Поуке таро пророштво со вакерѓа ле о Јаков англедер те мерел —дујто дело

1. Со ка дикха ки акаја статија?

Е ЈАКОВЕСКЕРЕ чхаве кхединѓе пе узи лесте хем шукар шунена сине џикоте ленгоро пхуро дад благословинела сине секоле јекхе лендар. Ки англуни статија дикхлем кај о Рувим, о Симеон, о Леви хем о Јуда бут изненадинѓе пе таро лафија пле дадескере. Адалеске, ола сигурно пучена пе сине со ка вакерел о Јаков околе офто чхавенге да. Те дикха со шај те сикљова таро адава со о Јаков вакерѓа е Завулонеске, е Исахареске, е Данеске, е Гадеске, е Асереске, е Нефталимеске, е Јосифеске хем е Бенјаминеске.a

О ЗАВУЛОН

2. Со вакерѓа о Јаков е Завулонеске, хем сар исполнинѓе пе адала лафија? (1. Мојсеева 49:13; дикх хем и рамка.)

² Читин 1. Мојсеева 49:13. О Јаков вакерѓа кај о чхаве е Завулонескере ка живинен узо море, ко северно дело тари Ветими пхув. Повише таро 200 берша покасно, о племе Завулон добинѓа дело тари пхув кова со аракхљола сине машкар о Галилејско хем о Средоземно Море. Иако ленгоро дело на икљола сине директно ко море, сепак сине паше узи лесте. О Мојсеј пророкујнѓа: „Радујн тут Завулон ко тле патујба“ (5. Мој. 33:18). Акалеа шај мислинела пе сине ко адава кај о племе Завулон локхе шај сине те ресел ко солдуј морија коте со шај сине те керел трговија адалеске со адатхе авена сине мануша таро разна тхана. Било сар те овел сине, е Завулонескере племе сине ле причина те овел среќно.

3. Со ка поможинел амен те ова задоволна?

³ Со шај те сикљова? Секогаш иси амен причина те ова радосна бизи разлика кај живинаја или саве тане амаре околностија. Те шај те ачхова радосна мора те ова задоволна адалеа со иси амен (Пс. 16:6; 24:5). Понекогаш аменге шај полокхо те концентририна амен ко адава со нане амен наместо ко шукар буќа со иси амен. Адалеске, те трудина амен те дикха о позитивна буќа ко амаре околностија (Гал. 6:4).

О ИСАХАР

4. Со вакерѓа о Јаков е Исахареске, хем сар исполнинѓе пе адала лафија? (1. Мојсеева 49:14, 15; дикх хем и рамка.)

⁴ Читин 1. Мојсеева 49:14, 15. О Јаков фалинѓа е Исахаре адалеске со сине буќарно хем ки позитивно смисла спорединѓа ле хереа коле со иси ле зорале кокала — животно кова со шај те пхиравел пхарипе. О Јаков исто аѓаар вакерѓа е Исахареске кај ка овел ле шукар пхув. Спрема о лафија е Јаковескере, о потомција е Исахарескере добинѓе плодно пхув узи река Јордан (Ис. Нав. 19:22). Сигурно ола керѓе бут бути те шај те обработинен пли пхув, ама ола исто аѓаар бут трудинѓе пе те поможинен е јаверенге (1. Цар. 4:7, 17). На пример, кеда о судија о Варак хем и пророчица и Девора родинѓе помош таро Израелција те шај те боринен пе против о Сисара, о племе Исахарескоро сине јекх таро племија кола со нудинѓе пе те поможинен. А сине спремна те боринен пе ко јавера да прилике (Суд. 5:15).

5. Сар шај те џа пало пример е Исахарескере потомцонгоро, хем соске?

⁵ Со шај те сикљова? О Јехова ценинела о трудо со даја ки служба баши лесте исто сар со ценинѓа о трудо е племескоро Исахар (Проп. 2:24). На пример, размислин башо старешине кола со бут трудинена пе те шај те грижинен пе башо собрание (1. Тим. 3:1). Ола на учествујнена ко дословна борбе, ама мора напорно те керен бути те шај те заштитинен е Девлескере народо таро духовна опасностија (1. Кор. 5:1, 5; Јуда 17-23). Исто аѓаар, ола бут трудинена пе те шај те спреминен хем те икерен охрабрувачка говорија те шај те керен позорало о собрание (1. Тим. 5:17).

О ДАН

6. Сави задача добинѓа о племе Дан? (1. Мојсеева 49:17, 18; дикх хем и рамка.)

⁶ Читин 1. Мојсеева 49:17, 18. О Јаков башо Дан вакерела кај тано сар сап кова со нападинела побаре животнен, сар на пример грасте кова со користинела пе борбаке. О Дан сине опасност е Израелцонгере душманенге. Џикоте о Израелција патујнена сине џи ки Ветими пхув, о племе таро Дан сине ленге „сар заштитно стража“ (4. Мој. 10:25). Адаја сине важно задача иако о јавера Израелција нашти сине те дикхен са со керѓа ленге о племе Дан.

7. Со ваљани те овел амен ки годи баши било која задача со кераја ла ки служба башо Јехова?

⁷ Со шај те сикљова? Дали некогаш керѓан несави задача баши која со мислинеа кај никој на приметинѓа адава? Шај поможинѓан ко чистибе хем одржибе и дворана, шај сиан сине доброволцо ко несаво конгрес или керѓан несави јавер задача. Ако тано аѓаар, ту сиан баши пофалба! Никогаш ма бистре кај о Јехова приметинела хем ценинела са со кереа баши леске. Ов посебно ценинела кеда служинеа леске на адалеске со мангеа о јавера те фалинен тут, него адалеске со мангеа те сикаве леске искрено мангипе (Мат. 6:1-4).

О ГАД

8. Соске о племе Гад шај сине локхесте те овел нападимо таро душмања? (1. Мојсеева 49:19; дикх хем и рамка.)

⁸ Читин 1. Мојсеева 49:19. О Јаков пророкујнѓа кај о Гад ка овел нападимо таро чора. Повише таро 200 берша покасно, о племе Гад наслединѓа и пхув источно тари река Јордан која со сине паше узо народија кола со сине ленге душмања. Адалеске, е племе Гад бут локхесте шај сине те нападинен о душмања. Сепак, о племе Гад мангља те живинел ки адаја пхув адалеске со адатхе сине бут шуже ливаде баши лескири стока (4. Мој. 32:1, 5). Јасно тано кај о мануша таро племе Гад сине храбра мануша. Сој тано панда поважно, лен сине лен доверба кај о Јехова ка поможинел лен те аракхен и пхув со денѓа ла ленге таро било кова душмани со ка нападинел лен. Ола чак бершенцар бичхалена сине пле војникон те поможинен е јавере племенге те шај џи ко крајо те освојнен и Ветими пхув, западно тари река Јордан (4. Мој. 32:16-19). Лен сине лен доверба кај о Јехова ка аракхел е џувлен хем е чхавен џикоте о мурша тане ки борба. О Јехова благословинѓа лен баши ленгири храброст хем самопожртвуваност (Ис. Нав. 22:1-4).

9. Сар амари доверба ко Јехова ка влијајнел упро амаре одлуке?

⁹ Со шај те сикљова? Те шај те служина е Јеховаске ко пхаре да ситуацие, мора понадари да те овел амен доверба ки лесте (Пс. 37:3). Бут џене авдиве сикавена кај иси лен доверба ко Јехова адалеа со спремно керена жртве те шај те учествујнен ко градибе теократска објектија, те служинен адари коте со иси побари потреба или те шај те поможинен ки е Јеховаскири организација ко јавера начинија. Ола керена адава соске тане увериме кај о Јехова секогаш ка грижинел пе баши ленде (Пс. 23:1).

О АСЕР

10. Сави прилика нашавѓа о племе Асер? (1. Мојсеева 49:20; дикх хем и рамка.)

¹⁰ Читин 1. Мојсеева 49:20. О Јаков пророкујнѓа кај о племе Асер ка овел барвало хем адава чаче исполнинѓа пе. Акава племе наслединѓа несаве таро најплодна делија ко цело Израел (5. Мој. 33:24). Лескири пхув сине одма узо Средоземно Море хем адатхе сине о Сидон кова со сине барвало феникиско трговско пристаниште. Ама о племе Асер на бркинѓа е Ханаанцон тари адаја пхув (Суд. 1:31, 32). Изгледа кај о племе Асер нашавѓа пли ревност башо чисто обожавибе адалеске со сине ле барвалипе, ама хем со сине ле лошно влијание таро Ханаанција. На пример, кеда о судија о Варак родинѓа помош таро Израелција те шај те боринел пе против и Ханаанско војска, о племе Асер на нудинѓа пе те поможинел. Адалеске, акава племе нашавѓа и прилика те учествујнел ки победа со о Јехова чудоја денѓа е Израелцонге „ко пања ко Мегидо“ (Суд. 5:19-21). О племе Асер веројатно лаџандило кеда шунѓа и победничко гили со гиљавѓе ла о Варак хем и Девора, ки која со сине о стихо: „О Асер бешела сине узо море хем ништо на керела сине“ (Суд. 5:17).

11. Соске ваљани урамнотежено те дикха ко материјална буќа?

¹¹ Со шај те сикљова? Амен мангаја те да амаро најшукар е Јеховаске. Те шај те кера адава, ваљани те пазина те на ова сар о мануша таро акава свето кола со мислинена кај о паре хем адава со шај те кинен е паренцар тано најважно нешто ко живото (Изр. 18:11). Амен трудинаја амен те дикха урамнотежено ко паре (Проп. 7:12; Евр. 13:5). На мангаја ништо те чхинавел амен те кера амари служба башо Девел. Адалеске, на трошинаја амаро време хем амари сила те шај те кхеда материјална буќа кола со уствари на ваљанена аменге чаче. Наместо адава, трудинаја амен те да амаро најшукар е Јеховаске соске џанаја кај ки иднина аџикерела амен чаче сигурно хем удобно живото (Пс. 4:8).

О НЕФТАЛИМ

12. Сар шај исполнинѓе пе о лафија е Јаковескере со вакерѓа лен башо Нефталим? (1. Мојсеева 49:21; дикх хем и рамка.)

¹² Читин 1. Мојсеева 49:21. О Јаков вакерѓа кај о Нефталим ка вакерел „шуже лафија“. Акава шај мислинела пе ко начин сар о Исус керела сине лафи џикоте керѓа пли служба ки пхув. О Исус, кова со сине пенџардо пало адава кај шукар сикавела е јаверен, селинѓа пе ко Капернаум, подрачје ко Нефталим (Мат. 4:13; 9:1; Јован 7:46). Поврзимо е Исусеа, о Исаија пророкујнѓа кај о мануша таро племе Завулон хем Нефталим ка дикхен „бари светлина“ (Иса. 9:1, 2). Башо начин сар сикавела сине, о Исус сине „чачутни светлина, со светинела упро са о мануша“ (Јован 1:9).

13. Сар шај те радујна е Јехова амаре лафенцар?

¹³ Со шај те сикљова? Е Јеховаске тано важно со вакераја хем сар вакераја адава. Ко саво начин шај те вакера „шуже лафија“ коленцар со ка радујна е Јехова? Јекх начин тано аѓаар со ка вакера о чачипе (Пс. 15:1, 2). Освен адава, шај те охрабрина е јаверен амаре лафенцар аѓаар со ка трудина амен те фалина лен наместо те критикујна лен хем те жалина амен (Еф. 4:29). Исто аѓаар, шај те чхива аменге цел пошукар те почмина разговорија кола со ка анен џи ко адава те сведочина.

О ЈОСИФ

14. Сар исполнинѓа пе о пророштво башо Јосиф? (1. Мојсеева 49:22, 26; дикх хем и рамка.)

¹⁴ Читин 1. Мојсеева 49:22, 26. О Јаков сигурно дичинела пе сине е Јосифеа. Ов сине „биримо машкар лескере пхраља“ хем о Јехова користинѓа ле ко посебно начин. О Јаков баши лесте вакерѓа кај тано „гранка таро плодно каш“. О каш сине о Јаков, а о Јосиф сине лескири гранка. О Јосиф сине о првобијамо чхаво е Јаковескоро тари лескири мангли ромни и Рахела, а о Рувим сине о првобијамо чхаво е Јаковескоро тари лескири ромни и Лија. Ама адалеске со о Рувим нашавѓа о право сар првобијамо, о Јаков пророкујнѓа кај о Јосиф ка добинел о дупло дело таро лескоро наследство (1. Мој. 48:5, 6; 1. Лет. 5:1, 2). Акава дело таро пророштво исполнинѓа пе кеда таро Ефрем хем таро Манасија, о дуј чхаве е Јосифескере, уле дуј племија ко Израел кола со наслединѓе пли пхув (1. Мој. 49:25; Ис. Нав. 14:4).

15. Сар реагиринѓа о Јосиф ко неправде со сине ле?

¹⁵ Исто аѓаар, о Јаков башо Јосиф вакерѓа: „Стрелаџие стрелинѓе ле хем мрзинѓе ле“ (1. Мој. 49:23). Адала стрелаџие сине лескере љубоморна пхраља кола со сине крива башо бут неправде со доживинѓа лен. Сепак, о Јосиф на мрзинѓа пле пхрален хем на кривинѓа е Јехова башо адава со случинѓа пе. Баши лесте о Јаков вакерѓа: „Лескири стрелка сине зорали, лескере васта сине силна“ (1. Мој. 49:24). Џикоте накхела сине таро пхаре ситуацие, е Јосифе сине ле доверба ко Јехова хем на само со простинѓа пле пхраленге него хем постапинѓа ленцар љубезно (1. Мој. 47:11, 12). О Јосиф дозволинѓа о неволје со сине ле те чистинен ле, јавере лафенцар те поможинен ле те овел пошукар мануш (Пс. 105:17-19). Адалеске, о Јехова шај сине те користинел ле ко јекх посебно начин.

16. Сар шај те џа пало пример е Јосифескоро кеда иси амен неволје?

¹⁶ Со шај те сикљова? Никогаш те на мукха о неволје те циден амен таро Јехова хем таро амаре пхраља хем пхења. Ма бистре кај кеда амари вера тани испитими, о Јехова шај те обликујнел амен (Евр. 12:7). Ов шај те поможинел амен те развина или панда повише те сикава о христијанска особине сар сој милост хем простибе (Евр. 12:11). Шај те ова сигурна кај о Јехова ка наградинел амен баши амари истрајност исто сар со наградинѓа е Јосифе.

О БЕНЈАМИН

17. Сар исполнинѓа пе о пророштво башо Бенјамин? (1. Мојсеева 49:27; дикх хем и рамка.)

¹⁷ Читин 1. Мојсеева 49:27. О Јаков пророкујнѓа кај о племе Бенјамин ка овел ле бут баре воена вештине „сар рув“ (Суд. 20:15, 16; 1. Лет. 12:2). „Сабајле“, јавере лафенцар кеда ко Израел почминѓе те владинен царија, таро племе Бенјамин иклило о прво цари ко Израел, о Саул. Ов бизи дар боринѓа пе е Филистејцонцар (1. Сам. 9:15-17, 21). „Раќате“, јавере лафенцар кеда е Израелцон на сине лен више цари, и Естира хем о Мардохеј, кола со сине таро племе Бенјамин, поможинѓе те на овен уништиме о Израелција ко Персиско Царство (Ест. 2:5-7; 8:3; 10:3).

18. Сар шај те ова верна исто сар о племе Бенјамин?

¹⁸ Со шај те сикљова? О мануша таро племе Бенјамин сигурно дичинѓе пе е Саулеа кеда уло цари соске сине таро ленгоро племе. Ама, покасно, о Јехова чхивѓа сар цари е Давиде, кова со сине таро племе е Јудаскоро. Сепак, о мануша таро племе Бенјамин ко крајо поддржинѓе адаја промена (2. Сам. 3:17-19). Бершенцар покасно, кеда деш таро племија бунинѓе пе, о племе Бенјамин верно поддржинѓа о племе Јуда хем е царе коле со о Јехова чхивѓа ле (1. Цар. 11:31, 32; 12:19, 21). Амен да шај те џа пало ленгоро пример аѓаар со верно ка поддржина околен со о Јехова чхивела лен те шај те водинел лескере народо авдиве (1. Сол. 5:12).

19. Сар користинела аменге о пророштво со вакерѓа ле о Јаков англедер те мерел?

¹⁹ О пророштво со вакерѓа ле о Јаков англедер те мерел шај бут те користинел аменге. Адава со дикхлем сар исполнинѓа пе лескоро пророштво керела позорали амари вера кај ка исполнинен пе јавера да пророштвија таро е Јеховаскоро Лафи. А адава со дикхлем сар сине благословиме о чхаве е Јаковескере поможинела амен пошукар те хаљова сар шај те радујна е Јехова.