Сар шај те аракхе туке брачно партнери?

1-2. а) Башо со ваљани шукар те размислинел јекх христијани со нане женимо англедер те почминел врска? б) Ко со мислинела пе е лафеа „врска“ ки акаја статија? (Дикх ко „Објасниме лафија“.)

ДАЛИ мангеа те женине тут? Иако и среќа на зависинела таро адава дали некој ка овел женимо или на, бут христијања кола со нане жениме — бизи разлика дали пхуре или терне — мангена те аракхен песке брачно партнери. Џанѓола пе, англедер те почмине врска некасаја, ваљани те ове паше амал е Јеховаја, шукар те пенџаре тут хем те ове способно материјално те грижине тут кеда ка ове ко бракоa (1. Кор. 7:36). Ако кереа акала буќа, побари тани и веројатност кај ка овел тут среќно брако.

² Сепак, нане секогаш локхо те аракхе брачно партнери со ка одговоринел туке (Изр. 31:10). Па чак ако аракхеа некас кас со мангеа пошукар те запознајне, шај нане те овел туке локхо те почмине врска.b Ки акаја статија ка дикха со шај те поможинел е христијаненге со нане жениме те аракхен некас со мислинена кај шај те овел ленге шукар брачно партнери хем те почминен врска. Исто аѓаар, ка дикха сар шај о јавера таро собрание те поможинен околенге со мангена те женинен пе.

САР ШАЈ ТЕ АРАКХЕ ШУКАР БРАЧНО ПАРТНЕРИ?

3. Башо кола буќа ваљани те размислинел јекх христијани со мангела те женинел пе?

³ Ако мангеа те женине тут, англедер те почмине те запознајне тут некасаја, ваљани те џане кола особине мангеа те овен тле брачно партнере.c Ако на размислинеа башо акава, шај те на приметине некас со шај те овел туке шукар брачно партнери, или те почмине врска некасаја со на одговоринела туке. Џанѓола пе, врска ваљани те почмине некасаја сој крстимо слуга е Јеховаскоро (1. Кор. 7:39). Ама на значинела кај секова крстимо слуга ка овел шукар брачно партнери туке. Адалеске, шај те пуче тут: „Саве целија иси ман ко живото? Кола особине манге важна те овен мле брачно партнере? Дали адава со очекујнава тано разумно?“

4. Башо со молинена пе несаве џикоте родена песке брачно партнери?

⁴ Ако мангеа те женине тут, сигурно молинеа тут башо адава (Фил. 4:6). Џанѓола пе, о Јехова на ветинела кај секоле јекхе слугаске ка аракхел брачно партнери. Ама ов грижинела пе башо тле потребе хем чувствија хем шај те поможинел туке џикоте родеа брачно партнери. Адалеске, продолжин те вакере леске со мангеа хем сар осетинеа тут (Пс. 62:8). Молин тут баши стрпливост хем баши мудрост (Јак. 1:5). О Џон,d јекх пхрал таро САД кова со нане женимо, вакерела башо со молинела пе: „Вакерава е Јеховаске саве особине мангава те овен мле ромња. Молинава ман те овен ман прилике те запознајнав несаве пхења која со шај те овел манге шукар ромни. Исто аѓаар, молинава е Јехова те поможинел ман те развинав особине со ка поможинен манге те овав шукар ром“. И Тања, јекх пхен тари Шри Ланка, вакерела: „Џикоте родава некас со шај те овел манге ром, молинава е Јехова те поможинел манге те ачховав леске верно, те овав позитивно хем радосно“. Чак ако на аракхеа одма некас со шај те овел туке брачно партнери, о Јехова ветинела кај понадари да ка грижинел пе башо тле физичка хем емоционална потребе (Пс. 55:22).

5. Ко кола прилике окола со нане жениме шај те запознајнен некас со мангела е Јехова? (1. Коринќања 15:58; дикх хем и слика).

⁵ И Библија поттикнинела амен те ова „зафатиме ки бути е Господареске“. (Читин 1. Коринќања 15:58.) Ако сиан зафатимо ки служба башо Јехова хем накхавеа време различна пхраленцар хем пхењенцар, на само со ка уживине ко шукар друштво, него исто аѓаар ка овен тут прилике те запознајне јавере пхрален хем пхењен кола со нане жениме хем кола со исто сар туте, тане зафатиме ки служба башо Јехова. А џикоте деа тутар са те радујне е Јехова, ка ове чаче среќно.

6. Џикоте трудинена пе те аракхен брачно партнери, со на ваљани те бистрен окола со нане ко брако?

⁶ Сепак, пазин ки јекх бути. Џикоте родеа туке брачно партнери ма дозволин адава те овел туке и најважно бути ко живото (Фил. 1:10). И чачутни среќа на зависинела таро адава дали сиан ко брако, него таро тло амалипе е Јеховаја (Мат. 5:3). А џикоте сиан коркори, иси тут побари слобода хем шај те кере повише ки служба башо Јехова (1. Кор. 7:32, 33). Адалеске, шукар користин адава време. И Џесика јекх пхен таро САД, која со женинѓа пе кеда сине ла скоро 40 берш, вакерела: „Англедер те женинав ман сиум сине зафатими ки служба хем адава поможинѓа манге те овав задоволно иако мангава сине те женинав ман“.

ДИКХ САР ПОНАШИНЕЛА ПЕ

7. Соске тано мудро те одвојне туке време те дикхе сар некој понашинела пе англедер те вакере со осетинеа? (Изреки 13:16).

⁷ Со ако баши некасте мислинеа кај шај те овел туке шукар брачно партнери? Дали ваљани одма те вакере лаке со осетинеа? И Библија вакерела кај јекх гоѓавер мануш шукар испитинела англедер те керел нешто. (Читин Изреки 13:16.) Адалеске ка овел мудро, англедер те сикаве кај интересинеа тут некаске, тари страна те дикхе сар понашинела пе. О Ешвин, јекх пхрал тари Холандија, вакерела: „О чувствија шај сигате те бајрон ама хем сигате те нашавѓовен. Адалеа со ка одвојне туке време те дикхе сар некој понашинела пе, нане те почмине врска која со темелинела пе само ко моментална чувствија“. Освен адава, џикоте шукар дикхеа некас шај ка хаљове кај адаја личност нане туке.

8. Сар шај некој со нане женимо шукар те дикхел некас те шај те хаљол дали одговоринела леске? (Дикх хем и слика.)

⁸ Сар шај шукар те дикхе некас бизо те овел приметливо? Ко состанокија или џикоте дружинена тумен е јавере пхраленцар хем пхењенцар, шај ка приметине и духовност, о особине хем о понашибе тари адаја личност. Кој тане лакере амала хем башо со керела лафи? (Лука 6:45). Дали иси тумен слична целија? Шај те кере лафи е старешиненцар таро лакоро собрание или јавере зрела пхраленцар хем пхењенцар кола со шукар пенџарена ла (Изр. 20:18). Шај те пуче ко саво гласо тани хем саве особине иси ла (Рут 2:11). Џикоте шукар дикхеа некас, пазин те на кере те осетинел пе незгодно. Поштујн лакере чувствија хем лакири приватност хем ма џа пало секова лакоро чекори.

9. Англедер те вакере некаске со осетинеа кова со мислинеа кај шај те овел тло брачно партнери, ко со ваљани те ове сигурно?

⁹ Кобор време ваљани те дикхе некас англедер те вакере кај сиан заинтересиримо лаке? Ако вакереа лаке сигате, шај те мислинел песке кај анеа сигате одлуке бизо те размислине (Изр. 29:20). Тари јавер страна ако аџикереа бут, шај те мислинел песке кај на сиан одлучно, посебно ако халили кај интересинеа тут лаке (Проп. 11:4). Ма бистре кај англедер те вакере некаске со осетинеа, на ваљани те ове сигурно кај ка женине тут лаја. Ама ваљани те ове сигурно кај сиан спремно башо брако хем кај адаја личност шај те одговоринел туке сар брачно партнери.

10. Со ваљани те кере ако хаљовеа кај некој тано заинтересиримо туке, а ту на сиан?

¹⁰ Ама со ако хаљовеа кај некој тано заинтересиримо туке? Ако ту на сиан заинтересиримо лаке, трудин тут адава јасно те сикаве тле постапкенцар. Нане љубезно те кере о јавер те мислинел кај мангеа те почмине врска, а уствари нане тут асавки намера (1. Кор. 10:24; Еф. 4:25).

11. Ако поможинеа некаске те почминел врска или те женинел пе, со ваљани те ле ко предвид?

¹¹ Ко несаве пхувја, очекујнела пе о родителија или несаво јавер возрасно те биринел брачно партнери некаске тари фамилија со нане женимо. Ко јавера пхувја, и фамилија или о амала аракхена некас со шај те овел леске брачно партнери, а пало адава договоринена о чхаво хем и чхај те дикхен пе те шај те одлучинен дали ка почминен врска. Ако сиан замолимо те поможине некаске те почминел врска или те женинел пе, ле ко предвид о желбе хем о потребе е солдујенгере. Ако мислинеа кај некој шај те овел шукар брачно партнери тле амалеске или некаске тари тли фамилија, трудин тут шукар те запознајне адале пхрале или пхења, те шај те дикхе саве особине иси е јавере, хем сој најважно, дали тани духовно личност. О паше амалипе е Јеховаја тано бут поважно таро паре, таро образование или тари положба ко општество. Ама ма бистре, ко крајо о пхрал хем и пхен тане адала со ваљани те одлучинен дали ка лен пе (Гал. 6:5).

САР ШАЈ ТЕ ПОЧМИНЕ ВРСКА?

12. Ако мангеа те почмине врска некасаја, сар шај те вакере лаке адава?

¹² Ако мангеа те почмине врска некасаја, сар шај те вакере лаке адава?e Шај те договорине тут лаја те керен лафи или ко несаво јавно тхан или преку телефони. Јасно вакер кола тане тле намере (1. Кор. 14:9). Ако ваљани мукх лаке време те шај те размислинел со те одговоринел (Изр. 15:28). Ако адаја личност нане заинтересирими баши врска, тегани поштујн лакере чувствија.

13. Со шај те кере ако некој вакерела туке кај мангела те почминел туја врска? (Колошања 4:6).

¹³ Со ако некој вакерела туке кај интересинела пе туке? Веројатно ваљанѓа леске храброст, адалеске ов љубезно хем сикав поштовање. (Читин Колошања 4:6.) Ако ваљани туке време те шај те размислине дали ка прифатине те ове ки врска, вакер адава. Ама трудин тут те одговорине со посигате (Изр. 13:12). Ако нане тут намера те ове ки врска, вакер адава љубезно хем јасно. Дикх сар о Ханс, јекх пхрал тари Австрија одговоринѓа јекхе пхењаке кеда вакерѓа леске кај мангела те запознајнел ле пошукар: „Вакерѓум лаке мли одлука тактично ама јасно. Керѓум адава одма соске на мангљум те надинел пе. Тари исто причина, пало адава разговор пазинава сине сар понашинава ман лаја“. Тари јавер страна, ако мангеа те почмине врска, вакер адава хем керен лафи сар очекујнена те овел тумари врска. Ако сиен тари различно култура, или разликујнена тумен ко нешто јавер, шај адава со ту очекујнеа разликујнела пе таро адава со о јавер очекујнела.

САР ШАЈ О ЈАВЕРА ТЕ ПОМОЖИНЕН ОКОЛЕНГЕ СО НАНЕ КО БРАКО?

14. Сар шај амаре лафенцар те поможина околенге со нане ко брако?

¹⁴ Сар шај те охрабрина хем те поможина околен со мангена те женинен пе? Јекх начин тано аѓаар со ка пазина со кераја лафи (Еф. 4:29). Шај те пуча амен: „Дали лава ки хајгара околен со мангена те женинен пе? Кеда дикхава сар јекх пхрал хем јекх пхен сој беќарија керена лафи, дали мислинава манге кај иси нешто машкар ленде?“ (1. Тим. 5:13). Освен адава, никогаш на ваљани те кера окола со нане ко брако те осетинен пе кај тане жалибаске или кај похари врединена таро јавера. О Ханс коле со спомнинѓем ле англедер вакерела: „Несаве пхраља хем пхења вакерена манге: ’Соске на женинеа тут? Пхуриљан више‘. Асавке лафија шај те керен окола со нане ко брако те осетинен пе кај нане цениме хем ако иси лен притисок те женинен пе, шај панда повише те бајрарен адава притисок“. Бут пошукар тано те рода прилике те пофалина околен со нане ко брако! (1. Сол. 5:11).

15. а) Спрема о начело таро Римјања 15:2, башо со ваљани те размислина англедер те поможина некаске те аракхел песке брачно партнери? (Дикх хем и слика.) б) Кола важна поуке сиклиљан таро видеоклипи?

¹⁵ Со ако мислинаја аменге кај несаво пхрал хем несави пхен шај те овен шукар пари? И Библија вакерела аменге кај ваљани те размислина башо чувствија е јаверенгере. (Читин Римјања 15:2.) Бут пхраља хем пхења со нане жениме на мангена о јавера те запознајнен лен некасаја со шај те овел ленге брачно партнери хем амен ваљани те поштујна адава (2. Сол. 3:11). Јавера шај мангена помош, ама на ваљани те мешина амен ако ола на родинѓе амендар адава.f (Изр. 3:27). Несаве шај мангена те запознајнен некас, ама на ко добором директно начин. И Лидија, јекх беќарка тари Германија, вакерела: „Шај те канине е пхрале хем е пхења те дружинен тумен ки јекх побари група. Кер прилика те шај о пхрал хем и пхен те дикхен пе, а о јавер мукх ленге ко васта“.

16. Со на ваљани те бистрен окола со нане ко брако?

¹⁶ Сарине амен бизи разлика дали сием жениме или на, шај те овел амен среќно живото! (Пс. 128:1). Адалеске, ако мангеа те женине тут ама панда на аракхљан некас, ачхов зафатимо ки тли служба башо Јехова. Јекх пхен таро Макао со викинела пе Син Ји, вакерела: „Ако спорединеа о време со ка накхаве ле тле брачно партнереа ко рај, о време со ка накхаве ле акана коркори тано кратко. Уживин ко адава време хем шукар користин ле“. Ама со ако аракхљан некас со шај те овел тло брачно партнери хем почминѓен врска? Ки следно статија ка дикха сар шај те овел тут успешно врска ки колате со ка ане мудро одлука.