Ма одложин те крстине тут

1. Кола тане несаве шукар причине те крстине тут?

МАНГЕА ЛИ е Јехова е Девле, окова со денѓа тут секова шукар поклон, па чак хем о живото? Мангеа ли те сикаве леске кај мангеа ле? Најшукар начин те кере адава тано аѓаар со ка де ле лафи кај ка служине леске цело живото, а пало адава ка крстине тут. Аѓаар ка ове дело тари е Јеховаскири фамилија. А ако кереа адава, тло Дад хем амал ка водинел тут хем ка грижинел пе туке соске ту ка ове лескоро (Пс. 73:24; Иса. 43:1, 2). О завет хем о крстибе дена тут хем прилика те живине вечно (1. Пет. 3:21).

2. Со ка дикха ки акаја статија?

² Дали нешто чхинавела тут те крстине тут? Ако оја, на сиан о единствено. Милиоња јавера да ваљанѓе те керен промене ко пумаро начин сар понашинена пе хем сар размислинена те шај те пхерен о условија те крстинен пе. Акана ола ревно хем радосно служинена е Јеховаске. Со шај те сикљове таро несаве со крстинѓе пе ко прво веко? Те дикха саве предизвикија сине лен хем со шај те сикљова лендар.

О САМАРЈАЊА КРСТИНЃЕ ПЕ

3. Со шај чхинавела сине несаве Самарјанен те крстинен пе?

³ Ко време е Исусескоро, о Самарјања припадинена сине ки јекх религиозно група. Бут таро Самарјања живинена сине околу и диз Сихем хем ки Самарија, северно тари Јудеја. Англедер те крстинен пе, о Самарјања ваљанѓе шукар те џанен е Девлескоро Лафи. Ола прифатинена сине само о прва панџ лила — тари прво џи ки панџто Мојсеева — а веројатно хем о лил Исус Навин, сар лила таро Девел. Сепак, ола аџикерена сине те авел о Месија соске верујнена сине ко е Девлескоро ветување сој пишимо ки 5. Мојсеева 18:18, 19 (Јован 4:25). Те шај те крстинен пе, ваљанѓе те прифатинен е Исусе сар о ветимо Месија. Бут Самарјања керѓе баш адава (Јован 4:39). Јавера, шај ваљани сине те циден пестар о хор предрасуде со сине машкар о Самарјања хем о Евреија (Лука 9:52-54).

4. Спрема Апостолија 8:5, 6, 14, сар реагиринѓе несаве Самарјања кеда о Филип проповединѓа?

⁴ Со поможинѓа е Самарјаненге те крстинен пе? Кеда о проповеднико о Филип проповединѓа „башо Христос“, несаве Самарјања „прифатинѓе е Девлескоро лафи“. (Читин Апостолија 8:5, 6, 14.) Иако о Филип сине Евреи, ола сепак шунѓе ле. Шај сетинѓе пе ко стихија таро Пентатеух кола со сикавена сине кај о Девел нане пристрасно (5. Мој. 10:17-19). Бизи разлика сар сине, ола внимателно шунѓе адава со о Филип вакерела сине башо Христос хем халиле о јасна доказија кај е Филипе сине ле е Девлескири сила. Ов керела сине исто аѓаар бут чудија, сар на пример сасљарела сине насвален хем цидела сине е демонен таро мануша (Апо. 8:7).

5. Со шај те сикљове таро Самарјања?

⁵ Адала Самарјања шај сине те одбинен те сикљовен таро Филип адалеске со ов сине Евреи или адалеске со англедер ола на шунѓе башо адала сикљојба. Ама ола на мукхле адава те случинел пе. Откеда уверинѓе пе кај о Филип сикавѓа лен башо чачипе, о Самарјања на одложинѓе те крстинен пе. О библиско извештај вакерела: „Кеда о Филип вакерѓа ленге о шукар хабери башо е Девлескоро Царство хем башо анав е Исус Христосескоро, бут мурша хем џувља верујнѓе ле хем крстинѓе пе“ (Апо. 8:12). Дали сиан уверимо кај о чачипе аракхљола ко е Девлескоро Лафи? Дали сиан уверимо кај е Јеховаскере сведокија накхавѓе о предрасуде хем кај дена пестар са те шај те сикавен искрено мангипе јекх јекхеске — знако пало кова со пенџарѓовена о чачутне христијања? (Јован 13:35). Тегани ов одлучно те кере адава со ваљани хем ов уверимо кај о Јехова ка благословинел тут.

6. Сар шај те користинел туке е Рубенескоро пример?

⁶ О Рубен тари Германија, барило ки фамилија сој е Јеховаскере сведокија. Ама, сар терно ов сумнинела пе сине дали о Јехова постојнела. Сар успејнѓа те накхавел акала сумње? Ов халило кај на џанела доволно баши акаја тема хем адалеске одлучинѓа те керел нешто башо адава. Ов вакерѓа: „Ко мло лично проучибе ваљани сине те откринав сој точно, а со на. Мора сине некобор пути те проучинав баши еволуција“. Читинѓа о лил Постои ли Творец кој се грижи за тебе? Адава лил бут влијајнѓа упро Рубен. Тегани ов вакерѓа песке: „О Јехова чаче постојнела“. А кеда посетинѓа амаро главно седиште, о Рубен панда повише почминѓа те ценинел амари организација сој ко јекхипе. О Рубен иранѓа пе ки Германија хем ко 17 берш крстинѓа пе. Ако сумнинеа тут башо нешто со сиклиљан, истражин ко амаре публикацие. Шај те накхаве о сумње аѓаар со ка овел тут шукар пенџарибе (Еф. 4:13, 14). А кеда ка шуне искуствија башо мангипе хем јекхипе машкар е Јеховаскоро народо ко јавера делија таро свето, а ка приметине о исто хем ко тло собрание, са повише ка ценине амаро пхралипе сој ко цело свето.

О САВЛЕ ТАРО ТАРС КРСТИНЃА ПЕ

7. Кова размислување ваљани сине те менинел о Савле?

⁷ Размислин башо пример е Савлескоро таро Тарс. Ов шукар напредујнела сине ко Јудаизам хем овела сине са поважно машкар о Евреија (Гал. 1:13, 14; Фил. 3:5). Ко адава време, о Евреија дикхена сине ко христијања сар отпадникија хем адалеске о Савле бут прогонинела лен сине. Ов мислинела сине кај адалеа керела е Девлескири волја, иако адава сине погрешно (Апо. 8:3; 9:1, 2; 26:9-11). Те шај те прифатинел е Исусе хем те крстинел пе сар христијани, о Савле коркори ваљани сине те овел спремно те овел прогонимо.

8. а) Со поможинѓа е Савлеске те крстинел пе? б) Спрема Апостолија 22:12-16, сар о Ананија поможинѓа е Савлеске? (Дикх хем и слика.)

⁸ Со поможинѓа е Савлеске те крстинел пе? Кеда о Господари о Исус појавинѓе пе е Савлеске, ов королило (Апо. 9:3-9). Трин диве ни хаља ни пиља хем сигурно размислинела сине башо адава со случинѓа пе леске. О Савле уверинѓа пе кај о Исус тано о Месија хем кај лескере следбеникон иси лен и чачутни религија. Е Савлеске сигурно сине бут пхаро со поддржинѓа е Стефанескоро мударибе (Апо. 22:20). Ко крајо таро адала трин диве, јекх ученико со викинела пе сине Ананија, љубезно керѓа лафи е Савлеа, керѓа палем те дикхел хем поттикнинѓа ле одма те крстинел пе. (Читин Апостолија 22:12-16.) О Савле понизно прифатинѓа и помош хем почминѓа нево живото (Апо. 9:17, 18).

9. Со шај те сикљове таро Савле?

⁹ Бут шај те сикљова таро пример е Савлескоро. Ов шај сине те мукхел и гордост или и дар таро мануш те чхинавел ле те крстинел пе. Ама на мукхља те случинел пе адава. Кеда прифатинѓа о чачипе башо Христос, о Савле понизно керѓа промене ко пло живото (Апо. 26:14, 19). Ов сине спремно те овел христијани иако џанља кај ка овел прогонимо (Апо. 9:15, 16; 20:22, 23). Откеда крстинѓа пе, ов понадари да родела сине помош таро Јехова те шај те истрајнел ко бут неволје (2. Кор. 4:7-10). Кеда ка крстине тут сар е Јеховаскоро сведоко, шај ка овен тут испитија баши тли вера или неволје, ама нане те ове коркори. Шај те ове уверимо кај о Девел хем о Христос секогаш ка овен туја (Фил. 4:13).

10. Сар шај те користинел туке о пример е Анакоро?

¹⁰ И Ана барили ки јекх курдистанско фамилија ки источно Европа. Откеда и дај лакири крстинѓа пе, о дад лакоро дозволинѓа лаке те почминел те проучинел, тегани сине ла ења берш. Ама, адава анѓа џи ко проблемија лакере фамилијаја кола со живинена сине заедно. Лакере фамилијаке сине бари лаџ некој те мукхел и религија ки која со бијандили. Кеда сине ла 12 берш, и Ана пучља пе даде дали шај те крстинел пе. Ов мангља те џанел дали ој коркори мангела адава, или некој јавер чхивела ла. Ој вакерѓа леске: „Ме мангава е Јехова“. О дад лакоро дозволинѓа лаке те крстинел пе. Откеда крстинѓа пе, лакири фамилија понадари да понашинела пе сине лаја лошно. Јекх лендар чак вакерѓа лаке: „Пошукар ка овел сине те живине неморално хем те пушине, него те ове е Јеховаскоро сведоко“. Сар и Ана иклили ко крајо адале проблемеа? Ој вакерѓа: „О Јехова поможинѓа манге те овав зорали. А исто ми дај хем мо дад бут поддржинѓе ман“. И Ана пишинела о прилике кеда осетинела е Јеховаскоро вас ко пло живото. Понекогаш читинела адава со пишинѓа те шај те на бистрел сар о Јехова поможинѓа лаке. Ако дараја таро противибе, ма бистре кај о Јехова ка поможинел туке да (Евр. 13:6).

О КОРНЕЛИЈ КРСТИНЃА ПЕ

11. Соске о Корнелиј шај сине те мислинел пе дали те крстинел пе?

¹¹ Ки Библија тано пишимо о пример е Корнелијаскоро. Ов сине командири кова со управинела сине 100 римско војниконцар (Апо. 10:1, фус.). Адалеске, ов шај сине важно машкар о мануша хем ки војска. Баши лесте и Библија вакерела: „Ов керела сине бут шукар буќа е чороле манушенге“ (Апо. 10:2). О Јехова бичхалѓа е апостол Петаре те вакерел леске о шукар хабери. Дали баши пли положба со сине ле, мислинела пе сине дали те крстинел пе?

12. Со поможинѓа е Корнелијаске те крстинел пе?

¹² Со поможинѓа е Корнелијаске те крстинел пе? Ки Библија баши лесте пишинела: „Дарала сине таро Девел хем обожавинела ле сине цело пле фамилијаја... Хем стално таро вило молинела пе сине е Девлеске“ (Апо. 10:2). Кеда о Петар објавинѓа ленге о шукар хабери, о Корнелиј хем лескири фамилија прифатинѓе е Христосе хем одма крстинѓе пе (Апо. 10:47, 48). Сигурно о Корнелиј сине спремно те керел секоја промена со ваљани сине те шај те обожавинел е Јехова заедно пле фамилијаја (Ис. Нав. 24:15; Апо. 10:24, 33).

13. Со шај те сикљове таро Корнелиј?

¹³ Исто сар о Савле, о Корнелиј да шај сине те мукхел лескири положба те чхинавел ле те овел христијани. Ама на мукхља те случинел пе адава. Дали ваљани те кере баре промене ко тло живото те шај те прифатине о чачипе? Ако оја, о Јехова ка поможинел тут. Ов ка благословинел тли одлучност те служине леске спрема о библиска начелија.

14. Сар шај те користинел туке о пример е пхралескоро Цујоши?

¹⁴ О Цујоши тари Јапонија ваљанѓа те керел промене ки пли бути те шај те пхерел о условија крстибаске. Ов сине помошнико е директорескоро ки школа Икенобо, коте со сикљола пе сине сар те местинен пе лулуѓа. Кеда о директори нашти сине те џал ко погребија, о Цујоши бут пути заменинела ле сине ко будистичка ритуалија. Ама кеда о Цујоши дознајнѓа о чачипе башо муле, адава со присуствујнела сине ко адала ритуалија чхинавела ле сине те крстинел пе. Ов одлучинѓа повише те на учествујнел ки ленде (2. Кор. 6:15, 16). О Цујоши керѓа лафи пе директореа. Саво сине о резултати? Ов шај сине те ачхол ки бути бизо те учествујнел ко адала ритуалија. Јекх берш откеда почминѓа те проучинел и Библија, ов крстинѓа пе.a Ако ваљани те кере промене ки тли бути те шај те угодине е Девлеске, ов уверимо кај ов ка дел тут адава со ваљани туке хем тле фамилијаке (Пс. 127:2; Мат. 6:33).

О КОРИНЌАЊА КРСТИНЃЕ ПЕ

15. Со чхинавела сине е Коринќанен те крстинен пе?

¹⁵ О мануша со живинена сине ко пурано Коринт, сине пенџарде сар материјалистија хем неморална. Бут џене керена сине буќа со о Девел на мангела сине. Адалеске, бут сине пхаро е манушенге со живинена сине ки асавки околина те почминен те служинен е Девлеске. Сепак, кеда о апостол Павле ало ки адаја диз хем проповединѓа о шукар хабери башо Христос, „бут Коринќања кола со шунѓе... верујнѓе хем крстинѓе пе“ (Апо. 18:7-11). Пало адава, о Господари о Исус Христос, појавинѓа пе е Павлеске ки визија хем вакерѓа: „Ки акаја диз иси панда бут мануша со ка верујнен ки манде“. Аѓаар, о Павле понадари да проповединѓа адари берш текваш.

16. Со поможинѓа несавенге ко Коринт те мукхен о буќа со чхинавена лен сине те крстинен пе? (2. Коринќања 10:4, 5).

¹⁶ Со поможинѓа е Коринќаненге те крстинен пе? (Читин 2. Коринќања 10:4, 5.) Е Девлескоро Лафи хем е Девлескири моќно сила, поможинѓа ленге те керен баре промене ко пумаро живото (Евр. 4:12). Окола ко Коринт со прифатинѓе о шукар хабери башо Христос, успејнѓе те циден пестар о постапке хем о навике сар сој о маќојбе, о чорибе хем и хомосексуалност (1. Кор. 6:9-11).b

17. Со шај те сикљове таро Коринќања?

¹⁷ Иако несаве ко Коринт ваљанѓе те циден пестар навике кола со мукхле хор коренија ки ленде, ола на мислинѓе кај ка овел ленге бут пхаро те овен христијања. Ола денѓе пестар са те шај те почминен те пхирен ко тесно друмо кова со ингарела ко вечно живото (Мат. 7:13, 14). Дали туке пхаро корендан те циде тутар несави лошно навика или те чхинаве те кере нешто сој тано погрешно те шај те крстине тут? Никогаш ма откажин тут! Молин е Јехова те дел тут пли сила која со ка поможинел туке те борине тут против и желба те кере адава сој погрешно.

18. Сар шај те користинел туке о пример е Моникакоро?

¹⁸ И Моника тари Грузија, бут трудинѓа пе те чхинавел те користинел непристојна хем груба лафија хем те отфрлинел и неприкладно забава те шај те крстинел пе. Ој вакерела: „Џикоте сиум сине тинејџерка, и молитва денѓа ман сила. О Јехова џанља кај мангава те керав адава сој исправно хем секогаш поможинела сине манге хем водинела ман“. И Моника крстинѓа пе ко 16 берш. Дали ваљани те чхинаве несаве постапкенцар те шај те служине е Јеховаске ко начин со прифатинела ле? Понадари да роде лестар сила те кере промене. О Јехова дарежливо дела тари пли сила (Јован 3:34).

ТЛИ ВЕРА ШАЈ ТЕ ПРЕМЕСТИНЕЛ ПЛАНИНЕ

19. Со шај те поможинел туке те накхаве пречке баре сар планина? (Дикх хем и слика.)

¹⁹ Ов сигурно кај о Јехова мангела тут хем мангела те ове дело тари лескири фамилија. Адава тано аѓаар бизи разлика кола буќа чхинавена тут те крстине тут. Јекхе група пле учениконге, о Исус вакерѓа: „Ако тумари вера тани бари само кобор јекх зрно таро синап, ка вакерен акале планинаке: ’Преместин тут акатар адари‘, хем ој ка преместинел пе. Хем тумен ка шај са те керен“ (Мат. 17:20). Окола со шунѓе акава, сине е Исусеа само некобор берш хем ленгири вера панда бајрола сине. Ама о Исус уверинѓа лен кај ако бајрарена пумари вера, о Јехова ка поможинел ленге те накхавен пречке баре сар планине. Адалеске со о Јехова ка поможинел тут, ту да шај те кере о исто!

20. Ко со поттикнинѓе тут о примерија таро пурано време хем таро амаро време сој спомниме ки акаја статија?

²⁰ Ако дикхеа кола буќа чхинавена тут те крстине тут, одма кер нешто те шај те циде лен. О примерија е христијаненгере таро пурано време хем таро амаро време шај те ден тут утеха хем сила. Ленгоро пример нека охрабринел тут хем нека поттикнинел тут те де лафи е Јеховаске кај ка служине леске цело живото хем те крстине тут. Адаја тани и најшукар одлука со шај те ане ла!