силно вера?
12 Ко 468 берш а.а.е., и дујто група Евреија иклиле таро Вавилон те џан ко Ерусалим а заедно ленцар сине хем о Езра. Е Езраске хем околенге со цидинѓе акава друмо, ваљанѓа бари вера. Соске? Ола ваљанѓе те накхен таро опасна друмија хем ингарена сине пеа бут злато хем сребро кова со денѓа лен о цари башо храми. Адалеске о чора шај сине локхесте те нападинен лен (Езра 7:12-16; 8:31). Исто аѓаар, сигате халиле кај ни ко Ерусалим на сине безбедно. Ки диз живинена сине бут хари мануша, а о ѕидија хем о порте ваљани сине те поправинен пе. Со шај те сикљова таро Езра башо адава сар те бајрара амари доверба ко Јехова?
13. Сар о Езра бајрарѓа пли доверба ко Јехова? (Дикх хем и фуснота.)
13 О Езра дикхља сар о Јехова поддржинела пле народо ко пхаре времија. Бут берша англедер, ко 484 берш а.а.е., о Езра веројатно живинела сине ко Вавилон кеда о цари о Ахасвер нарединѓа те мударен са е Евреен ко персиско царство (Ест. 3:7, 13-15). Акава значинела кај е Езраскоро хем са е Евреенгоро живото сине ки опасност! Кеда шунѓе башо акава, ола сине добором секириме со постинѓе хем ровѓе хем сигурно молинѓе е Јехова те поможинел ленге (Ест. 4:3). Замислин туке сар о Езра хем о Еврееја осетинѓе пе кеда дикхле сар окола со мангле те мударен лен сине мударде! (Ест. 9:1, 2). Акала пхаре времија веројатно спреминѓе е Езра башо идна испитија хем најверојатно бајрарѓе лескири доверба кај о Јехова шај те заштитинел пле народо.d
14. Која поука сиклили јекх пхен кеда дикхља сар о Јехова грижинела пе лаке ко пхаре времија?
14 Кеда дикхаја сар о Јехова грижинела пе аменге ко пхаре времија, адава бајрарела амари доверба ки лесте. Те дикха о пример е Анастасијакоро која со живинела ки Источно Европа. Ој мукхља пли бути адалеске со лакере колеге керена сине лаке баро притисок те мешинел пе ко јекх политичко проблеми. Ој вакерела: „Никогаш на сиум сине ки ситуација те овав бизо паре. Ама мукхљум акаја бути е Јеховаске ко васта хем дикхљум сар ов љубезно грижинѓа пе манге. Те ачхиљум некогаш палем бизи бути, нане те дарав. Ако мло небесно Дад грижинела пе манге авдиве, ов ка грижинел пе манге тајса да“.
15. Со поможинѓа е Езраске понадари да те бајрарел пли доверба ко Јехова? (Езра 7:27, 28).
15 О Езра дикхља е Јеховаскоро вас ко пло живото. Адава со о Езра размислинела сине сар о Јехова грижинѓа пе леске англедер сигурно поможинѓа ле те бајрарел пли доверба ки лесте. Адава шај те приметина таро акала лафија: „О вас е Јеховаскоро мле Девлескоро, сине упри манде“. (Читин Езра 7:27, 28.) О Езра користинѓа слична лафија панда панџ пути ко библиско лил кова со ов пишинѓа ле (Езра 7:6, 9; 8:18, 22, 31).
Ко кола ситуацие шај појасно те дикха е Девлескоро вас? (Дикх ко пасус 16)e
16. Ко кола ситуацие шај те дикха кај о Јехова чаче поможинела амен? (Дикх хем и слика.)
16 О Јехова шај те поможинел амен кеда сием ки пхари ситуација. На пример, даја прилика е Јеховаске те сикавел пло вас ко амаро живото кеда ваљани те пуча ки бути башо слободна диве те шај те џа ко конгрес или кеда ваљани те менина о работно време те шај те џа ко са амаре состанокија. Шај о буќа ка икљон бут пошукар таро адава со очекујнѓем. Тегани амари доверба ко Јехова ка овел побари.
О Езра ровела хем молинела пе ко храми адалеске сој леске пхаро башо гревија е народоскере. О мануша околу лесте исто аѓаар ровена. Пало адава о Сеханија утешинела е Езра е лафенцар: „Иси панда надеж е Израелеске... Амен сием туја“ (Езра 10:2, 4). (Дикх ко пасус 17.)
17. Сар о Езра сикавѓа кај тано понизно ко пхаре времија? (Дикх и слика тари насловно страна.)
17 О Езра понизно родинѓа помош таро Јехова. Секогаш кеда сине секиримо баши несави одговорност, о Езра понизно молинела пе сине е Јеховаске (Езра 8:21-23; 9:3-5). Адава со сине ле доверба ко Јехова поттикнинѓа е јаверен те поддржинен ле хем те овел лен сар лескири вера (Езра 10:1-4). Кеда секиринаја амен башо амаре материјална потребе или баши амаре фамилијакири безбедност, мора те овел амен доверба ко Јехова хем те рода лестар помош ки молитва.
18. Со шај те поможинел аменге те овел амен панда побари доверба ко Јехова?
18 Ако понизно родаја помош таро Јехова хем прифатинаја и помош таро амаре пхраља хем пхења, тегани амари доверба ко Девел ка бајрол панда повише. И Ерика кола со иси ла трин чхаве, на нашавѓа пли доверба ко Јехова чак кеда случинѓе пе лаке страшна буќа. Муло лакоро бебе англедер те бијанѓовел а башо кратко време муло хем лакоро ром. Кеда сетинела пе ко са адава со случинѓа пе лаке, ој вакерела: „Нашти те џане англедер сар о Јехова ка поможинел туке. И помош шај те добина ла ко начин со на очекујнаја. Дикхљум кај о Јехова преку мле амаленгере постапке хем лафија одговоринѓа ко мле молитве. Ако вакерава ленге со случинела пе манге ко живото тегани шај полокхесте те поможинен ман“.
НЕКА ОВЕЛ ТУТ ДОВЕРБА КО ЈЕХОВА ЏИ КО КРАЈО
19-20. Со сикљоваја таро Евреија со нашти иранѓе пе ко Ерусалим?
19 Шај исто аѓаар те сикљова јекх важно поука таро Евреија да кола со на иранѓе пе ко Ерусалим. Несаве шај на иранѓе пе адалеске со сине пхуре, насвале или башо ленгере фамилијарна околностија. Сепак, ола спремно поддржинѓе околен со иранѓе пе ко Ерусалим аѓаар со денѓе лен бут буќа башо храми (Езра 1:5, 6). Изгледа околу 19 берш покасно, откеда иранѓа пе и прво група ко Ерусалим, окола со ачхиле ко Вавилон понадари да бичхалена сине прилогија ко Ерусалим (Зах. 6:10).
20 Чак ако нашти кераја адава со мангаја ки служба башо Јехова, шај те ова сигурна кај о Јехова дикхела адава со кераја таро вило. Котар џанаја адава? Ко е Захаријаскоро време о Јехова вакерѓа пле пророкоске те керел круна таро злато хем сребро кова со сине бичхалдо околендар со ачхиле ко Вавилон (Зах. 6:11). Акаја „скапоцено круна“ ваљанѓа те сетинкерел лен ко ленгере дарежлива прилогија (Зах. 6:14). Амен шај те ова сигурна кај о Јехова никогаш на бистрела со трудинаја амен те служина леске цело вилеа ко пхаре времија (Евр. 6:10).
21. Со ка поможинел аменге те овел амен доверба ко Јехова, бизи разлика со ка случинел пе ки иднина?
21 Џанѓола пе, ко акала последна диве понадари да ка овел амен пхарипа хем шај чак о условија ка овен полошна ки иднина (2. Тим. 3:1, 13). Ама на ваљани претерано те секирина амен. Ма бистре адава со вакерѓа о Јехова пле народоске ко е Агејескоро време: „Ме сиум туменцар... Ма даран“ (Агеј 2:4, 5). Амен да шај те ова сигурна кај о Јехова ка овел аменцар са џикоте даја амаро најшукар те кера лескири волја. Ако применинаја о поуке таро пророштвија со вакерѓе лен о Агеј хем о Захарија хем таро пример е Езраскоро, ка бајрара амари доверба ко Јехова, бизи разлика со аџикерела амен ки иднина.
ГИЛИ 122 Овен зорале!
a Акаја статија ка поможинел амен те бајрара амари доверба ко Јехова кеда иси економска проблемија, нестабилна политичка условија или противибе башо амаре активностија.
b О израз „О Јехова, о заповеднико е војскенгоро“ појавинела пе 14 пути ко лил Агеј. Акава сетинкерѓа е Евреен хем сетинела амен кај о Јехова тано Семоќно хем заповединела баре војскаја таро ангелија (Пс. 103:20, 21).
c Несаве анава тане мениме.
d О Езра на само со сине вешто препишувачи е Девлескере законескоро него исто аѓаар развинѓа бари доверба ко е Јеховаскере пророштвија панда англедер те џал ко Ерусалим (2. Лет. 36:22, 23; Езра 7:6, 9, 10; Ерем. 29:14).
e ОБЈАСНИМИ СЛИКА: Јекх пхрал пучела пле шефе башо слободна диве те шај те џал ко конгрес, ама о шефи на дозволинела леске. Ов молинела пе е Јеховаске баши помош те водинел ле англедер те џал хем палем те пучел пле шефе. Ов сикавела пле шефеске и конгресно покана хем објаснинела кај и Библија шај те керел амен пошукар мануша. О шефи тано воодушевимо хем адалеске мукхела ле те џал.