Дали иси стабилно влада со шај те владинел е светоја? — Со вакерела и Библија?

Ко владе ко цело свето случинена пе буќа со вознемиринена е манушен. Чак ко пхувја коленде со изглединена кај о владе тане стабилна, о политичарија керена буќа со анена лаџ, иси изборија коте со иси бут тикни разлика ко гласија, политичка поделбе хем граѓанска немирија.

И Библија вакерела кај иси јекх влада која сој тани стабилно. Шај више англедер шунѓан баши акаја влада. Ла о Исус Христос спомнинѓа ла ки пли најпенџарди молитва.

• „А тумен молинен тумен аѓаар: ’Амаро Дад со сиан ко небо, те фалинел пе тло свето анав. Те авел тло Царство. Те овел тли волја, сар ко небо аѓаар ки пхув да“ (Матеј 6:9, 10).

Со вакерела и Библија башо адава Царство?

О Царство тано стабилно влада

О Царство владинела таро небо.

• О Исус баши акаја влада вакерѓа кај тано „небесно Царство“ (Матеј 4:17; 5:3, 10, 19, 20). Адалеске ов вакерѓа: „Мло Царство нане дело таро акава свето“ (Јован 18:36).

О Царство ка владинел ко тхан е манушикане владенге.

• И Библија вакерела: „Адава Царство... ка уништинел хем ка чхинавел са о [манушикане] царствија, а коркори ов ка ачховел засекогаш“ (Даниел 2:44).

О Царство, колесте со о Исус Христос тано Цари, никогаш нане те овел уништимо.

• И Библија вакерела: „Лескири власт тани вечно, која со никогаш нане те накхел, хем лескоро царство никогаш нане те овел уништимо“ (Даниел 7:13, 14).

О Царство ка анел мир хем сигурност ки пхув.

• И Библија вакерела: „Секова јекх ка бешел тели пли дракх хем тели пли смоква хем никој нане те даравкерел лен“ (Михеј 4:4).

Сикљов повише башо Царство

Кеда о Исус сине ки пхув, ов бут време накхавѓа ко проповедибе „о шукар хабери башо Царство“ (Матеј 9:35). Ов исто аѓаар пророкујнѓа:

• „Акава шукар хабери башо Царство ка проповединел пе ко цело свето, те шај о мануша таро са о народија те шунен ле, хем тегани ка авел о крајо“ (Матеј 24:14).

Авдиве, о шукар хабери башо Царство вакерела пе ко повише таро 240 пхувја. Поттикнинаја тут повише те дознајне баши акаја влада хем сар користинела туке лакоро владибе.

Молинаја тут дикх о видеоклипи Сој е Девлескоро Царство?